LUKAS 6

Tebaraa' tong Dau Posot

(Mat. 12:1-8, Mrk. 2:23-28)

1 # Ula. 23:25 Jah Dau Posot Yésus lakau ngelapah térék, la'ah irah bakéh Néh nyepit lo'ong parai ke' réh nyelegaa' éh ke' réh kuman éh. 2La'ah ha' kelunan Parisi ngan réh, Uban ineu' keh maneu' éh kenat? Ha' lem Surat Musa éh kenivu lu', bé' éh buhaa' lu' maneu' éh kenat tovoo' Dau Posot, ha' réh.

3Ha' Yésus mipa réh, Kineu', bé' keh purung tong Daud hun néh la'au' sahau rai? 4#1 Sam. 21:1-6 #Ima. 24:9 Daud nah tai Umaa' Allah ngan pu'un éh alaa' roti éh nena' réh ngan Allah, iah pu'un kuman éh ngan pu'un éh mena' éh kepéh ngan irah éh kivu éh nah. Iah péh maneu' éh kenat na' péh ha' lem Surat Musa bara' kelunan éh kereja' imam awah éh omok kuman éh, bé' kelunan éh jah omok. Na' péh kenat pu'un Daud alaa' éh, ha' Yésus ngan réh.

5Ha' Yésus kepéh, Anak Kelunan pu'un penyukat bara' tong éh tekep neu' tong Dau Posot, ha' Néh.

Kelunan éh paket ojoo'

(Mat. 12:9-14, Mrk. 3:1-6)

6Tong jah Dau Posot éh jah kepéh, Yésus tai tong lamin sebayang irah Yahudi ke' Néh nebaraa' réh. Pu'un jah kelunan sinah paket jebila'ojoo'. 7Irah éh nebaraa' tong sohoo' lem Surat Musa ngan irah éh kivu adet Parisi péh pitah jalan ke' réh omok pesala' Yésus. Kenat péh irah ngedalem ngan na'at Éh ke' réh omok jam hun Néh pu'un peka'o kelunan tong Dau Posot nah. 8Bang Yésus jam kekat éh seneruh réh kenat, inah Yésus pané ngan kelunan paket ojoo' nah. 9Ha' Néh, Betéé' ke', jian ke' tuai nekedéng siteu', ha' Néh. Boh éh tai nekedéng tong jumen réh. Ka' ha' Yésus ngan réh kepéh, Akeu' juk neteng ka'ah, Ineu' éh omok neu' lu' tong Dau Posot? Kineu' ha' lem ukum éh kenivu lu' iteu'? Pu'un éh nyohoo' lu' masi kelunan? Kineu', pu'un éh nyohoo' lu' maneu' sa'at ngan kelunan? Kineu', pu'un éh nyohoo' lu' purip kelunan? Kineu' ha' ukum tong Dau Posot lu' iteu' kunah ka'ah, ha' Yésus ngan réh. 10Ngejuwak éh na'at kekat réh béé, boh Éh pané ngan kelunan éh paket ojoo' nah, ha' Néh, Jian ke' pejat ojoo' ko' nah, ha' Néh. Pelapah kelunan nah pejat ojoo' néh, tioo jian ojoo' néh.

11Bang kekat kelunan tong lamin sebayang inah merek mu'un-mu'un réh, pepané réh pitah jalan ke' réh omok maneu' Yésus.

Yésus ngevéléé' jah poloo' duah usah bakéh Néh

(Mat. 10:1-4, Mrk. 3:13-19)

12Sioo' inah Yésus tai jah tokong ke' Néh sebayang. Putung merem Iah sebayang ngan Allah. 13Tovoo' dau rema Iah tebai kekat irah éh kivu Éh ke' Néh ngevéléé' jah poloo' duah usah jin belah réh ke' Néh maneu' réh lawah Néh. Ngaran irah éh kevéléé' Néh nah, 14inah éh, Simon, Simon nah Yésus maneu' ngaran néh Péterus, ngan Anderias éh padéé' Simon nah, Yakub rawah Yohanes, Pilipus ngan Bartolomeus, 15Matius ngan Tumas, Yakub éh anak Alpeus, Simon éh jelua' koléé' réh mateng éh, kelunan éh gahang kivu Politik, 16ngan inah kepéh, Yudas éh anak Yakub ngan Yudas Iskariot éh memalo Yésus rai. Inah kekat réh béé éh kevéléé' Néh.

