Matyù 5
5
Ànwùə̀ Nẅùə̀ nɨ Yěsû à lə̀ shwəŋə̀nə a àtwuə̀ mbarə̀
(Luk 6.20-23)
1Nkwùə̀ nɨ Yěsû à lə̀ zəənə̀nə ɨ̀pùŋə̀ pə̀ənə̀ pə, à lə̀ tyiʼə̀ nkoʼò ndèrə̀ a àtwuə̀ mbarə̀, nnwuunə̀ a ɨ̀shyə̂. Ɨ̀zùŋə̀ ndzùmə̀ ɨ̀pe zùŋə̀ e ntô nnwuunə̀ a nɨ̀pwùnə ze. 2A pìʼnə̀ a nɨ təətə̀ a ghobə nshwəŋə̀ lo,
3“Mborə̀ ɨ̀ chyə̂ ambo pànə̀ nɨ pobə fumə̀nə amwuə Àzhwùə̀,
ntiinə ànwùə̀ Nɨ̀fò nɨ̀pwuurə̀ la àzobə.
4Mborə̀ ɨ̀ chyə̂ ambo pànə̀ nɨ mɨ̀ntɨŋmə̀ ɨ̀mobə mənə nsòmnə̀,
ntiinə Nẅùə̀ à ghǎ porəkə̀ mɨ̀ntɨŋmə̀ ɨ̀mobə.
5Mborə̀ ɨ̀ chyə̂ ambo pànə̀ nɨ pobə pa nshwuʼkə̀ mbɨ̀ŋmə̀ ɨ̀zobə a ɨ̀shyə̂,
ntiinə pobə ghǎ kẅiirə̀ àzwuumə̀ nɨ Nẅùə̀ à kàʼnə ambo pobə.
6Mborə̀ ɨ̀ chyə̂ ambo pànə̀ pa nɨ pobə mənə ntàʼà ghɨ̀rə̀ mɨ̀nwùə̀ nɨ mɨ təəmə̀nə a mbyə̀ Nẅùə̀,
ntiinə pobə ghǎ zwurə̀.
7Mborə̀ ɨ̀ chyə̂ ambo pànə̀ nɨ pobə pa nkoorə̀ mɨ̀lɨŋə̀ mɨ pə̀ənə̀,
ntiinə Nẅùə̀ à ghǎ kɨ koorə̀ mɨ̀lɨŋə̀ ɨ̀mobə.
8Mborə̀ ɨ̀ chyə̂ ambo pànə̀ nɨ mɨ̀ntɨŋmə̀ ɨ̀mobə laanə̀nə,
ntiinə pobə ghǎ zəənə̀ a Nẅùə̀.
9Mborə̀ ɨ̀ chyə̂ ambo pànə̀ nɨ pobə pa nfàʼà lo àporə̀porə̀ â pə a tɨ̀tɨ̀rə̀ pə̀ənə̀,
ntiinə pɨ ghǎ fuŋə̀ a ghobə nɨ ɨ̀poonə̀ pɨ Nẅùə̀.
10Mborə̀ ɨ̀ chyə̂ ambo pànə̀ nɨ pɨ pa nnyàŋə̀ a ghobə, ntiinə pobə pa ngɨ̀rə̀ mɨ̀nwùə̀ nɨ mɨ təəmə̀nə,
ànwùə̀ Nɨ̀fò nɨ̀pwuurə̀ la àzobə.”
11“Mborə̀ ɨ̀ chyə̂ ambo pɨghə mbə̀ʼə pɨ mə ndzòomə̀ a wɨghə, nnyàŋə̀ a wɨghə, nkɨ mmə nshwəŋə̀ mbuurə̀ ɨ̀nwùə̀ tɨ̀pòŋə̀ ɨ̀tsùmə̀ àtwuə̀ pɨghə tyìʼə̀ àfǐfǐ mbə̀ʼə mə̀. 12Nɨ̀ mə ngaʼà, nkɨ mə ntèrə̀ ntiinə mɨ̀ntsoʼnə̀ mɨ àfàʼà mɨ̀noʼnə chyə̂ ambo pɨghə a nɨ̀pwuurə̀. Ntiinə pɨ lə̀ kɨ nnyàŋə̀ ngàŋə ntwuumə̀ Nẅùə̀ zhyə̀ nɨ lə̀ pənə a mbyə̀ pɨghə.”
