Luka 8

Ndau mujer nesërё dupi Jezus

1Dupi aisti ci unxirё, Jezus nesi pit hor shi pit kasabai tas fëcja predikimja shi s'll'u spunia evanghelu a kratu a Dumёxё, shi dojspërxacëjё ara ku nёs. 2Ara shi ndau mujer ci Jezus l'i avja vindëkatë di sufulltu urrut sh di llёngor: Maria ci s'akjёma Magdalenё, di nёsё ara dёpërtac shapti demonj, 3Joana, mujera a Kuzi ci vёgja malla shi plaçka a Herod, Suzana shi mullti allti ci avja datë avera a llor, tas s'ja xhutё a Jezus shi a dishepujllu.

Meselea a cëlluj ci sjamёnё

4Kënd s'adunarё mulltё mileti ci vinërё lla nёs di mullti bilokёri, Jezus ll'u spusi unё meselei: 5“Un om ci sëmёna, ishё tas aminë sëmicё. Kёnd ma sёmëna, ndau sëmici gëxurё n'kali, shi ômënjjё l'i këllkarё, shi puje l'i mёkarё. 6Ndau allti sëmici gёxurё tu bilok ku shkёmbi, sh kit akëcarё si uskarё, kё nu avja apё. 7Ndau allti gёxurё pit rrux. Rruxjё kёrskurё dadun ku nёsi sh nu l'allësarё s'krastё. 8Ndau allti gëxurё tu bilok bun, shi kёnd kёrskurё fecërё unësutë di or ma mullt. Dapoja xësi: Kaj ari ureq t'i avxari, as avdё!”.

Ti ci s'i spun meseleili

9Dapoja dishepujё u tërbarё ci vra s'xёkё aistё meselei. 10Jezus ll'u xёsi: “Avau v'i sënt xёsi tuti askumtёli a kratu a Dumёxё, ma allёntor ll'u spun meselei tas ajbё oq shi s'nu vjadё, shi s'avdё ma s'nu aduqastё”.

Ci vra s'xekё meselea a cëlluj ci sjamënë

11“Meselea esti aistё: sëmica esti zborru a Dumёxё. 12Sëmicëli ci gëxurё n'kali, sёnt acej ci u avd zborru. Dapoja jini djavollu shi orrëqeshti zborru di inëma a llor, tas nu pistusjastё shi s'nu s'i skapё. 13Sëmicёli ci gëxurё pit shkёmbi, sënt acej ci u avd zborru, shi o-prôqё ku hёrau, ma nu o-llasё tas akacё rrëxёtinё. Ej pistusest gollё ti pucёn qёro, shi tu qërollu ci s'bagё tu provё s'dёpërtjaxё di pistuseri. 14Sëmica ci gëxu pit skinj, sënt acej ci u avd, ma tu aistё kali ll'u ja sufulltu hëjurrё shi stinahorili, avera shi bunecli a shtёje bani, shi ponjjë a llor nu s'axhung. 15Sëmica ci kadi tu llok bun, sënt acej ci u avd zborru shi u vjagje tu unё inёmё tinjësitё shi bunё. Aiç arrëmën ma pistusicjë shi fak ponj bunj”.

Lunjina sum kёpësteri

16“Içvërr nu o-prindi kёndilla tas u bagё sum kёpësteri, iti sum kёrvat. Llunjina s'bagё tu këndilla a je, tas u vjadё llunjina acej ci intrё nunt. 17Içcёva askumtё nu us arrёmёnё n'i zdёvëlitё, shi içcёva askumtё nu us arrёmёnё n'i kënёskutё shi n'i ishatё tu llunjinё. 18S'avec mintja kёnd avxac, kё acell ci ari us i'j s'i da ma mullt, shi acell ci nu ari, us i'j s'i ja shi aca pucёnё ci mindueshti ci ari”.

Mёsa shi fracjë a Jezus

19Mёsa shi fracja a Jezus nesёrё tas s'i adunё, ma nu pёturё tas axhungё pën di nёs, kё avja mullc ômёnj. 20Dapoja i'j xësërё a Jezus: “Mёta a ta shi fracjë a tëj sënt nafôrё sh vra s'ti vjadё.” 21Ma ell ll'u xёsi: “Muma a mja shi fracjë a njej sënt acej ci avd shi fak zborru a Dumёxё”.

Jezus qinduri vimtu shi tallazu

22Unё xuё Jezus s'ja lёnё pi unё varkё ku tuc dishepujë a lluj shi ll'u xёsi: “Us nёxem tu allantё marxënё a gjolu”. Shi ashё, nqёsirё. 23Kёnd ma vuzja, Jezus o-këcë somu.

Di-unôrё ahurhji un vimt mari pisti gjol. Varka ma s'umplla ku apё, shi ej pôti s'i nёka. 24Dishepujё i'j s'i apurqarё a Jezus, u zhdëpëtarё sh i'j xësërё: “Mvëcëtor, mvëcëtor ma n'i nёkёm.” Ell s'i zhdёpёtё, u vërji vimtu shi tallazu sert, sh ej di-unôrё qindurirё. 25Jezus ll'u xёsi a dishepujllu: “Ju esti pistusera a vôstё?” Ej ara aspёrac shi çudusic, sh xësërë un-di-allant: “Kaj esti aist ci faci timbii shi vimtu shi apa, sh'eli s'i apunё?”

