Jenesis 2
2
1Eme ya kon mari ma kandrah badeh ndramwesekei ndrano ai. 2Eme na len onoh badeh lahou ta Kindrei ano. Eme na len ndro taloh badeh iy amunyau. 3Eme iy nyosowani len ndro taloh ma atehei ere len, tasah na len doh badeh iy mwesekei lakou mari ma iy amunyau. 4Eme ya i dah nyala lakou mari badu munyak asahan i buku sah.
Bilin Iden
Na len Laban Kindrei mwesekei kon munyak mari, 5badeh sese kei bateh bwe, ari buwa kei badeh bateh bada ndren bwe, tasah iy batiye ur badeh bandruk bwe, ma lau ta apou ndren bwe. 6Arile gwa ja badeh udu bolo ndren eme loken badeh asabu bwele-e munyak. 7Ano badeh Laban Kindrei rawi ndren eme loken, ano iy amwekes ndramak na aliy; ano badeh iy aluhi kohan handru i no-on ma ndramak dah asahan awas.
8Ano badeh Laban Kindrei mwesekei bilin nyaran Iden udu loboho an eme loken. Ano badeh iy tiye ndramak nane, iy mwesekei dah udu aliy ai. 9Iy badeh mwesekei saba kei mwasin badeh ateh udu aliy ma edeu salin. Eme udu alih ta bilin badeh kei lu-ei le, kei doh ta edeu koham winiyan bano bwe. Ma kei ale ta edeu tanan ndra-in ma tanan mwasin. 10Ma gwa rawa badeh arorou, udu bolo Iden ta edeu gwa i ta bilin; ano udu doh badeh, apou i handra. 11Gwa rawa ma bwena eh, badeh aloh gwa Pison, badeh arorou awudi kon munyak aloh nyaran Habilah. 12Ya bek nyikilikin aloh gol badeh, udu aliy ma kei ta suluw badeh udu aliy ma hawe bek mwasin mwasin badeh udu aliy ale. 13Ya andra gwa rawa ja aloh gwa Gihon; badeh arorou awudi kon munyak aloh Kus. 14Ano andra gwa taloh badeh gwa Taigres; iy badeh arorou loboho an eme loken ta kon Aseriya. Ano andra gwa hahuw badeh nyaran gwa Yupretis.
15Ano badeh Laban Kindrei atehei ndramak nane udu bilin loboho kon Iden ta iy kinyor ma iy katondrok. 16Ano iy tiye i tan, “Ou badeh winiyan aimon buwa kei mari badu bolo bilin; 17Arile kei ala ta leheya tanan ndra-in ma ta leheya tanan mwasin badeh ou saimon buwan ndri-i labai. I buku na len ou aniy kameh, ou kameh amak.”
18Ano Laban Kindrei lomondra i buku doh, “Ei, bamwenen se bwe, i buku ndramak udu ya iy badeh le ari le. Jo kamwesekei ari seben mwasin ta aseben iy.” 19Eme iy andrei ndren eme, ano iy mwesekei iri katin haka mari ma hawe iri sirih. Ano badeh iy tukumwi iri ase ala hawe i ndramak nane dah ta iy katondrohan nyara iri. 20Eme ma iy tondrohani nyara iri sirih mari ma hawe iri katin haka mari; arile ari toro badeh mwasin ta asahan borobwar tan bwe.
21Ano ja badeh Laban Kindrei badeh mwesekei ndramak dah amadin tuk; eme iy i ndramatinou kahis le badeh iy andrei ndruwi kabeden ari. Ano iy lowosani odan i hamon ja. 22Eme iy mwesekei badih dah nane na ndruwi kabede ndramak dah ano sirini iy ili hawen. 23Ano ndramak dah anya ja eh, “Kabwe ai; i dah i buku le jo amwenen. Ndruwin andrei badeh badu ndruwik ma odan badeh badu odak amwenen. Ya eme iy badeh badih, tasah iy badeh asahan ta ndramak mwan.” 24Eme ya ta katin doh badeh i mwan badeh karuwani taman uru tinen ya iy keme len hawe udun ya uru badeh ka ari buruwen. 25Ya uru ma la-uh badeh kolau bwe, arile uru badeh buli uru bama uru bwe.
Nu geselecteerd:
Jenesis 2: lidNTpo
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2001, Wycliffe Bible Translators, Inc. All rights reserved.