Ngwaŋə̀ pobə nkàʼà
(Mrk 9.50; Luk 14.34-35)
13“Pɨghə la ngwaŋə̀ mɨ àtwuə̀ ɨ̀shyə̂ zə̀. La ngwaŋə̀ tə pəla mbî nɨ̀lɨ̀ŋmə̀ e, pɨ pòŋə̀ ghɨ̀rə̀ lə ɨla lo mèrə chi ndɨ̀ŋmə̀? Ka àfàʼà e a chyə̂ mbə e ghu, mbòŋə̀ lo pɨ̀ kẅìrə̀ a mèrə pànə̀ tyiʼə̀ mmə nnyə̀nkə̀ nɨ mɨ̀kwùə̀.
14“Pɨghə la nkaʼà amwuə àtwuə̀ ɨ̀shyə̂ zə̀. Mbə̀ʼə mbòmpə àlaʼà za nɨ pɨ korə̀nə àtwuə̀ kòŋə̀ la ɨ̀ laʼa ndə̀əmə̀ e apə̀. 15Ka pɨ̀ tswuʼə̀ e làamə̀ nkumnə̀ a ɨ̀sùmə nɨ̀kwùʼə̀, pɨ pa ntə̂ la àtwuə̀ aləŋə mbə̀ʼə â kyàʼà pànə̀ pɨ̀tsùmə̀ amwuə ndâ. 16Nɨ ndwuumə̀ wə̀, nɨ̀ ghɨ̀rə̀ nkàʼà ɨ̀wɨghə kɨrə̀ a ɨ̀myə̂ pə̀ənə̀, pobə zəənə̀ ngɨ̀rə̀ mɨ̀nwùə̀ ɨ̀zɨghə yɨ̀ ɨ̀shìʼnə̀ mbə̀ʼə tyiʼə̀ ghuʼtə̀ a Tǎ ɨwɨghə a nɨ̀pwuurə̀.”
Yěsû a nèrə̀ ànwùə̀ nɨ mbòomə Nẅùə̀ à wa nshwəŋə̀
17“Kò nɨ̀ kwàŋə̀ a wɨghə lo ǹtô la a nɨ pyaatə̀ a mbòomə nɨ à pənə amwuə àŋwàʼnə̀ Mǔsî kə̀ ànwùə̀ nɨ a pənə amwuə àŋwàʼnə̀ ngàŋə̀ ntwuumə̀ Nẅùə̀. Ka ǹtô mə̀ la a nɨ pyaatə̀ mbòomə, ǹtô pə a nɨ lẅenə̀. 18Ǹshwəŋə̀ tyìʼə̀ nkǔŋə nkuŋə ambo pɨghə lo, mbə̀ʼə taʼà ànwùə̀ amwuə mbòomə a laʼa mbî apə̀, tə mbyàa nkwùə̀ nɨ àtwuə̀ ɨ̀shyə̂ ghobə nɨ̀pwuurə̀ ghǎ myə̀. Mɨ̀nwùə̀ mɨ̀tsùmə̀ nɨ mɨ pənə amwuə mbòomə wə̀ ghǎ ghɨ̀rə̀. 19Ŋònə̀ nɨ ǎ pəʼə̀ tyìʼə̀ a mɨlyiʼə ntə̌ wə̀ yɨ̀tse kɨ nèrə̀ ambo pɨ̀tse pànə̀ lo pobə̂ kɨ ngɨ̀rə̀ a lenə, pɨ ghǎ fuŋə̀ e nɨ ŋònə̀ nɨ à kɨ̂nə ndẅùutə̀ amwuə Ànwùə̀ Nɨ̀fò nɨ̀pwuurə̀. La ŋònə̀ nɨ ǎ nùŋə̀ mɨ̀ntə̌ mèrə mə, kɨ mèrə̀kə̀ pɨ̀tse pànə̀ lo pobə̂ kɨ nnùŋə̀ àzobə, pɨ ghǎ fuŋə̀ e nɨ ŋònə̀ ngẅùunə amwuə Ànwùə̀ Nɨ̀fò nɨ̀pwuurə̀. 20Ǹshwəŋə̀ a wɨghə lo ngɨ̀rə̀ mɨ̀nwùə̀ ɨ̀zɨghə tə ka təəmə̀ e tsàarə̀ yɨ̀ pɨ̀nèrə̀ mbòomə pobə pɨ̀Farìsî, nɨ̀ ghǎ nkwuunə̀ a wɨghə amwuə Ànwùə̀ Nɨ̀fò nɨ̀pwuurə̀ apə̀.”