Yésus nebaraa' kelunan ngan peka'o kesakit réh

(Mat. 4:23-25)

17La'ah Yésus piso jin tokong inah ke' Néh tai ngan irah éh kevéléé' Néh inah. Iah nekedéng tong jalan éh pemai pemung ngan kekat irah éh kivu Éh ngan éh pekalai jin Néh. Pinaa' kepéh irah kelunan éh jah sinah éh pu'un tai jin siget leboo' tong tana' Yudea ngan jin leboo' Yérusalem, ngan pu'un éh kepéh jin leboo' Tirus ngan Sidon éh déhéé' baa' banget. 18Irah tai kenat dokoo' réh omok menéng ha' tebaraa' Néh, kenat péh dokoo' réh menyat Éh peka'o réh jin kekat arong kesakit réh. Kelunan éh nasek balei' péh pu'un réh tai tavin Yésus, ngan balei' inah pu'un pega' jin réh. 19Kekat kelunan inah juk ngamit Éh uban Néh pu'un penyukat peka'o réh jin kekat arong kesakit réh.

Tong pepata kelunan éh murung ngan irah éh mapah péh

(Mat. 5:1-12)

20Tuhan Yésus na'at kekat irah Éh kivu éh, boh Éh bara' ngan réh ka'.

Murung kenin kelunan éh kari,

uban ka'ah omok tai lem pengihau pengeraja' Allah

21Murung kenin ka'ah éh la'au' hun iteu'

ka'ah juk beso kepéh

Murung kenin ka'ah éh mangaa' hun iteu'

ka'ah juk mala' kepéh

22Murung kenin keh hun kelunan ngeleko keh, musat keh, peja' ngan ngesa'at ngaran keh uban neu' Anak Kelunan. 23Uban kenat péh jalan tepun réh sahau maneu' irah nabi, murung kenin keh hun néh pu'un kenat, sayau ngan bahuu' keh uban ja'au mu'un oléé' néh ngan keh tong seruga.

24Tusah mu'un ngan ka'ah éh kaya' hun iteu',

uban ka'ah lepah alaa' éh ngejian kenin keh hun iteu' awah

25Tusah mu'un ngan ka'ah éh beso hun iteu',

uban ka'ah juk la'au' kepéh

Tusah mu'un ngan ka'ah éh mala' hun iteu'

uban ka'ah juk besau ngan mangaa'

26Tusah mu'un ngan ka'ah hun kelunan ngajung keh, uban kenat péh tepun réh sahau ngajung irah nabi éh kenyo ha' Yésus.

Tebaraa' tong pika irah éh leko lu'

(Mat. 5:38-48, 7:12a)

27Ka' ha' Yésus kepéh, Bang inah ha' Ké' ngan kekat ka'ah éh omok menéng. Jian ke' pika irah éh leko ke', ngan maneu' jian ngan kelunan éh sa'at kenin ngan ko'. 28Jian ke' pané ngan ha' éh jian ngan kelunan éh pané nyahit ngan ko'. Jian ke' sebayang menyat Tuhan pika kelunan éh maneu' ke'. 29Hun pu'un kelunan éh tepap da'in ko', mai ke' maneu' éh kepéh, bang jian ke' mata sela' ko' kepéh ngan néh. Hun pu'un kelunan alaa' kerayung ko', jian ke' kejeraa' éh alaa' seput ko' kepéh. 30Hun néh pu'un kelunan éh menyat livah ko', jian ke' mena' éh ngan néh, ngan hun pu'un kelunan éh alaa' livah ko', mai ke' menyat éh moléé' kepéh, jian ke' pika réh. 31#Mat. 7:12 Ineu' éh keneloo' keh naneu' kelunan éh jah tong ka'ah, jian keh maneu' éh kenat ngan réh.

32Hun ko' pika kelunan éh pika ke' awah, kineu' ke' seruh ke' pu'un jian hun ko' maneu' éh kenat awah? Kelunan éh sa'at péh jam éh pika kelunan éh pika éh. 33Hun ko' maneu' éh jian ngan kelunan éh maneu' jian ngan ko', kineu' ke' seruh ke' pu'un jian neu' ko' maneu' kenat? Kelunan éh sa'at péh jam éh maneu' éh jian ngan kelunan éh maneu' jian ngan néh. 34Hun ko' pekeliwah livah ngan kelunan uban ko' seruh réh omok poléé' éh mutaa' kepéh, kineu' ke' seruh ke' pu'un jian neu' ko' maneu' éh kenat. Kelunan penyala' péh pu'un réh pekeliwah livah ngan kelunan pata penyala' ke', dokoo' réh omok alaa' pekua' ke ja'au éh nalaa' réh lepah nah. 35Bang inah éh tekep, jian ke' pika irah éh leko ke' ngan maneu' jian ngan réh, ngan pekeliwah livah ngan réh ngan bé' makat uban ko' seruh omok alaa' éh mutaa' kepéh jin réh. La'ah ja'au mu'un oléé' néh ngan ko', la'ah ka'au' omok anak Allah éh Matek Bau, uban néh pu'un masi kelunan éh sevahau' ke' awah, ngan kelunan éh sa'at péh. 36Jian ka'ah pika kelunan pekua' Tamen keh éh pu'un pika irah, ha' Néh.

