LUKAS 4

Sitan tupat Tuhan Yésus

(Mat. 4:1-11, Mrk. 1:12-13)

1La'ah moléé' Yésus jin baa' Yordan ngan kenin Néh penoo' neu' Sahéé' Ni'ai. La'ah Sahéé' Ni'ai mihin Éh tai ahang tana', 2sinah Éh tenupat Sitan pat poloo' dau kelebéé' néh. Kelebéé' inah bé' pu'un ineu'-ineu' kinan Néh. Kenat péh avéé' tong ke pat poloo' dau nah, Yésus la'au' mu'un.

3La'ah ka' ha' Sitan pané ngan Néh, Hun Ko' Anak Allah mu'un, jian Ke' ngepaléu bateu' inah malui roti, ha' néh.

4 # Ula. 8:3 Ha' Yésus mipa éh, Ha' surat Allah bara', Bé' éh neu' roti awah kelunan murip, ha' Néh.

5La'ah Sitan mihin Éh tai berusu' bau, ngan dalem jah litep iah bara' kekat penyukat ngan pengaren tipo tana' ngan Néh. 6La'ah ha' Sitan ngan Néh kepéh, Akeu' juk mena' kekat penyukat ngan pengaren inah ngan Ko'. Kekat inah anah ké' béé éh, akeu' omok mena' éh ngan séé' éh keneloo' ké'. 7Hun Ko' ngejekuu' lep Ko' seva' akeu', boh ku' mena' kekat inah anah Ko' kepéh, ha' Sitan nah.

8 # Ula. 6:13 La'ah ha' Yésus mipa éh kepéh, Ha' surat Allah bara', Tekep ke' seva' Tuhan Allah éh kenelan ko' ngan kivu Iah awah, ha' Néh.

9La'ah Sitan mihin Éh tai Yérusalem ke' néh tai bau beluvung Umaa' Allah, la'ah ha' néh ngan Énéh, Hun Ko' Anak Allah mu'un, jian Ke' ngeliwang kera' ketai, 10uban ha' surat Allah bara', Allah juk nyohoo' meliket Néh mihau Ke'. 11#Msm. 91:11-12 Ngan pu'un jah ha' kepéh éh bara' ka', meliket Néh mihau Ke', bé' Ke' teneng tong bateu' nah ngan suhat, ha' Sitan nah.

12 # Ula. 6:16 Ha' Yésus mipa éh kepéh, Ha' surat Allah bara', Mai ke' tupat Tuhan Allah éh kenelan ko', ha' Néh.

13La'o Sitan tupat Yésus dalem kekat arong penupat néh inah, piso éh jin Yésus ke' néh pitah aken néh kepéh.

Tong bu'un kereja' Yésus tong tana'

(Mat. 4:12-17, Mrk. 1:14-15)

14La'o inah Yésus moléé' tai tana' Galilia ngan penyukat Sahéé' Ni'ai pu'un ngan Néh. La'ah rengah Néh avéé' tong kekat leboo' tong tana' inah. 15Ngan Iah nebaraa' réh lem kekat lamin sebayang irah Yahudi ngan kekat kelunan péh mejing éh.

Yésus nebet réh jin leboo' Nasaret

(Mat. 13:53-58, Mrk. 6:1-6)

16La'o inah Yésus lakau tai leboo' Nasaret, éh leboo' Néh jin hun Néh si'ik, Dau Posot tai éh tong lamin sebayang Yahudi barei' kemalai Néh nekedéng Éh ke' néh purung surat Allah, 17pu'un irah mena' surat Yesaya ngan Néh. La'ah Iah nyelevat surat inah jin len néh ke' Néh purung retek ha' éh bara' ka',

18Sahéé' Tuhan pu'un tong Akeu'.

Iah lepah ngevéléé' Akeu' dokoo' ké' bara' rengah

jian ngan kelunan kari.

Iah nyohoo' Akeu' bara' jalan

ngan kelunan ripen ke' réh omok pelepu.

Kelunan éh bé' pu'un ta'an, Akeu' maneu' réh omok na'at kepéh.

Kelunan éh besau, Akeu' juk ngelepu réh jin kekat kebesau réh neu' kelunan éh maneu' réh.

19 # Yes. 61:1-2 Ngan Akeu' juk bara' tong sioo'

Tuhan juk purip kelunan éh anah nah, ha' néh.

20La'ah Yésus melen surat inah ke' Néh poléé' éh ngan kelunan tong sebayang nah, boh Éh menyun. Kekat kelunan dalem lamin sebayang nah kepuh Éh. 21Ka' ha' Néh pané ngan réh, Kekat ha' lem surat Allah éh penurung Ké' ri', dau iteu' kekat éh benara' Néh inah pu'un éh lepah avéé', ha' Néh.

22Kekat kelunan jian kenin réh ngan Néh, béé kenin réh menéng ha' tebaraa' Néh éh jian éh benara' Néh. Boh irah bara' ka', Kineu', bé' énéh anak Yusup, ha' réh.

