Genesis 10
10
Akaonhwentsakwé꞉kon Nón꞉kwe Raonhá꞉ke Ne Noah Nitiakothwatsirí꞉non
1Ne kí tsi wahatiwatsiratátie ne Noah ne raonekenhteronʼtsheraʼshón꞉ʼa, ne ne Shem, Ham, tánon ne Japheth. Ne sontóhetsteʼ tsi iawehnó꞉tonhkweʼ, ratikwé꞉kon wahotinekenhteronʼtsheraientá꞉seron.
2Ne raonekenhteronʼtsheraʼshón꞉ʼas ne Japheth: ne ne Gomer, Magog, Madai, Javan, Tubal, Meshech, tánon ne Tiras. 3Ne raonekenhteronʼtsheraʼshón꞉as ne Gomer: né: ne Ashkenaz, Riphath, tánon Togarmah. 4Ne raonekenhteronʼtsheraʼshón꞉ʼas ne Javan: ne ne Elishah, ó꞉ni ne Tarshish, Kittim, tánon ne Dodanim. 5Japheth kíʼ nón꞉we nithonathwatsirí꞉non ne ne kawehnohkwaktóntie ionhwentsaké꞉ronʼs ratinakerénion nonkwehshón꞉ʼas. Ne raononwentsaké꞉shónʼs, ne rontá꞉tis tsi nihonronkhahttsheró꞉tenʼs, ne tsi ratiʼtaraién꞉tons, ne raotitióhkwakons.
6Ne Ham ne raonekenhteronʼtsheraʼshón꞉ʼa: ne Cush, Mizraim (Egypt), Put, tánon ne Canaan. 7Ne kí ne Cush raonekenhteronʼtsheraʼshón꞉ʼa: ne ne Seba, Havilah, Sabtah, Raamah, tánon ne Sabteca. Ne Raamah raonekenhteronʼtsheraʼshón꞉ʼa ne ne Sheba tánon ne Dedan. 8Ne Cush ráonha kaʼníhsera rotón꞉ʼon tsi nokwá ne Nimrod; ne Nimrod raónha thotierénhton ne tsi niionhwéntsa rateriiohskó꞉wa wahá꞉ton. 9Kwáh í꞉ken tsi ratoratskó꞉wa kén꞉ne raohén꞉ton ne Roiá꞉ner, “Kwáh tsi ní꞉ioht ne Nimrod ratoratskó꞉wa í꞉ken raohén꞉ton ne Roiá꞉ner.” 10Nonkwehshón꞉ʼas ne tsi kanatowá꞉nens ne Babel, Erech, tánon ne Accad, ronnónha ne kwáh tsi karihwakweʼní꞉io ronwaienawaʼséhahkwe, akwé꞉kon kí꞉ken kanatowá꞉nenʼs aotonhwentsá꞉ke ne Shinar nón꞉we nikanataién꞉tonʼs.#10.10 Né kaieríhaton nié꞉kate ne kanatowá꞉nen ne ne Calneh, ók ótiáʼke ne ronathiatonhseraweiénhston. 11Thóh aotonhwentsá꞉ke ne Shinar tontahahtén꞉ti Assyria niahá꞉re, tánon thóh nón꞉we iahatenatonniánion ne Nineveh, Rehoboth-Ir, Calah, tánon ne 12Resen, ne nenʼ néʼeh tsi naʼtetiátere ne Nineveh tánon ne kanatowá꞉nen Calah.
13Ne Egypt ráonha raonekenhteronʼtseraʼshón꞉ʼas tsi nonkwá ne Ludim, Anamim, Lehabim, Naphtuhim, 14Pathrusim, Casluhim, tánon ne Caphtorim, ne ne Philistiaró꞉nons thóh nón꞉we nithonatenekwenhsí꞉non.
