Psalmyn 9
9
MORNING PRAYER.
PSAL. 9.
Confitebor tibi.
1Ver-yms booise dhyts, O Hiarn, lesh ooilley my chree:
loayr-ym jeh ooilley dty obbraghyn mirrillagh.
2Bee’ms gennal as goym boggey ayn-yds:
dy-jarroo, my arraneyn nee’m y yannoo jeh dt’Ennym, O Uss smoo Ard.
3Choud as ta my noidyn er nyn imman ersooyl:
nee ad tuittym as cherraghtyn ec dt’enish.
4Son t’ow er vendeil my chairys as my chooish:
t’ow dty hoie er stoyl-reeoil dy vriwnys cairagh.
5T’ow er choyrt oghsan da ny ashoonyn, as er stroie ny mee-chrauee:
t’ow er choyrt ass yn ennym oc son dy-bragh as dy-bragh.
6O uss noid, ta traartyssyn er jeet gys slane jerrey:
eer myr ny ard-valjyn t’ow er stroie; ta’n imraa oc er gholl naardey mâroo.
7Agh ta’n Chiarn farraghtyn son dy-bragh:
t’eh myrgeddin er chiarail e stoyl-reeoil son briwnys.
8Son nee eh yn seihll y vriwnys ayns cairys:
as shirveish briwnys firrinagh er y pobble.
9Bee yn Chiarn neesht fendeilys dauesyn ta tranlaasit:
dy-jarroo kemmyrk ayns y traa cooie dy heaghyn.
10As adsyn shione daue dt’Ennym, ver nyn dreishteil ayn-yds:
son cha vel uss, Hiarn, rieau er hreigeil adsyn ta dy dty hirrey.
11O moylley-jee yn Chiarn ta vaghey ayns Sion:
soilshee-jee da’n pobble cre t’eh er n’yannoo.
12Son tra t’eh jannoo briaght son deayrtey fuill dyn loght, t’eh cooinaghtyn orroo:
as cha vel eh jarrood accan ny ymmyrchee.
13Jean myghin orrym, O Hiarn; smooinee er y seaghyn ta mee dy hurranse lioroosyn ta dwoaie oc orrym:
uss ta dy my hroggal seose veih giattyn y vaaish;
14Dy voddym soilshaghey ooilley dty voylley cheu-sthie jeh giattyn inneen Sion:
nee’ms boggey ’ghoaill ayns dty haualtys.
15Ta ny ashoonyn er duittym sheese ayns yn ooig t’ad hene er n’yannoo:
ayns y ribbeh cheddin dollee ad dy-follit, ta’n chass oc hene er ny ghoaill.
16Ta fys ain dy vel y Chiarn cooilleeney briwnys:
ta’n mee-chrauee er ny chassey ayns obbyr e laueyn hene.
17Bee ny drogh-yantee er nyn jyndaa gys niurin:
as ooilley yn sleih ta jarrood Jee.
18Son cha bee’n boght dy-kinjagh er ny yarrood:
cha jean farkiaght surransagh ny imlee cherraghtyn son dy-bragh.
19Trogg ort, Hiarn, as ny lhig da dooinney laue yn eaghtyr y gheddyn:
lhig da ny ashoonyn v’er nyn mriwnys ayns dty hilley.
20Cur ad ayns aggle, O Hiarn:
dy vod fys ’ve ec ny ashoonyn nagh vel ad hene agh deiney.
Nu geselecteerd:
Psalmyn 9: PS1765
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
maintained by the British and Foreign Bible Society