Lucas 14

Kuito̱he jína ijnko nkexro tsíkꞌatjoyé kuenté

1A̱ndá ti ña̱o to̱kꞌéhe sin sákjuí chꞌin Jesús ndo̱e ijnko fariseo tꞌe̱to̱an kixin ntiha sinieko chꞌan sin. Ndá ti íso sin la tsjehe sin nkehe sichꞌe chꞌan. 2Ndá ntiha chokꞌèxín#14:2 chokꞌèxín frente, delante de él, en frente ti itjen chꞌan mé itjen ijnko chojni tsíkꞌatjoyé kuenté. 3Ndá chꞌin Jesús kjuanchankíhi ti sin tjako ley la ko ti sin fariseo, ndáchro:

―¿A̱ siín kjuachaxin sinchekito̱heni jína ijnko chojni níhi ti ña̱o to̱kꞌéheni ní, o̱ náhí?

4Kjánchó jehe sin la tání sin. A̱ndá chꞌin Jesús sákjuíko ti si̱níhi la kjuínchekito̱he chꞌan jína la kꞌue̱to̱an chꞌan kixin sátsji ti nkexro a. 5#Mt. 12:11.*Ndá chrꞌéxi̱n ndáche chꞌin Jesús ti sin fariseo:

―Ti nkojinra chontara kolócho o̱ koxinta la ti chrókuitsinkahya va tóye̱ la, ¿á senóhña chrókuakítsjetaónra va kjónté ti ña̱o to̱kꞌéheni ní? ―ichro chꞌan.

6Ndá jehe sin la ninkehó kjuáte̱hya sin.

Ti sin tsíkꞌeye̱he̱ sin itsji kia tsíkóte̱he chojni

7Ti ó kꞌuíkon chꞌin Jesús kixin ti sin tsíkóchjina ti kia la kjueyá sin ti silla a̱ntsí tjetoan tsꞌejótja̱xi̱n sin chjina ti mesa ndá kjuíncheyóe̱xin chꞌan, ndáchro chꞌan:

8 # Pr. 25:6, 7. *―Ti nkojín nkexro tsꞌeyahára ijnko kia tso̱te̱he chojni la tjéyáhyara ti silla a̱ntsí tjetoan; ti náhí la itsi nkojín nkexro a̱ntsí tjetoan 9ndá ti ó itsi nkexro kꞌuéya̱hára yóíra la tsondáchro kixin tsꞌinkatje̱nxian ntiha kixin tsjakꞌe ti nkexro a. Ndá jahara la tso̱suáhara sátsjira tsjakꞌetja̱xian ti silla kjuixixín. 10Méxra̱ ti ó tsꞌeyahára sin ijnko kia la ícha jína chrókjuakꞌetja̱xian ti silla tjetuanhña, kixin ti ó chrókui ti nkexro kꞌuéya̱hara la tsondáchro: “Tꞌatsínka tjakꞌétja̱xian ti silla a̱ntsí tjetoan.” Ndá xi̱kaha tsjikosáyahara sin nkayakon kaín ti sin tsꞌejótja̱xi̱n ntiha. 11#Mt. 23:12; Lc. 18:14.*Kixin kaín ti nkexro nchejié a̱sén tjinkaon a̱ntsí tsꞌe̱to̱an la chrꞌéxi̱n tsꞌítuehen sin. A̱ndá ti nkexro nchejiéhya a̱sén kꞌuétjetoanhña la a̱ntsí tsꞌe̱to̱an.

12Kja̱xin ndáche chꞌan ti nkexro tsíkjasin kia:

―Ti ó tsjásian jnko kia la tꞌéye̱hya ti sin choxián, ni ti sin kichua o̱ ti sin na̱xa̱ kjéhya o̱ ti sin rico tjejó chjino ndo̱a, kixin chrꞌéxi̱n la tsjasin sin ijnko kia ndá tsꞌeyahá la ti xi̱kahó la ó kjuixin kja̱nhán ti ixra̱. 13Ícha jína chrókꞌueye̱hé ti sin nóa la ko ti sin tsíxénká to̱té la ko ti sin xitjahya itji la ko ti sin tꞌikonhña. 14Ndá a̱ntsí chrókócháha kixin jehe sin la xitjahya tsokjanhan sin ti xra̱. A̱ndá ti ó tsoxechón ti sin jína la Díos mé tsje̱nka̱ha chꞌan kixin kjuínki̱tsa ti jehe sin.

Chꞌin Jesús kjuíncheyóe̱xin éxi ijnko kia ijié

15A̱ndá kuíhin ijnko ti sin tjejótja̱xi̱n chjino ti mesa, la ndáche chꞌin Jesús:

―Díos sincheñao ti sin sinie ti kia ijié tsꞌixin nkaya nka̱jní, ti itjen Díos tꞌe̱to̱an.