Ànwùə̀ mbə̀ʼə nɨ zaŋə̀ a loŋə ghobə nɨ̀zhwuutə̀ ŋwùə̀
21“Nɨ̀ zuʼù mə lo pɨ laʼa nshwəŋə̀ ambo ngàŋə mbyə̀ lo ‘Kò nɨ̀ zhwuutə̀ ŋwùə̀, ngəʼə̀ ɨ̌ pə aŋunə ŋònə̀ nɨ ǎ ghɨ̀rə̀ a lenə aŋunə njyə̂ ntsòʼtə mɨ̀sàʼa.’ 22La ǹshwəŋə̀ a wɨghə lo ŋònə̀ nɨ à wa ndzaŋə̀ a loŋə aŋunə ndyimə e, à kùʼnə̀ lo pɨ chyâ ɨ̀sàʼa aŋunə ze. Ŋwùə̀ a zòomə̀ a ndyimə e, a kùʼnə̀ lo pɨ̀ lòo e ngə̀ a mbyə̀ ngàŋə̀ nsaʼà mɨ̀sàʼa. Pɨ ghǎ màʼà a ŋònə̀ nɨ à fuŋə̀nə a ndyimə e nɨ àpuukə̀ amwuə ɨ̀mǔ tɨ myə̀. 23Wə̀ tə pəla ntô a nɨ ŋâ nchàʼtə Nẅùə̀ o a alyiʼə mɨ̀shwàʼà Nẅùə̀ nkẅempə̀ lo wə̀ fàntə̀ ànwùə̀ ambo ndyimə o, 24wə̀ myàʼtə̀ nchàʼtə Nẅùə̀ o a alyiʼə ghu ngə̀ nshwàatə̀ ànwùə̀ ghu zaʼà mbòŋə̀ kẅirə̀ tô ŋâ nchàʼtə Nẅùə̀ o za.
25“Myàanə̀ ɨ̀sàʼa pɨghə ŋònə̀ nɨ à chyânə ɨ̀sàʼa aŋunə ghò â pòŋə̀ lòo o ghə̀ kwuunə̀ amwuə ndâ ɨ̀sàʼa, ntiinə pɨghə ze tə ghə̀ nkwuunə̀ amwuə yi ǎ ŋâ o ambo ngàŋə̀ nsaʼà mɨ̀sàʼa pobə̂ ŋâ o ambo ngàŋə̀ mbyabə̀ nkaʼà ɨ̀tsaŋə̀ mbə̀ʼə â chyâ o amwuə ɨ̀tsaŋə̀. 26Ǹshwəŋə̀ tyìʼə̀ nkǔŋə nkuŋə ambo ghò lo wə̀ tə kwuunə̀ a ɨ̀tsaŋə̀ gha yi wə̌ chyə̂ amwuə tə pyàa nkwùə̀ nɨ wə̌ twuə̀ nkabə̀ nɨ wə̀ ẅìimə̀nə e nɨ zèrə ntsùmə̀, tə mbyàa aŋunə ndẅùə̀ndzùmə̀ nkabə̀.”
