Yoana 10
10
Omure:fi we kisi
(Jab. 23; Baeb. 13:20; 1 Pet. 5:4)
1Ni cimari cimari, enibabwira ati, Unu atakuitiŋana mu muryango okwingira mwigutu rya jina:ma, nawe ka:sisisya andi, oyo ni mwifi na musa:kusi. 2Nawe unu katura mu muryango, niwe omure:fi wa jina:ma. 3Oyo omwigasi kamwigurira, na jina:ma ejungwa oburaka bwae, kajibirikira jina:ma jae amasi:na najiurusya aanja. 4Wora amara okujiurusya ejae jo:ne, kajitangatira, na jina:ma jae nijimuru:ba, okuba jimenyere oburaka bwae. 5Oundi jitakumuru:ba, nawe ejimwiruka, okuba jitakumenya oburaka bwa bandi. 6Yesu nababwira ecijekekanyo cinu, nawe batamenyere cinu ababwiriye.
7Mbe Yesu nababwira rindi ati, Ni cimari cimari enibabwira ati, Nanye omuryango gwa jina:ma. 8Bo:ne banu bantangatiye bariga be:fi na basa:kusi, nawe jina:ma jitabonguywe. 9Anye nanye omuryango. Omu:nu akengirira mwanye, kakira, kengira, kauruka, kabona obure:bero. 10Omwifi ataku:ja, tari kare:twa okwiba, no kwita, no kusimagisya. Anye ne:jire korereki babe no buanga, na ka babe nabwo bwafu. 11Anye nanye omure:fi we kisi. Omure:fi we kisi ke:tegayo obuanga bwae kurwa jina:ma. 12Unu kare:bera omuyero, atari mure:fi, na jina:ma jitari jae, akarora omusege nigu:ja, kasiga jina:ma, ne:ruka, no musege nigujika:ya, nigujinyaraganya. 13Ne:ruka okuba ni wa muyero era, amwi atajirumirwe jina:ma. 14Anye nanye omure:fi we kisi, ka nimenyere ejani, ne jani ji:menyere. 15Rwa Rata kutyo a:menyere, nanye one kutyo nimumenyere Rata. Nanye nini:tegayo obuanga bwani kurwa jina:ma. 16Na ka ndina jina:ma ejindi jinu jitari ja mwigutu rinu. Ejo one kunyiire okujire:ta. Jiryungwa riraka ryani, nijiba eijo rimwi, no mure:fi umwi. 17Nikwo kakora Rata nanyenda, okuba eniso:sya obuanga bwani, korereki nibugege rindi. 18Atariwo unu kabunso:syako nawe nanye omwene:ra enibuso:sya. Ndino buinga bwo kubuso:sya, ka ndino buinga bwo kusuba okubugega. Eciragiro eco naciyabirwe Rata. 19Nikubao okwaukana rindi mu Bayaudi kurwe misango ejo. 20Mwabo aba:fu niba:ika ati, Ari no musambwa, ka asarire, ?omumungwirwa ki? 21Abandi niba:ika ati, Emisango jinu jitari ja mu:nu unu ari no musambwa. ?Omusambwa ogutura okwigura ame:so ga baofu?
Yesu na Nyamuanga ni umwi
(Rora Yo. 14:9; 20:28-29)
22Mbe mu Yerusalemi gariga gario marya go kucuma, jariga jiri siku ja imbeo. 23Yesu naribatira mu yekaru mu Cisuna ca Sulemani. 24Mbe Abayaudi nibamusingira, nibamubu:sya ati, ?Urikingyari okucitima:tyatima:tya? Araba na:we Kristo, nucibwire abweru. 25Yesu naindura ati, Ndababwiriye, nawe mutakwikirisya. Emirimu jinu enikora mwisi:na rya Rata, nijo ejinyimako anye. 26Nawe emwe mutakwikirisya, okuba mutari ba mu na:ma jani. 27Jina:ma jani ejungwa riraka ryani, nanye nijimenyere, eiene nijindu:ba. 28Nanye enijiyana obuanga bunu butakuwao, amwi jitaribura kajanende na kajanende, amwi atariwo unu arijinyugumbura mu kuboko kwani. 29Rata unu ajinae ni mukuru kukira bo:ne, amwi atario unu katura okujinyugumbura mu kuboko kwa Rata. 30Anye na Rata riri umwi.
31Abayaudi nibagega amabui rindi ati bamurasire mabui. 32Yesu nabaindura ati, Ndabe:resisye emirimu je kisi myafu jinu jaso:kere ku Rata. ?Ni murimu ki mwijo gunu ogukora nimwenda okundasira amabui? 33Abayaudi nibamuindura ati, Citakukurasira mabui kurwo murimu gwe kisi, nawe kurwo kufuma Nyamuanga, okuba awe uri mu:nu kowikora Nyamuanga. 34Yesu nabaindura ati, ?Bitandikirwe mu biragiro byemwe ati, Anye na:ikire ati, muri banyamuanga? 35Mbe, araba abatogere abo banyamuanga, banu be:jiywe omusango gwa Nyamuanga (na binu byandikirwe bitakutura kuwao). 36?Mbe, unu Rata amwauye namutuma mu:si, omumubwira ati, Wafuma Nyamuanga, okuba anye na:ika ati, Nanye Omwana wa Nyamuanga? 37Araba nitakukora mirimu ja Rata, musige kunyikirisya. 38Nawe nikajikora, nakabee mutakunyikirisya anye, nawe mwikirisye emirimu, mumenye no kusombo:kerwa ati Rata ari mwanye, nanye mu Rata. 39Nibayenja obwenge rindi okumugwata, naso:ka mu maboko gebwe.
40Nagenda rindi ku ngego ya Yorodani, anu Yoana ariga:ri okwamba nabatija, naba eyo. 41Aba:nu ba:fu nibamutako, niba:ika ati, Yoana atakorere cibarikisyo, nawe Yoana binu byone a:ikire ku unu byariga bya cimari. 42Nibamwikirisisya eyo ba:fu.
Nu geselecteerd:
Yoana 10: KIJ1960
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kijita New Testament © The British and Foreign Bible Society and The Bible Society of Tanzania, 1960.
