उत्पत्ति 4
4
कयिन नेरो हाबिल
1आदम ह्रोंसए प्ह्रेंस्योने बालु तइ, धै हब्बाइ प्हसे नोसि कयिन फिइ, धै बिइ, “याहवेहजी ल्होमिंसि ङइ च्ह घ्रि फिइ।” 2चइ धबै कयिनए अलि हाबिल फिइ। हाबिल क्यु छैं तइ, कयिन बिस्याँ म्रोंर के लब तइ। 3दे त्हे लिउँइँ कयिनइ म्रोंर रोबै सैमैंउँइँले च्हौदे भेटि याहवेहए ङाँर पखइ। 4दिलेया हाबिलइ ह्रोंसए क्युए बगालउँइँले ओंसों फिबै छोबै क्यु भेटि पखइ। छतमा याहवेह हाबिल नेरो चए भेटि म्रोंसि सैं तोंइ।#हिब्रू ११:४ 5दिलेया कयिन नेरो चए भेटि म्रोंसि सैं आतों। छतमा कयिन बेल्ले ह्रिस खसि ङ्हो छु लइ।
6छतमा याहवेहजी कयिनने बिइ, “क्हि तले ह्रिस खल? क्हिए ङ्हो तले छु लल? 7क्हिइ छ्याँबै भेटि पखस्याँ ङ क्हि म्रोंसि सैं आतोंमल् वा? क्हिइ छ्याँब के आलस्याँ पाप क्हिए म्रार्न क्हुइ टिरिम्। चइ क्हिए फिर क्ल्हे तल् म्हैम्, दिलेया क्हि चए फिर क्ल्हे तल् त्हुम्।”
8कयिनइ ह्रोंसए अलि हाबिलने “खो, ङ्यो बैरु म्रोंर ह्याले,” बिइ। झाइले चमैं म्रोंर ह्यामा कयिनइ ह्रोंसए अलि हाबिल सैवाइ।#मत्ती २३:३५; लूक ११:५१; १ यूह ३:१२
9छतमा याहवेहजी कयिनने “क्हिए अलि हाबिल खनिर मुँ?” बिसि ङ्योएमा चइ बिइ, “तुसि! ङइ आसे। ङ ङए अलिए प्ह्रोंछैं वा?”
10याहवेहजी बिइ, “क्हिइ छाबै आछ्याँबै के तले लल? क्हिए अलिए कोइ सउँइँले ङने ग्वार ह्रिरिइमुँ।#हिब्रू १२:२४ 11क्हिइ सराप योंइमुँ। तारे क्हिइ सर खेति लल् योंरिब आरे। क्हिइ अलि सैवामा सइ सुँ फैइ। क्हिए अलिए कोइ स प्हाँइमुँ। 12तारेसेरो क्हिइ सर खेति लमा सइ क्हिए ल्हागिर रोमैं तोइ पिंरिब आरे। क्हि पृथ्बीर खोंयोंन् बिलै छिं ङ्हाँन् आयोंन्ले स्युररिल् त्हुब्मुँ।”
13कयिनइ याहवेहने बिइ, “ङइ सैदिल् आखाँबै दण्ड ङलाइ तइ। 14तिंयाँ क्हिजी चु क्ल्ह्योउँइँले ङलाइ तेवासिन् मुँ, धै ङ क्हिउँइँले लोल् त्हुब्मुँ। ङ पृथ्बीरि छिं ङ्हाँन् आयोंन्ले स्युररिल् त्हुब्मुँ, छतसि ङलाइ स्याब्मैंइ ङ सैवाब्मुँ।”
15छबिमा याहवेहजी चने बिइ, “छ आङिं! खाबइ कयिन सैमुँ चने बालु ङि गुणा खी किंब्मुँ।” छतसि कयिन स्याब्मैं खाबज्यै आसैरिगे बिसि याहवेहजी चए ज्युर चिनु घ्रि लमिंइ। 16झाइले कयिन याहवेहउँइँले त्होंसि अदनए स्यारउँइँ मुँबै नोद#4:16 नोद हिब्रू क्युइर “नोद” ए अर्थ “स्युररिब” ग। बिबै ह्युलर टिबर होंइ।
कयिनए प्हसेमैं
17कयिन ह्रोंसए प्ह्रेंस्योने बालु तसि चए प्ह्रेंस्योइ प्हसे नोइ, धै हनोक बिबै च्ह फिइ। कयिनइ सहर घ्रि बनेसि ह्रोंसए च्हए मिं हनोक च सहरए मिंर्न थेंइ। 18झाइले हनोकउँइँले ईराद बिबै च्ह योंइ। ईरादउँइँले महूयाएल बिबै च्ह योंइ। महूयाएलउँइँले मतूशाएल बिबै च्ह योंइ। मतूशाएलउँइँले लेमेख बिबै च्ह योंइ।
19लेमेखइ प्ह्रेंस्यो ङ्हिं पखइ। थेब्स्योए मिं आदा, च्योंब्स्योए मिं सिल्ला मुँल। 20आदाइ याबाल बिबै च्ह फिइ। तम्बुर टिब्मैंए नेरो खेदो न्हब्मैंए खे च मुँल। 21चए अलिए मिं यूबाल मुँल। च बिस्याँ बीणा नेरो मुरलि ह्राब्मैंए खे मुँल। 22सिल्ला बिबै च्योंब्स्योइ तूबलकयिन बिबै च्ह फिइ। चइ ताँन् खालर्बै काँस नेरो पैए हातियारमैं बनेमल। तूबलकयिनए अङाँ नामा बिब् मुँल।
23लेमेखइ ह्रोंसए प्ह्रेंस्योमैंने बिइ,
“ओ आदा नेरो सिल्ला, ङए ताँ थेद्।
ओ लेमेखए प्ह्रेंस्योमैं, ङइ बिबै ताँमैं छेनाले थेद्।
तलेबिस्याँ ङलाइ नल् लबै म्हि ङइ सैवाइमुँ,
ङलाइ प्रिंसि आधाकल्सो लबै फ्रेंसि या ङइ सैवाइमुँ।
24कयिनलाइ सैब्मैंल म्हि ङि सिल् त्हुब्मुँ बिस्याँ,
लेमेखलाइ सैब्मैंल झन् ङिच्युसे ङि म्हि सिल् त्हुब्मुँ।”
शेत नेरो एनोश
25धबै आदम ह्रोंसए प्ह्रेंस्योने बालु तसि चए प्ह्रेंस्योइ च्ह फिइ। “कयिनइ सैवाबै हाबिलए साटोरि परमेश्वरजी ङलाइ कोलो घ्रि पिंइमुँ।” बिसि हब्बाइ चए मिं शेत#4:25 शेत हिब्रू क्युइरि चु मिंए अर्थ “पिंइमुँ” ग। थेंइ। 26शेतलै या च्ह घ्रि तइ, चए मिं एनोश थेंमिंइ। च त्हेउँइँले म्हिमैंइ याहवेहए मिं किंबर होंइ।
Nu geselecteerd:
उत्पत्ति 4: GCMB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2020, Wycliffe Bible Translators, Inc. All rights reserved.
