MATTHAI 26
26
Jesu Thah Sawmna
(Mk. 14.1-2; Lk. 22.1-2; Jn. 11.46-53)
1Huan hichi ahi a, Jesu’n huai thu tengteng a genkhit in, a nungzuite kiang ah, 2“Ni nih nungchiang in Paikan Ankuangluina a hongom ding chih na thei ua, Mihing Tapa kilhden ding in a mansak ding uh” a chi hi.
3Huailai in siampu lianpen Kaiapha a chih uh huangsung ah siampu liante leh vantang upate a kikhawm uhi. 4Jesu zekhem a mat a, a hihlup theihna ding un a kikum uhi. 5Himahleh, “Ankuanglui sung in hikeileh huchilou in zaw vantang lak ah buaina a hongpiang khading” a chi uhi.
Bethani Khuaa Jesu Thaunilhna
(Mk. 14.3-9; Jn. 12.1-8)
6Bethani khua a, phak Simon inn a Jesu a omlai in, 7Numei khat alabaster bawm a thau gimlim mantam tawi in, a kiang ah a hongpai a, an a umlai in a lu ah a sungbua hi. 8Himahleh nungzuite’n huai a muh un a heh ua, “Bangdia hichibang a hih mangthang mawkmawk ahia? 9Hiai thau mantam tampi a zuak a, mizawngte kiang a piak theih ahi ngal a” a chi uhi.
10Jesu’n huai a theih in, a kiang uah, “Numei bangdia hihbuai na hi ua? Ka tung ah thil hoihtak a hih ahi. 11Mizawngte tangtawn in na kiang uah a om uh a kei hiam, kei bel tangtawn a na kiang ua om ka hi kei hi. 12Hiai thau gimlim ka sa a a sun, vui ding a honbawl ding in a hih ahi. 13Chihtaktak in k’on hilh ahi, khovel tengteng ah koi ah leng hiai Tanchinhoih a genna peuh uah hiai numei thilhih leng amah theihgigena ding in a genzel ding uh” a chi hi.
Judas Iskariot Muanhuailouhna
(Mk. 14.10,11; Lk. 22.3-6)
14Huai nung in sawmlehnihte lak a mi khat, Judas Iskariot a chih uh, siampu liante kiang ah a hoh a: 15Amah, “Hon mansak le’ng, bang n’on peding ua?” a chi hi. Huchi in dangka sawmthum a buksakta uhi. 16Huai nung matsakna ding hunlem a zongta hi.
Paikan Ankuang Umna
(Mk. 14.12-21; Lk. 22.7-13,21-23; Jn. 13.1-30)
17Huan tanghou silngou sohlouh ni, ni masapen in nungzuite Jesu kiang ah a hong ua, “Paikan Ankuanglui nekna ding koilai ah hon bawlsak le ung na ut a?” a chi uhi. 18Aman “Khopi ah kuahiam kiang ah hoh unla, a kiang ah, ‘Sinsakpa’n, ka hun a naita a; nungzuite toh Paikan Ankuang na inn ah ka um ding uh e’ a chi, vachi un” a chi hi. 19Jesu’n a kiang ua a chih bang in nungzuite’n a hih ua; Paikan Ankuang a bawlta uhi.
20Huai ni nitaklam in, nungzui sawmlehnihte toh an a um uhi. 21An a neklai un, aman, “Chihtaktak in k’on hilh ahi, na lak ua mi khat in kei a hon mansak ding” a chi hi. 22Huchi in a lungkham mahmah ua, a kiang ah, “Toupa, kei ka hi maw?” a chi chiat uhi. 23Aman, “Ankuang hon sawkpihpa ngei in kei hon zuausan in hon mansak ding a chi hi. 24Mihing Tapa tanchin a gelh bang un a pai ding hi. Himahleh, Mihing Tapa mansak dingpa tung a gik hi: huai mipa zaw piang keileh amah ading in a hoihzaw ding” chi in, a dawng hi. 25Huan a mansak dingpa Judas in a dong a, “Heutupa, keimah ka hi maw?” a chi hi. Aman a kiang ah “Hi e” a chi hi.
Nitak Ankuang Nanung
(Mk. 14.10,11; Lk. 22.14-20; 1 Kor. 11.23-25)
26Huan an a neklai un Jesu’n tanghou a la a, a vualzawl a, a balkham a; nungzuite kiang ah a pia a, “La unla, ne un; hiai ka sapum ahi” a chi hi.
