Matayo 5
5
1Eneki’nd’oenaka bik’ike bon’ato, aanda ena lingonji; ko eneki’nd’okisak’ase bakili’anande baoy’eneyal’ende; 2ko aomumola bonyua bonande, ko amalaka, ate,
3Iy’anayali biinda en’olimo bakik’ekiko; lacina lifoka lina loola liyali liniyo.
4Iy’an’oka lokeseli bakik’ekiko; lacin’iyo bangolombolama lokeseli.
5Bana mwi bakik’ekiko; lacin’iyo bangosangola loko.
6Iy’anoka baoyi bana mbongi njala la mposa bakik’ekiko; lacin’iyo bangokinda.
7Iy’anokamel’ato isei bakik’ekiko; lacin’isei inguta eneyal’iyo.
8Iy’anayali l’etema bena soto bakik’ekiko; lacin’iyo bangena Yakomba.
9Iy’an’ambany’ato en’efili bakik’ekiko; lacin’iyo bangotangama ban’ana Yakomba.
10Iy’an’enyama bino lacin’ena mbongi bakik’ekiko; lacina lifoka lina loola liyali liniyo. 11Enengi bato okotang’ino lotango ko bakoeny’ino bino, ko bakofot’ino bowe bon’ekotua behetu lacin’enami, ino bokik’ekiko. 12Bonyangelaka ko bokikak’ekiko bike, lacina nkita enino eyali bokolo ena loola, lacin’oka iyo baenyaki basumoli banayaaki en’oso’onino bino nk’osamb’oho.
13Ino boyali bokwa bona loko; koko yombo bokwa bosila bolotsi, bongata bolotsi lakina ineya? Boho bofayonge lakina tu: ekoli lacina boho bookame, ko bato baikamel’oho l’akaka. 14Ino boyali fololo en’enyanga. Bonyanga bonoyali ena lingonji bofafisamisa. 15Bato bafafetsa moinda lacina baile eho en’ase ban’ifondo; bail’eho en’eilelo ena moinda, ko eofeta eneyali bato bahatu banayali en’otumba. 16Nk’osamb’oho bila fololo enino efete en’oso bon’ato, lacina baene bikambwa binino bin’olotsi, ko bakumya Bafango’onino onoyali ena loola.
17Botakanelake oka njaki oyehya basangya ko l’aoyi banaki basumoli otendaka. Ntaya oyehya: njaki lacina baoyi’aho bailame. 18Solosolo, emi lakosumol’ino, yengoko loola la loko bauma, efana yoi limoko ko efana indembindembi imoko ininguma ena basangya, yengoko baoyi bahatu bailama. 19Lacin’eho, boto onotembola boek’omoi bona beeka bene beneleki tosalisali, ko alak’ato yok’oho, angotangama isalisali mene ena lifoka lina toola; ohonde boto on’ila beek’eho, ko alak’ato beho, ende angotangama ona lokumo ena lifoka lina loola. 20Emi lakosumol’ino, yombo mbongi enino efaleki mbongi ena batengi ban’ekanda l’ena Bafalusi, bofatuaki ena lifoka lina loola tu.
21Ino bomoka baoyi banak’iy’osumolaka bato en’alale, iy’ate, Botayakake’oto; ko onongoyak’oto angokolana l’ekwelo ena likambo. 22Koko emi lakosumol’ino, boto l’oto onoka efili enande nkele angokolana l’ekwelo ena likambo; ko boto l’oto onila efili enande, ate, E ilemeleme! angokolana l’ekwelo ena likambo la likita lina balimo; ko boto onila, ate, E bolole! ende angokolana la Ngena ena nkoi. 23Lacin’eho, yombo olekya nganji ene ena mesa ena mbeka, ko enayel’e meho okanedy’oka e l’efili ene boyali la likambo, 24cika nganji ene en’oso bona mesa ena mbeka, ko coaka oyosimbane k’efili ene en’oso, ko omboya oyolekya nganji ene. 25Enaco’e la bookyi’owe’one ena mboka, ongya lisimbana l’ende isanga, lacina bookyi’owe’one atokotola eneyali juge, ko juge atokolekya eneyali police, ko otofusama en’otumba bon’enyolo. 26Solosolo lakosumola, ofafole meho yengoko olekya toma tohatotu, efana nko le centime emoko eneciki tu.
