Yoana 1
1
Yesu Kristo niwe Nyamuanga
(Baeb. 1:1-2; 1 Yo. 1:1-3)
1Okwamba ariga:rio Omusango. Omusango ariga aamwi na Nyamuanga. Omusango niwe Nyamuanga. 2Oyo ariga aamwi na Nyamuanga ku bwambiro. 3Ebi:nu byone byakorerwe nage. Aja:tari uyo citakakorerwe ci:nu na cimwi cinu cakorerwe. 4Obuanga bwariga mu Mwene. No buanga nibuba obweru bwa ba:nu. 5Obweru nibwatika mu cisu:te, ka ne cisu:te citabumenyegesisye.
6Abonekere omu:nu unu atumirwe na Nyamuanga, risi:na ryae Yoana. 7Oyo e:jire okwimako, abwimeko obweru, korereki bo:ne be:kirisye kubwae. 8Oyo tari niwe ariga obweru, nawe e:jire abwimeko obweru. 9Bwariga buriwo obweru bwe cimari, bunu obwatikiraga mu:nu wo:ne unu ka:ja mu:si. 10Ariga:ri mu:si, na i:si yakorerwe Omwene, na i:si itamusombo:keywe. 11E:jire mu butunge bwae nawe aba:nu bae batamuramiye. 12Nawe bo:ne banu bamuramiye, abe:kirisisye okuba ba:na ba Nyamuanga, nibo abo abe:kirisya risi:na ryae, 13Banu bate:buywe kurwa amanyinga nakabee kuri kwenda kwo mubiri, nakabee kuri kwenda kwo mu:nu, nawe be:buywe na Nyamuanga.
14Omusango naba mubiri, ne:kara kwiswe, nicirora rikusyo ryae, niryo rikusyo rya Unu ebuywe umwi enyere:ra na Rata, e:jue ecigongo ne cimari.
Okwimako kwa Yoana Omubatija
(Mt. 3:1-12; Mk. 1:4-8; Lk. 3:1-18)
15Yoana namwimako, na:ikirira inguru ati, Oyo niwe nababwiriye ati, Unu ka:ja inyuma yani ankirire ecibaro, okuba Omwene niwe antangatiye. 16Okuba eswe bo:ne cayabirwe mu kuku:mira kwae, ne cigongo inguru ye cigongo. 17Okuba ebiragiro byare:terwe na Musa, nawe ecigongo no kumasya byare:terwe na Yesu Kristo. 18Atario unu ararorere Nyamuanga anu cikabere:ga. Nyamuanga unu e:buywe enyere, unu ari mu cifuba ca Rata, Oyo niwe amubu:risisye.
19Kunu nikwo okwimako kwa Yoana, Abayaudi be:jire bamutumira abagabisi na Barawi, korereki bamubu:sye ati, Na:we:ga? 20Omwene e:bu:rire, amwi ataremere, na:ika ati, Anye nitari Kristo. 21Nibamubu:sya ati, Mbe nawe:ga? Uri Eliya? Na:ika ati, Anye ntari niwe. ?Na:we omuragi uriya? Naindura ati, Tere. 22Mbe nibamubu:sya ati, Na:we:ga? Nucibwire korereki cibaindure banu bacitumire. ?Owitogaga? 23Na:ika ati, Anye ndi buraka bwa unu ka:ikirira inguru mwibara ati, Mumugororere Ratabugenyi injira, rwo muragi Isaya kutyo a:ikire.
24Banu bariga batumirwe, bariga ba mu Bafarisayo. 25Nibamubu:sya ati, ?Ka araba awe utari Kristo, amwi Eliya, amwi omuragi uriya, kambe cinu oukora nubatija niki? 26Yoana nabaindura ati, Anye enibabatija na manji. Agati yemwe emereguyumo unu mutakumenya. 27Unu niwe ka:ja inyuma yani, anye nite:ire kugesya orukoba rwe cikwirya cae. 28Ebyo byakoreywe Betabara, ku ngego yenderya ya Yorodani, enu Yoana abatijisyaga.
