ADECHHÜ 15
15
Anyiza na Abram ssinu Cenkethenjüh sakeya
1Tsaseng wi Abram na kemanthi kesü mu nu Apvüwa na hati ma kekiza zaya, “Abram, nmessi lalo, hi kemessi wi ntsonhi saya nu akutimen keti pi no cüden.” 2Isala Abram na luneng “Kekhang Apvüwa, hi atsanga nkemi na no akutimen kemehai mangwa pi hi cüden nu? Hi keben ghong kesawa tsüna Damaska nyiwa Eliezer ketanle. 3No atsanga pi hi ncü, nu imagha kesü hi keben ghongya tendha.”
4Tsaseng wi Apvüwa na ajüh khipi ma kiza keben za neng; “Amaghawa Eliezer ha no keben ghongya nben, atsa ntsawa kesü na no keben ghongben.” 5#Rom 4.18; Ibr 11.12. Apvüwa na ma ssinu akhemi wi shhu nu khi, “Atssan wi ghangchi nu ghotsithu tsü sinanlo; nshicübvüghathu na ji pi tsüthu tsüti saben.”
6 #
Rom 4.3; Gal 3.6; Jos 2.23. Abram na ma kenondi pi Apvüwa miwi chi, nu ha ghena Apvüwa na Abram nen nu ma ssiya.
7Tsaseng wi Apvüwa na Abram kiza, “Hi Apvüwa, ayyi hapi nji sa thsüle nu Babylonia yyi Ur wina no ssi keshhughowa tsüle.”
8Isala Abram na keü, “Kekhang ntsa Apvüwa, hi khatinu tsüna iji le kesa chüya nu?”
9Apvüwa na khineng “Amesü kesü, aneni kesü, aneni süpon kesü tsüdila amapi kecheng ji zza, nkhetsü kesü nu duktur kesü tsüthu sen nu hi wi gholo.” 10Abram na asahangthu sen nu Anyiza wi gho, tsüthu handhi pi kenini sa nu pi alen keni sala ghapeli chia; isala ma awathu tsü nhandhi. 11Kamang kemcüwathu na akamangthu miwi dugho, isala Abram na tsüthu jügü pi bvü thsüa. 12#Job 4.13,14. Minulen wi Abram na jenchi ntsa wa nu kemessi nu kejang keti na ma miwi gho. 13#Bvü 1.1-14; Kek 7.6. Apvüwa na ma wi kiza, “Nshicübvüghathu na asang yyi wi kijünyi saben, mathu ciwi amapi meza mejü nyu nssümagha sa nu nyu mathu meten-mesha ntsa saben. 14#Bvü 12.40,41; Kek 7.7. Isala hi mizzatenti mathu pi amagha kesa thsüthu tsü meten-mesha ben. Nshicüthu na khathansha wi asang yyi tsü teshi nu shhu khe keben-keyeng kejon sen nu mathu gweghe shhuaben. 15No kesie hang pi qhai ntsa, cca shü pi vhüaben. 16Abvüye mejüwa wi nshicübvüghathu na ayyi hewi ghoneng shaben. Amor nyithu gheshighena ntsa pi kemeten-kemesha npi kemu qo chu hi mathu jügüshi nten.”
17Aghani du nu atsajang kegho wi anni kekhu-pfü nu annikeqhe kesü wan aghangsa kamangthu jüwi tsü gho. 18#Kek 7.5. Ciwi Apvüwa na Abram ssinu cenkethenjüh kesü sa nu ma wi khi, “Hi ayyi ha tsüdi Ejipt na wa Eufrat Ghaku kecu pi nshicübvüghathu cüten kesa kishen ben, 19tsüna Ken, Keniz, Kadmon, 20Hitti, Periz, Refaim, 21Amor, Kanaan, Girgash, nu Jebus nyithu yyi tsüdi saghu.”
Nu geselecteerd:
ADECHHÜ 15: RENGNBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
