MATTHAI 13
13
1Cu ni ah Jesuh inn in a chuak i rili kamah a ṭhu. 2Cun a sinah mi tampi an i pum i tilawng cungah a kai, a ṭhut hnu ah mizapi kha tikam ah an dir. 3Tahchunhnâk hmangin bia tampi a cawnpiak hna, “Ngaihmanh u, thlaici vorhtu thlaici vorh ah a kal. 4Thlaici a vorhmi cheukhat cu lam lakah an tla i vate nih an char dih. 5A cheu lung lak lei a pannâk hmunah a tla. Lei a pan caah a keuh cawlh. 6Asinain ni a hung tlân tikah uai lak in a emh, hram a bunh lo caah a lo cawlh. 7Cheukhat hling lakah a tla, hlingkung a ṭhang i lo lak in a khuh. 8Sihmanhsehlaw cheukhat lei ṭha ah tla i a let zakhat, a let sawmruk, a let sawmthum in theitlai an chuah. 9Theihnâk dingah hnâ a ngeimi pauh nih thei hna seh,” tiah a ti. 10Cun lamkaltu kha a sinah an ra i, “Zeiruangahdah tahchunhnâk in an sinah bia na chim?” tiah an ti. 11Anih nih, “Vanbawi pennâk biathli hi nan hngalh dingah pêk nan si, asinain annih cu pêk an si ve lo ruangah a si,” tiah a ti. 12Zeitintiah a ngeimi pauh tam chinchin in a ngeih nâkhnga an chap chih hna lai, a ngei lomi cu a ngeihchun hmanh an lâkpiak lai. 13Curuangahdahkaw an sin i tahchunhnâk i bia ka chimh hna cu, an hmu ko nain an hmu taktak lo. An thei ko nain an hngal taktak lo, a sullam an hngalh khawh lo caah. 14Cun an sining Isaiah nih a rak chim chungmi kha a tling. Hnâ in an thei ko nain, a sullam an hngal kho lo. Hmuh cu nan hmuh ko nain nan lung a piang kho lo. 15Zeitintiah hi miphun hna lungthin hi a khong cang i an hnâ zong a chêt. An mit zong an i au kho lo. Culoahcun, an mit in an hmuh lai, an hnâ zong nih a theih lai i an lung in an hngalh lai, an i mer lai i ka rak damter sual hna lai,” tiah a rak ti. 16Nan mit hi a van a ṭha i nan hnâ hi a van a ṭha tuk. zeicatiah an hmuh i an theih cang. 17Biataktein kan chimh hna, “Profet tampi hna le miding fel tampi hna nih nan hmuhmi hi hmuh an duh nain an hmu kho lo, nan theihmi hi theih an duh nain an thei kho lo. 18Cucaah thlaici vorh tahchunhnâk hi rak ngai hmanh u: 19Mizei pauh nih pennâk Thawngṭha hi a theih i a sullam a hngalh lo ahcun, mi ṭhalopa cu ara i a lungthin i a tlami thlaici cu a lâkpiak tawn. Cucu lamlak i a tlami cu a si. 20Lungtamnâk hmun i a tlami cu, bia kha an theih i lungtho ngai in a cohlang cawlhmi an si; 21Asinain a chungah hram a thlak lo caah, cân toi te lawng a nguh. Bia ruang i serhsatnâk le hremnâk a phâk tikah a tlu tawn. 22Hling lak i a tlami cu, bia cu a theih ko. Asinain hi vawlei thil le rum duhnâk nih bia cu a khuh caah theitlai a chuah kho lo. 23Asinain lei ṭha i a tlami cu bia a hnâ in a theih i a sullam a hngalmi kha an si; theitlai a chuahmi cu a let zakhat, a let sawmruk le a let sawmthum in a karh tawn. 24Tahchunhnâk dang an sinah a chim ṭhân, “Vanbawi pennâk cu a lo i ciṭha a vorhtu bantuk a si. 25Asinain zan i â hngailh lio ah a ralpa a ra i ciṭha lakah ciṭha lo a deu kha a rak vorh i lo diam a kal. 26Thlaici kha a keuh i theitlai a chuah tikah a deu kha a rak lang ve. 27Longeitu sinum kha an ra i, ‘Bawipa, lo ah ciṭha na vorh a si lo mei? A deu khi zeitindah a um khawh ê? tiah an ti. 28An sinah, ‘Kan ralpa cawlcanghnâk a si,’ tiah a ti. Sinum hna nih a sinah, “Asiahcun cu hna cu kan va khawmh hna lai maw? tiah an ti. 29Anih nih, “Sihlah e, a deu nan khawmhnâk ah a tak nan hrawh sual lai. 30Rawlṭuan tiangin umṭi ko hna seh, rawlṭuan tikah a ṭuntu hna sinah, a