Matyù 4

Satàanə̀ a kwàʼnə̀ a Yěsû

(Mrk 1.12-13; Luk 4.1-13)

1Zèrə̀ za ànwùə̀ a ghə̀ a nɨ làŋə̀, Àzhwùə̀ Nẅùə̀ a tsàa a Yěsû a alyiʼə waakə lo Satàanə̀ â kwàʼnə̀ e ghu. 2À lə̀ pə ghu mɨ̀twuʼə̀ mɨ̀ghumə̀ nɨ̀kwàa ghobə mɨ̀njyə̂ mɨ̀ghumə̀ nɨ̀kwàa ka zɨghə̀ e, njyə̀ ɨ̀ tyiʼə̀ mmə ndzaŋə̀ e. 3Ngàŋə̀ àkwàʼnə̀ wa a tô nshwəŋə̀ ambo ze lo, “Wə̀ pəla mbə Moonə̀ Nẅùə̀ wə̀ pə̀ŋə̀ mɨ̀ghòorə mə mɨ tyiʼə̀ àpaanə̀.”

4Yěsû a kẅùə̀ lo, “Pɨ ŋwàʼnə̀ amwuə àŋwàʼnə̀ Nẅùə̀ lo, ‘Ka ŋwùə̀ a chyə̂ e a mbyə̂ la mbə̀ʼə ndàʼà àpaanə̀, à chyə̂ pə aŋunə àshwəŋnə̀ àtsùmə̀ nɨ a furə̀nə a ntswùə̀ Nẅùə̀.’”

5Lenəla Satàanə̀ a lòo a Yěsû ndèrə̀ a Yèrusalèmə̀, nɨ à pənə àlaʼà yè laanə̀nə, ntə̂ e a ngotə àtwuə̀ Ndâ Mɨ̀shwàʼà Nẅùə̀, 6nshwəŋə̀ ambo ze lo, “Wə̀ pəla mbə Moonə̀ Nẅùə̀ wə̀ furə̀ àtwuə̀ ndâ ghə ntsoʼnə̀ nkànə̀ a ɨ̀shyə̂, ntiinə pɨ ŋwàʼnə̀ amwuə àŋwàʼnə̀ Nẅùə̀ lo:

‘Nẅùə̀ ǎ shwəŋə̀ ambo pəngèrə̀ ɨ̀pe mbə̀ʼə o;

pobə̂ tyiʼə̀ nderəkə̀ o a àtɨ̀ghə ntwuʼtə̀ o amwuə mbô ɨ̀mobə

mbə̀ʼə wə̀ kaŋə tsòo àkwùə̀ o aŋunə nɨ̀ghòorə.’”

7Yěsû a kẅùə̀ lo, “La àŋwàʼnə̀ Nẅùə̀ a za nkɨ nshwəŋə̀ lo, ‘Kò wə̀ laʼa nkwàʼnə̀ a Ndòʼnə̀mbyə̂ Nẅùə̀ o.’”

8Lenəla Satàanə̀ a chi ndòo a Yěsû nkoʼò ndèrə̀ a ngotə àtwuə̀ mbarə̀ yɨ̀ sàa, nnèrə̀ e nɨ ɨ̀laʼà ɨ̀tsùmə̀, pyə̀ nɨ pɨ̀fò pɨ àtwuə̀ ɨ̀shyə̂ pa nsaʼà pobə pɨ nɨ̀pòŋə̀ ɨghobə, 9nshwəŋə̀ ambo ze lo, “Mbɨ ŋâ ɨ̀pwuumə̀ pə̀ ɨ̀tsùmə̀ ambo ghò mbə̀ʼə wə̀ pəla ŋŋuʼnə̀ a ɨ̀shyə̂ nguʼtə̀ mə̀.”

10Yěsû a kẅùə̀ lo, “Lòo ndèrə̀, ngàŋə̀ àfɨ̀ghə̀! Pɨ ŋwàʼnə̀ amwuə àŋwàʼnə̀ Nẅùə̀ lo, ‘Kɨ nguʼtə̀ pə a Ndòʼnə̀mbyə̂ Nẅùə̀ o nkɨ mmə nfàʼà pə ambo ze ndàʼà.’”

11Ngàŋə̀ àfɨ̀ghə̀ wə̀ a tyiʼə̀ mmyàʼtə̀ e ndèrə̀ e; pəngèrə̀ tô nkẅiirə̀ a Yěsû.

Yěsû a pìʼnə̀ àfàʼà e a Galìlyə̂

(Mrk 1.14-15; Luk 4.14-15)

12Yěsû à lə̀ zuʼù lo pɨ chyâ a Jònə ngàŋə̀ àŋâ àkẅiirə̀ nchyə a ndâ ɨ̀tsaŋə̀, ntyiʼə̀ nfurə̀ ndèrə̀ a Galìlyə̂. 13Ka à lə̀ ghoŋə̀ e a Nazarètə̀; à lə̀ furə̀ ngə̀ mmə nchyə̂ a Kàpenòmə̀ a nɨ̀pwùnə atəŋə Galìlyə̂, a pàa àlaʼà Zebulùnə̀ pobə Naftalì. 14A lə̀ furə̀ la a nɨ lẅenə̀ ànwùə̀ nɨ ngàŋə̀ ntwuumə̀ Nẅùə̀ Ìsayà à lə̀ shwəŋə̀nə lo,

15“Àlaʼà Zebulùnə̀ pobə ɨ̀shyə̂ pànə̀ pɨ Naftalì,

pyə̀ nɨ pèrə pənə a nɨ̀pwùnə nkàŋə̀ nchyə Jodànə̀ amwuə Galìlyə̂ wə̀ nɨ à pənə àlaʼà pànə̀ nɨ ka pobə pə ghobə pɨ̀Jew.

