THILSIEMBUL 6
6
Mihiem laka Gitlohna Pung
1Chun, hiti hi ahi a, lei chunga mihiem a hung pun a, chanute a hun neih zel lai un.#Job 1.6; 2.1 2Pathien chapate chun mihiem chanute chuh melhawih takin a muu a; tichun a deih takphawt u chuh zi’n a nei tau a. 3Tichun Lalpa chun, “Ka thagau in mihiem chuh chenpih zing puo’n a, amau haw chuh phehlevo ahi ngâl u a; himahleh kum za leh sawmnih chuh dam in au,” a ti a. 4Zielai chun Nephilim te chuh lei ahin a um u a; zie nung chun le Pathien chapate’n mihiem chanute chuh a kivawppih u a, amau haw a cha a neih sek lai u khan le a um u a: ziehaw chuh malaia mihat, mi minthang haw kha a hiu hi.#Kis 13.33 5Chun, Lalpa chun, lei ahin mihiem nunsiet dân chuh huoisie tak ahi tih leh, a lunggil u a gitlohna ngaihtuoh zing zing ahiu hi tih a mu a.#Mat 24.37; Luk 17.26; 1 Pet 3.20 6Tichun, lei ahin mihiem a na siem tâk ziekin Lalpa chuh a kisik a, a lunggil a nat lawh ta a. 7Tichun Lalpa chun, “Ka mihiem siem hi lei chung apat hin sumangthai mai ing ka; mihiemte, gamsate, bawka vak ganhingte, chung leng vachate natieng in ka na siem tâk ziekin ka kisik hi,” a ti a. 8Noah vang chun Lalpa mit a tung a.
Noah Chanchin
9Ziehaw hi Noah suonte chuh ahiu hi. Noah chuh mi diktat ahi a, a khanguolpih haw lak achun gensiet bei ahi: Noah chuh Pathien tawh a kivawp sek u a.#2 Pet 2.5 10Noah chun chapa thum a nei a Shem, Ham leh Japheth ahiu hi. 11Chun, lei hi Pathien mitmuh in a sie zo ta a, lei hi kipawngbawlna’n a dim zo tai. 12Chun, Pathien in lei hi a en a, ngaitie a sie zo tai tih a mu a, leichung a hinna nei chengcheng umdan chuh a thanhuoi tâk ziekin.
13Chun, Pathien in Noah kawm achun, “Phehlevo chengcheng tawpna chuh ka ma ah a hung tung tai; amau haw ziekin lei hi kipawngbawlna’n a dim zo ta ngâl a; tichun ngaiin, a lei pum in sumangthai ding ka hi. 14Nang a dingin châk thing in lawng siem inla, lawng sung achun a pindan haw siem in na tin, a sunglam leh a pawlam chuh châknai a na châl suok ding ahi. 15Chun, na siem ding dân chuh hiti hi ahi: lawng dunglam chuh tawng zathum hi’n tin, a sânlam chuh tawng sawmthum hi’n tin, a let dân chuh tawng sawmnga hi’n a. 16Lawng achun tukvan siem in la, a chunglam tawng khat hal achun na zawh ding ahi; lawng kawtkhak chuh a pang ah na siem ding ahi: dan nuoinung leh dan nihna leh dan thumna nei a na siem ding ahi. 17Ngaiin, keimah ngêi in lei ahin tui let sak ing ka ting, phehlevo nei, amau a hinna hu nei taphawt chuh vannuoi apat in sumang ding ka hi; lei a thil um tincheng hi thi vek in au. 18Himahleh, ka thugawlh chuh na chungah sudet zaw’ng ka ting; lawng a chuh na lut ding ahi a, nang na lut ding ahi a, na chapate tawh: na zi tawh, na chapate zite le nang kawma a lut dinguh ahi. 19Chun, Phehlevo nei ganhing cheng, akawp kawp in nang kawma hinsuoh ding in lawng sunga chuh na puihlut ding ahi a; anu leh achal hiding ahi. 20Vacha chikim, gamsa chikim leichung a bawkvak ganhing chikim nih zelin hinsuoh dinga na kawma a hung dinguh ahi. 21Chun, an na nêk theih chi chengcheng uh lakhawm inla, na kawmah kawihkhâwm in, tichun nang leh amau a dingin an hin au,” a ti a. 22Chun, Noah chun khutibang tak chun ahih a, Pathien in a kawma thu a piek bang tak chun ahih ta a.#Heb 11.7
Nu geselecteerd:
THILSIEMBUL 6: GANGBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.