Esta 1
1
Kanaba Dalagipe Susa:gi Basitite Obape Dalagi Sekesis Dima Pa:pa Gima Kamiyana Gi
1 #
Ese 4:6
Kanaba Sekesis obate Pesiya wala kanaba eloyana tepala obate 127 opa:pa:yana a:ibaiga tidoloyana, obate tida:loyana wa enobai Itiyopiya wala asemite wete Indiya wama saoyana, 2a:ma tepala obate Susa kabiginapa baigala eloyana, 3obate salikiwa gogola kanaba eloyana tepala oba waelabega wala gaganabina edeliyana dala awada:miyana obape kabiginapa bulaga poko sabama. Amale obape okona dalata: gwama obape okona tida:liyana dalata: gwama obape a:iya:dela opa:pa:yana a:ibaiga tida:liyana dalata: gwama sa:kemana dalata:te Midiya wata: Pesiya wata:le pa:diyana, obape ya:biya:bi gi tilamada:le.
4Kanaba dalagite obape ya:biya:bi gi luma ituda:munaleyala 6 samoso pa:na:diyana. Obate kipale gosata: a:pite obape genama gobana eta:mi ya:biya:bi gita: obai ituda:mumoyana.
5A:pite a:ma gi guyala obate Susa kabiginapa baigala edeliyana luma waelabegadima eta bulaga poko a:na:miyana obape genama ebatala apediliyana i omata gobala. A:ma bulaga pokote menagi wik egeyana. A:pite waelabega lumate a:ma bulaga pokoma pa:diyana, ya:biya:bidanata: a:pite gwama salipanata:. 6Kanaba dalagite obape gisaolana danayala obaite a:ma poko saba bonobonona kalikota: gwama abibilona kalikota:le palasamiyana. Obaite a:ma kaliko iwitawa kakaleda:na a:tela tao a:na:pina gwegweyadana taole gwalidiyana. Amale obaite kilikilina ba:kelele a:na:da:miniyana salo a:ma bulaga poko sabama tolete silibale a:na:da:miniyana bigi lopala a:mama sa:eseminiyana. Obaite siliba lopalata: gwama gaolod lopalata:le a:na:da:miniyana seya a:ma sabama aliyana. A:ma bulaga poko sabana mitata si obaite gwegweya opa:pa:ya imimina lopalale lutitiliyana. 7Obaite gaolod lopalale a:na:da:miniyana imimi opa:pa:yana kakabuwale waen sika nidiliyana. A:pite kanaba dalagite luma kabigibegale iwaleda:loyana. 8Obate obape okona luma danayala obaite lumadima waen sika kabigibegale dapiliyana.
9A:pite a:ma tepa menagila kanaba susa:gi Basiti iya:ta: kanaba Sekesisepe genama gobala ato waelabegadima eta poko a:na:miyana.
10Amale a:yatanapa kadepala kanaba dalagi Sekesis obate waen sika nidolote sa:keladele obape gisaolana dala 7 auda:miyana, Meyumanata: Bisata: Abonata: Bigatata: Abagatata: Setata: a:pite Kakasata:, 11amale obate obai auda:miyana obaite na:da:te kanaba susa:gi Basiti oba dima gwalite pa:da:mada:le. Obate obai dima a:negelayana, da: na:da:te kanaba susa:gi Basiti anala, oba pa:ladele obape gaolod waiya kaminamalelo lumate obape imimi sa:lepula tima:mada:le. 12A:pite obai na:da:te a:ma gilala kanaba susa:gi anaiyana tepala oba ilapala eyana. Amale kanaba dalagi kabigi begale ga:oyana Basitipe a:na:mina gima.
13Enobala kanaba dalagite, oba dima gi iwaleda: apiletedilina sa:kemana dala awada:miyana, gi ase a:ma enoba gite oba dima saolamila obate a:na:minotoloyana gi, a:pite a:mai sa:kemana dalate oba dima gi iwaleda: sa:sa:lena apiletediliyana, obate miya tepala powa gi a:na:minamalelona gi. 14Kanaba dalagite ma:mai sa:kemana dala gi itawa bapi, enobala obate obai iwida:miyana, Kasenata: Setata: Adamatata: Tasista: Melesta: Masenata: a:pite Memukanata:, ma:mai dala iya:ta enobai kanaba dalagipe a:iya:dela Pesiya wata: Midiya wata:la sidina gabamani dala edeliyana.
15Amale kanaba dalagite obai danayana, babalate powa gi laleloya kanaba susa:gi Basitite na:pe gilalama gima pa:pa kamiwina gima.
16Memukana amale kanaba dalagita: a:pite obape sidina gabamani dalata: danayana, ma:ma kanaba susa:gi Basiti pa:pa kanaba menagidima ma:ma sosawe gi a:na:miwina, oba ameta ma:ma Pesiya wa kabigibegale edelina sidina gabamani okona dalata: gwama dala waelabegata:dima ma:ma sosawe gi a:na:miwina. 17Ato waelabegate Pesiya wa kabigibegale ma:ma Basitite kanaba dalagipe gilalama pa:pa gima kamiwina gi enamada:madilina tepala, obai iya:ta: obaimunu daladima pa:pa gima kamidelamadili. Obaite a:nege lalamadili, kanaba dalagite kanaba susa:gi iwimiwina tepala, oba a:ma gilala gima ilapala ewena. 18Ama kadepala wa pa:pa itilalona tepala ato waelabegate kanaba Sekesis obate tida:lona wa kabigibegale obape a:iya:dela sidina kabigida:na gabamani dala eda:dele Pesiya wata: Midiya wata: tidilina dalimunu ato, kanaba susa:gi Basitite a:na:miwina gilala a enama enama ediwina. A:ma gile wa waelabegale edelina atote obaimunu daladima gima pa:pa kamidelamadilina gile dalate obaimunu atodima ga:odelamadili.
19Enobala kanaba dalagi, na: a: awagolowa, a:dila ma:ma gi awapa elamalelona tepala a: a:na:minamalelo. Gi awapa a: gilala waelabega lumadima auda:munamalelo a:dowali gagile, a:na:pi Basitite gwama a: dima pa:pa pa:lamalelo. A: gilala lawela lumate ma:ma gilala Pesiya wata: gwama Midiya wata: gobana babala buka gobama alilamadili, a:pite ma:ma gilala lumate pa:pa gwama opa:yaminamadili. Amale a: Basiti elatete eta sa:lenapa susa:gi gwalilamalelo obape saba egala gima. 20A: e tida:lona wa kabigibega gobala lumate ma:ma gilala kekemiwila a:pite susa:gite obape dalagi sa:lele tiladele obape gilalama gima kamunamalelo. Gabamani sabale mitatilina dalale asemite kola:te oko binina daladima saola.
21Kanaba dalagita: a:pite obape sidina kabigida:na gabamani okona dalata: amale Memukanate ladoloyana gilala awapage laiyana. 22Kanaba dalagite amale obate tida:loyana wa kabigibega gobama leta auda:munoyana. Obaite a:mai leta, gilala opa:pa:yale a:na:da:minete gilalape alila nabidile a:mai leta gilala aliliyana. A:mai leta gilala enoba, dalagite obape noneya gobala ganabinapa elamalelona gilalate dololoyana.
Nu geselecteerd:
Esta 1: GBOTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Gogodala Bible Translation Project © Bible Society of Papua New Guinea, 2016.
