Yoana 6
6
Aba:nu 5,000 nibari:si:bwa
(Mt. 14:15-21; Mk. 6:32-44; Lk. 9:10-17)
1Wejire ebyo byawa, Yesu nagenda ku ngego ya inyanja ya Galilaya, niyo eya Tiberia. 2Ecise cinene nicimuru:ba okuba barorere ebibarikisyo binu akorere ku barwae. 3Yesu narinya ku ci:ma, nenyanja okwo aamwi na abe:igisibwa bae. 4Na Ipasaka yariga iri yei, nigo amarya ga Bayaudi. 5Mbe Yesu ne:namu-sya ame:so, narora cise cinene nicimu:jako, namubu:sya Filipo ati, ?Jecigure a:ki ebiryo, banu binu bararya? 6A:ikire kutyo kumusaka, okuba ariga amenyere omwene cinu kenda okukora. 7Filipo namuindura ati, Ebiryo bya siringi magana gabiri bitakubaswira, mu:nu wo:ne aryeko bityari. 8Oumwi ku be:igisibwa bae, nuwe Anderea omumura wabo Simoni Petero, namubwira ati, 9Ariwo mumura muto:to unu ari na mikate eta:nu ja sairi na biswi bibiri, ?Nawe binu niwo ki mu ba:nu ba:fu banu? 10Yesu na:ika ati, Mubenyanje aba:nu. Awo bwariga burio bunyasi bwa:fu. Mbe aba:nu nibenyanja, obukumi bwebwe uti bisira bita:nu. 11Mbe Yesu nagega emikate, nasi:ma, nagabira banu benyanjire. Na jiswi one nabagabira rwa kutyo bendere. 12Wejire be:guta nabwira abe:igisibwa bae ati, Nimukofye ebiba:ra binu byasigara, casiga kuburao ci:nu. 13Mbe nibakofya nibe:jusya ebibo ekumi na bibiri ebye biba:ra bye mikate jita:nu eja jisairi, binu byasigae ku banu bari:ye. 14Mbe aba:nu wejire barora ecibarikisyo cinu akorere, niba:ika ati, Ni cimari unu niwe omuragi unu ka:ja mu:si.
Yesu naribatira ku manji
(Mt. 14:22-23; Mk. 6:45-52)
15Yesu namenya ati, abajo:ku:ja okumugwata, bamukore mukama, nasuba rindi ku ci:ma enyere. 16Wejire kwaba kegoro, abe:igisibwa bae nibatebera ku mwaro. 17Nibasyabara mu bwato, bariga nibambuka inyanja okugenda Kaperinaumu. Na kwariga kwerabuye, na Yesu ariga acari kubakingako. 18Inyanja nisa:ru:ma, omuyaga mwafu niguyemba. 19Mbe wejire bamara okufuga uti mairi isatu amwi ina, nibarora Yesu naribatira ku manji, nafugera ku bwato, nibo:baya. 20Nawe omwene nababwira ati, Na:nye, musige ku:baya. 21Nibe:kirisya okumwingisya mu bwato. Aonao obwato nibugoba ku mwaro enu bariga nibaja.
Yesu ne:igisya ebye biryo byo buanga
22Mwejo bwejire bwaca, ecise cariga cimereguyu ku ngego yenderya ya inyanja, wejire barora ati butario bwato bundi, tari ubumwi, na Yesu ata:syabae aamwi na be:igisibwa nawe abe:igisibwa ba:gendere benyere. 23Nawe ama:to agandi gaso:kere Tiberia, nigagoba yei na anu ba:ri:ri:ye emikate, anu Ratabugenyi asi:miye. 24Mbe ecise wejire barora ati, Yesu atariwo, nakabee bari be:igisibwa bae, abene nibasyabara mu ma:to garya, nibaja Kaperinaumu nibayenja Yesu. 25Wejire bamubonera ku ngego yenderya ya inyanja, nibamubu:sya ati, ?Rabbi, wama:jari anu? 26Yesu nabaindura na:ika ati, Ni cimari cimari enibabwira ati, Omu:nyenja tari kwo kuba mwarorere ebibarikisyo nawe kwo kuba mwama:rya emikate nimwiguta. 27Musige kukorera ebiryo binu ebiwao, nawe ebiryo binu ebi:karao kukinga ku buanga bunu butakuwao, binu Omwana wo mu:nu aribayana. Okuba niwe oyo Rata Nyamuanga amuteeko ecibarikisyo. 28Nibamubu:sya ati, ?Cikore kutiki okukora emirimu ja Nyamuanga?
29Yesu naindura nababwira ati, Gunu nigwo omurimu gwa Nyamuanga, okumwikirisya oyo amutumire. 30Nibamubu:sya ati, ?Mbe ni cibarikisyo ki cinu awe oukora, cirore, cikwikirisye? ?Oukora murimu ki? 31Basaja bari:raga emanu mwibara, rwa kutyo byandikirwe ati, abayae ebiryo byo kurya binu byaso:kere mu rwire. 32Mbe Yesu nababwira ati, Ni cimari cimari enibabwira ati, Atari Musa unu abayae ebiryo binu byaso:kere mu rwire, nawe Rata nuwe kabayana ebiryo bye cimari binu ebiso:ka mu rwire. 33Okuba ebiryo bya Nyamuanga nibyebyo ebiso:ka mu rwire, binu ebire:tera eca:ro obuanga. 34Mbe nibamubwira ati, Ratabugenyi, ciyanega ebiryo ebyo kusiku.