16Ndá ndáchro chꞌin Jesús:

―Ijnko chojni kjuasin ijnko kia ijié, ijnko kójín la kꞌuéye̱he̱ nchónhña chojni itsi ti kia a. 17A̱ndá ti ó kuichjina ti hora sinie sin, ndá jehe chꞌan kꞌue̱tue̱hen chꞌan ijnko chojni chꞌexín ixra̱ tsjichenka kaín ti sin ó tsíkꞌeye̱he̱ chꞌan kixin chrókóchjina sin kixin ó síchóhen ti nkehe sinie sin. 18Ndá kaín sin kjuankíxin sin kjuaxin#14:18 kjuaxin excusarse sin nkehe, ndáchro sin kixin xitjahya tsji sin ti kia. Ti chojni sa̱oxín kjuitsjehe ti nkexro la ndáchro: “Na̱ndá kꞌue̱nani ijnko nonte la ticháxi̱n tsitsjeheni, méxra̱ xitjahya tsjijini, chrónòani kixin chrókónínkakonhña, ichro chꞌan.” 19Ndá ti íjnko nkexro la ndáchro: “Na̱ndá kꞌue̱nani inꞌó yunta koxinta, la ticháxi̱n tsotsjeheni á jína ichꞌe va ixra̱, méxra̱ chenka chꞌan kixin chrókónínkakonhña chꞌan.” 20Ndá ti íjnko nkexro la ndáchro: “Na̱ndá kóte̱he̱ni, méxra̱ xitjahya tsjijini.” 21Ndá ti ó kjan ti nkexro ichꞌe ixra̱ la chenka ti làmoé kaín ti nkehe ichro sin. A̱ndá ti lamo la imá kónínkaon la ndáche ti nkexro chꞌexín ixra̱: “Tjoka sátjia kaín nti̱a ti chjasin i la tsjiko̱a ntihi kaín ti sin nóa la ko ti sin tsíxénká to̱té la ko ti sin xitjahya tji la ko ti sin tꞌikonhña.” 22Ndá chrꞌéxi̱n ikjan ti nkexro chꞌexín ixra̱ la ndáchro: “Ó kjuínchexiteyáni éxi ti kuéto̱an la na̱xa̱ xranka itsi íso chojni.” 23Ndá ti lamo la ndáche ti nkexro chꞌexín ixra̱: “Sátjia ti nti̱a ijié la ko kaín ti nti̱a ntsíntsí la tétue̱hén kaín ti chojni tsꞌitjá kixin chrókui sin ti nchia kuénta̱na 24kixin nijnko ti sin kꞌue̱ya̱ha̱ senó la ni tsotsjexínhña#14:24 tsotsjexínhña probarán, probar la comida sin ti nkehe ichján ti kia í”, mé xi̱kaha kjuako chꞌin Jesús.

Ixra̱ tsochréhe̱ni Cristo

25Nchónhña chojni nkáchréhe̱ sin chꞌin Jesús, ndá jehe chꞌan kuinkátjíá chꞌan la ndáchro chꞌan:

26 # Mt. 10:37. *―Ti nkojín nkexro tjinkaon tsochréhe̱ ti janhan la ticháxi̱n a̱ntsí tso̱tjue̱he sin ti janhan ke ti itꞌé sin, o̱ ìñé sin o̱ ichjién sin o̱ xje̱en sin o̱ kícho sin ndoa o̱ kícho sin chjin la ko kanhñó chrótjue̱hé sin a̱sén sin, a̱ndá ti náhí la xitjahya tsꞌóna discípulo kuénta̱na. 27#Mt. 10:38; 16:24; Mr. 8:34; Lc. 9:23.*La ko ti nkexro tsamáhña ti ntacruz kuènté ndá tsochréhe̱ ti janhan la xitjahya tsꞌóna discípulo kuénta̱na. 28Kixin xá nkexro ti sichꞌéna ijnko tja̱tꞌo̱ nte̱to, ¿la senóhña tjenka̱yáxin nkekja̱ín chichaon tsicháxi̱n la ko tsjehé á ncho̱xon chrókjuixixín chrókꞌónaxín ti tja̱tꞌo̱? 29Kixin ti tsjankíxin sin si̱chꞌéna sin ti tja̱tꞌo̱ ndá chrꞌéxi̱n xitjahya tsjindaxín ti ixra̱, ndá kaín chojni tsꞌikon sin la tsjano sin 30la tsondáchro sin: “Ti nkexro a la kjuankíxin kjui̱chꞌéna jnko nchia, ndá ijie xitjahya si̱nchekjindaxin chꞌan.” 31O̱ xá nkojín rey tꞌe̱to̱an tsjajo̱nko íjnko rey senóhña tjenka̱yáxin jína kixin ti ite mil soldado ó chónta la, ¿á chrókjuacha chrókjuajo̱nko ti ikán mil soldado chónta ti íjnko nkexro tꞌe̱to̱an? 32A̱ndá ti chrókjuachahya chrókjuajo̱nko ti íjnko rey, ndá na̱xa̱ ikjín itjen la ícha jína chróchrꞌan ijnko nkexro tsochronòa kixin chrókꞌuixinhña ti kjuanínkaon a. 33Mé xi̱kaha nkojínra ti tsi̱to̱éhyara kaín ti nkehe tjénka̱yáxinra la xitjahya tsꞌóna discípulo kuénta̱na.

Ti xíjnta tsíkꞌánkehe

(Mt. 5:13; Mr. 9:50)

34’Méxra̱ jína ti xíjnta, kjánchó ti chrókꞌuaxrjehe ti ijní chónta la xitjahya chrókójní ínaá. 35Ndá ti xi̱kaha la ni ti inche xitjahya tsjiko ni tsitjínkíhi ti inta tꞌóna ito jehó tsꞌitjí ndója. Ti nkexro tjinkaon tsihin la chrókuihin jína kaín tíhi ―ichro chꞌin Jesús.

Nu geselecteerd:

Lucas 14: poeNTplus

Markering

Deel

Kopiëren