27Huaizoh in nou leng a la a, kipahthu a gen a, a kiang uah a pia a, “Na vek un dawn un; 28Hiai ka sisan a thukhun thak, khelhnate ngaihdamna dia mi tampi dia pawt ding ahi. 29Himahleh k’on hilh ahi, ka Pa gam a nou toh a thak ka dawn ni a tun masiah tuban grepgui gahtui ka dawn nawnta kei ding” a chi hi. 30Huan la a sakzoh un a pawt ua, Olive tang ah a paita uhi.
Jesu’n Nungzuite Taihsan Ding Thu A Genkhol
(Mk. 14.27-31; Lk. 22.31-34; Jn. 13.36-38)
31Jesu’n amau kiang ah, “Tuzan chiang in na vek un ka tungthu a lungkia in n’on taisan vek ding uh;
‘Belamchingpa ka zep ding a,
belamte a dalh ding uh’ chih gelh bang in.
32Himahleh ka thohnawn nung in Galili gam ah na ma uah ka pai ding” a chi hi. 33Peter in a kiang ah, “Avek un na tungthu ah lungkia in om mahle uh kei zaw lungkia in ka omkei hial ding” chi in, a dawng hi. 34Jesu’n a kiang ah, “Chihtaktak in k’on hilh ahi, tuzan in ak khuan ma in, nang thumvei n’on kitheihmohbawl ding” a chi hi. 35Peter in a kiang ah, “Na sihna a leng si sam ding himah leng k’on kitheihmohbawl kei hial ding” a chi a. Huchi bangmah in nungzuite’n leng a chi chiat uhi.
Jesu Gethsemani Huan Ah
(Mk. 14.32-42; Lk. 22.39-46)
36Huaizoh in amau toh mun khat Gethsemani a chih uh a tung ua: a nungzuite kiang ah, “Pam a ka vathum kal in hiai ah na tu un” a chi hi. 37Peter leh Zebedai tapate nih a pi a, a lungkham in a hong mangbang mahmahta hi. 38Huan a kiang uah, “Ka kha a lungkham mahmah a, sihna khop hial ahi; hiai ah om unla, hon venpih un” a chi hi.
39Neukha in malam ah a vapaizek a, khupboh in, “Ka Pa aw, a hih theihleh hiai nou in honpel mahmah hen; himahleh keimah thu hilou in, nangmah thuthu hizaw hen” chi in, a thum hi.
40Huan nungzuite kiang ah a hongpai a, amau ihmu in a hong mu hi, Peter kiang ah, “Nou dakkal khat lel leng hon hahpih zoulou na hi umaw? 41Khemna a na lut louhna ding un kiging gige in thum un; kha in zaw a ngap a, sa bel a hatkei” a chi hi.
42Nihveina ah a vapai a, a thumnawn a, “Ka Pa aw, ka dawnlouh a hiai nou in a honpelh theihkei leh, nangmah thuthu hi hen” a chi hi. 43A hongpai nawn a, amau ihmu in a hongmu nawn hi, a ihmut uh a suak mahmah hi.
44Huan, a paisan nawn a, a thumveina ah a gen ngei gen in a thum nawn hi. 45Huaikhit in nungzuite kiang ah a hongpai nawn a, a kiang uah, “Na ihmu lailai umaw, na tawlnga lailai umaw? Ngai dih uh, a hun a hongtungta, Mihing Tapa mikhialte khut ah khotkhit ahita. 46Thou unla, pai ni, en dih uh, a hon mansak dingpa a hong naita hi” a chi hi.
Jesu Matna
(Mk. 14.43-50; Lk. 22.47-53; Jn. 18.3-12)
47Huan, a genlai mah in Judas, sawmlehnihte lak a mi khat, siampu liante leh laigelhmite leh upate kiang a kipan mipi thupitak leh namsau leh khetbukte toh a hongtungta hi. 48A mansak dingpa’n chiamtehna ding a hilhkhol sipsip a, “Ka tawp penpen amah na man ding uh” chi in.
49Huchi in Jesu a vanaih a, “Chibai, Heutupa, chi in, a tawp tonton hi.”