Ànwùə̀ mbə̀ʼə àfànə̀
27“Nɨ̀ lə̀ zuʼù nkwùə̀ ntsàambyə̀ lo, ‘Kò wə̀ ghɨ̀rə̀ àfànə̀.’ 28La ngwə̀ nshwəŋə̀ a wɨghə lo, ŋònə̀ nɨ à naŋə̀nə a mə̀ngyə̌ mbə nɨ ntoŋə aŋunə ẅèrə la, à ghɨ̀rə̀ mə àfànə̀ pobə ze amwuə ntɨŋmə̀ e. 29Lenəla, nɨ̀lyə̂ ɨ̀tsô tsɨ̀ zɨghə̀nə tə pəla ngɨ̀rə̀ lo wə̀ ghɨ̀rə̀ ànwùə̀ tɨ̀pòŋə̀ wə̀ tsoʼò ngwaʼà. A pòŋə̀ ambo ghò a nɨ pî alaamə mbɨ̀ŋmə̀ o yètse ntsàarə̀ a nɨ màʼà mbɨ̀ŋmə̀ o ntsùmə̀ amwuə àkɨɨnə̀ ɨ̀mǔ. 30Mbə̀ʼə àpô o yè zɨghə̀nə a ghɨ̀rə̀ lo wə̀ kwuunə̀ amwuə ngɨ̀rə̀ ɨ̀nwùə̀ tɨ̀pòŋə̀ wə̀ lə̂ a zèrə ngwaʼà. A pòŋə̀ lo wə̀ pî a taʼà àpô o ntsàarə̀ a nɨ pî mbɨ̀ŋmə̀ o ntsùmə̀ amwuə àkɨɨnə̀ ɨ̀mǔ.”
Ànwùə̀ mbə̀ʼə nɨ̀ghàbə̀ nɨ̀zoʼò
(Mat 19.19; Mrk 11–12; Luk 16.18)
31“Pɨ lə̀ shwəŋə̀ amwuə mbòomə Mǔsî lo, ‘Ŋònə̀ nɨ à fuukə̀nə a ngẅùə e a ndâ ze, â zəənə̀ lo à ŋâ àŋwàʼnə̀ nɨ̀ghàbə̀ nɨ̀zoʼò ambo ze’ 32La ǹshwəŋə̀ a wɨghə lo mbə̀ʼə ŋwùə̀ a fuukə̀ a ngẅùə e a ndâ, ka fuukə̀ e a ye pə ntii ànyòrə̀kə̀, yi à tsàa e la a atwurə àfànə̀. Ŋònə̀ mbyàŋnə̀ nɨ à zoʼnə e à kɨ ngɨ̀rə̀ la ànwùə̀ àfànə̀ pobə ze.”
Ànwùə̀ mbə̀ʼə nɨ̀tsə̀əmə̀
33“Nɨ̀ lə̀ zuʼù mə lo pɨ lə̀ shwəŋə̀ nkwùə̀ ntsàambyə̀ lo, ‘Kò nɨ̀ kɨ ntsə̀əmə̀ mɨ̀ntsə̀əmə̀, la wə̀ pəla mbyə̀ ntsə̀əmə̀ ambo Ndòʼnə̀mbyə̂ lo wə̌ ghɨ̀rə̀ ànwùə̀, wə̀ ghɨ̀rə̀ ànwùə̀ ghu.’ 34La ǹkùmə̀ mmə nshwəŋə̀ a wɨghə lo kò nɨ̀ pyə̀ ntsə̀əmə̀ ntiinə nɨ̀ tə tsə̀əmə̀ aŋunə nɨ̀pwuurə̀ yi la alyiʼə nɨ aləŋə nɨ̀fò Nẅùə̀ a pənə. 35Kə̀ aŋunə ɨ̀shyə̂ ntiinə la alyiʼə nɨ Nẅùə̀ à wa ntəətə̀ mɨ̀kwùə̀ ɨ̀me aŋunə. Kə̀ aŋunə Yèrusalèmə̀ ntiinə a pàa àlaʼà ɨ̀fò ngẅùunə. 36Kò wə̀ pyə̀ ntsə̀əmə̀ aŋunə àtwuə̀ o, ntiinə mbə̀ʼə ka wə̀ tsùŋə̀ o ɨ̀nyùŋə̀ fuə moʼo kə̀ a yɨ̀ shyə aŋunə. 37Nɨ̀ ghɨ̀rə̀ ‘ee’ ɨwɨghə â pə ‘ee,’ kə̀ ‘ngaŋə’ ɨwɨghə â pə ‘ngaŋə’; ànwùə̀ yè nyaanə nɨ nɨ̀ kẅìʼnə̀nə nshwəŋə̀ a furə̀ la ambo ngàŋə̀ àfɨ̀ghə̀.”
