Jenesis 13
13
Abram Uru Lot Apou Uru
1Lot i hawe Abram uru udun ma hawe lakou ta Abram mari, eme oro au ala loboho rai ta Ijip ano oro ala loboho kum ta Kenan. 2Abram badeh tan lakou solo-an handru en, iri katin haka i buku none iri sipsip, me hawe bulumakau, bek nyikilikin silba hawe gol. 3Ano badeh iy udu doh edek i rakon rakon ili Betel. Eme iy asahan kon mene ndrokowa Betel hawe Ai kon mene iy udu aliy bwena. 4Eme iy eme ta bek mene iy tukumwi ma iy aloh nyara Laban.
5Lot badeh tan iri sipsip, me ma bulumakau ale i buku none udun nadun oro hawe iri lohowan tan ale. 6Eme ya uru badeh munyak hawe bwidiu solo-an bwe, winiya uru ma la-uh bwe, tasah uru badeh katin haka turu badeh solo-an labai. 7Eme iri lau ta tondrok katin haka ta Abram hawe ta Lot badeh andra-i. (Na len doh badeh iri Kenan hawe iri Perisa badeh manyah ado munyak nane doh).
8Ano badeh Abram tiye ta Lot anya eh, “Talu badeh lowa talu, arile lau tam hawe lau tek badeh andra-i. 9Eme ya talu kapou talu. Ou aseken munyak loboho heh bwena? I buku none ou aseken bilisiu badeh bilisiu baden eh jo ki aliy ai.”
10Eme Lot anyolom ili eme iy anyolom nyamak Jordan ili isos So-ar badeh gwa solo-an i buku none bilin ta Kindrei ma i buku none munyak badu Ijip. (I doh badeh Kindrei basulumwi kon tinan Sodom hawe Gomora bwe le). 11Eme Lot badeh solo-ei nyamak mari badu Jordan badeh i tan, eme iy iu i loboho lan ai. I dah sihide uru ma la-uh atalan i buku sah. 12Ya Abram badeh udu munyak Kenan udu ai, ya Lot baden eh ili manyah udu bolo kon tinan nyamak ma manyah mirihik ta Sodom. 13Iri badeh kandriyen tiri badeh ndrandra-i labai ta mada Kindrei.
Abram Ili Hibron
14Ano hamon ta Lot ndra-au badeh, Laban tiye ta Abram, “Kon ou are aliy baden, ou suri ou, ma ou anyolom kili keme ki jaha, ki rai, ki kum ma ki lan. 15-16Jo kameh edeu munyak doh i tam ma lundriyem oro kameh nyaran bwe, winiya ari lau winiyan bandromwei bwe; on badeh winiyan andromwei. 17Ou ala anyolom kili bwele-e munyak mari, munyak jo kameh edeu i tam.” 18Eme Abram ili tahi asiu udu mirihik ta kei ndrabun loboho Mamre udu Hibron, eme udu doh badeh iy tukumwi bek ta salom i ta Laban.
Nu geselecteerd:
Jenesis 13: lidNTpo
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2001, Wycliffe Bible Translators, Inc. All rights reserved.
