GENESIS 2
2
1Cielokunam kay pachapiwan ruray tukusqa karqa chaypi tukuy ima kaqkunapiwan. 2Chaymi qanchis kaq punchawpi Dios nirqa:
—Rurasqaykunaqa tukusqañam —nispa.
Chaymi qanchis kaq punchawpi samarqa. 3Diosmi qanchis kaq punchawta bendecirqa hinaspam kikinpa punchawninpaq sapaqcharqa, chay punchawtaqa sapaqcharqa llapa imatapas unancharuspa samasqanraykum. 4Chaynatamá chay punchawkunapi Dios unancharqa cielokunatawan kay pachata.
Eden Huertapi Adanta Dios churasqanmanta
Kay pachatawan cielokunata Tayta Dios unanchayta qallarichkaptinmi 5llapa plantapas kay pachapiqa manaraq karqachu, qorakunapas manaraqtaqmi paqarimurqachu, Tayta Diosqa manaraqmi parachimurqaraqchu nitaqmi runapas karqaraqchu llamkananpaq. 6Ichaqa allpamantam yaku toqyarqa lliw allpata parqonanpaq. 7Tayta Diosmi #Hebreo simipi Adam (Adan) ninanqa “runa” ninanmi.runata rurarqa ñutu allpamanta, senqanman kawsachiq samayta pukuykuptinmi kawsaq runaña karurqa.
8Tayta Diosmi intipa qespimunan law Edenpi huertata rurarqa. Chaymanmi rurasqan runata churarqa. 9Tayta Diosmi wiñachirqa sachakunata mikunapaq sumaqllaña ruruyoqta, wiñachirqataqmi huertapa chawpinpi kawsay qokuq sachatapas chaynataq allin kaqta hinaspa mana allin kaqta yachanapaq sachatapas.
10Huerta parqonanpaqmi Edenmanta mayu lloqsimurqa hinaspam chaymanta rakikurqa tawa pallqaman. 11Huknin pallqaq mayupa sutinmi karqa Pison, chay mayum tukuy Havila law allpata muyumun, chaypim kan qori. 12Chay allpapi qoriqa sumaqllañam. Chaypiqa kantaqmi miski asnaq horqonanku sachapas chaynataq alhaja rumipas. 13Iskay kaq mayupa sutinñataqmi Gihon, chay mayum tukuy Cus law allpata muyumun. 14Kimsa kaq mayupa sutinñataqmi Tigris, chay mayuqa Asiria nacionmantam richkan intipa qespimunan lawman. Tawa kaq mayupa sutinñataqmi Eufrates.
15Tayta Diosmi runata churarqa Eden Huertaman chaypi llamkananpaq hinaspa waqaychananpaq. 16Runatam Tayta Dios kamachirqa:
—Huertapi llapallan sachapa ruruntaqa mikunkim. 17Allin kaqta hinaspa mana allin kaqta yachanapaq sachapa ruruntam ichaqa ama mikunkichu, chayta mikuruspaykiqa cheqaptapunim wañurunki —nispa.
18Chaymantam Tayta Dios nirqa:
—Manam allinchu qaripa sapallan kayninqa, yanapaqnintayá payman rikchakuqta rurasaq —nispa.
19Tayta Diosmá purunpi tukuy animalkunata chaynataq alton pawaqkunata allpamanta rurarqa hinaspam runaman pusamurqa sutichananpaq. Runapa suti churasqanmi llapallan kawsaq animalkunapa sutinqa. 20Churarqamá sutinta llapallan uywa animalkunamanpas, alton pawaqkunamanpas chaynataq purunpi animalkunamanpas. Adanpaqmi ichaqa mana tarikurqachu payman rikchakuq yanapaqnin. 21Chaymi runaman Tayta Dios qoykurqa sinchi puñuyta. Puñunankamam huknin costillanta horqoruspa aychanta kaqlla wichqaykurqa.
22Tayta Diosmi qaripa costillan horqosqanmanta warmita rurarqa hinaspam qariman pusamurqa. 23Hinaptinmi Adan nirqa:
Payqa tulluymanta hinaspa aychaymanta kaqmi.
Paypaqa #Hebreo simipi warmi ninanqa “china runa” ninami.warmim sutin kanqa
qarimanta rurasqa kasqanrayku.
24Chayraykum qariqa Tayta-mamanta saqespa hukllawakunqa warminmanña chaymi iskayninku huk runa hinallaña kanqaku.
25Warmipas qaripas mana pachayoq kachkaspapas manam penqakurqakuchu.
Nu geselecteerd:
GENESIS 2: QUEAYA87
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
