Lucas 15

Kjuíncheyóe̱xin chꞌin Jesús éxi ijnko kolélo tsíkꞌitjáña

(Mt. 18:10-14)

1 # Lc. 5:29, 30. *Kaín ti sin nchekjènki̱ la ko ti sin chónta nchónhña ijie̱ kóchjinehe sin chꞌin Jesús kixin tjinkaon sin chrókuihin sin ti nkehe tjechronka chꞌan. 2Ndá ti sin fariseo la ko ti sin tjako ley mé kjuankíxin sin kjonta sin chꞌin Jesús ndáchro sin:

―Ti nkexro i, la tꞌiton ti chojni chónta nchónhña ijie̱ la ko nieko.

3Ndá chꞌin Jesús kjuíncheyóe̱xin jnko nkehe, ndáchro:

4―Ti nkojínra, chontara ciento kolélo ndá chrókꞌuitjáña ijnko va la, ¿á chrókui̱to̱éhyara ti noventa y nueve va a nte̱je̱, ndá sáchrókjuikjéyára ti iko tsíkꞌitjáña hasta chrókꞌuitjára va? 5Ndá ti ó tsꞌitjára va ndá tsamára va la tso̱cháhara. 6Ndá ti ó tsokjanra ndo̱ara ndá tsꞌeye̱héra kaín ti sin choxínra itjóra jína la ko ti sin chjinaxón ndo̱ara ndá tsondáchera sin: “Tso̱chéhe̱ni ijie kixin ó kꞌuitjá ti kolélo kꞌuitjáña.” 7Chaxín ndáxrja̱n kixin a̱ntsí tso̱chéhe̱ kaín ti sin tjejó nkaya nka̱jní ti ijnko chojni tsokjan tsochréhe̱ Díos ke ti noventa y nueve chojni jína tjejó ticháxi̱nhña tsjinkí ti nkehe tjenka̱yáxin.

Éxi ti chichaon kꞌuitjáña

8’Ti jnko chojnichjin chónta ite chichaon, ndá ti chrókjuinchekꞌitjáña tjan ijnko ti chichaon a la, ¿á chrókjuinchekꞌákjenhña tjan xrohi la chrókꞌuájón tjan ti nchia hasta chrókꞌuitja tjan ti chichaon ní? 9A̱ndá ti ó tsꞌitja tjan la tsꞌéye̱he̱ tjan kaín ti chojnichjin jína itjo tjan la ko ti sin chjinaxón ndo̱e tjan la tsondáche tjan sin: “Tso̱chéhe̱ni ijie kixin ó kꞌuitjani ti chichaon kjuínchekꞌitjáñani.” 10Mé xi̱kaha ndáxrja̱n kixin imá tso̱chéhe̱ kaín ti sin ángel kuènté Díos ti ijnko chojni tsíto̱he kaín ti ijie̱ tjasin.

Éxi ti ixjan sákjuichroe kjuínchexéhen chichaon

11Kja̱xin ndáchro chꞌin Jesús:

―Ijnko nkexro chónta yaá xjan, 12la ti xjan tsoyo ndáche ti itꞌé: “Itꞌéni, chje̱héni kaín ti nkehe tónheni tókan.” A̱ndá ti itꞌé sin kóchrítꞌo̱he ti nkehe chónta. A̱ndá ti nkexro tsoyo kꞌuáyéhe̱ ti nkehe tóhen tókan. 13A̱ndá kanhñó itsjé ña̱o la ti ixjan tsoyo kjuínchekji kaín ti nkehe kꞌuáyéhe̱, la sákjuíko ti chichaon ókjé chjasin ikjín. La ntiha kjuínchexéhen kaín ti chichaon chónta kixin jehya jína kjuíchꞌe. 14A̱ndá ti ó kjuixin kjuéje̱he ti chichaon ndá kókjinta ti chjasin ntiha la kohya nkehe sinie sin. Ndá jehe chꞌan kjuankíxin tꞌenxín chꞌan kjinta. 15Ndá sákjuikjeyá chꞌan ixra̱ sichꞌe chꞌan. Ndá ti chjasin a mé itjen ijnko nkexro kjuanchehe chꞌan ixra̱. Ndá ti nkexro a kjuajon ixra̱ ndá kꞌue̱to̱an kixin sátsji chꞌan no̱nte̱e ti nkexro a kixin ntiha tsꞌayakohen chꞌan kochíno. 16Ndá jehe chꞌan la tꞌenxín chꞌan kjinta la tjinkaon chꞌan chrókjonie chꞌan ti nkehe inie ti kochíno kixin ninkexró tjejó ntiha chrohya tsjajon nkehe sinie chꞌan. 17Ndá kjuákꞌe kjuénka̱yáxin chꞌan: “Nchónhña chojni siín ndo̱e Tꞌaná ichꞌe sin ixra̱ la chónta sin nkehe sinie sin. Ndá janhan tjétꞌénxi̱a̱n kjinta ntihi. 18Méxra̱ ijie la tsokjan ti itjen Tꞌaná la tsondáxrja̱n: Itꞌéni, kjuasini ijie̱, kuitekakuenhñani Itꞌéni itjen nkaya nka̱jní la ko kuitekakuanhñani ti jaha. 19Tósuéhe̱ni tsondáchrua kixin xja̱an ti jeheni. Chꞌénani éxi ijnko chojni tꞌaha ixra̱.” 20Ndá kuákja chꞌan nti̱a la sákjuí chꞌan ti ndo̱e itꞌé chꞌan.