Vindikara a unuj gerasenu ci ara umpllut ku sufulltu a djavollu

26Dapoja axhumsёrё tu biloku a gerasenёllor, ci ara di allantё marxënё a gjolu, qandra di Galilea. 27Kёnd dupunё tu marxёnё, all Jezus i'j ishё dininti un om di aca kasabai. Aist om ara umpllut ku sufulltu a djavollu, shi avja qëro ci nu s'vёshtja sh nu bёna akasё, ma pit mirëminc. 28Kёnd vёxu Jezus, ell sёlёgji unё aurrari, gёxu pёrdinc dininti a lluj shi aurrё ku bocia analltё: “Ci aj ku mini Jezus, Hjij a Dumёxё ma anallt? Ma c'fak rixhai, nu m'i sturnjupsja!”, 29kё Jezus i'j xesi a sufulltu urrut tas isha di acell om. Sufulltu urrut o-vja umpllutё acell mullt or, tiaca u lёga ku zinxhiri shi u cënia tu hjarrё, ma ell l'i fërnxja hjarrёli shi draku u pinxja tu errnjii (pustinjë). 30Dapoja Jezus u tёrbё “Kum ôj numa?” Ell j'u turrё “Legjion”, kё nunt lla nёs avja intratё mullc demonj. 31Shi djavollu i'j fëcja rixhai a Jezus tas s'nu ursja demonjjë s'i aminë tu rripë. 32Ako ara unё kupii mari di porrc, ci ma pёshtja tu munti shi draku i'j feci rixhai tas o llësa s'intra tu kupia di porrc. Jezus o-llёsё. 33Kit ishё di acell om sufulltu a djavollu, s'hjipsi tu porrc. Porrcjё kёrcёnirё tas arrsëra dit rripё tu gjol, shi s'nëkarё. 34Kёnd vëxurё ci unxi, acej ci pёshtja porrcjё, kërcënirё shi rrëspëndirё hëbara pit hor shi pit kasabai. 35Ômënjjё vinërё tas vjadё ci avja unxitё. Kёnd axhumsërё lla Jezus, afllarё omu ci avja skëpatё, shi di nёs ara dëpёrtac demonjjё. Ell ara apus tu çëçôrrё a Jezus, ara mvëskut sh ku mintja bunё. Ej j'akëcё frika. 36Acej ci avja vëxutё aca ci s'feci, ll'u spusërё kё kum ara vindёkat umpllutu di sufulltu a demonjllu. 37Dapoja tuc ômёnjjё a shtëlluj biloku i'j këftarё a Jezus tas s'i dëpërtjaxё di nёsh, kё avja mulltё frikё. Jezus s'alënё pi varkё shi s'turrё. 38Omu ci skëpё di djavollu i'j këftё a lluj tas sta ku nёs, ma Jezus u nqësi sh i'j xësi: 39“Tôrrёti lla kasa a ta, shi spunё ci ari faptё Dumёxë ti tini.” Ell s'dёpёrtё shi spusi tu tuti kasabaili ci avja faptë ti nёs Jezus.

Hjija a Jair shi mujera llёnxёtё ku hemoragjii

40Kёnd ma s'turra, a Jezus j'isharё dininti mullc ômënj ci ma o-shtëpta. 41Astumsëna s'apurqё un burbat ku numa Jair, ci ara ma marrё ali sinagogi, sh i'j gëxu pi çëçôri a Jezus. Ell i'j fece rixhai tas nёxja lla kasa a lluj 42kё fjata a lluj, singura, ci ara dojspërxaci di anj, ma mura. Kala ti lla kasa a lluj, ômënjjё di tuti pёrcli ma s'pinxja. 43Shi unё mujeri ci stërrxja di dojspërxaci di anj di llëngôra a sënxili, ku tutё ci avja harxhuitё tutë avera a je, içvërr nu avja pёtutë tas u vindëka. 44Ija s'apurqё di dinëpoj, akëcё ku mëna a je cepu ali manteli, shi di-unôrё i'j qinduri sënxili. 45Astumsëna Jezus xësi: “Kaj dedi pi mini?” Tuc u fecërё asha. Pjetru i'j xësi “Mvëcëtor, ômënjjё ma t'ja vërrtest shi ma ti ping” 46Ma Jezus xёsi: “Un om m'ja këcё ku mëna, shi aduqij ci nj'ishё fuqii di mini.” 47Astumsëna mujera, kёnd vëxu ci nu putja s'i askundё, vini sh trumbura. Gёxu pi çëçôrrё a lluj shi spusi dininti a tutëllor ti ci o-vja akëcatё ku mëna Jezus, sh kum ara vindёkatë di-unarё. 48Jezus i'j xësi: “Hjijё, pistusera a ta t'i ari skёpatё. Fux tu irini.” 49Kёnd ma gra, vini un di kasa a ma marrё ali sinagogi shi i'j xësi: “Hjijëta muri. Nu u stinahorsja ninga mvëcёtoru.” 50Kёnd o-vxё aistё Jezus i'j xёsi: “Nu t'ja spari, gollё pistusja shi ija us skapё.” 51Kёnd axhumsi akasё, nu allёsё içvёrr tas intrë ku nёs, gôllё Pjetru, Gjon, Jakob, mësa shi tatёsu a fetiji. 52Tuc pёllnxja ku kuji, ma Jezus xёsi: “Nu pëllnxec, ija nu e môrtё, ma, ma dôrmi.” 53Ma ej s'ja rrëdja, kё u shtja ci fjata avja muritё. 54Astumsëna Jezus u llo di mёnё sh i'j xësi: “Fjatё skôllë!” 55A je i'j s'i turrё sufulltu shi s'i skullё di-unôrё. Dapoja Jezus ll'u xësi s'i'j da ti mёkari. 56Përincjё a je s'hërësirё mullt, ma Ell ll'u xësi s'nu i'j spunia a içvërruj ci avja unxitë.

Nu geselecteerd:

Luka 8: ARUM

Markering

Deel

Kopiëren