Esta 5
5
Estate kanabata: Amanata: poko sabama awada:miyana gi
1Esta salikiliwa kadepa gobala baya awanale eladele God dima timo ela gi gumite, a:pite salikiliwanapa kadepala obate obape kanaba susa:gi kakana lopala kakamite kanabate eloyana genama sabama weleyana. Obate kanabate eloyana sabala ta a: gobama sa:ete kanaba dima imimi mite lelayana a:pite kanaba dalagi obape kanaba mana sabala manate Esta tiloyana, obate eloyana genama ogosa palala lelaleyala. 2Kanaba obate Esta tiliyana obate mananoyana sabala wa segela lelaloyana a:ma ta ogosa a:yatala. Oba Esta gwana saweda: eladele obape mai gobala doloyana gaolod gabi pakamiyana. A:pite Esta amale a:i sawamitata wete a:ma gabi pala gwaliyana.
3Kanaba amale Esta anayana a: e pa:wena gi la, a: powa gi lalamalona, na: a: dima ne eladele sa:kelowamena baiga gi kanika:wa na: tepama ka:mite a: dima apulamalowa.
4Esta amale kanabape gilala wisa eladele oba anayana a:dila ma:ma gi awapa elamalelona tepala, a: ta: a:pite Amanta: da: saki ne sa:lemiwamena pokoma baya nana gima pa:lamalelewa.
5Kanaba a:ma gi awapage layana, enobala oba Aman lulumiyana obate sela pa:la ewela, obai saki Esta tilama na:na:malale.
Amale obai saki Estate sa:lemiyana pokoma na:iyana. 6Obaite waeni sika wi nida:dele kanaba obate Esta anayana, Estate obadila powa gi egelamalale oba iwimiyana gi oba anamalale. Kanaba amale oba anayana a: na:dila powa gi egela gi iwiminamalona na: a: dima atamalowa. Gwama ne kanika:wadele tilelowamena wa kabigibega tepama ka:mite a: e pala tila gima iwiminamalelona na: a: dima atamalowa.
7Esta amale kanabate layana gilala wisa eyana. 8Kanaba ma:ma ne lalelowamena gi a:da awapa elamalona sa:lebega, da: saki Amanadale geda: ne sa:leminawamena eta pokoma gwama pa:lamalewa.
Amanate Modekai dima ga:oladele oba lapolamalale a:piloyana gi
9Aman amale a:ma poko sabala sa:kelatata wama saoyana, oba wama saote weladele Modekai tiliyana kanabape genama ta ogosa tepala mananoyana. Modekai oba ameta Amanate oba giwitite pa:weloyana tepala pa:pa patate oba dima baoyana, enobala Aman a:ma gima gwana menebega eyana. 10A:ma gi Amanadila a menebapi eyana a:pite obape gwana gobala ila bapi eladele obape genamama weleyana oba eta:mi gi pa:pa a:na:da:minoyana.
Oba amale genamama wete obape sopodalata: gwama obape susa:gi Selesta: auwada:miyana, 11obai waelabeya:gai pa:diyala Aman amale obaya oba awagadele obape manita: gwama obape sege a:ta:pi waelabeya:gai gita: gwama obape ya:biya:bi gita:, a:pite kanabape opisol okona waelabeya:gai gobala Amanate kanaba auwabapila eladele eta:mi Amanape a:iya:dela edilina gima, Amanate obaya oba awagaloyana. 12Pa: ya:mai gi menegigida:, eta gi enoba kanaba susa:gi Esta na: menagi auwamiwina ne kanabada wete obadila obate sa:leminanona poko baya naenamada:le. A:pite kanaba susa:gi obate gilala gwama miwina geda: obate sa:leminanona pokoma na: menagite welamalale. 13Ameta Yu dalagi Modekai obate kanabape genama ogosa tepala manonotelelona gitena: dima sa:kela gi pa:pa ma:lelo. A:pite na:dila dowatilina sa:sa:lena gi waelabeya:gaita: gwama ne a:na:da:minenowamena sa:sa:lena gi waelabeya:gaite a pa: gi ediwina. Na: ameta gwana meneda elelowa.
14Amale Amanape susa:gi Selesta: a:pite obape sopodalata: gi miyana patapata a:na:minamada:le 20 mita sidima dila. Eta ibasegela a:ma a:na:miyana patapata sidima Modekai tao tibimite oba lapolamada:le. A:pite Aman obate kanaba dalagida sa:kelada poko sabama welamalale. Aman amale obaite laiyana gilalama awapage late gi miyana a:ma patapata a:na:minamada:le.
Nu geselecteerd:
Esta 5: GBOTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Gogodala Bible Translation Project © Bible Society of Papua New Guinea, 2016.