’A̱ndá kjónté na̱xa̱ ikjín ikui chꞌan la ti itꞌé chꞌan la ó tsíkꞌikon la imá kui̱konoéhe̱ ti xje̱en. Ndá kuinká ti itꞌé chꞌan kjuíxihin nti̱a ti jehe chꞌan la kjóa chꞌan la ko kjonieko chꞌan kochíto. 21Ndá ti xje̱en chꞌan la ndáchro: “Itꞌéni kjuasini ijie̱, kuitekakuenhñani Díos la ko kuitekakuanhñani ti jaha. Tósuéhe̱ni tsondáchrua kixin xja̱an ti jeheni.” 22A̱ndá ti itꞌé chꞌan la kꞌuéye̱he̱ ti sin chꞌexín ixra̱ la ndáchro chꞌan: “Xrákoara ti ika a̱ntsí jína nchekꞌinkáyara ti xja̱na la ko tjakꞌénka̱yara ndedo itja chꞌan ijnko kochꞌa̱ninko la ko nchekjankara chꞌan to̱tjo̱a̱. 23La tjikákjínra ti koxintáxjan a̱ntsí tsa̱nka̱ la tꞌoñára va kixin siniekoni ti xja̱na i, tsjasihini chꞌan kia. 24Kixin ti xja̱na i la éxi ó tsíkꞌen chꞌan ndá ijie éxi ó xechón chꞌan, tsíkꞌitjáña chꞌan ndá ijie ó kónoxín chꞌan ínaá.” Ndá kjuankíxin sin kjuasin sin kia.

25’A̱ndá ti xjan sa̱o la tjechꞌe ixra̱ ti nonte. A̱ndá ti ó ikjan chꞌan la ó ikui chꞌan chjinaxón nchia la kuíhin chꞌan siín isón la ko ité sin. 26Ndá kꞌuéye̱he̱ chꞌan ijnko nkexro chꞌexín ixra̱ la kjuanchankí chꞌan nkekuènté siín ti kia. 27Ndá ti nkexro a la ndáchro: “Ti kichua la ó ikjan. Ndá itꞌá kꞌue̱to̱an ikꞌuén ti koxintáxjan a̱ntsí tsa̱nka̱ kixin jína xíkjan chꞌan.” 28A̱ndá ti xjan sa̱o la kónínkaon la chrohya kꞌuíxehen ti nchia. A̱ndá kꞌuaxrjexín nchia ti itꞌé chꞌan la chrónòa chꞌan kixin chrókꞌuixehen xjan nchia. 29Kjánchó jehe chꞌan kjuáte̱he chꞌan ndáchro chꞌan: “Nchónhña nánó tꞌa̱há ixra̱, la nkochríxín kuitekakohani kaín ti nkehe kuéto̱an, kjánchó kjuájonhña nijnko kotèntso̱ chrókjoniekoni ti sin chóxini. 30A̱ndá ijie ikjan ti xja̱an i kjuínchekꞌitjáña chꞌan kaín ti nkehe chje̱hé chꞌan, kjuasikoxin chꞌan ijie̱ chojnichjin. Ndá ijie ikjan chꞌan la, ¿na̱xa̱ tꞌoñá ti koxintáxjan tsa̱nka̱ sinie chꞌan ni?”, ichro ti chꞌin sa̱o. 31Ndá ndáchro ti itꞌé chꞌan: “Xje̱eni, jaha la xráxín tjejóko kíchóni ntihi. Kaín nkehe kuénta̱na la kuèntá kja̱xin. ¿Nkekuènté nínkaoan? 32A̱ndá ijie la ticháxi̱n tsjasihini kia ti kichua la tso̱chéhe̱ni kixin ikjan chꞌan kixin éxi tsíkꞌen chꞌan ndá ijie la ó tsíxechón chꞌan, tsíkꞌitjáña chꞌan ndá ijie la kónoxín chꞌan ínaá.”

Nu geselecteerd:

Lucas 15: poeNTplus

Markering

Deel

Kopiëren