भजनसंग्रह 73:25-28
भजनसंग्रह 73:25-28 नेपाली नयाँ संशोधित संस्करण (NNRV)
स्वर्गमा तपाईंबाहेक मेरो अरू को छ र? र पृथ्वीमा पनि मैले चाहना गर्ने तपाईंबाहेक अरू केही छैन। मेरो तन र मन दुवै विफल होलान्, तर परमेश्वर सदासर्वदाको निम्ति मेरो हृदयको शक्ति र मेरो भाग हुनुहुन्छ। तपाईंबाट टाढ़ा रहनेहरू नष्ट हुनेछन्, तपाईंलाई विश्वासघात गर्ने सबैलाई तपाईं विनाश गर्नुहुन्छ। तर मेरो लागि भने परमेश्वरको नजिक रहनु असल छ। मैले परमप्रभु परमेश्वरलाई मेरो शरणस्थान बनाएको छु, म तपाईंका सबै कार्यहरूको वर्णन गर्नेछु।
भजनसंग्रह 73:25-28 पवित्र बाइबल, नेपाली समकालीन संस्करण (NCV)
स्वर्गमा तपाईंबाहेक मेरो अरू को छ र? अनि तपाईंबाहेक पृथ्वीमा मैले चाहना गरेको अरू कोही छैन। मेरो देह र मेरो हृदय दुवै विफल होलान्, तर परमेश्वर सदासर्वदाको निम्ति मेरो हृदयको बल र मेरो भाग हुनुहुन्छ। तपाईंबाट टाढा रहने मानिसहरू नष्ट हुनेछन्; तपाईंलाई विश्वासघात गर्ने सबैलाई तपाईंले विनाश गर्नुहुन्छ। तर मेरो लागि चाहिँ परमेश्वरको नजिक रहन पाउनु असल छ; मैले प्रभु याहवेहलाई मेरो शरणस्थान बनाएको छु; म तपाईंका सारा कामहरूको वर्णन गर्नेछु।
भजनसंग्रह 73:25-28 पवित्र बाइबल (NERV)
हे परमेश्वर, तपाईं बाहेक म स्वर्गमा कसलाई चाहन्छु। अनि म तपाईंसित पृथ्वीमा भएको बाहेक अरू केही इच्छा गर्दिनँ। मेरो तन र मन नष्ट हुन सक्छ, तर मसँग परमेश्वर छ जसलाई म प्रेम गर्छु। मसँग परमेश्वर सदा-सर्वदा हुनुहुन्छ! हे परमेश्वर, मानिस जसले तपाईंलाई त्यग्दछ त्यो हराउने छ। तपाईंले तिनीहरूलाई ध्वंश गर्नु हुनेछ जो तपाईंसित विश्वासी छैनन्। म परमेश्वर कहाँ आएँ अनि त्यो मेरो लागि हितकारी भयो। मैले परमप्रभु परमेश्वरलाई मेरो सुरक्षित ठाउँ बनाएँ। परमेश्वर, म तपाईंकहाँ, तपाईंले गर्नु भएका सबै थोकहरू बताउन आएँ।
भजनसंग्रह 73:25-28 सरल नेपाली पवित्र बाइबल (सरल नेपाली)
स्वर्गमा तपाईंबाहेक मेरो अरू को छ र? तपाईं हुँदाहुँदै मलाई पृथ्वीमा अरू कुन थोक चाहिन्छ र? मेरा शरीर र मन दुवै दुर्बल हुन सक्छन्, तर परमेश्वर मेरा सामर्थ्य हुनुहुन्छ, मलाई चाहिने उहाँ मात्र हुनुहुन्छ। तपाईंलाई त्याग्नेहरू निश्चय नाश हुनेछन्, तपाईंलाई विश्वास नगर्नेहरूलाई तपाईंले ध्वंस पार्नुहुनेछ। तर मेरो निम्ति परमेश्वरको नजिक रहन पाउनु, सार्वभौम परमप्रभुको सुरक्षा पाउनु, र उहाँका कामबारे वर्णन गर्नु कति उदेकको कुरा हो!