35Yesu nababwira ati, Nanye ebiryo byo buanga. Unu kanyijako atarirumwa mweko kata, unu kanyikirisya atari:twa bwiro na katyari. 36Nawe nababwiriye ati, Mwandorere mutanyikirisisye. 37Bo:ne banu Rata kanana bari:ja kwanye, na unu ka:ja kwanye, nitarimuirisisya aanja na katyari. 38Okuba nitaso:kere mu rwire korereki nikore binu enenda anye, tari binu kenda unu antumire. 39Okwenda kwa Rata unu antumire ni kunu ati, mu bo:ne banu ananire asige kumbura na umwi, nawe nimusu:rurire ku rusiku rwa ku bute:ro. 40Okuba okwenda kwa Rata unu antumire ni kunu ati, mu:nu wo:ne unu karora Omwana no kumwikirisya, abe no buanga bunu butakuwao, nanye ndimusu:rurira ku rusiku rwa ku bute:ro.
41Mbe Abayaudi nibe:toŋanira okuba a:ikire ati, Nanye ebiryo binu byaso:kere mu rwire. 42Niba:ika ati, ?Tari unu niwe Yesu wa Yusufu, unu cimenyere esemwene na nyiramwene? ?Ka wori ka:ika atiki ati, Naso:kere mu rwire? 43Yesu nabaindura ati, Musige kwitoŋanira emwe abene era. 44Atario unu katura oku:ja kwanye, tari akuruywe na Rata unu antumire. Nanye ndimusu:rurira ku rusiku rwa ku bute:ro. 45Byandikirwe mu baragi ati, Bo:ne bariigisibwa na Nyamuanga. Unu wo:ne kongwa no kwiigira ku Rata, niwe ka:ja kwanye. 46Tari ati ario mu:nu unu ararorere Rata, tari Unu aso:kere ku Nyamuanga. Oyo niwe ararorere Rata. 47Ni cimari cimari enibabwira ati, Unu ke:kirisya ari no buanga bwa kajanende. 48Nanye ebiryo byo buanga. 49Basa:ja wanyu bari:raga emanu mwibara nibafwa. 50Binu nibyo ebiryo binu ebiso:ka mu rwire, omu:nu abiryeko asige kufwa. 51Nanye ebiryo ebianga binu byaso:kere mu rwire. Omu:nu akarya ku biryo binu ariba muanga kajanende na kajanende. Ebiryo binu ndigaba kurwo buanga bwa i:si, nigwo mubiri gwani.
52Mbe Abayaudi nibabambasyanya abene era niba:ika ati, ?Unu katura atiki okuciyana omubiri gwae okugurya? 53Mbe Yesu nababwira ati, Ni cimari cimari enibabwira ati, Mukarema okurya omubiri gwo Mwana wo mu:nu, no kunywa amanyinga gae, butarimo buanga mwimwe. 54Unu karya omubiri gwani, no kunywa manyinga gani, ari no buanga bwa kajanende, nanye ndimusu:rurira ku rusiku rwo bute:ro. 55Okuba omubiri gwani nibyo ebiryo bye cimari, na manyinga gani nico eco kunywa ce cimari. 56Unu karya omubiri gwani no kunywa amanyinga gani, ke:kara mwanye, nanye mu mwene. 57Rwa Rata omuanga kutyo antumire, anye one rwa kutyo ndi muanga kurwa Rata, nikwo kutyo one unu kandya, ariba muanga kubwani. 58Binu nibyo ebiryo binu byaso:kere mu rwire. Tari rwa basa:ja kutyo baryaga nibafwa. Unu karya ebiryo binu ariba muanga kajanende na kajanende. 59Ebyo abyaikiye mu rikofyanyisyo ne:igisya mu Kaperinaumu.
Abe:igisibwa ba:fu nibasiga Yesu
60Mbe ba:fu aba mu beigisibwa bae wejire bongwa niba:ika ati, Omusango gunu ni mukomee. ?Niga unu katura okugungwa? 61Nawe Yesu namenya munda yae ati, abe:igisibwa bae abe:toŋanirira eco, nababu:sya ati, ?Eco nico ecibayabya? 62?Mbe biriba kutiki ariba mwarora Omwana wo mu:nu narinya enu ariga okwamba? 63Omwoyo nigwo ogutamo obuanga. Omubiri gutari na cinu ogwiya. Emisango jinu nababwira nigwo mwoyo nibwo buanga. 64Nawe bariwo abandi mwimwe banu batakwikirisya. Okuba Yesu ariga amenyere kuso:ka ku bwambiro banu batakwikirisya, na unu ariga nenda okumuromera iniku. 65Na:ika ati, Kwonakora nimbabwira ati, Atariwo mu:nu unu katura oku:ja kwanye, Rata atamuyae okutura.
66Aba ku be:igisibwa bae ba:fu nikwo bakorere nibagenda nibasuba inyuma, nibarema okuribatira aamwi nage rindi. 67Mbe Yesu nababu:sya rikumi na babiri ati, ?Si imwe one omwenda okugenda? 68Simoni Petero namuindura ati, Ratabugenyi, cije ku:ga? Awe uri ne misango jo buanga bwa kajanende. 69Neswe ce:kirisisye nicimenya ati, Awe uri Mweru wa Nyamuanga. 70Yesu nabaindura ati, ?Tari nanye nabasorere emwe rikumi na babiri, no umwi kwimwe ni Syetani? 71A:ikire ku Yuda, Omwana wa Simoni Iskariote, okuba niwe ariga nenda okumuromera iniku, niwe oumwi kwikumi na babiri.
Nu geselecteerd:
Yoana 6: KIJ1960
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kijita New Testament © The British and Foreign Bible Society and The Bible Society of Tanzania, 1960.