deu kha khawm hna ulaw meiphu ah paih hna u, a ṭhami kha buk chungah khumh hna u, ka ti te hna lai,” tiah a ti. 31Tahchunhnâk dang kha an sinah a chim ṭhân, “Vanbawi pennâk cu an`amci fangkhat a lâk i a lo ah a tuhmi bantuk a si; 32Ci vialte lakah a hme bik a si nain a ṭhan tikah thlai dang nâkin a ngan deuh i thingkung ah â cang; vanva an ra i a nge ah an riak tawn,” tiah a ti. 33Tahchunhnâk dang a chimh ṭhân hna i, “Vanbawi pennâk cu nu pakhat nih thilnu â lâk i changvut relkhat thawhter ding i a phulhmi bantuk a si. 34Cuvialte cu Jesuh nih tahchunhnâk in mizapi sinah a chim i tahchunhnâk lo cun an sinah zeihmanh a chim lo. 35Profet nih, “Tahchunhnâk in ka kâ ka pau lai i vawlei serka i â thupmi kha ka chim hna lai” tiah a rak chimmi kha a tlin nâkhnga caah a si. 36Cuhnuah Jesuh nih mizapi a ṭinter hna hnu ah inn ah a lut. A lamkaltu kha a sinah an ra i, “Lo i ṭhlaici deu kong kha kan chimfiang tuah,” tiah an ti. 37Anih nih an sinah, “Ciṭha vorhtu cu Mi Fapa hi a si. 38Lo cu vawlei hi a si. ciṭha cu pennâk fale hi an si. cideu cu misual fale an si. 39Ralchanhtu, cideu a vorhtu cu khuachia a si, Rawlṭuan cu vawlei donghnâk ding kha a si; rawl ṭuntu cu vancungmi an si. 40Cucaah a deu kha an khawmh hna i mei ah an paih bantukin vawlei donghnâk ah cun a um te lai. 41Mi Fapa nih vancungmi kha a thlah hna lai, a pennâk chungin Ṭhatlonâk a tuahtu hna le, nawl buartu vialte an khawmh dih hna lai. 42Meiphu chungah an hlawnh hna lai i cuka ah ṭah le hacang rialnâk a um lai. 43Miding cu an Pa pennâk ah ni bangin an ceu cang lai. Theihnâk dingah hnâ a ngeimi nih thei ko hna seh. 44Vanbawi pennâk cu lo i ro an phummi, mi nih a hmuh i a thuhmi bantuk a si. Â lawmhtuk ah a ngeihmi vialte a zuar i lo cu a va cawk. 45Vanbawi pennâk cu lungvar dawh kawlin chaw a lettu bantuk a si; 46Lungvar mansung a hmuh tikah a ngeihmi vialte a zuar dih i a cawk. 47Vanbawi pennâk cu rili chung i lênkhang zam i nga phunkip an awhmi bantuk a si. 48Lênkhang kha a khah hnu ah tikam ah an hnuh i ṭhutbu in a ṭhami an thim i a ṭha lomi kha an hlawnh ṭhân hna. 49Vawlei a dongh tik zongah cubantuk cu a si te lai. Vancungmi kha an chuak lai i miṭha sinin miṭha lo kha an thleidan hna lai; 50Meiphu chungah an hlawnh hna lai. Cukâ ah cun ṭah le ha cang rialnâk a um lai,” a ti hna. 51Jesuh nih an sinah, “Hi thil vialte hi nan theithiam maw? a ti hna. Annih nih Aw, kan theihthiam ko, Bawipa,” tiah an ti. 52Anih nih “Nawlbia cawnpiaktu, vanbawi pennâk kong a cawng cangmi hna cu, inn ngeitu a ro bawm chungin thilhlun le thilthar a chuah tertu bantuk a si,” tiah a ti hna. 53Jesuh nih tahchunhnâk a chimdih hnu ah cu hmun cu a chuahtâk. 54A umnâk khua a rak phân i an Sinagog ah a cawnpiak hna, an khuaruah a har ngaingai. “Hipa nih hin hi fimnâk le khuaruahhar tuahkhawhnâk hi khauzeiindah a hmuh? 55Hipa hi zungthiampa fapa kha a si lo maw? Anu zong Mary an timi a si lo maw? A nau le zong Jeim, Josef, Simon le Judas an timi an si lo maw? 56Afar le zong kan sin i ummi an si lo maw? Hipa nih hin khuazeiindah hi thil vialte hi a hmuh hnga?” tiah an ti. 57Cuticun Amah cu an zum kho lo. Jesuh nih an sinah, “Profet cu amah khua dah ti lo ah cun conglomh lo in a um bal lo,” tiah a ti. 58An zumhlonâk ruangah cuka ah thil lianngan tampi a tuah lo.
Nu geselecteerd:
MATTHAI 13: HAKABSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
