Esta 6
6
Kanabate Modekai pakamiyana gi
1A:ma isa menagila kanaba pa:pa sa:lele teneyana, a:pite oba gilala miyana obape okonate obate tiloyana wa kabigibega gobala obate tepa waelabegala eladele gwalemonotoloyana gilala alimenetediyana buka egema:te pa:da:mada:le. 2A:pite a:ma buka gobala Bigtanata: Telesata: obai sakite kanaba dima a:na:minama a:piliyana gi tiliyana. Ma:mai dala saki kanabate eloyana genama wa lawiladele giwa:lana lawidilidiyana. Obai ameta kanaba lapolamada:le gi sa:lemiyana. Modekai ameta obai sakite a:na:minamalale sa:leminiyana gi itawa ete gibaba eyana.
3Kanaba amale gilala wisa eyana Modekai obate a:na:miyana gima, sa: oba dima eta sa:lenapa wisa a atilimanata. A:pite kanaba dalagipe gisaolanate laiyana awa, sa: oba dima eta sa:lenapa gi pa:pa a:na:minimana. 4Kanaba amale eta:mi obape opisol danayana, eta na:dowali opisa dalagi ma:ma genama gobala elelota. A:ma tepala Aman ma:ta pa:te kanaba anamalale obate sa:lemiyana patapata sidima Modekai tao tipi mite lapolamalale. Kanabate eloyana genama waeya:denapa ta a: gobama sa:eloyana.
5Kanaba dalagipe okonate laiyana, Aman a:meta ogosa tepala lelalo.
Oba gwalite pa:da:la, kanabate layana.
6Aman genama gobama sa:eyala, kanaba oba anayana, eta dalagi a:meta elelo na: oba ewamedele obape gagi sidima pakamite sa:lenapa gi a:na:minamalowa. Aman obaya oba gwanema gi iwaledoloyana, na: elelowamena tepala eta lumagi powateya kanabate ameta oba ewamedele obape gagi sidima pakamite oba dima sa:lenapa gi a:na:minama a:pileloya. 7Aman amale kanaba dalagipe gilala wisa eladele layana. E ewamedele obape gagi sidima pakamite sa:lenapa gi a:na:minama a:pilelona lumagidima a: ma:ma gi a:na:da:mu, 8oba dima kanaba kakanapa lopala alema:te pa:da:la, gwama kanabate dilaminanona os egema:te pa:da:la, a:ma oso ganabinapa waiya ka:ima:te gwalite pa:da:la. 9A:pite a:mai kakana lopalata: a:pite osota: alete pa:da:te kanabate iwalelona eta kanabape a:iya:dela kabiginapa elelona dalagi dima apilemela, obate a:mai lopala alete wete kanabate sa:keladele ewamenona lumagidima kakamima:malelo. A:pite a:ma opisol dalagi osoma manawela Susa kabiginapa baiga gobala gwalila mida:dele mamabegale mamida:dele gilala latedelamadelewa. Da: tila, ma:ma enoba dalagi kanabate sa:keladele obape gagi sidima pakaminadele ma:ma gi a:na:mineno.
10Kanaba a:ma gilala enamadolote Aman anayana, e lawena gi a:na:pi a: sela wete a:ma kakana lopalata: osota: alete pa:te Yu dalagi Modekai okonapa, oba ameta na:pe genama ogosa a:yatala oko a:na:minano. A: a:ma kakana lopala kakima:te oba osoma manawela, obape gagi ewamedele e lawena gi a:na:pi a:na:mina elamalelo.
11Aman a:mai kakana lopalata: osota: alete pa:te Modekaipe kakama kanabape kakanapa lopala dima:te a:pite osoma manayala obai saki menagimite na:te a:ma kabiginapa baiga gobala waminadele, Aman obate gilala ladoloyana. Da: tila, ma:ma enoba dalagi kanabate oba ewamedele obape gagi sidima pakaminano. Kanaba oba awapa bapinapaminano, na: enobala ma:ma gi oba dima a:na:minanowa.
12A:ma gi guyala Modekai kanabape genama ogosa tepala oko a:na:minamalale gwama weleyana. A:pite Aman kabiginapa pisala eladele obape ganabi kawapite, genamama gwana meneda weleyana, 13Aman amale genamama wete obate a:ta:pi a:na:mina eloyana gi waelabega obape susa:gi Selesta: a:pite obape sopodalata: danadoloyana.
Obai a:mai gilala enamadelete obape susa:gi Selesta: a:pite obape sopodalata: oba kakaminadele oba aniyana. Amapula a:dowali kamali a binilelo, Modekai ameta a kamalibapi elelo, oba Yu lumagi a:pe kamali pa:pa awapamalelo oba giwitila gima. A: enoba pa:pa awapa bapi etata wete sosawe bapi elamalelo. 14Amanata:mi amale gwalemenaliyala kanaba dalagipe gisaolana na:da:te Aman gwalite Estate sa:lemiyana pokoma oba gwalite na:diyana.
Nu geselecteerd:
Esta 6: GBOTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Gogodala Bible Translation Project © Bible Society of Papua New Guinea, 2016.
