KANTHOUNA 4
4
Adamyei Chanaorap
1Asinungri Adam'ne aiyei nu Eve'le rkhum tilrilbini, heirou ani nao urbi Cain'ya hungpukkurla; heirouri Eve'ne kyun, “Keine Umpurei chanapawa khat pukpiwurla”. 2Heihillou ani hanuikhi chanapawa khatkhi pukthula, aiyei minri Abel toubine ung, heirou Abel'ri yaosil thimi, heiya Cain'ri loutrun thimi. 3Heirou nungkhatnuiri Cain'ne aiyei lou trunnarei thuk hutlha hei tha Umpuei bomra makatkur. 4#Heb 11.4. Heirou Abelnekhi aiyei dunna yaorul hangrei yaoshun hutlha marnamcha khat khalthutbi makatkur. Heirouri Umpune koukhi khalchanamakni Abelya malung pilwurbi aiyei makat putya loulhakpikur. 5Heiya Cain'le aiyei makatkur putyari Umpune malung pilmakkurbi loulhakpimakura. Heitounei ngamrou Cain'ri meithukni malungkhawurbi aiyei mai mraowura. 6Heitounei Umpune Cainya kngai, “Nangya koungammei heinak malungkhakurawo? Kouya tounei neiyei mairung mraobi sikhuplhakuro? 7Lhangai toubom thukya nangni chimni loutoukhoulanungri, neiyakhi yapimakrouko? Heiya lhangai-chimya nangni toumakurari, borh heini neiyei shumtrumra heitonlhakura, heiya nangni aya kul chalchangmanungri, neiyari ani tlumni maangyerrouwa.” 8#1 Jn 3.12. Heirou Cain'ne aiyei naowa Abelya, “Kakhu'teinao ramra chawase,” toubi yunbini chilloukur; heirouri yakhu teinaoni ramhangra chayei kaalnung, Cain'ne kanthi fyoubi aiyei naowa Abelya umhatkur. 9Heirouri Umpune Cain'nung kngai, “Neinaowa Abelri kourangawo?” Heirouri ani loumallang, “Keiri mumakme. Keiri keinaowaya silchabi klei thimiko?” 10Heirouri Umpune shun, “Neiyei toukur heiya kouweiyo? Thilak, neinaowaei hee heini thleimairei Keinung kat'ungraobi leilei. 11Heineri asinung waiyoubini neihutrei neinaowaei hee heiya machuplhaknung aangbi klei thleikhur heirouwei neiyari manchowurla. 12Heirou nangni thleiya chorbini lou trunlanungkhi trunwai lhangaini lukmakrou; heirou nangri tlaipang doura cheem-keikhi naimakni ramtangbi kuicha-kuimaibi klei thimi hoirouwa.” 13Heirou Cain'ne Umpunung shun, “keinungei pikur tanti awari keiyei urchangnarouwei duini ritdachakura. 14Thilak, angturi Nangni keiya tlaipangpal bi arouwei hulthutdurla, heirou Neiyei mit'thrilna bom'rouwei keiri trukyullouwa; heitoubi keiri cheem-keikhi naimakni leirouwa; heirou huhuni keiya karthanglanungri hatrouwame.” 15Heirouri Umpune anungei shun, “Heiri nimakme, thimi hukounakpani Cainya hatlanungri, anungei enibui thukni khlang lhakrou.” Heisitounei Umpune Cainya sharungra mu'kna hutlha makmei khat leiyerkur, heiya mubini thimi hunikhi aya hatpimakrou. 16Heisitoubi Cain'ne Umpuei bom'rouwei chawurbi, heirou Edenyei kulkung lhangrei klei ram Nodra wabi paalkur.
Cainyei Yu-charap
17Heirouri Cain'ne aiyei nule rkhum tilrilbi, heirou aiyei nu heiri nao urwura, heitoubi Enoch'ya hungpukkurla; heirou ani aiyei chanapawa Enochyei min loubini kho khat phunbaangkur. 18Heirou Enoch'ne Iradya pukkhou; heitoubi Irad'ri Mehujaelyei pa, heirou Me-huja-elri Me-thusha-el'yei pa, heitoubi Me-thusha-elri Lamech'yei pa. 19Heitoubi Lamechni nu khintam loukhou; Nutiryei minri Adah toubi ung; heirou nukhuyei minni Zilla toubi ung. 20Nutirwi Adah'ne Jabal'ya pukkhou, heirou Jabalni ramhangra khuiluphi cheem klei halsilbi klei chanao rapya pukkhou. 21Heitoubi ainaowaei minri Jubal toubine ung; heirou a heiri taari taangkhung thimirap, heirou paasi khung thimi rapbei yenraanna pa. 22Heirou Lamech'yei nukhu Zilla'ne Tubal-Cainya pukkhou; heirou a heiri kulshan heirou thir sheemnara beimakni hutsa khei lhangsha khat. Tubal-cainyei charwiyei minri Naamah toubine ung.
23Heirou Lamechni aiyei nu rapnung shun, “Adah heirou Zilla, keiyei houya louninglak; Lamech'yei nurap, nani keiyei kyunya ninglhaklak; Keiya hatnungei krang thimi kartlanga khatya keine hatdurla; 24Heitoubi Cainya hat thimi heiyari enibuirek kallengni khlang lhakkur kya; heiya Lamech'ya hat thimiyari somret'enibuirek kallengni khlang lhakrou.”
Sethdei Yu-charap
25Heitoubi Adam'ne hanuikhi aiyei nule rkhum tilrilthula, heirou aiyei nu heiwini chanapawa khatkhi pukthula; heitoubi aiyei minri Seth toubine ungkur; heirouri Eveni kyun, “Cain'ne Abelya hatdurbikhi, Umpune keiya kringpibi Abelyei rungkhlang khoini keinungei chanapawa khatkhi pukyerpithula.” 26Heirouri Seth'nekhi chanapawa khat pukkhou, heirou ani aiyei chanapawaei minri Enosh toubine ungkur; heitoubi kheen heirouwei waiyoubini tlaipang thimi rapne Umpuei minya ungbi khrumyoukur.
Nu geselecteerd:
KANTHOUNA 4: MARIBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