27Bomoka yoi lin’ilamaki’ale, Tatatake likele; 28koko emi lakosumol’ino, boto l’oto onolend’oyota la mposa ena ntata ena likele l’ende, amosila litata likele l’oyoto’oko en’otem’onande. 29Yombo liso line y’ome yokokumba, kuma liho, ko oka liho nko mboka; bolotsi eneyal’e lacina elama ena emoko eehyame, yonge line lihalitu litofusama ena Ngena. 30Ko yombo likasa line y’ome yokokumba, kesa liho nko pa, ko oka liho mboka; bolotsi eneyal’e lacina elama ene emoko eehyame, yonge line lihalitu litofusama ena Ngena. 31Koko yoi yilamaki’ale, Onongumola booli’onande, ayofe bokanda bona njaka ena liala; 32koko emi lakosumol’ino, onongumola booli’onande kuma booli ataata likambo lina likele, amil’ende boyoto’ona lisamba; koko boto onosonga booli onoki bome’omoi oumolaka, atata nko likele.
33Lakina, bomoka yoi lin’ilamaki eneyali bato ban’alale, Tatehake eteho ena mpoci; koko ilela Yawe bisemba binik’otehaka. 34Koko emi lakosumol’ino, Botatehake tu; botatehake la loola, lacina loho loyali nk’ieko ina Yakomba; 35botatehake la loko, lacina loho loyali nko limbolongo lin’akak’anande; botatehake la Yelusalema, lacina boho boyali bonyanga bona Lifoka lin’okolo lina Roi; 36tatehake l’ote’one, lacin’e ofilisa bese bomoko bona lifo line telele yombo tukulu. 37Yoi linino liyalamake nko O, O; la Efana, Efana; lacina baoyi banaleki baho baoya nk’eneyali Boto’oho on’owe.
38Bomoka yoi lin’ilamaki’ale, Liso licindanake la liso, koko lino la lino; 39koko emi lakosumol’ino, Botasimbake on’owe. Ohonde yombo boto akofoma losoola ena litama line y’ome, ohalingwele litama limoi. 40Yombo boto alanga akotole en’etendelo en’akambo, ko asokotamba bokoto’one bona ntundulu, imedya lacina atambe bokoto’one bona liko nkoho. 41Ko yombo boto akosomya losomo lacina ocu l’ende kilometre emoko, coaka l’ende kilometres ife. 42Faka boto onokolomba, ko tatumelake boto onolanga asombe eneyal’e mbusa.
43Bomoka yoi lin’ilamaki’ale, Ok’on’oli l’e nganji, koko oka bookyi’owe’one bowe; 44koko emi lakosumol’ino, boka baokyi’owe’anino nganji, bosakel’iy’anakosaiy’ino bosako, bilel’iyo banakook’ino bowe bolotsi, ko boondel’iy’anakonyom’ino ko bakoeny’ino bino; 45lacin’ino boyale ban’ana Bafango’onino onoyali ena loola; lacin’oka ende akedya bato ban’owe la bato ban’olotsi bina bonande, ko alweya banakoli l’anafakoli mbula. 46Yombo bato bakook’ino nganji, ko ino boka nko bato’aho nganji, bosokokolana l’oluko boka nai? iya, basusanyi bana mpuci bafile yok’osamb’oho? 47Ko yomb’ino beesa banotwa l’ino kei, boleki bato’akina bokotua’oya? Befenda bafile nde yok’osamb’oho? 48Lacin’eho, boyalamaka la mbongi enakolana, yoka bosamb’onoyali Bafango’onino onoyali ena loola la mbongi enakolana.
Nu geselecteerd:
Matayo 5: BBY62
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bokanda Bona Yakomba Bon’ototo © Alliance Biblique de la R. D. Congo, 1962
