Piligu 8
8
Kokpɛɣu nyuuya
1Amaa Naawuni daa bi tam Nuhu mini mɔɣu ni biŋkɔbiri ni yiŋ’ biŋkɔbiri bɛn zaa daa be o sani ŋariŋ maa ni la yɛla. Ka Naawuni daa chɛ ka pɔhim ʒiɛna, ka kom maa daa gbaai nyuubu. 2Ka tiŋgban’ ni kɔbil’ nina mini sagbana ni kɔsoya daa ŋari; ka saa chɛ mibu, 3ka kom maa daa gbaai nyuubu biɛlabiɛla. Zaŋ chaŋ biɛɣ’ kɔbiga ni pihinu dali, ka kom maa daa filim. 4Gol’ so ŋun pahir’ ayopɔin biɛɣ’ pinaayopɔin dali, ka ŋariŋ maa daa kana ti tam Ararat Zoli zuɣu. 5Ka kom maa daa kul gbaai nyuubu zaŋ hal ti paai gol’ so ŋun pahiri pia dahin yini dali, ka zoya zuɣusaa daa nyili.
6Zaŋ chaŋ biɛɣ’ pihinahi dali, ka Nuhu daa yooi ŋariŋ maa takɔr’ shɛli o ni daa chib’ la, 7ka chɛ ka kahiŋkɔɣu doli nimaani yi. Kahiŋkɔɣu maa ni daa yiɣi yi, o daa kul yiɣirimi gindi hal ka kom maa ti nyuui. 8Di nyaaŋa ka o daa ti chɛ ka ŋmani yiɣi yi ni o nyaa kom maa nyuuya, 9amaa ka ŋmani maa daa yiɣi chaŋ ti bi nya o ni yɛn tam binshɛli zuɣu, dama kom maa daa na kul tɛlila tiŋgbani luɣilikam zaa. Ka o daa lab’ o sani ŋariŋ maa ni, ka o ti zaŋ o nuu tiri takɔro maa ni n-gbaag’ o kpɛh’ o sani ŋariŋ maa ni. 10Ka Nuhu daa guhi daba ayopɔin, ka lan chɛ ka ŋmani maa yi ŋariŋ maa ni chaŋ. 11Zaŋ chaŋ zaawuni ha ka ŋmani maa daa ŋmaai olivi tia vamahili n-gbab’ o noli lab’ o sanna ŋariŋ maa ni; ka Nuhu daa baŋ ni kom maa yipa nyuuya tiŋgban’ ni. 12Ka o daa lan guhi daba ayopɔin pahi, ka lan chɛ ka ŋmani maa yi n-chaŋ yaha, dindina, ka ŋmani maa daa bi lan labina.
13Yuun’ shɛli din daa pahiri Nuhu yuun’ kɔbisiyɔbu ni yini puuni gol’ so ŋun daŋ tooni dahin yini dali ka kom maa daa nyuui tiŋgban’ ni, ka Nuhu daa piligi binshɛli din pili ŋariŋ maa, ka lihi nya ka tiŋgbani ŋme pɔhim. 14Zaŋ chaŋ gol’ so ŋun pahir’ ayi biɛɣ’ pisinaayopɔin dali, ka tiŋgbani daa kuui zaa. 15Ka Naawuni daa yɛli Nuhu, 16“A min’ a paɣa ni a bidibisi la ni bɛ paɣiba yim’ ŋariŋ maa ni na. 17Zaŋmiya binnɛma balibu kam bɛn nyɛ noonsi mini biŋkɔbiri ni binnɛma bɛn zaa gbamdi tiŋa n-yina, ka bɛ ti dɔɣi pam nab’ pali dunia ŋɔ.” 18Ka Nuhu min’ o paɣa ni o bidibisi ni bɛ paɣiba maa daa yi ŋariŋ maa ni na. 19Ka biŋkɔbiri balibu kam zaa mini binnɛma balibu kam bɛn zaa gbamdi tiŋa ni noonsi balibu kam ni binshɛɣukam zaa bɛn chani gindi dunia ni balibu kam zaa daa dol’ taba yi ŋariŋ maa ni na.
Nuhu mali sara
20Ka Nuhu daa me sara maligu bimbini zali Yawɛ, ka zaŋ biŋkɔb’ shɛb’ bɛn be kasi balibu kam mini noon’ shɛb’ bɛn be kasi balibu kam mali sara shɛli bɛ ni zaŋdi nyɔri buɣim la sara maligu bimbini maa zuɣu. 21Ka Yawɛ daa wum di ʒiɛɣu, ka di tiɣ’ o nini ka o yɛl’ o suhu ni, “N ku lan yɛli noli niŋ tiŋgban’ ni ninsal’ zuɣu, dama ninsal’ suhu ni tɛha pun nyɛla tɛhi’ biɛri o bilim ni; ka m mi ku lan ku binnɛma zaa kaman n ni niŋ shɛm ŋɔ. 22Dunia ŋɔ ni na be ŋɔ, biribu saha mini chɛbu saha ni maasim saha ni tulim saha ni shɛɣu saha ni kikaa saha ni wuntaŋ’ ni mini yuŋ kul ni beni.”
Nu geselecteerd:
Piligu 8: DBwDB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Dagbani Bible with Deuterocanonical Books © Bible Society of Ghana, 2011.
