Luk 7
7
Yesò chʉʼ wù shyèʼ kətʉ kə vəsugyèʼ
(Mat 8.5-13)
1Andiʼ ando Yesò ngàʼ alì myètə nyʉ̀ vyi a ghə̀ kəŋ la viʼi zhʉ, ghə̀ bwènə̀ shìʼi a ntə̀ʼ Kàbanùm. 2Kətʉ kə ve sugyèʼ viʼi Lum vətsenvə ndiʼ tsu, kiʼ wù shyèʼ wen, a ghə̀ nkòŋ wen no nə̀ nànto. Wù shyèʼ a ghèn nkwaʼa no nànto, sə diʼ tò mə pfʉ. 3Kətʉ kə və sugyèʼ akyì zhʉ soʼgho byìʼì Yesò ə tɨm vəchəʼ və Jus vətsenvə la və dyʉ̀ ə sènsə wen la ghə̀ vì ə chʉʼ wù shyèʼ wen ayì. 4Vəwenə dyʉ̀ à Yesò ə sènsə wen no ŋàŋ gàʼà la, “Gyàmtə̀ wìʼ ghèn, ghə̀ diʼ no tò wìʼ a wù yì ndiʼ gyàmtə̀. 5Kətʉ kə və sugyèʼ a kènkə kòŋ viʼi vəghəŋ, mu ghə̀ tə gyàmtə̀ bwom ngə̀ŋ tsèntə à yès.”
6Alì, Yesò lù wenə vəwenə. A sə ndiʼ ando ghə̀ njèʼè sə boʼsə dyʉ̀ a ngə̀ŋ kətʉ kə vəsugyèʼ a kì, ghə̀ tɨm viʼi ndoŋsə wen la və dyʉ̀ gàʼ a Yesò la, “Bobo, kə wù be a yèn ngəʼ əvì byìʼàndo ma ko kwʉ̀ʼ la wu kwen à mò a ngə̀ŋ, 7bè diʼ alə̀ kènla ma kwʉʼli ətɨmə ə gàʼ à wù fa mò a ngə̀ŋ. Alì, gàʼa tò gàʼa la wù shyèʼ mò to, a ghə̀ a to. 8Ma gàʼ alə̀ byìʼàndo nkàntə̀ mò shyèʼè a ti viʼi, kiʼ vəsugyèʼ à mò ati. Mà gàʼ à ghèn la, ‘Dyʉ̀!’ ghə̀ dyʉ̀ tò dyʉ̀, ə gàʼà à wutsen la, ‘Vi!’ ghə̀ vi tò vi. Mà gàʼ à wù shyèʼ mò la, ‘Ne alə̀!’ ghə̀ nè tò alì.”
9Yesò zhʉ kənyʉ̀ a kì a ghə̀ ngàʼa lì sə diʼ nə̀ kaynə, ghə̀ gàʼ à tənòyn tə viʼi tì a tə ndzɨ̀mtə̀ wen la, “Ma ko təmə yen wìʼ, a ghə̀ kiʼi nki byɨmə ghenə a tyì loʼ Islel.”
10Viʼi ndoŋsə kətʉ kə vəsugyèʼ a shì sə bwènə̀ pfwo a wen a ngə̀ŋ yen tò mu wù shyèʼ ayì toli.
