1 Samuel 7
7
1Qama'le jogaa'me jiyaĝa'u jo'ne 'lachaqa't di'me Quiriat-jearim dajotegue qama'le yachi'y jaga'me lae't daa'me lamajoĝonaĝaco ñe'me Jaliaĝanec, qama'le yanedaue ga'me 'lemec ñe'me Abinadab, jo'ne na'ña ga'me comadetelegue. Yem qama'le 'yadelegue ñe'me mach'e c'oĝot Eleazar qaedi nach'eñe netela.
Samuel mach'e lajoĝola' gaa'me Israel lec'oqo'tepi
2Yenoĝodegue gaa'me veinte 'uoidi chiyoqochi'ña ca'li qoyana'ña jaga'me lae't daa'me namajoĝonaĝaco di'me Quiriat-jearim, qama'le ena'uaque gaa'me Israel lec'oqo'tepi degueja da'me lelnataĝa'j yelotedaque ñe'me jaliaĝanec.
3Chane'eja jouaĝat da'me dojo', ñe'me Samuel yiyaĝanalo ena'uaque gaa'me Israel laje'pi qama'le enaac:
«Qom auomachiiya naa'me adai'lidi' da'me a'viyelaqaiyot ñe'me Jaliaĝanec, qama'le auajaqaidegue gaa'me qop'iyapegalo jo'ne yoda'alo choqogaa'me lequi'il jañe'me Astarté.#7:3 Astarté: nach'añe jañe'me qop'iyapega gaa'me Canaán laje'pi jo'ne yanema ga'me noqopich'i nataq'aen da'me nec'oĝochiyaĝac. Yataqata a'uonataĝañiuo'o ñe'me Jaliaĝanec, qama'le nach'eñe aueñi nale ademiya'a't, auañem ga'me adamaiqui. Qom naq'aeta da'me auauoyi, qama'le ñe'me ami de'uolo'te da'me dojo' lañoqotaĝanaĝa'j jogaa'me filisteopi.»
4Qama'le jogaa'me Israel laje'pi yajaĝadegue jogaa'me yodapecache lequi'il ñe'me Baal#7:4 Baal: nach'eñe ñe'me qop'iyapega gaa'me Canaán laje'pi jo'ne yanema ga'me uotep nataq'aen da'me nec'oĝochiyaĝac. chaqañe'me Astarté, qama'le onolec ñe'me Jaliaĝanec e'n da'me yema'a't.
5Yem qama'le Samuel eetac ga'me 'laqatac:
«'Noota ta'le ademiya'a't ena'uaque ami Israel laje'pi, ademiya'ña di'me noic Mispá, qama'le jayem ñachoĝodenot ñe'me Jaliaĝanec qaedi ami jajelaĝalo'te.»
6Chane'eja jogaa'me Israel laje'pi yema'a't ca'li di'me Mispá, qama'le nach'ega ua'a da'me naqachidijeguem ga'me noĝop, yecodedegue ga'me qa'a e'n lajaqaje'j yate'm ñe'me Jaliaĝanec. Jo'me nolo' cha'li noqouaqatela'ajalo qa'a natetola'ajalo queda'me yauo'oe gaa'me loeco jo'ne nauteta ñe'me Jaliaĝanec. Di'me Mispá, ua'a ca'li ñe'me Samuel male qoyen lajoĝola' gaa'me Israel laje'pi. 7Gaa'me lajoĝola'te jogaa'me filisteopi, ca'li noma'alo jogaa'me Israel laje'pi queda'me yema'a't di'me Mispá, qama'le dajotegue ga'me ueteda'a jogaa'me qaedi nala'te'to. Chane'eja, gaa'me Israel laje'pi, ca'li nomedaye degueja da'me loqolanaqa', 8qama'le edapega ñe'me Samuel:
«Ena'te aĝañi da'me anachoĝodetapecot ñe'me Jaliaĝanec jo'ne Qanedios jouaĝat qo'mi, qaedi qo'mi nec'alaĝatedegue, da'me nach'e eta't qo'mi nejaliaĝatelo'te gaa'me filisteopi.»
9Qama'le Samuel yacona ga'me 'nanaĝate c'oĝot qama'le en lajaqajec, maliaĝa nalo'ta't da'me yanot ñe'me Jaliaĝanec; yem qama'le nachoĝodenot ñe'me Jaliaĝanec qa'a jouaĝat gaa'me Israel laje'pi, qama'le ñe'me Jaliaĝanec yaloĝon da'me dojo': 10mane'e ca'li ñe'me Samuel yauotaque ga'me lajaqajec, gaa'me filisteopi yec'adeta qaedi yepelaĝa't da'me quiiñguilo. Qama'le ñe'me Jaliaĝanec degueja da'me ne'uaĝa'ñalo jogaa'me, qama'le en najaqachiguilo da'me loqolanaqa't. Chane'eja ca'li jogaa'me Israel laje'pi male noma't jogaa'me. 11Qampaja'a jogaa'me Israel laje'pi chiyoqoda'ña di'me Mispá da'me yecalo'te gaa'me filisteopi, qama'le nomachichidiñe chayovida'a yovideta di'me Bet-car.
12Yem qama'le Samuel yacona ga'me qa' t'adaic, yachañgui laeñi gaa'me noyaqa Mispá nataq'aen di'me Sen, qama'le en lenaĝat Eben-ézer,#7:12 Eben-ézer: hebreo 'laqatac jo'ne yelo'teguet da'me qa' jo'ne netouenec da'me qanecochaguec. qa'a eetac:
«Chayovida'a nayi ñe'me Jaliaĝanec qo'mi lecochiyalo.»
13Gaa'me filisteopi male qonoma't, qama'le ja yitaĝa yeloiquiaĝa'tape joga'me 'naleua gaa'me Israel laje'pi. Da'me cha'li nec'aletaye ñe'me Samuel, ñe'me Jaliaĝanec nach'e eta't da'me nautenalo gaa'me filisteopi. 14Gaa'me noyaqa jo'ne doĝotaĝaneque ca'li gaa'me filisteopi jo'ne 'nale'u gaa'me Israel laje'pi, chiyaqa'ña di'me Ecrón chayovida'a di'me Gat, yitaĝa loĝo't gaa'me Israel laje'pi. Qama'le naq'aeta gaa'me Israel laje'pi naqatedegue ga'me 'naleua' jo'ne naajo' nejaliaĝatetapelo'te gaa'me filisteopi, qama'le 'uo da'me 'nemaĝac gaa'me Israel laje'pi choqoga'me amorreopi.#7:14 Amorreopi: nach'egaua jo'ne 'lachaqa't ca'li di'me aleua jo'ne Canaán.
15Ñe'me Samuel nach'eñe lajoĝola't gaa'me Israel laje'pi da'me cha'li 'uo da'me nejiyaĝauayaĝac. 16Yemeda gaa'me 'uoidi, yec'ata di'me Betel, di'me Guilgal choqodi'me Mispá, qaedi yelo'ogueta nale 'uo ga'me lajouaĝa'j gaa'me Israel laje'pi, naqaenaua yec'atalo nale. 17Nale yomat ena'uac, 'viyelaĝague di'me Ramá jo'ne nach'edi neta'ña, nataq'aen nach'edi chiyaqa'ña da'me nejaliaĝatelo'te gaa'me Israel laje'pi. Nach'e ena'am da'me ya'uo ga'me c'atonaĝala' jo'ne loĝot ñe'me Jaliaĝanec.
Nu geselecteerd:
1 Samuel 7: TDO
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Biblia en Toba del Oeste © Sociedad Bíblica Argentina, 2014, 2019.