2 RÊNGHAI 10
10
Ahaba irchihai thina
1Samari khuaa khan Ahaba nâipasal sômsari an oma. Samari khuaa a pahai leh hruaitu Ahaba nâi enkoltuhai kuanga Jehua’n lekha a thona hiang hin a’rziak. 2“Reng nâihai chu nin kuta an oma. Tâli, Sakor, râlthuam le kulnei khuahai khom nuamin nin hmang theia. 3Ki lekha hi nin hmuin chu rêng nâihai laia a feltak inthang unglân, rêngin siam roi, pu thar nin inei sûnghual roi,” tiin.
4Samari khuaa hruaituhaiin nangni an chia. “Reng inhni luan nangni ngam loiin, keini hin itin mo nangni kin ingam hrang?” an tia. 5Reng in enkoltuhai, kho sûng hruaituhai upahai le rêng nâi enkoltuhaiin an sâma, “Ni siahlo kin nia, tho hranga ni ni inphût dôr chu tho hrangin kin irsiam mai. Tûte mi dang rêng inchang nuam ma ung, a sa ni iti lam takin tho ro,” an tia. 6Jehua’n lekha dang a thon nôka, “Keima tianga kop nin nia, ki thu nin zôm hrangin chu, nangtûk hiang zoro hin Jezreel khuaa rêng nâihai lu lahai roi,” tiin.
Ahaba nâi sômsarihai chu Samari khua hruaitu enkolna hnuaia seiliana om an nia. 7Jehua lekha an hmu’n chu Samari khuaa hruaituhaiin Ahaba nâi sômsarihai chu an thathaia, an lu chu bêma an thunhaia. Jezreel khuaa Jehua kuanga an thon tâka.
8Ahaba nâihai lu an hong lâk tah ti Jehua an hrila. Anni’n, “Khopui kul mikot bula buk hniin le’rbukkhôm unglân, nangtûk ten lei om ri sehai,” a tia. 9Zînga kul mikot bula a va fea, khataka lei omhai kuang khan, “Reng Jorama khitphiara thattu ki ni, ama mô kha chu nangni’n pêl no chin ni. A mihai hi tu ithat mo? 10Ahaba nâihai chungchânga Rengpa thuhril kha mâkana ni mah ti inhre roi. Rengpa’n a deipu Elija kuanga a ihril murdi a inlang a ni ta,” a tia. 11#Hos 1.4 Jezreel khuaa Ahaba urênghai le sipai hruaituhai le a rual sahai le ochai inkhat lua hôi loiin a thathaia.
Reng Ahazia urênghai thina
12Jehua’n Jezreel a suak sana, Samari khuaa fe a tuma, Lampuia belrapu tual; an itihna khan, 13Juda rêng Ahazia in mihai a’rtongpuihaia, “Tuhai mo nin ini,” a tia.
“Ahazia urênghai kin ni, rêngnu Jezebeli nâihai le rêng in mihai chubai mûk hrangin Jezreel khuaa fe kin itum a ni,” an tia. 14Jehua’n a rualhai kuang khan, “A hringin chelpaihai roi,” a tia. An chelhaia, Betheged#10.14: Betheged hi “Belra mul epna in,” tihna a ni. in khur kôla khan an thata an rêngin mi sômminli inhni an ni, inkhat lua hôihai mahai.
Ahaba urêng la damhai that zoina
15Jehua chu a fe maia, Rekaba nâipa Jehonadaba’n a’rtongpuia. Jehua’n chubai a lei mûka, “Ni chunga ki milung inchong ang hin, ki chunga lungrîl sa mo ni’rput?,” a tia. Jehonadaba’n, “Ki’rput” a tia. Jehua’n “Ni’rputin teh ni kutin ni hon ban ro,” a tia. An kut an irtûka, Jehua’n tâli chunga an chuangtira. 16“Ni hong zuiin lân, Rengpa ta hranga sathnem ki irngaizia hi nangma’n hmu ni ti,” a tia. Samari khua panin tâlia chuangin an fe tâka. 17An va tungin chu, Ahaba urêng murdi chu inkhat lua hôi loiin a thathai vinga. Elija kuanga Rengpa ihril kha a itung a ni ta.