Yesò lùsə wàyn wùwì pfʉ fa pfʉ
11Fa bàm a tsu, Yesò lù ə dyʉ̀ a ntə̀ʼ tsen, a və ndzàŋ nə̀ Nayn, wenə ndzɨ̀mtə̀sə bàm wen nə̀ tənòyn tə viʼi, və ghoʼo və no alə̀. 12A sə ndiʼ ando ghə̀ mboʼsə dyʉ̀ a chʉ ntə̀ʼ ayì, ə̀ yen viʼi mu və byèʼè li wù pfʉ sə fʉ̀ vì nə̀ wen. Wàyn wulɨm pfʉ ayì ndiʼ tò wen nyɨŋ a kəvu lì wen, lì wen ayì ndiʼ wùwì mpfʉ. Wùwì mpfʉ ayì ndiʼ wenə tənòyn tə viʼi no ghoʼo a və nlù fa ntə̀ʼ ayì. 13Bobo n-yen wùwì a ghèn sə kusə nshinsə à wen no ŋàŋ ə gàʼ à wen la, “Chɨmə, kə wu be dì.” 14Yesò gàʼ alì ə kwentə dyʉ̀ ə kùmsə̀ kəmbùŋ kə wu pfʉ akì, viʼi vyì a və mbyèʼè wen lì tɨmə, ghə̀ gàʼ la, “Wàyndyə nkuŋ, lu.” 15Wu pfʉ ayì lù ŋwʉʼʉ ə zìtə̀ sə gàʼà. Yesò lyɨ̀ wen ə bwènsə̀ ku wen à lì wen.
16Fàyn ghaʼ no viʼi vətsèm tsu. Vəwenə sə kuʼsə Nyìngòŋ gàʼà la, “Nshə̀ʼtə̀ ghoʼo vì li a vəghəŋ a ntìntìn. Nyìngòŋ vì li ə lye viʼi wen!”
17Soʼgho a ghèn byìʼì Yesò saykə̀ dyʉ̀ a loʼ Judiyà no tsèm bè nə̀ no a təloʼ tə tsèm a mbyì ayì.
Viʼi ntɨm Joyn Wu Ku Amù
(Mat 11.2-19)
18Ndzɨ̀mtə̀sə Joyn wù Ku amù shə̀ʼtə̀ nyʉ̀ venə byìʼì Yesò à wen. 19Joyn dzàŋ sətsen sə la vəbò ə tɨm la vəwenə dyʉ̀ bèm a Bobo Yesò la, “A diʼ wù yì a wu ndiʼi ne vì mu, yès diʼi nkə̀ʼtə̀ wù kədyàŋ lo?”
20Viʼi a venə dyʉ̀ yen Yesò ə gàʼ à wen la, “Joyn wu Ku Amù tɨm la yès vì bèm à wù la, ‘A diʼ wù yì a wù tə ndiʼi ne vì lì mu yès ntsi kə̀ʼtə̀ wù kədyàŋ lo?’”
21Vəwenə nsə vì alì, Yesò chʉʼʉ viʼi a zhʉ ayì no və ghoʼo fa tənkì tə təkwaʼa tìtə a vəwenə nkwaʼa nə̀ təwentə be dzɨ̀mə̀ zhwì byɨvə, be nè la nfyɨf ghoʼvə bwènsə̀ yen shi. 22Yesò bwènsə̀ gàʼ à vəwenə la, “Ghə̀ŋ dyʉ̀ ə shə̀ʼtə̀ nyʉ̀ vyì à Joyn a ghə̀ŋ yenli fa ghə̀ŋ ngeŋ be nzhʉ fa viʼi vətsenvə: Nfyɨf sə bwensə̀ yenə shi, viʼi kəkwàʼkə sə jèʼè, viʼi kənsòtə̀ nto, mpfʉ̀sə tʉ sə zhʉ nyʉ̀, viʼi və pfʉkəvə nlù fa pfʉ, və be shə̀ʼtə̀ ntəmə jùŋ a viʼi vyi a və ko təmə byɨmə. 23Mbwaʼmə diʼ a wìʼ yì a ghə̀ ko maʼa byɨmə yi a ghə̀ kiʼì a mo.”
