Génesis 14
14
Abrampa Lot kꞌaripa atada
1Lot Sodoma pꞌuurude bakꞌãri, jura paraaji. Maapai Amrafel rey paji Sinar eujãde; Arioc rey paji Elasar eujãde; Quedorlaómer rey paji Elam eujãde; Tidal rey paji Goyim eujãde. 2Mãgɨ́ reyrãpa mãikꞌaapa ãchi eere pꞌanadapꞌedaarãpa jura chõojida nãgɨ́ reyrã ome: Sodomadepema rey Bera ome; Gomorradepema rey Birsá ome; Admadepema rey Sinab ome; Zeboyindepema rey Semeber ome; Beladepema rey ome. Mãgɨ́ Bela pꞌuuru ichiaba Zoar apachida. 3Ma rey joisomaarãpa pedeeteejida aukꞌa chõodaitꞌee chi apemaarã ome. Mapa ãchi soldaorã chipꞌe atadapꞌeda, cheepurujida Sidín eujã jewedaade, Mar Muerto kꞌaitꞌa. 4Doce años wãyaaru misa, ma reyrã pꞌanapachida rey Quedorlaómer jua ekꞌari. Mamĩda ma año trecede pedeeteejida chõodaitꞌee ichi eere pꞌanadapꞌedaarã ome.
5Año catorcede Quedorlaómer, awaraa reyrã ichi eere pꞌanadapꞌedaarã ome wãjida Astarot Carnayin eujãdee. Mama pꞌanɨde refaitaarã pꞌoyaajida. Tꞌẽepai pꞌoyaajida zuzitaarã Jam eujãde mãikꞌaapa emitaarã Save Quiriatayin eujãde. 6Ichiaba pꞌoyaajida horeorã Seír ee jẽra bɨmãi mãikꞌaapa mãɨrã tꞌẽe wãjida Parán eujã jewedaadee eujã pania wẽe bɨ ide. 7Chewãdade Quedorlaómer, ichi eere pꞌanadapꞌedaarã ome pachejida Enmispat eujãde; mãgɨ́ eujã ichiaba tꞌɨ̃jarapatapꞌedaa Cades. Ma eujã wãyaadade peekꞌoojida amalecitaarã mãikꞌaapa amorreorã, chi Jazezón Tamar eujãde pꞌanadapꞌedaarã.
8Sidín eujã jewedaade ma reyrã joisomaarã Sodomadepema, Gomorradepema, Admadepema, Zeboyindepema mãikꞌaapa Beladepema chõojida 9Elamdepema rey Quedorlaómer, ichi eere pꞌanadapꞌedaa reyrã ome; Tidal Goyimdepema, Amrafel Sinardepema, mãikꞌaapa Elasardepema Arioc ome. 10Ma eujã jewedaa Sidinde uria paraaji ne–inaa pꞌãimaa kꞌarakꞌaraa ome. Chi chõo atua wãdakꞌãri, ma Sodomadepema rey mãikꞌaapa Gomorradepema rey jĩchoodachida ãchi eere pꞌanadapꞌedaarã ome mãikꞌaapa ũkꞌuru ma uriade baaikꞌoodachida. Chi apemaarã reyrã atua wãdapꞌedaarã ãchi eere pꞌanadapꞌedaarã ome jĩchoodachida ee jẽra beemaa.
11Mãgá rey Quedorlaómer eere pꞌanadapꞌedaarãpa pꞌoyaajida mãikꞌaapa pꞌe ateejida Sodomadepemaarã mãikꞌaapa Gomorradepemaarã, ãra ne–animalaarã, ãra netꞌaa paara. 12Abram sobrino Lot Sodomade bapachi perã, iru preso ateejida ichiaba ichi netꞌaa ome. 13Mamĩda eperã ãchi juadeepa uchiadai badapa Abrammaa jara cheji Lot ateedapꞌedaa. Maapai Abram chi hebreo apatapꞌedaa atꞌãri bapachi Mamré eujãde pakꞌurura jẽra bɨmãi. Ma Mamré amorreo paji. Ichi, chi ɨ̃pemaarã Escol, Aner ome Abram eere pꞌanajida.