Baal biakhai thatna thu
18Jehua’n Samari mihai a koi bukhaia, an kuang, “Reng Ahaba khan intôm takin Baal tah hrangin sin a thoa, Jehua rêkin chu a sân uar ok a ti. 19Baal deipuhai, ama biaktu murdi le ochai murdi koibukhai roi. Tûte irnghil loiin, Baal kôla thil roiinpuitak inhlan hrang ki ni, a suak loi kai chu thatpai ni an ti,” a tia. (Baal biakhai thatpaihai ving a tum sikin, khaanga vâr irlet thu a insuak a ni.) 20“Baal biakna hrang nî sûn indang roi,” Jehua’n a tia. A sûn an indang tâka. 21Jehua’n Israel rama mihai chu a bukkhômhaia; Baal biaktu murdi chu an honga, a hong loi zel om mahaia. Baal tempila an irbukkhôma. 22Ochaihai songkol enkoltuhai kuanga, “Baal biaktu murdihai sil hrang chu an lâka. 23Jehua le Rekaba nâipa Jehonadaba chu Baal tempila khan an lûta, Baal biak ngai ni loi, Rengpa biak ngai, hi hin an om le om loi satakin zong roi,” a tia. 24Hâlirvôm thilinhlan le thil dang inhlanin Baal tempila khan an lût tâka. Jehua’n mi sômriat pên tiang khan a thuphaia, an kuang khan, “Hihai hi nin ithathai ving hrang a ni, nin inzôkhai paiin chu an zôktu tak chu suak nêkin thatpai zôi zel ni nin ti,” a tia. 25Hâlirvôm thil ar hlan zoiin chu Jehua’n a sipai le a hruaituhai kuang, “Lût unglân, tûte hôihai loiin thatpaihai ving roi,” a tia. Baal tempila khan an lûta khandai irdok saiin, an thathaia; an ruakhai an hong kêlsua paihaia; tempil sûngrîla an lûta. 26Kha hmun khan Baal illim thinga an isin, phun indet kha an lâka, an hâlpaia. 27Baal illim lungphuna an isinhai an inkhiak pehaia, tempil kha an insiata, atûn ten hin mihaiin ramfenahaiin an ihmang tâk a ni.
28Khaang dôra siatin Baal biakna hmun Israela om chu insiat a ni. 29#1 Rng 12.28-30 Nebata nâipa Jeroboama sualna sikin, Israelhai hruai insualna chu Jehua’n thathai zoi nuam maka. Bethel le Dan khuaa rângachak illima siam sehrât illim kha an la biak mai a ni. 30Rengpa’n Jehua kuang, “Ki mithmua thil sa ni thoa, ki inuam lam angin Ahaba in sûng mihai ni soisak thei sikin nir chihai chu irlo minli dênin Israel rama inlal an ti,” a tia. 31Khannisianlân, Jehua’n Rengpa, Israelhai Pathian dân chu a dik takin zôm nuam maka; Jeroboama sualna, Israelhai hruai sualna kha irnghil thei maka.
Jehua thina thu
32Kha lai khan Israel ram chu Rengpa’n an chîntira, Suria rêng Hazaela’n Israel ram kha a hong doia. 33Jordan dung nisua tiang panga ram, Gilead hai, Gad hai, Reubena hai le Manasea hai omna ram Arnon tui kôlhaia, Aroer, an khopui Gilead le Basan dênin a lâkpai tâka.
34Jehua sintho danghai chu, a hrât lamhai chu Israel rênghai thurchi irziakna bua a chuang vinga. 35Jehua chu a thia, Samari khuaa an phûm tâka. A nâipa Jehoahaza chu ar thûlin an lal nôka. 36Kum sômhni kiriat sûng chu Samari khuaa Jehua chu a inlal a ni.
Nu geselecteerd:
2 RÊNGHAI 10: HRACLBSI
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.