24Ando viʼi ntɨm Joyn a vyi mbwenə lù, Yesò zìtə̀ sə gàʼ à nòyn viʼi vyi byìʼì Joyn, bèmə̀ la, “Ghə̀ŋ nlù dyʉ̀ à Joyn a nse zɨm ədyʉ̀ yen gho tsu a? Ghə̀ŋ ndyʉ̀ əyen kəgeŋ a fwof nə̀ʼə̀ mu? 25Ghə̀ŋ ke ndyʉ̀ əyen no ghò? Wìʼ a ghə̀ lafə lafə jùŋ ghə̀ mu? Ghə̀ŋ kɨ la viʼi vyi a və lafə a ji ayì be zhɨ fo jùŋvə tsi tò ntuʼ. 26Ghə̀ŋ shə̀ʼtə̀ à mò la ghə̀ŋ ke ndyʉ̀ əyen gho ayì lo, nshə̀ʼtə̀ ghoʼo mu? Kə diʼ tò alì. Mà gàʼ à ghə̀ŋ la ghə̀ chò nshə̀ʼtə̀ ghoʼo. 27A diʼ Joyn, wìʼ yì a və nlù ə nyòʼ a Ŋwàʼlə̀ Nyìngòŋ byìʼì wen la,
‘Yen a, mà lə tɨm wù ntɨm mò,
ghə̀ dyʉ̀ à wìʼ ambì ə shɨ̀tə ji yì à wù.’
28Mà shə̀ʼtə̀ à ghə̀ŋ la, wìʼ ko təmə diʼ a nse a shə̀, a ghə̀ chò Joyn wu Ku Amù, alì no məndo yì a ghə̀ lu ndiʼ bàm a kəshi kə fòyn Nyìngòŋ chò wen.”
29Viʼi vətsèm əboʼsə nə̀ viʼi tinə kənsè nè zhʉ gàʼà Yesò sə̀ bwomsə̀ Nyìngòŋ byìʼàndo vəwenə nshi mu fa Joyn. 30Alì, viʼi Falàsi bènə̀ ndìʼsə̀ sə təsoʼ ntyen əkɨ kwòʼtə̀ yi a Nyìngòŋ nkiʼi kùmə̀ vəwenə tò ndə̀ŋndəŋ ando vəwenə nlù tyen əshi mu fa Joyn.
31Yesò bè mù gàʼ la, “Mà lə zì mà shəʼmə viʼi mbyi layn nə̀ ghò, vəwenə diʼ a nə̀ ghò? 32Vəwenə diʼ tò nə̀ vunə a və ŋwʉʼ a woŋ, vətsenvə dzàŋ vətsenvə gàʼà la, ‘Yès zhɨmə ndzàŋsə fwòməsə la ghə̀ŋ ben, kò ghə̀ŋ lə benə, ə zhɨmə ndzàŋsə pfʉ la ghə̀ŋ dì, ko ghə̀ŋ lə ndì.’ 33Joyn Ku Amù nvi li ko ghə̀ zhɨ kəfo, kò nyʉ məlyʉ̀ʼ, ghə̀ŋ ngàʼ la, ‘Ghə̀ kiʼi kəzhwì kə byɨkə.’ 34Wàyn Wìʼ nvi sə zhɨ, bè nyʉ, ghə̀ŋ ngàʼ la, ‘Ghə̀ zhɨ chòsə̀ bè dìʼ ndoŋ wenə viʼi a və tinə kənsè bènə̀ viʼi nè nyʉ̀ byɨvə vətsenvə!’ 35Alì, Nyìngòŋ dìʼì la tofə wen diʼ nəmwèʼè à viʼi no vətsèm a və byɨmə chò nyʉ̀ vyi a viʼi nè à vəwenə ntsìnə̀sə.”