14Abrampa Lot ateedapꞌedaa kꞌawaakꞌãri, ichi te pidaarã mãikꞌaapa mimiapataarã chõo kꞌawaa beerã ichi tede waridapꞌedaarã chipꞌe atapꞌeda, wãjida Quedorlaómer tꞌẽe. Abram eerepemaarã trescientos dieciocho paji. Ẽpꞌenajida Dan pꞌuurude. 15Pꞌãrikꞌua ãra atu pꞌanɨde Abram eere pꞌanadapꞌedaarã awara–awaraa tꞌoodapꞌeda, ãra ome chõonajida. Ãchi jĩchoo wãrutade Abram ichi eere pꞌanadapꞌedaarã ome tꞌẽe wãjida Hobá pꞌuurude parutamaa; Damasco pꞌuuru norte eere. 16Mama Abram eere pꞌanadapꞌedaarãpa pꞌoyaajida. Netꞌaa jõmaweda pꞌe aneejida, eperãarã jida, Lot, ichi te pidaarã ome, awaraa wẽraarã atee wãdapꞌedaarã paara. Ichiaba Quedorlaomerpa netꞌaa jãri atee wãdapꞌedaa paara aneejida.
Melquisedecpa Abrammaa pedee pia jarada
17Abrampa ichi eere pꞌanadapꞌedaarã ome Quedorlaómer mãikꞌaapa reyrã iru eere pꞌanadapꞌedaarã pꞌoyaajida. Ãpɨtee chewãdade Sodomadepema rey Abram ome unuitꞌee cheji eujã jewedaa Savede; ichiaba tꞌɨ̃jarapatapꞌedaa Reyde. 18Mama bɨde Salén pꞌuurudepema reypa pan, vino ome aneeji. Ma rey tꞌɨ̃jarapachida Melquisedec. Mãgɨ́ Tachi Akꞌõre Waibɨa–itꞌee pꞌaare mimia oopachi.
19Mãgɨpa Abrammaa ma pan, vino ome teekꞌãri, na pedee pia jaraji:
—Tachi Akꞌõre Waibɨa, chi pajã mãikꞌaapa eujã oodapa pɨ pia akꞌɨ baitꞌeeda aji. 20Iru jõmaarã kꞌãyaara waibɨara bɨda aji, pɨ kꞌaripada perã pɨ kꞌĩra unuamaa iru pꞌanapataarã pꞌoyaamerã.
Mãpai Abrampa Melquisedecmaa teeji netꞌaa diezdepema chaa aba jãri atadapꞌedaa Quedorlaómer juakꞌaawa.
21Maapꞌeda Sodomadepema reypa Abrammaa mãgaji:
—Mɨmaa eperãarã teepáde aji. Jõdee pɨ netꞌaa ome beepáde aji.
22Mamĩda Abrampa pꞌanauji:
—Tachi Akꞌõre, chi pajã mãikꞌaapa eujã ooda kꞌĩrapite mɨa nãga jara bɨ. 23Pɨ netꞌaa apida ata kꞌinia–e bɨ. Jɨ̃kꞌara pɨjida ata kꞌinia–e mɨ chanclade jɨ̃itꞌee. Mɨa kꞌinia–e bɨ pɨa jaramerã pɨ kꞌaurepa mɨ pꞌaratꞌara bɨ. 24Mɨchi–itꞌee maarepida ata kꞌinia–e bɨ; aba mɨ ome nipapataarãpa chikꞌo kꞌodapꞌedaa. Mamĩda netꞌaa teepáde aji, mɨ kꞌõpꞌãyoorã Mamremaa, Anermaa mãikꞌaapa Escolmaa, ãrapa ma chõodade mɨ kꞌaripadapꞌedaa perã.
Nu geselecteerd:
Génesis 14: sjaB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2005, 2010, 2015 Wycliffe Bible Translators, Inc. All rights reserved.