15Ne Canaan ráonha kaʼníhsera wahá꞉ton tsi nonkwá né Sidon ne ne thakowá꞉nen roién꞉ʼa, tánon ne Heth, 16ó꞉ni ne Jebusites, ne Amorʼró꞉nons, Girgashró꞉nons, 17ó꞉ni ne Hivró꞉nons, ne Arkites, ne Sinites, 18ó꞉ni ne Arvadites, ne Zemarites, tánon ne Hamathites. Ne kí꞉ken ne raotiʼtaraʼshón꞉ʼas ne Canaanites tánon waʼthonré꞉ni. 19Tánon tsi nihotinakeráhsera ne Canaanites Sidon nón꞉we tiotáhsawe, eʼthó꞉ne Gerar nonkwá꞉ti nietsawé꞉non, ié꞉io tsi niió꞉re ne Gaza, eʼthó꞉ne Sodom nonkwá꞉ti nietsawé꞉non, tánon ne Gomorrah, Admah, tánon ne Zeboiim kwáh tsi niió꞉re ne Lasha. 20Né kí ne Ham raonekenhteronʼtsheraʼshón꞉ʼa, skátne ratinákerehkwe tsi nihotiʼtaroʼtén꞉sonʼskwe ó꞉ni ne rontá꞉tiskwe tsi nihonhronkhahttsheró꞉tenʼs ne raononhwentsá꞉keʼs, ó꞉ni ne raotitióhkwakonʼs. 21Shem ráonha thokstén꞉hahkwe, ne iatateʼkén꞉ʼa ne Japheth, ne Shem ráonha kaʼníhsera wahá꞉ton ratikwé꞉kon ne Eber tsi niahathwatsí꞉rine. 22Ne raonekenhteronʼtsheraʼshón꞉ʼas ne Shem: ne ne Elam, Asshur, Arpachshad, Lud, tánon ne Aram. 23Ne Aram raonekenhteronʼtsheraʼshón꞉ʼa ne ne Uz, ó꞉ni Hul, Gether, tánon ne Meshek. 24Ne Arpachshad ne ieshoién꞉ʼa ne Shelah, ók ne Shelah ne ne ieshoién꞉ʼa ne Eber. 25Ne Eber tékeni tehonekenhteronʼtsheraién꞉takwe: shaiá꞉ta ne roién꞉ʼa Peleg ronwá꞉iatskwe, aseʼkénh ne sihotenhniseraténionʼskwe teiakonitiohkwakkháhshion ne tsi ionhwentsá꞉te;#10.25 Ne Peleg ne Hebrew ne ne kén꞉tonʼs “Tekakháhshion.” ne iatateʼkén꞉ʼa Joktan neʼ ronwá꞉iatskwe. 26Ne Joktan ne ne shakoioʼokón꞉ʼas ne Almodad, Sheleph, Hazarmaveth, Jerah, 27Hadoram, Uzal, Diklah, 28Obal, Abimael, Sheba, 29Ophir, Havilah, tánon ne Jobab; ratikwé꞉kon kí꞉ken Joktan raonekenhteronʼtsheraʼshón꞉ʼas. 30Tsi nón꞉we nihatiná꞉kere ne ne Mesha kwáh tsi niió꞉re ne Sephar ne ne tsi ionhniahrónnions kananerahserá꞉ien ne tsitkarahkwínekenʼs nonkwá꞉ti. 31Ne kí꞉ken ne Shem raonekenhteronʼtsheraʼshón꞉ʼas, skátne ratinákere tsi nihotiʼtaroʼtén꞉shons tánon ne rontá꞉tis tsi nihonhronkhátsheró꞉tenʼs ne raononhwentsà꞉keʼs ó꞉ni ne raotitióhkwakon. 32Ne kí꞉ken ne raotitaraʼshón꞉ʼas ne Noah raonekenhteronʼtsheraʼshón꞉ʼas, ne entioianénhawe tsi nienhonthwatsí꞉rine ne raotitióhkwakonʼs; tánon thóh tontáhsawen kí꞉ken onkwehshón꞉ʼas tsik nonwéhson niaʼthonré꞉ni ne tsi ionhwentsá꞉te shonhtóhetste tsi iawenhó꞉tonhkweʼ.
Nu geselecteerd:
Genesis 10: MHK
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