Yesò zhɨ a ngə̀ŋ wù Falàsi
36Wù Falàsi tsen làʼà Yesò la ghə̀ vi a wen a ngə̀ŋ, wenə wen zhɨ. Ghə̀ dyʉ̀ shiʼi ŋwʉʼʉ a kəshi kə kəzhɨ. 37Wùwì nyʉ̀ byɨvə tsen a ghə̀ ntsi a ntə̀ʼ ayì zhʉ la Yesò zhɨ a ngə̀ŋ wù Falàsi, ghə̀ lyɨ̀ fəshoʼ fə tsenfə, mu və shɨ̀təli nə̀ nguʼ tsen a və dzàŋ nə̀ alàbàstà, mənzhiʼ mə lèmtə mə diʼ tsu, ə dyʉ̀ nə̀ wen tsu. 38Ando ghə̀ ndyʉ̀ lì, ghə̀ dyʉ̀ tɨmə a mbyɨ̀ Yesò mù sə dì, məshɨ chòmkə a aghʉ Yesò, ghə̀ laŋtə ə tsə̀ʼ nə̀ nyɨŋsə kətʉ wen, ə ghaʼtə aghʉ wen bè zuʼ nə̀ mənzhiʼ mə lèmtə mə myì. 39Ando wù Falàsi yì a ghə̀ nlaʼà Yesò, nyen kənyʉ̀ akyì sə gàʼà a wen a ngə̀ŋ la, “Wìʼ ghèn tu ndìʼ nshə̀ʼtə̀ ghoʼo, mu ghə̀ kɨ li nkì wùwì ghèn a ghə̀ kùmə̀ wen lə̀ dìʼ wù nyʉ̀ byɨvə.”
40Yesò toŋtə Simon ə gàʼ la, “Mà kiʼi kənyʉ̀ əgàʼ à wù.”
Ghə̀ bwènsə̀ gàʼ la, “Ndìʼsə̀, gàʼà vì, mà zhʉtə.”
41Yesò gàʼ la, “Wù choʼo ko sətsèn nchoʼo ko à viʼi vəbò, wù mùʼ nkiʼ ko kuʼ zaʼa təghɨ tə tayn, wutsen kiʼ tò məwum tayn. 42Ando no wìʼ mùʼ fa vəwenə ntìntìn nko kiʼ ko ə bwensə lòʼ. Ti ko ayì ə ghʉsə dyʉ̀ nə̀ ko ayi à vəwenə vətsèm. Wù lè zì wù kɨ la adiʼ wìʼ ko a ntìntìn viʼi a venə vəbò a ghə̀ nkòŋ ti ko ayì chò ghə̀ tsen a?”
43Simon bwènsə̀ la, “Mà kwòʼtə̀ la a diʼ yì a və nghʉsə ko ghoʼo ghə̀ a wen lì.”
Yesò gàʼ à wen la, “Wù gàʼ tò nəmwèʼè.” 44Ghə̀ bè kaʼsə wenə wen sə ki wùwì ayì ə gàʼ a Simon la, “Wù yenli wùwì ghèn? Mà yì vì a wù a ngə̀ŋ kènla wù kuli mu la mà shʉ̀ aghʉ ghomə tsu, alì ghə̀ shʉ li aghʉ ghomə nə̀ məshɨ bè tsə̀ʼ nə̀ nyɨŋsə kətʉ wen. 45Wù ko yì bwamtə mò a zhʉ a mà yì vì alì fa zhʉ a mà yì vì, ghə̀ faŋ sə ghaʼtə mò tò ghaʼtə. 46Wù ko yì zuʼ kətʉ kom no a nkàyn nə̀ mənzhiʼ, alì ghə̀ zuʼli aghʉ ghomə nə̀ məzhiʼ mə lèmtə mə. 47Byìʼ alì mà gàʼ à wù la, kòŋ ghoʼghə yi a ghə̀ dìʼì à mò diʼ la Nyìngòŋ lyesəli nku byɨsə wen no sətsèm, alì wìʼ yì a və lyesə ku wen to tyetə be diʼi kòŋ tò tyetə.”
48Yesò mù gàʼ à wùwì a yì la, “Və lyesəli nku nyʉ̀ byɨvə wù.”
49Viʼi vətsenvə a və ndiʼi a kəshi kə kəzhɨ mù sə kayntə à vəwenə ntìntìn la, “Ghèn diʼ no ndo a ghə̀ lyesə ku mbyɨsə viʼi a?”
50Yesò mù gàʼ à wùwì ayì la, “Byɨmə wù bwaʼsəli wù. Pfwo tò nə̀ mbwaʼmə.”
Nu geselecteerd:
Luk 7: bbkDBLnt
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
