Cenisihs Mii 'owe Keoncinihsitohtaman O'owe Cenisihs Kaa'icikaatek Masina'ikan
Mii 'owe Keoncinihsitohtaman O'owe Cenisihs Kaa'icikaatek Masina'ikan
Cenisihs kaa'icikaatek kekoon kaaonci maacihsek. O'owe masina'ikan kiwiintamaakomin kahkina kekoon kaaoshihcikaatek aaniin kaye inini kaakii ishi oshi'aakaniwitc, kaakii onci maacihsek macitootamowin kaye kakwaatakihtoowin o'omaa ahkiink, Kishemanitoo kaye kaaishi kanawaapamaatc pemaatisinitc. O'owe masina'ikan Cenisihs kii'niishonaawinikaate:
1. Kihci oshipii'ikanan 1—11 kaakii ishi oshihcikaatek ahki shikwa nihtam iko kaakii onci maacihsek ciayaatc pemaatisitc.
2. Kihci oshipii'ikanan 12—50 nihtam iko kaakii onci maacii ayaawaatc Isriyalak. Mii 'imaa eshitashinsotc nihtam iko a'a Eparahaam kaakii ishinihkaasotc aaniin kaaishi tepweyenimaatc kaaishi nana'ihtawaatc kaye Kishemanitoon. Tashimaawan kaye okosihsan Aaisikoon ini kaye oshihshan Cekapoon. Cekap kaye kiihtako ishinihkaaso Isriyal. Cekap kaakii mitaahshiniishinitc okosihsa' tashinsowa'. Mii iitok i'imaa kaakii onci maacihsewaatc mitaahshiniishwewaan kaakii'inintwaa Isriyalak. Niipiwa' kii‑ishi noontaakaaniwiwan peshik ini okosihsan Coosap kaakii'inimintc. Miihsh kaakii onci ishihsenik Cekap ciani ishaatc weti Iicipahkiink i'i kaye kotak okosihsa'.
Pemaatisiwaatc tashimaawak o'omaa masina'ikanink. Kishemanitoo tahsh iko maawac tashinso, aaniin kaye kaaishihciketc. Wiinteni kaye wiin iko kehcinaac ekii oshihtootc o'oweni ahki. Kitani wiintamaakomin o'o masina'ikan ani ishkwaahsek Kishemanitoo otahshotamaakewin pishihshik iko ciani waapanta'iwetc kaaishi naakatawenimaatc opimaatisiima'. Kishemanitoo wiin iko mayaa tashinso o'omaa misiwe masina'ikanink. Wiin iitok kaaonaahkoniketc kaanana'ahsaatc kaye kaamamaashiinitc pemaatisinitc. Tashinteni kaye eniikaaniihtamawaatc, ewiici'aatc opimaatisiima' eani onahtamawaatc keni ishi pimaatisinitc. O'owe masina'ikan maawac mewisha kaaonci ayaak kiionci oshipii'ikaate cionci kihkencikaatek iki aaninta kaakiih pimaatisiwaatc kaakii ishi tepweyentamowaatc cini onci ishihsek tepweyentamowin nehpic cini pimi ayaamakahk.
Entahso pepahkaanipii'ikaatek O'o Masina'ikan
Kahkina kekoon kiioshihcikaatek, inini kaye kiioshi'aakaniwitc 1.1—2.25
Kiimaacihsek macitootamowin, kakwaatakihtoowin kaye 3.1-24
Aatam kaakii onci maacihsenitc opiiwesiima' piinihsh weti Noowa 4.1—5.32
Noowa shikwa kaakii nihkipiik 6.1—10.32
Ishpaapihkinikan Pepal kaaishinihkaatek 11.1-9
Shem kaakii onci maacihsenitc opiiwesiima' piinihsh weti Eparam 11.10-32
Otetemaak maawac kaakiih kihci inentaakosiwaatc, Eparahaam, Aaisik, shikwa Cekap 12.1—35.29
Iiswaa opiiwesiima' 36.1-43
Coosap shikwa wiicihkiweya' 37.1—45.28
Isriyalak i'imaa ahkiink Iicip 46.1—50.26
Ojibwe Shorter Bible (Roman Script) © 2008 Canadian Bible Society