Mai ulak pesala' kelunan

(Mat. 7:1-5)

37Ha' Yésus kepéh, Mai keh ulak pesala' kelunan boh Allah bé' pesala' keh kepéh. Mai keh ulak ngukum kelunan, boh Allah bé' ngukum keh kepéh. Hun kelunan pu'un menyat pika jin keh, jian keh pika réh ngan mai keh mihau kesa'at réh lem kenin keh, boh Allah omok mega' kesa'at keh kepéh. 38Ineu' éh pu'un tong keh jian keh masi mena' éh ngan kelunan éh jah, boh Allah omok mena' éh pelapah ja'au kepéh pah avéé' néh mutaa' ngan keh. Pekua' jalan keh pu'un masi ngan pika kelunan éh jah, kenat péh Allah juk masi ngan pika keh kepéh, ha' Néh.

39 # Mat. 15:14 La'ah Yésus bara' jah ha' tapan ngan réh, ka' ha' Néh, Kineu', omok kelunan peseu' majak bakéh néh éh peseu' kei. Hun roh pajak kenat, adang rawah béé pata pelohoo' lem lebek. 40Bé' pu'un jah anak sekulah éh pelapah ja'au jin guru néh, bang hun néh lepah pekalai, boh éh omok pekua' pengejam ngan guru néh.

41Kineu' ke' nyohoo' padéé' ko' kejeraa' ke' mega' moo' jin maten néh hun ka'au' tengéé' péh bé' tenah mega' uvap éh pu'un lem maten ko' kenat? 42O ka'ah éh ngelayoo' awah maneu' jian, jian ke' mega' uvap jin maten ko' tenah, boh ke' omok jian ta'an ngan mega' moo' jin maten padéé' ko', ha' Yésus.

Ha' tapan tong jah inan kayeu' buaa'

(Mat. 7:16-20, 12:33-35)

43Inah kepéh jah ha' tapan éh benara' Yésus ngan réh. Ka' ha' Néh, Inan kayeu' buaa' éh jian bé' éh ngebuaa' ngan buaa' néh malui, ngan inan kayeu' buaa' éh ngenyiwan bé' éh ngebuaa' ngan buaa' néh pu'un jian. 44Uleu' omok jam siget arong inan kayeu' buaa' neu' buaa' néh tengéé'. Uban bé' lu' omok alaa' buaa' ara jin sepakan suha', ngan bé' lu' omok alaa' buaa' agun jin lakat suha'. 45#Mat. 12:33-34 Kelunan éh jian iah maneu' jian uban kenin néh pu'un jian. Kelunan éh sa'at iah maneu' sa'at uban kenin néh pu'un sa'at. Pekua' éh pu'un dalem kenin kelunan, kenat péh ha' ané néh kepéh, ha' Yésus.

Ha' tapan tong duah arong lamin

(Mat. 7:24-27)

46Ha' Yésus kepéh, Uban ineu' keh bara' Akeu' Tuhan keh hun keh bé' kivu sohoo' ké'? 47Siget-siget kelunan éh tuai tavin Akeu' ngan menéng ha' ké' ngan kivu éh kepéh, irah inah teneng barei' ha' tapan tong kelunan éh maneu' lamin. 48Kelunan éh maneu' lamin inah pu'un éh mekot tana' dilem ke' néh mejek kekat lihei' néh tong bateu'. La'ah avéé' baa' ja'au nesung lamin inah, bang bé' lamin inah gusii' uban penyuai néh pu'un reken tong bateu'. 49Bang kelunan éh menéng ha' Ké' bang bé' iah kivu éh, inah éh pekua' ha' tapan tong kelunan éh maneu' lamin tong tana' awah ngan bé' pu'un lihei' néh reken. La'ah avéé' baa' ja'au nesung lamin inah, tioo kuba' lamin inah ngan petegarai mu'un-mu'un la'ah éh, ha' Néh.

Nu geselecteerd:

LUKAS 6: PNT

Markering

Deel

Kopiëren