Ànwùə̀ mbə̀ʼə nɨ̀kẅuə̀ a tɨ̀pòŋə̀
38“Nɨ̀ lə̀ zuʼù mə tsaʼnə pɨ lə̀ shwəŋə̀nə lo, ‘Kẅuə̀ nɨ̀lyə̂ nɨ nɨ̀lyə̂, nkɨ nkẅuə̀ nɨsoŋə nɨ nɨsoŋə.’ 39La ǹshwəŋə̀ a wɨghə lo, kò nɨ̀ kẅuə̀ a tɨ̀pòŋə̀ àtwuə̀ tɨ̀pòŋə̀. Ŋwùə̀ à tə pəla ndùbə̀ nɨ̀ghə̀ʼə̀ ɨ̀tsô tsɨ̀ zɨghə̀nə, wə̀ pə̀ŋə̀ a chyə̀ ŋŋâ ambo ze. 40Ŋwùə̀ à tə lòo o a ndâ ɨ̀sàʼa mmə ntàʼà a nɨ kẅiirə̀ atsəʼə o yè màʼnə, wə̀ ŋâ e nɨ atsəʼə ɨ̀fə̂ o. 41Ŋwùə̀ a nyìimə̀ lo wə̀ kẅiirə̀ e ndèrə̀ a taʼà ntàamə̀, wə̀ pyiimə̀ ntyiʼə̀ ndèrə̀ ntàamə̀ ɨpaa. 42Ŋwùə̀ a loonə̀ àzwuumə̀ ambo ghò, wə̀ ŋâ; kò wə̀ kɨ ntwuunə̀ a nɨ tsoʼkə̀ a ŋwùə̀ nɨ àzwuumə̀.”
Kòŋə̀ a ngàŋə̀ kɨpaanə o
43“Nɨ̀ laʼa ndzuʼù tsaʼnə pɨ lə̀ shwəŋə̀nə lo, ‘Kòŋə̀ a ndyimə o, mbàanə̀ a ngàŋə̀ mbwùunə̀ o.’ 44La ngwə̀ nshwəŋə̀ a wɨghə lo nɨ̀ mə nkòŋə̀ ngàŋə mbwùunə̀ ɨ̀zɨghə, mmə nchàʼtə̀ a Nẅùə̀ àtwuə̀ pànə̀ nɨ pobə pa nnyàŋə̀ a wɨghə. 45Nɨ ndwuumə̀ wə̀, nɨ̀ tyiʼə̀ nfàʼà tsaʼa ɨ̀poonə̀ pɨ tǎ ɨwɨghə nɨ à pənə a nɨ̀pwuurə̀, ntiinə à wa ngɨ̀rə̀ nẅùumə̀ a tâ àtwuə̀ pànə̀ pɨ tɨ̀pòŋə̀ pobə pɨ̀shìʼnə̀, mmə ngɨ̀rə̀ mbə̀ŋə̀ ɨ̀ lô aŋunə pànə̀ nɨ mɨ̀nwùə̀ ɨ̀mobə laanə̀nə pobə pyə̀ nɨ ka mɨ̀nwùə̀ ɨ̀mobə laanə̀ e. 46Nɨ̀ tə pəla mmə nkòŋə̀ pə ndàʼà pànə̀ nɨ pobə pa nkòŋə̀ a wɨghə, Nẅùə̀ a tyiʼə̀ ntsoʼò àfàʼà àzɨghə ntii àkə? Mbaa pə pɨ̀nkẅiirə̀ pɨ̀taghə̀, ka pobə mə ngɨ̀rə̀ a ghobə lə a lenə? 47Nɨ̀ tə mbəla mmə nchàʼtə̀ pə ndàʼà pɨ̀momaa ɨ̀pɨghə, ànwùə̀ ɨ̀shìʼnə̀ nɨ nɨ̀ tyiʼnə ngɨ̀rə̀ ntsàarə̀ a pɨ̀tse pə̀ənə̀ a pə la àkə? Yi tyìʼə̀ pɨ̀tɨ̀pyiimə̀ a Nẅùə̀ pa nkɨ ngɨ̀rə̀ àzobə la a lenə? 48Nɨ̀ ghɨ̀rə̀ mɨ̀nwùə̀ ɨ̀mɨghə mèrə təəmə̀ ɨ̀shìʼnə̀ tsaʼnə mɨ tǎ ɨwɨghə a nɨ̀pwuurə̀ kɨnə ntəəmə̀ ɨ̀shìʼnə̀ la.”
Nu geselecteerd:
Matyù 5: pny
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2017, Cameroon Association for Bible Translation and Literacy