50Jesu’n a kiang ah, “Lawm, na hong nasan hih in” a chi hi. Huaitak in, Jesu a len ua, a manta uhi. 51Huan ngai dih, Jesu ompihte lak a khat in a khut in a sawk a, a namsau a dok a, siampu lianpen sikha a ban a, a bil a ban khiaksak hi. 52Himahleh Jesu’n a kiang ah, “Na namsau a koihna ah koih nawn in, namsau pan peuhmah namsau mah a a sih ding ziak in. 53Ka Pa ngen leng angel sang guk mun sawmlehnih hon sawlpah ding; ngen theilou in n’on ngaihtuah ua hia? 54Himahleh, ngen leng, bangchi’n ahia Laisiangthou in hichibang a hongom ding a chihte a tangtun theih ding?” a chi hi.
55Huailai tak in Jesu’n mipite kiang ah, “Namsaute, khetbukte tawi in suamhat man ding bang in kei man ding a hongpawt na hi umaw? Pathian biakin ah niteng in thuhilh in ka tu a, n’on man ngalkei uhi. 56Himahleh zawlnei Laisiangthou thute a tunkimna dia hiai tengteng hongtungta eive” a chi hi. Huchi in nungzui tengteng in amah a nusia ua, a taimangta uhi.
Siampu Lianpen Mai A Jesu Dinna
(Mk. 14.53-65; Lk. 22.54,55,63-67; Jn. 18.13-14,19-24)
57Jesu mante’n siampu lianpen Kaiapha inn a, laigelhmite leh upate omkhawmna ah amah a pita uhi. 58Himahleh Peter in gamla tak ah siampu lianpen huangsung tan in amah a zui hi, huan a valut a, a tawpna tan thei ding in sikhate lak ah a vatu hi. 59Amah hihlup theihna ding un siampu liante leh vaihawmte tengteng in Jesu hekna ding a zong uhi. 60Theihpih zuau tampi hongpai mahle uh ngohna ding a mu theikei uhi. A denchiang in mi nih a hongpai uhi. 61Hiai mipa’n, “Pathian biakin hihsia a, ni thum sung a lamnawn thei ka hi” a chi, a chi uhi.
62Huchi in, siampu lianpen a dingtou a, a kiang ah, “Bangmah a dawnglou ding maw? Hiaite hon hekna bangchidan ahia?” a chi hi. 63Jesu bel a daidide hi. Huan siampu lianpen in a kiang ah, “Pathian hing min in k’on ngen ahi, Khrist, Pathian Tapa na hi hia? Honhilh in” a chi hi.
64Jesu’n a kiang ah, “Hi e, himahleh, k’on hilh ahi, tunung chiang in Mihing Tapa thilhihtheihna taklam a tu a, van meitung a hongpai na mu ding uh” a chi hi.
65Huan siampu lianpen in a puansilh a botkek a, “Pathian a genseta; theihpih dang bangdi’n i kiphamoh nawn dia? Ngai dih uh, Pathian a gensiat dan tuin na za uh. Bangchi nasa ua?” a chi hi. 66Amau “Sitak ahi” chi in, a dawng uhi. 67Huan a mai ah chil a sia ua, a tum ua; khenkhat in a khutpek ua beng in, 68“Nang Khrist, kua ahia hontum honhilh in?” a chi uhi.
Peter In Jesu Kitheihmohbawl
(Mk. 14.66-72; Lk. 22.56-62; Jn. 18.15-18,25-27)
69Peter pawlam huangsung ah a tu a: nungak nou khat a kiang ah a hongpai a, “Nang leng Galili gam a mi, Jesu kiang a om na hi ve” a chi hi. 70Aman bel, “Na thugen ka theikei” chi in, avek ua ma ah a kitheihmohbawl hi. 71Huan inlim a a pawttak in nungak dang in amah a mu a, huai a omte kiang ah, “Hiai mi Nazaret Jesu kiang a ompa ahi” a chi hi. 72Peter kichiam in “Huai mihing zaw ka theikei” chi in, kitheihmohbawl nawn hi. 73Huan sawtlou nung in, a kiang a dingte’n, Peter kiang ah, “Nang leng a lak ua mi na hi vaw oi, na pau ah a kithei hi” a chi uhi.
74Aman bel huai mihing zaw ka theikei, chi in, hamsia kiloh in a kichiamta hi. Huchi in ak a khuang pahta hi. 75Huan Peter in, “Jesu’n ak a khuan ma in nang thumvei n’on kitheihmohbawl ding” chi a a kiang a a thugen a phawkkhia a, a pawtkhia a, a kap huphup hi.
Nu geselecteerd:
MATTHAI 26: PAITBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
