Mateo 4

Ti Jínahña chrókjuachròe Jesús

(Mr. 1:12-13; Lc. 4:1-13)

1 # He. 2:18; 4:15. *Ti Ncha̱kuén Díos mé sákjui̱ko chꞌin Jesús nte̱je̱ kixin chrókjuachròe ti Jínahña ti jehe chꞌan. 2Ndá ó kꞌuatsínka cuarenta ña̱o la ko cuarenta tie kjoniehña chꞌan landá ikꞌuén chꞌan kjinta. 3Ndá kóchjina ti Jínahña la ndáchro:

―Ti chaxín jaha Xje̱en Díos la ndáche ti ixro̱ i kixin tsꞌóna nio̱tja̱ sinte.

4 # Dt. 8:3. *Ndá chꞌin Jesús kjuáte̱he, ndáchro:

―Náhí. Ndáchro xroon itén Díos: “Jehya jehó nio̱tja̱ ó tjejóchónxin chojni. Náhí. Kaín ti itan nixja Díos mé tꞌejóchónxin chojni.”

5Ndá ti Jínahña mé sákjui̱ko ti chꞌin Jesús ti chjasin tjóá, ti chjasin Jerusalén, la sákjui̱ko chritaón ikja ti ni̱nko imá noi, 6#Sal. 91:11, 12.*la ndáchro:

―Ti chaxín Xje̱en Díos ti jaha, la tꞌanótjexian ntihi kixin ti xroon itén Díos la ndáchro kixin:

Díos mé tsochrꞌán ti ángel kuènté kixin tsꞌayakohan.

La tsotsé sin itjá

kixin tsjotéhya to̱tá tsꞌitja ixro̱.

7 # Dt. 6:16. *Ndá kjuáte̱he chꞌin Jesús, ndáchro:

―Náhí. Ndáchro xroon itén Díos, kixin “Chji̱ñéhña chrókjuásixián ijnko kjuaxroan kixin tsꞌikon íso chojni á chaxín tjinki̱tsa Díos o̱ náhí.”

8Ndá ti ó kjuixin, la sákjui̱ko ti Jínahña ti chꞌin Jesús ijnko ijna̱ imá noi la kjuako ti Jínahña kaín ti nación siín chjasintajni la ko ti nkehe tjete chónta. 9La ndáchro:

―Kaín tíhi tsotjahá ti tsjakꞌexi̱án tóchꞌian la tsjíkosáyehé ti janhan.

10 # Dt. 6:13. *Ndá kjuáte̱he chꞌin Jesús ndáchro:

―Sátjia Satanás, kixin ti xroon itén Díos ndáchro: “Jehó Ìnchéni Díos chrókjuíkosáyehé la ko jehó chꞌan chrókjui̱chꞌehé chꞌan ixra̱.”

11Ndá ti Jínahña la kuíto̱he ti chꞌin Jesús la ikui sin ángel kjuínki̱tsa ti jehe chꞌan.

Jesús kjuankíxin ti ixra̱ kuènté

(Mr. 1:14-15; Lc. 4:14-15)

12 # Mt. 14:3; Mr. 6:17; Lc. 3:19, 20. *Ti ó kuíhin chꞌin Jesús kixin ti chꞌin Juan la tjechjina ndá sákjuí chꞌan nó Galilea. 13#Jn. 2:12.*Kjánchó kuíto̱ehya chꞌan Nazaret; sákjuí chꞌan Capernaum la ntiha kjuákꞌe chꞌan. Ti chjasin itjen chrínta nda̱ñao chjino Zabulón la ko Neftalí. 14Mé xi̱kaha xiteyá ti nkehe tsíkjin Isaías, ti nkexro kꞌuéchronka itén Díos ósé, ndáchro:

15 # Is. 9:1, 2. *Tihínra jahara tjejora Zabulón la ko Neftalí,

itjen ti nti̱a chrínta nda̱ñao la ko ti nda̱río Jordán,

Tihínra jahara tjejora Galilea ti tjejó ti sin jehya judío:

16Ti sin kuékꞌejó sítie, mé kꞌuíkon sin ijnko xrohi ijié,

la ko ti sin kuékꞌejó éxi tsíkꞌen

mé ti xrohi a kꞌuinkaséñexín sin.

17 # Mt. 3:2. *Ndá kjuankíxin kjuako chꞌin Jesús, ndáchro:

―Ti̱to̱héra iji̱ára. La tákjára ti nti̱a ni̱xin kixin ti kjuachaxin kuènté Díos itjen nkaya nka̱jní la í séhya itsi.

Jesús kꞌuéye̱he̱ noó chojni kꞌuétsé koche

(Mr. 1:16-20; Lc. 5:1-11)

18Ndá ti kꞌuatsínka chꞌin Jesús chrínta ti nda̱ñao Galilea, la kꞌuíkon chꞌan yaá sin nkoko̱a kícho sin, ijnko chꞌan mé itꞌin Simón, mé kja̱xin itꞌin chꞌan Pedro, la ko ti kícho chꞌan itꞌin Andrés. Jehe sin mé itꞌe sin ti nchísén chrínkí ìnta̱ kixin xritsé sin koche. 19Ndá chꞌin Jesús ndáchro:

―Chréhéra ti janhan ndá tso̱tja̱hára ixra̱ tsjéyára chojni.

20Ndá tuénxín kuíto̱he sin ti nchísén kꞌuétséya sin koche, la chréhe̱ sin.

21A̱ndá kjínhña kjuíji chꞌin Jesús la kꞌuíkon chꞌan í yaá sin, nkoko̱a kícho sin, mé Jacobo la ko Juan, xje̱en chꞌin Zebedeo. Tjejóko sin ti itꞌé sin nkaxehen ijnko ntabarco la tjejótjo̱nité sin ti nchísén tséya sin koche. La chꞌin Jesús kꞌuéye̱he̱ ti sin a kja̱xin. 22Ndá jehe sin tuénxín kuíto̱he sin ti ntabarco la ko ti itꞌé sin, ndá chréhe̱ sin chꞌin Jesús.

Jesús kjua̱ko̱he̱ nchónhña chojni

(Lc. 6:17-19)

23 # Mt. 9:35; Mr. 1:39. *Ndá sákjuí chꞌin Jesús nkuíxín Galilea la kjua̱ko̱xi̱n chꞌan ti nchia xrakue̱xín ti sin judío nkojnko chjasin la kjuako chꞌan ti itan jína chrónka nkexrín ti kjuachaxin kuènté Díos la ko kjuínchekito̱he chꞌan jína itsjé chojni, kjuatsìin chꞌan kaín ichin la ko kaín kjuatjoté. 24Ndá kaín ti sin tjejó Siria kuíhin sin nkexrín ti kjuaxroan kjuasin chꞌin Jesús landá kjui̱ka̱o sin kaín ti chojni níhi, kaín ti chojni chónta kjuatjoté la ko ti chojni chónta ncha̱kuén jínahña, ti chojni tꞌaniáte la ko ti sin tsíxénká to̱té, landá chꞌin Jesús kjuínchekito̱he chꞌan sin jína. 25La itsjé chojni chréhe̱ ti chꞌin Jesús, ti sin kjui̱xi̱n Galilea la ko ti sin Decápolis, ti sin Jerusalén, kaín chojni siín Judea la ko ti sin tjejó chjinaxón ti nda̱río Jordán.

Nu geselecteerd:

Mateo 4: poeNTplus

Markering

Deel

Kopiëren