16Pànə̀ nɨ pobə lə̀ pənə amwuə ndzùmə, pobə zəənə̀ nkàʼà ghu ẅùunə;

pyə̀ pa nɨ pɨ lə̀ pənə amwuə àlaʼà nɨ ləgrə nɨ̀wɨghə̀ à lə̀ pənə ghu la, nkàʼà ɨ̀ kyàʼà mə a ghobə.”

17A nɨ furə̀ nkwùə̀ ghu, Yěsû a pìʼnə̀ a nɨ chwìitə̀ ntwuumə̀ Nẅùə̀ lo, “Nɨ̀ pə̀ŋə̀ mɨ̀ntɨŋmə̀ ɨ̀mɨghə, mmyàʼtə̀ a tɨ̀pòŋə̀ ɨwɨghə, ntiinə ànwùə̀ Nɨ̀fò nɨ̀pwuurə̀ a tyiʼə̀ a mbô.”

Yěsû a fuŋə̀ pɨ̀nkootə̀ ɨ̀swuə̀ nɨ̀kwàa

18Yěsû à lə̀ mə ngyìinə̀ a nkàŋə̀ nchyə ghu nɨŋnə̀nə a Galìlyə̂ ndzəənə̀ pɨ̀nkootə̀ ɨ̀swuə̀ pɨpaa; pobə lə̀ pə Shimùnə̀ ẅùə̀ nɨ pɨ lə̀ mənə nfuŋə̀ nɨ Pità pobə momaa e Andrù. Pobə lə̀ mə mmàʼà àlàʼà amwuə nchyə ghu a nɨ kootə̀ ɨ̀swuə̀. 19Yěsû a shwəŋə̀ ambo pobə lo, “Nɨ̀ tô ndzùŋə̀ mə̀, mbɨ ghɨ̀rə̀ nɨ̀ tyiʼə̀ nkootə̀ pə pə̀ənə̀.” 20Pobə lə̀ zùŋə̀ mmyàʼtə̀ ɨ̀làʼà ɨ̀pobə pa ndzùŋə̀ e.

21Pobə pɨ pobə lə̀ nyaʼa kɨ yìinə̀ tyìʼə̀ lə, a chi ndzəənə̀ ɨ̀pômbyàŋnə̀ pɨpaa: Jemə̀ pobə Jònə nɨ pobə pənə ɨ̀poonə̀ pɨ Zebedì. Pobə pɨ tǎ ɨghobə Zebedì lə̀ pə amwuə àkànwuʼə, ntsùŋə̀ ɨ̀làʼà ɨ̀pobə. Yěsû a fuŋə̀ a ghobə. 22Pobə zùŋə̀ mmyàʼtə̀ a àkànwuʼə ambo tǎ ɨghobə ndzùŋə̀ a Yěsû.

Yěsû a nèrə̀ ɨ̀nwùə̀, nchwìitə̀ ntwuumə̀ Nẅùə̀, nkɨ mbarə̀ pɨghoonə a Galìlyə̂

(Luk 6.17-19)

23Yěsû à lə̀ tyiʼə̀ mmə nkarə̀ àlaʼà Galìlyə̂ àtsùmə̀ mmə nèrə̀ ɨ̀nwùə̀ amwuə mɨ̀ndâ mɨ àshwatə̀ mɨ pɨ̀Jew, nkɨ mmə nchwìitə̀ ntwuumə̀ ghù ɨ̀shìʼnə̀ mbə̀ʼə ànwùə̀ Nɨ̀fò nɨ̀pwuurə̀. À lə̀ mə mbarə̀ pɨghoonə pobə ɨ̀lòʼo ɨ̀tsùmə̀ nɨ pənə aŋunə pə̀ənə̀. 24Ànwùə̀ mbə̀ʼə e a lə̀ tyiʼə̀ nsìimə̀ amwuə àlaʼà Siryà àtsùmə̀, pànə̀ tyiʼə̀ ndòo pɨghoonə pɨ̀tsùmə̀ ntô ambo ze. À lə̀ parə̀ pànə̀ nɨ pobə lə̀ pənə nɨ ɨghoonə a mbuurə̀ mbuurə̀, nɨ pànə̀ nɨ pobə lə̀ mənə ndzuʼù àndzaŋə àtsùmə̀, nɨ pànə̀ nɨ ɨ̀zhyə̂ lə̀ pənə amwuə pobə, nɨ ngàŋə àkɨ̀pwùrə̀ pobə pànə̀ nɨ mbɨ̀ŋmə̀ ɨ̀zobə lə̀ kwɨghə̀nə a pàa moʼo. 25Ɨ̀pùŋə̀ pə̀ənə̀ pɨ̀ẅùunə lə̀ tyiʼə̀ ndzùŋə̀ e nfurə̀ a Galìlyə̂ nɨ mɨ̀mbòmpə mɨ ɨ̀laʼà ma nɨ̀ghumə̀, nɨ Yèrusalèmə̀, nɨ Judyà farə ɨ̀laʼà nɨ pənə a nɨ̀pwùnə nchyə Jodànə̀ ɨ̀tsùmə̀.

Nu geselecteerd:

Matyù 4: pny

Markering

Deel

Kopiëren