Yoana 4
4
Yesu nagenda Galilaya
1Mbe Ratabugenyi okuba ariga amenyere ati, Abafarisayo bonguywe ati, Yesu ke:igisya no kubatija be:igisibwa ba:fu kukira Yoana. 2Nawe Yesu omwene atabatijisye, tari abeigisibwa bae. 3Naso:ka mu Buyaudi, nagenda Galilaya rindi. 4Ka kwariga kumwiire okuitiŋana mu Samaria. 5Mbe nakinga ku musi gwa Samaria gunu gwatogwaga Sikari, gunu gusijene na risambu rinu Yakobo ayae omwana wae Yusufu.
Yesu no Musamariagasi
6Carigamo ecinyo ca Yakobo. Mbe Yesu, ariga aigirwe orugendo, neinyanjira ku cinyo. Jariga jiri uti saa eta:nu na imwi. 7Omusamariagasi na:ja okutaya amanji. Yesu namubwira ati, Naneko amanji ninywe. 8Okuba abe:igisibwa bae bariga bajiye mu musi okugura ebiryo. 9Mbe Omusamariagasi namubu:sya ati, Awe uri Muyaudi, ?Ka okukora nusabwa amanji kwanye niki, nanye ndi Musamariagasi? Okuba Bayaudi batakusasikana na Basamaria. 10Yesu naindura namubwira ati, Kumba wari umenyere eciyanwa ca Nyamuanga na kutyo ari unu kakubwira ati, Naneko amanji ninywe, awe wakamusabirwe, omwene niwe akakuyae amanji go buanga. 11Omugasi uyo namubwira ati, Mukaruka, utari na ca kutaira ne cinyo ci:rimire muno. ?Kambe ougaso:sya a:ki amanji ago go buanga? 12?Awe uri mukuru kukira saja Yakobo unu aciyae ecinyo cinu, ka anywagamo omwene na ba:na bae ne myandu jae? 13Yesu naindura namubwira ati, Mu:nu wo:ne unu kanywa amanji ganu, obwiro burimwita rindi. 14Nawe unu kanywa amanji ago anye ndimuyana, obwiro butarimwita na katyari kajanende, nawe amanji ganu ndimuyana garabaga omumiro gwa manji munda yae nigafukura kukinga mu buanga bunu butakuwao. 15Omugasi uyo namubwira ati, Mukaruka, nana amanji ago, obwiro busigega kunyita, nakabee oku:ja enu okutaya. 16Yesu namubwira ati, Genda ubirikire omurume wao, usube anu. 17Omugasi uyo naindura namubwira ati, Nitari na murume. Yesu namubwira ati, Wa:ika kisi ati, Nitari na murume. 18Okuba ure:isye barume bata:nu nawe unu uri nage woryanu atari murume wao. Eco wa:ika ni ca cimari. 19Omugasi uyo namubwira ati, Mukaruka, enirora ati uri muragi. 20Basaja baramisyaga ku ci:ma cinu, nemwe omwaika ati, Yerusalemi niyo era eyo kuramisyagamo. 21Yesu namubwira ati, Mugasi awe, nyikirisya, omwanya ogu:ja gunu batariramisya Rata ku ci:ma cinu nakabee ari Yerusalemi. 22Emwe omuramya cinu mutakumenya. Eswe eciramya cinu cimenyere, okuba omweruro oguso:ka mu Bayaudi. 23Nawe omwanya ogu:ja, na ka wori guriwo, banu abaramya cimari bararamisyaga Rata mu mwoyo no kumasya, okuba Rata kayenja abe:ja:bo abo okumuramyaga. 24Nyamuanga ni Mwoyo, na banu abamuramya kube:ire okumuramisyaga mu mwoyo na mu kumasya. 25Omugasi uyo namubwira ati, Nimenyere ati Masiya ka:ja unu katogwa Kristo. Ariba:ja aricibwira misango jo:ne. 26Yesu namubwira ati, Nanye oyo ka:ika na:we.
