MATHI 4
4
Jisu mdo Pthleem
1Ava dilli Jisua dijabowl do pthleem ra pthla ngi kbowklai tha ṭhida. 2Ungta Mma ngi nii somplii jaan som plii thu then ngowl da, ava dilthang ro ngi mpoi tham da. 3Ungta kepthleem mi Mhin arva da, theda, “Nah Isowr Chapa akurthutta hava lung rekka thenpen apur owl.” 4Pdainu Mma ngi arthawng da, “Ava mdo kjit dok.”
‘Thenpen daatti mii ava ring nime; pdainu Isowr ner thungki kthuwk pauna ava khim khai daat ra.’ 5Ava dilli dijabowl li kchiir khuwpii tha hanṭhida, ungta luwbuk Inn kchuwng ver leenni kalṭhida. 6Ungu Mhin theda, “Nah Isowr Chapa akurthutta adaksaa ava jungkhuwng; mleija ava kjit dok da,
Nah aksut pṭoi ra Mma ngi waan tamsii rek akpiira ungta lung khdaat preva ngi akhu mdo thown ma nra, mkhut inni akukjowng lamra.” 7Jisu ngi mhin theda, “Ava ruk mdo kjit dok; nang ngi nang ki Isowr Mukpu ava ado pthleem ro nime.” 8Veikhat nowlli dijabowlli lown kparthaang sii ava leen ṭhida dultipaam thungki kruwngpaam rek mkheng leh mlaarnee Mhin tdet da, 9Ungta Mhin theda, “Nang ngi tluwda luw atbuk bi havale mkheng nga Nah hin apii chnik di.” 10Ava dilli Jisu ngi mhin theda, “Esun dok, Seitaan mleija hava mdo kjit dok; ‘nang ngi nangki Isowr Mukpu ava luw ado buk ra ungta Mma daat hin sok adolo ra.’” 11Ava dilli dijabowlli Mma ava ma pthii da; ungu asuwn,waan tamsii arjung da Mhin sok lo pik da.
Jisu ngi Galil thu Nong mdo Pṭhun
12Tunva Johon mdo kjown dok in Mma ngi maryaak thungta, Galil tha vang thliir chda. 13Ungta Nasareth ma thida truwn biing ngi Kaparnahum tha, Jebulun leh Naptali paamkowl tha am chdaat da. 14Khulpu Isaijah dothe dok ava mkurkhum na kurthuwk da:
15“Jebulun paam leh Naptali paam tha,
Jordon arkaan da,truwn ktong tha,
ktlok chati rek Galil ava tha,
16kjiing thu ka am mii rekki,
klin lang lang ki mar awng dei da,
ungta ava paamkowl tha ungu,
kdiyou thu ka am mii rek hin mar awng kleng nga.”
17Mpha ava thu Jisu ngi kparyaam pṭhunda, theda, plung ren ahur chaan, mleija parwaan Kruwngpaam ava knai tekka.
Jisu ngi Tuwlva Kukjowng Miilai Plii mdo Own
18Mma ngi Galil truwn be ngi mkurlon thungta,Pitor mdo dit Simon leh mnaopa Andrija unao knii ngi truwn thu kchak kdeeng slii hai deida; mleija mmaanna tuwlva kukjowng mii rek lam. 19Ungta Mma ngi mhin inni theda, “Kdil aṭoi chaan; ungu Neiji mii rek kukjowng apurthuw nikaan di.” 20Ungta mmaanni makchak rek in ma pthii teng lam thida, Mma dil ṭoi chlam da. 21Ungu ava thungki anto kchet slii ngi Jebidi chapa rek Jeems leh mnaopa Johon unao knii rekki, mpah in Jebidi tu arkuwng leen makchak rek in ktuphut slii meek deida; ungbi Mma ngi own lamda. 22Ungta mmaanni arkuwng leh mpah in ava ma pthii teng lamda, ungu Mma dil ṭoi chlam da.
Jisu do Purchu, mdo Paryaam; ungu mdo Pdam
23Ungta Jisu ngi Galil paam mkheng thu tlowng da, synagog rek thu purchuk da; ungu Kruwngpaam kṭha paumin paryaam da, ungta omlai khim khai leh mii rek arlakki msik msik omlaiji kukoi pdam da. 24Syria paam mkheng nga Mma mlei thung ngi pauren rek kurjou da, ungta kukoi rek mkheng Mhin ṭhi paphaak lamda; omlai msik msikki kukoi rek, ungu kpaang kma rek; ramṭhi rek, arngol rek; kyeng rek Mma ngi pdam pik lamda. 25Ungta Galil thungki, Dikapoli thungki, Jerusalem thungki, Judia thungki, ungu Jordon hai kheel dek thung ki mii rek klin lang lang ngi kurtuwl da Mdil ṭoida.
Nu geselecteerd:
MATHI 4: LAMKBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
