MOTHI 11
11
Jisu Aro Johon Baptist po
(Luk. 7:18-23)
1Ladisi Jisu anang bangkere-hini adun hel yok kithan aphel, lalong para tikangsi, anali rongpe jon-jan kapaklang ayok aro kapahar ayok damo. 2Laparake Johon Baptist po akrol along, Jisu Khristo katiki asal arjusi, anang adun hel angkhan yok ladi thansi tolo, 3aro Jisu yok pulo, “Kiwang nangepo nango ma, ma hali kamprek ihutyok inghong nang?” 4Lasi Jisu analiyok than phakngo, “Damot aro potsi arju hlongdo aro thek hlongdo, labang a-udi Johon poyok than dammot: 5Chotok po amek thekdo, kengkok hel akeng chijordo, arje ibeng kiso hel pangthir phlendo, nothong hel arju hlongdo, kithihel thurdo aro kicho-kangweyok kime-alamthe pahardo. 6Aro inghosi neyok aduk hlonghle, anangsi bor-eh chok.
Johon Baptist Poyok Jisu Kaparklam
(Luk. 7:24-35)
7Anali kidam jong amun, Jisu ke Johon po alam rat hel angot labadi alam than pono, “Nali pot kilangyok ingnam ajuyok olesi kidam? Tomon kapaklem ingkra ma? 8Tene pot kilang yok kidam? Kang-ar ape kachi-ik arleng kilang yok ma? Langot, inghosi ladi kang-ar ape chi-ik, anali recho ahem longsi doman. 9Tene piyokte olesi kidam? Turki poyok kilang aphan ma? Oik, ne nali thando, turkipo ayok ta kithechot ihut poyok. 10Johon po alam lo-kangthir long ladisi wido, “Langot, ne tharlon poyok nang ango tole, anang nang ngo-ngo si duwar honjoknge.” 11Ne naliyok khanangsi thando, arlosohel para kiplang hel adak, Johon Baptist po ateng aghai kaita wangwe yong; manta ethakpe-alongri long kibek yokta kibek posi anang yokta aghaichot. 12Johon Baptist po adin para minonhok ke ethakpe-alongri paduk-hap do, aro sotonga arleng hel sepsi en man. 13Piyok pu tene Johon po arniyok ahuwit turki aro Mosi po kanong long mophel kachiplange alam pachiklano. 14Aro nali labang alam kachidenge anengdo, tene anang kiwang nange ke Elija po. 15Ingho bangposi anodo ma, anang onenot! 16Manta labang owepo arleng helyok ingho pente ne pachingbar bo? Jibadi oso hel hathi long iningsi, anang kijal alokjor helyok chitaramsi puman, 17“Hali nali ngot muri-butpilo, manta nali kanke yongot, hali kasuru ghuk-ghuk manta, nali aneng dohojinje yongot.” Anali labang oso hel badilo. 18Piyok pu tene Johon po wangsi cho-junje yongot; la-apotsi arleng hel anangyok ke si-ik kihap po pusi puman. 19Arleng Aso wangsi cho-juno; la-apot arleng hel puman, “Langot te, bangpo kicho akhok aro hor kangri, kalukdar aro papi hel akhoipo. Manta agiyan, anang bithang katiki parasi khanang pusi aporman pido.”
Kikrolkre Arongpe
(Luk. 10:13-15)
20La-amun jotmahal arongpe long anang ki-ongchot ajakong asal katiki, lalong arleng hel neng kachipharleple apot, anang labang arongpe helyok ado pisi tampono. 21“Ayoh, Korasin abang, ayoh Bethsaida abang, nali kaphere me-me do! piyok pu tene nali sitem long jipe jakong kithe tikilo, labang asal hel Sidon aro Tayar rongpe long katiki nang tene, lalong kido abang angoke bosta ape chi-iksi aro thetlo chihelsi pap hel para neng chipharlep mo hoi. 22Manta ne nali thando, bisar-akithe arni nali aduk ayok ke Tayar aro Sidon aduk kachihi jalso chotbo. 23Aro ei Kaparnam abang, nang ethakpe yok thur une pusi chiron do ma? Jom ayoksi sun hlonge. Piyok pu tene nali sitem konbak jakong kithe asal tikilo, labang asal Sodum long katiki nang tene, bangpo minihok ta dojongo hoi. 24Manta ne nali thando, bisar-akithe arni nang aduk yok ke Sodum alongri aduk kachihi jalso chot bo.”
Jisu Anang Apayok Kardom Kipi
(Luk. 10:21-22)
25La-apor Jisu parju daksi pulo, “O Pa, ethakpe aro pirthimipe Hemphu, nang agiyan aro budhi-ater abang para lamehel butisi, oso hel angot chiklango, lasi nangyok kardom pajir do. 26Oik Pa, ladisi nang mahang semsemsi neng samjin kihlong apot, nangyok kardom nangpi do. 27Ne Apa parasi ahuwit neyok champi detdo; aro Apa aparke kaita Asoyok chinine; Aso aparke aro Aso ingho ango anang yok pachiklang yok anengman, anang aparke kaita Apa yok chinine. 28Kilak aro kaharjak abang, nedung yok wangot; ne naliyok kisang nali piye. 29Ne ke chipabek hop aro angthin kangduk arleng; la-apot nali thak ne jongal chibat, aro ne para chirlinot; la-amun nali bithang anenglong kisang hlonge. 30Piyok pu tene ne jongal ke chihi me-at, aro abhar ta karjang.”
Nu geselecteerd:
MOTHI 11: AMRI-BSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