27Mbe niwo abe:igisibwa niba:ja. Nibarugu:ra okuba agwekwaika no mugasi uyo, nawe atario unu a:ikire ati, ?Ouyenja ki? amwi ati, ?Cinu ecikwaikya nage niki? 28Mbe omugasi uyo nasiga ecitumo cae, nagenda mu musi, nabwira aba:nu ati, 29Mu:je murore omu:nu unu ambwira binu ndakorere byone. ?Atakuta:sya kuba Kristo?
30Nibaso:ka mu musi nibamuja:ko. 31Nawe abe:igisibwa bariga nibamuremberesya niba:ika ati, Rabbi, nurye. 32Nababwira ati, Ndina ebiryo binu mutakumenya. 33Mbe abe:igisibwa niba:ika abene era ati, ?Ario unu amure:tera eco kurya? 34Yesu nababwira ati, Ebiryo byani nikwo okukora binu kenda unu antumire, no kumarisya omurimu gwae. 35?Emwe mutakwaika ati, Gasigaeo me:si gana, niwo rigesa riye? Rora enibabwira ati, Mwesye ame:so, murore amasambu gaiye gendere okugeswa. 36Unu kagesa kayabwa omuyero, nakunia amatwasyo kukinga mu buanga bunu butakuwao, korereki unu kabiba na unu kagesa bakondererwe aamwi. 37Okuba omusango gunu nigwo gwe cimari ati, Unu kabiba ni undi na unu kagesa ni undi. 38Anye nabatumire emwe okugesa binu mutanya:kiriye. Abandi banya:kire, na emwe mwengiye mu mirimu jebwe.
Abasamaria ba:fu nibamwikirisya Yesu
39Na mu musi ugwo Abasamaria ba:fu bamwikirisisye kurwo musango gwo mugasi uyo, cinu amwimireko ati, Ambwira byone binu nakorere. 40Mbe Abasamaria bejire bakinga anu ariga:ri, nibamuremberesya ati, abe nabo. Namarayo siku ibiri. 41Ba:fu nibeyongesya okwikirisya kurwo musango gwae. 42Nibabwira omugasi uyo ati, Woryanu cite:kirisya kurwo kwaika kwao era okuba ceyungwirwa eswe abene, nicimenya ati ni cimari unu niwe Omukisya we ca:ro.
43Jisiku ejo jibiri wejire jaturao, naso:kayo nagenda Galilaya. 44Okuba Yesu omwene a:ikire ati, Omuragi atari na cibaro mu:si yabo. 45Mbe ejire akinga Galilaya, Abagalilaya nibamuramira, okuba barorere byone binu akoree Yerusalemi ku marya.#Amarya ganu ni siku ja Ipasaka. Okuba abene one bariga bajiye ku marya.
Omumura wo musi:ba naosibwa
46Mbe Yesu nakinga rindi mu Kana ya Galilaya, munu akoree amanji okuba ge mijabibu. Ariga:rio omusi:ba unu ariga:ri no mumura wae unu arwariye Kaperinaumu. 47Oyo ejire ongwa ati Yesu aso:kere mu Buyaudi akingire Galilaya, namu:jako namuremberesya atebere aosye Omwana wae, okuba ariga ajo:kufwa. 48Mbe Yesu namubwira ati, Ariba mutarorere ebibarikisyo ne birugu:ro mutari:kirisya na katyari. 49Omusi:ba namubwira ati, Ratabugenyi, utebere Omwana wani acari kufwa. 50Yesu namubwira ati, Genda, omwana wao ni muanga. Omu:nu uyo ne:kirisya omusango gunu Yesu amubwira, nagenda. 51Anu ariga acatebera, nabonana na bagaya bae, niba:ika ati, Omwana wao ni muanga. 52Mbe nababu:sya isaa inu amaoreramo. Nibamubwira ati, Rigoro, saa eta:nu ne:biri, ribiri ndimuso:kako. 53Mbe esemwene namenya ati, mu saa eyo nimwo Yesu a:ma:mubwirira ati, Omwana wao ni muanga. Omwene ne:kirisya na ba mu musi gwae bo:ne. 54Cinu nico ecibarikisyo ca kabiri cinu Yesu akorere wejire aso:ka Buyaudi okuja Galilaya.
Nu geselecteerd:
Yoana 4: KIJ1960
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kijita New Testament © The British and Foreign Bible Society and The Bible Society of Tanzania, 1960.