23Ha' Yésus ngan réh, Mu'un péh ka'ah juk bara' jah ha' tapan ngan Ké', tapan éh bara' ka', O doktun, jian ke' peka'o usah ko'. Inah kepéh pu'un keh juk nyohoo' Akeu' maneu' kekat penganeu' éh neu' Ké' tong leboo' Kapernaum rai tong leboo' Ké' iteu' kepéh. 24#Yoh. 4:44 Bang inah Akeu' bara' ngan keh, bé' pu'un jah nabi Tuhan, éh kenajung réh tong leboo' Néh tengéé', ha' Néh. 25Ha' Yésus kepéh Jian keh menéng ha' ké' mu'un, Hun nabi Elia pu'un tong tana' Israel sahau, sioo' taa' bé' pu'un teleu' ta'un nem laséh kelebéé', kekat kelunan la'au' mu'un. 26#1 Raj. 17:1,8-16 Tovoo' inah péh pinaa' redo baleu' tong tana' inah, bang bé' Allah nyohoo' Elia tai tavin jah-jah usah redo baleu' sinah. Bang Allah nyohoo' éh tai tavin redo baleu' éh tong leboo' Sarapat tong tana' Sidon. 27#2 Raj. 5:1-14 Inah kepéh, sioo' pengurip nabi Élisa sahau, pinaa' kelunan sakit kapéé' tong tana' Israel, bang bé' pu'un jah usah jin belah irah inah ma'o jin kesakit néh. Bang jah kelunan éh jin tana' Siria, inah éh ma'o kesakit néh, ngaran néh Naman, ha' Yésus.

28Kekat kelunan tong lamin sebayang inah merek mu'un-mu'un réh menéng ha' Néh pané kenat. 29Pelapah irah tai ngamit Yésus ngan menat Éh musit jin leboo' inah. Leboo' inah bau tokong, boh réh mihin Yésus tai ulun tibin, ke' réh juk ngelohoo' Éh jin sinah. 30Bang Yésus ngelapah kekat réh béé, tioo lakau.

Kelunan éh nasek balei'

(Mrk. 1:21-28)

31Lakau Yésus tai leboo' Kapernaum tong tana' Galilia. Tong Dau Posot inah iah nebaraa' kelunan. 32#Mat. 7:28-29 Béé kenin réh menéng ha' tebaraa' Néh uban ha' tebaraa' Néh pu'un éh ngan penyukat. 33Tong lamin sebayang nah pu'un jah kelunan éh nasek balei', ngeradau balei' nah ja'au ha', ka' ha' néh, 34Eii, ineu' juk neu' Ko' tong améé' o Yésus kelunan Nasaret? Kineu', Ka'au' tuai juk kebéé améé' énéh kei? Akeu' jam Ka'au'. Ka'au' lawah éh ni'ai éh tuai jin Allah, ha' balei' nah.

35Pelapah Yésus meta' balei' nah, ha' Néh, Mai ke' kahut, musit ke' jin kelunan inah, ha' Néh. Balei' nguba' kelunan inah saa' tenah kelunan pinaa' nah, pega' éh jin dalem kelunan inah, ngan bé' balei' nah ngesakit éh.

36Béé kenin kelunan pinaa' nah, pepané réh, ka' ha' réh, Oi, kineu' ha' Néh kenat, uban hun Néh pané, pu'un penyukat lem ha' ané Néh, hun Néh nyohoo' balei' nah pega' jin kelunan, pega' mu'un éh, ha' réh. 37La'ah rengah Yésus avéé' tong kekat leboo' tong tana' inah.

Tuhan Yésus peka'o kesakit kelunan pinaa'

(Mat. 8:14-17, Mrk. 1:29-34)

38Lakau Yésus kepéh jin lamin sebayang nah tai lamin Simon. Kivan Simon éh redo sakit darem, irah menyat Yésus nolong éh. 39Tai Yésus nekedéng déhéé' redo inah ngan meta' kedarem néh. Pelapah kedarem néh pega', betéé' éh petubo réh.

40La'ah dau diva' kekat kelunan éh pu'un bakéh éh sakit, pu'un réh mihin bakéh réh éh sakit nah tavin Yésus, la'ah Yésus mapai ojoo' Néh bau siget-siget usah réh ke' Néh peka'o réh. 41La'ah pinaa' balei' musit jin kelunan pinaa' nah, ngeradau balei' nah, ka' ha' réh, Ka'au' iteu' néh Anak Allah, ha' réh. Pelapah Yésus meta' kekat balei' nah pané, uban kejam balei' nah, Yésus éh Kristus éh pejajii' Allah.

Yésus nebaraa' kelunan tong tana' Yudea

(Mrk. 1:35-39)

42Tovoo' peka ngivun lakau Yésus tai mokoo' tong tana', la'ah kelunan pinaa' nah pitah Éh. Tovoo' réh temeu' ngan Néh irah juk pokoo' Éh ngan réh. 43Bang ha' Yésus ngan réh, Tekep Ku' tai tong leboo' éh jah kepéh ngan bara' Rengah Jian ngan réh tong jalan Allah pu'un Pengeja'au, uban kenat éh sohoo' Allah ngan Ké', ha' néh.

44La'ah Iah nebaraa' réh dalem kekat lamin sebayang Yahudi tong tana' Yudea.

Nu geselecteerd:

LUKAS 4: PNT

Markering

Deel

Kopiëren