29Mwejo Yoana narora Yesu namu:jako, na:ika ati, Rora, Omwana wa Ina:ma wa Nyamuanga, Unu kaso:syao ebibi:bi bye ca:ro. 30Oyo niwe nababwiriye ati, Inyuma yani ka:ja omu:nu unu ankirire ecibaro, okuba Omwene niwe antangatiye. 31Nanye nariga nitamumenyere, nawe korereki abu:risibwe ku Israeli, kwonakorere nini:ja nimbatija na manji. 32Yoana namwimako na:ika ati, Anye narora Omwoyo naso:ka mu rwire rwa injiba, namubako. 33Nanye nariga nitamumenyere, nawe Unu antumire okubatija na manji, Omwene niwe ambwiriye ati, Unu urirora Omwoyo ne:ka namubako, oyo niwe kabatija no Mwoyo Mweru. 34Mbe anye nindora, nimwimako ati, Oyo niwe Omwana wa Nyamuanga.
Abe:igisibwa ba Yoana nibaru:ba Yesu
35Mwejo rindi Yoana ariga emereguyu na beigisibwa bae babiri. 36Narore:rera Yesu naribata, na:ika ati, Rora Omwana wa Ina:ma wa Nyamuanga. 37Abe:igisibwa abo ababiri nibongwa na:ika, nibamuru:ba Yesu. 38Yesu ne:kebukira nabarora nibamuru:ba, nababu:sya ati, ?Omuyenja ki? Nibamubu:sya ati, ?Wikae a:ki Rabbi? Obugajuro bwaryo ati, Omwiigisya. 39Nababwira ati, Mu:je murore. Nibaja nibarora anu ariga e:kae, nibaba ewae rusiku urwo. Jariga uti saa ekumi. 40Anderea, owabo Simoni Petero, niwe oumwi ku babiri banu bonguywe binu Yoana a:ikire, nibamuru:ba. 41Omwene niwe ambire okubona omumura wabo Simoni, namubwira ati, camurorere Masiya, obugajuro bwaryo ati, Kristo. 42Namure:ta ku Yesu. Yesu namurore:rera na:ika ati, Na:we Simoni wa Yona. Uritogwa Kefa, obugajuro bwaryo Petero, norwo ribui.
Filipo na Natanaeli nibamuru:ba Yesu
43Mwejo Yesu endere okuso:kayo agende Galilaya. Namurora Filipo, namubwira ati, Ndu:ba. 44Nawe Filipo ariga:ri wa Betesaida, mu musi gwa Anderea na Petero. 45Filipo namubona Natanaeli, namubwira ati, Cabwene unu Musa andikire mu biragiro, na baragi unu bandikire, niwe Yesu wa Yusufu, owende Najareti. 46Natanaeli namubu:sya ati, ?Mu Najareti ecitura okuso:kayo eci:nu cire:si? Filipo namubwira ati, Ija urore. 47Yesu narora Natanaeli namu:jako, namwaika ati, Rora Muisraeli rumara unu atarimo burigerige! 48Natanaeli namubu:sya ati, ?Wa:menyee a:ki? Yesu naindura namubwira ati, Filipo anu ariri acari kukubirikira, anu wariri mwiti ryo mutini, ngwekurora. 49Natanaeli naindura namubwira ati, Rabbi, na:we Omwana wa Nyamuanga, na:we Omukama wa Israeli. 50Yesu naindura namubu:sya ati, ?Okwo nakubwira ati, nakurora mwiti ryo mutini, kwowakora niwikirisya? Urirora ebikuru kukira ebyo. 51Namubwira ati, Ni cimari cimari enibabwira ati, Murirora orwire rwigukire na bamaraika ba Nyamuanga nibarinya na ka nibe:kira ku Mwana wo mu:nu.
Nu geselecteerd:
Yoana 1: KIJ1960
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kijita New Testament © The British and Foreign Bible Society and The Bible Society of Tanzania, 1960.
