भजनसंग्रह 103:8-14
भजनसंग्रह 103:8-14 पवित्र बाइबल (NERV)
परमप्रभु अनुग्रही र करूणामय हुनुहुन्छ। परमेश्वर संवेदनशील र मायालु हुनुहुन्छ। परमप्रभुले सधैँ आलोचना गर्नु हुन्न परमप्रभु सधैँ हामीसँग क्रोधित भएर बस्नु हुन्न। हामीले परमेश्वरको विरूद्ध पाप गर्यौं। तर उहाँले हामीलाई कुनै प्रकारको दण्ड दिनु भएन, जसको लागि हामी योग्य थियौं। परमेश्वरको प्रेम आफ्ना भक्तजनहरूमा पृथ्वीदेखि आकाशको उचाई जस्तै अग्लो छ। अनि परमेश्वरले हाम्रो पापहरू पूर्व र पश्चिम टाढा-टाढा रहे जस्तो टाढो राखि दिनुभयो। परमप्रभु आफ्ना भक्तजनहरूसँग त्यस्तो स्नेही हुनुहुन्छ, जसरी एक पिता आफ्ना छोरा-छोरीहरूसँग हुन्छ। परमेश्वरले हाम्रो बारेमा सबै कुराहरू जान्नुहुन्छ, हामी धूलाका कणहरूबाट बनिएका हौं भनेर परमेश्वर जान्नुहुन्छ।
भजनसंग्रह 103:8-14 नेपाली नयाँ संशोधित संस्करण (NNRV)
परमप्रभु टिठालु र अनुग्रही, क्रोध गर्नमा ढिला, र अति करुणामय हुनुहुन्छ। उहाँले सधैँ दोष लगाइरहनुहुन्न, उहाँले सधैँभरि क्रोध पनि लिइराख्नुहुन्न। उहाँले हामीसँग हाम्रा पापअनुसारको व्यवहार गर्नुहुन्न, अनि हाम्रा अधर्मअनुसार हामीलाई दण्ड दिनुहुन्न। किनकि पृथ्वीबाट स्वर्ग जत्ति अग्लो छ, उहाँका भय मान्नेहरूमाथि उहाँको करुणा त्यत्तिकै महान् छ। पश्चिमबाट पूर्व जत्ति टाढ़ा छ, उहाँले हाम्रा अपराधहरू हामीबाट त्यत्तिकै टाढ़ा हटाइदिनुभएको छ। जसरी बुबाले आफ्ना छोराछोरीहरूलाई टिठ्याउँछन्, त्यसरी नै उहाँका भय मान्नेहरूलाई परमप्रभुले टिठ्याउनुहुन्छ। किनभने उहाँ जान्नुहुन्छ, हाम्रो सृष्टि कसरी भएको हो, हामी धूलो मात्र हौं भनी उहाँ सम्झनुहुन्छ।
भजनसंग्रह 103:8-14 पवित्र बाइबल, नेपाली समकालीन संस्करण (NCV)
याहवेह कृपालु र अनुग्रही हुनुहुन्छ, रिसाउनमा ढिलो र प्रेमले भरिपूर्ण। उहाँले सधैँ दोष लगाइरहनुहुन्न, न त आफ्नो क्रोध सदासर्वदा लिइरहनुहुन्छ; उहाँले हामीसित हाम्रा पापअनुसारको व्यवहार गर्नुहुन्न, न त हाम्रा अधर्मअनुसार हामीलाई बदला लिनुहुन्छ। किनकि पृथ्वीबाट स्वर्ग जति उच्च छ, उहाँका डर मान्नेहरूमाथि उहाँको अचुक प्रेम त्यत्ति नै महान् छ। पश्चिमबाट पूर्व जति टाढा छ, उहाँले हाम्रा अपराधहरू हामीबाट त्यति नै टाढा हटाइदिनुभएको छ। जसरी बुबाले आफ्ना छोराछोरीहरूलाई टिठ्याउँछन्, त्यसरी नै याहवेहले उहाँको भय मान्नेहरूलाई टिठ्याउनुभएको छ; किनकि उहाँले हाम्रो बनावट जान्नुहुन्छ, हामी धुलो मात्र हौँ भनी उहाँ सम्झनुहुन्छ।
भजनसंग्रह 103:8-14 सरल नेपाली पवित्र बाइबल (सरल नेपाली)
परमप्रभु दयालु र प्रेमिलो, रिस गर्नमा ढीला र अनन्त प्रेमले पूर्ण हुनुहुन्छ। उहाँले हकारिरहनुहुन्न, सधैँ रिसाउनुहुन्न। हामीले पाउनुपर्ने उचित दण्ड उहाँले हामीलाई दिनुहुन्न, हाम्रा पाप र अपराधअनुसार उहाँले हामीलाई दण्ड दिनुहुन्न। स्वर्ग पृथ्वीदेखि जति अग्लो छ, आफूलाई आदर गर्नेहरूप्रति उहाँको प्रेम त्यत्ति नै महान् छ। पूर्व दिशा पश्चिमदेखि जति टाढा छ, त्यति नै टाढा उहाँले हाम्रा पाप हामीदेखि हटाइदिनुहुन्छ। एउटा बुबा आफ्ना छोरा-छोरीहरूसँग जति दयालु हुन्छ, आफ्ना आदर गर्नेहरूसँग परमप्रभु त्यति नै दयालु हुनुहुन्छ। हामी केले बनिएका छौं, उहाँले जान्नुहुन्छ, हामी माटो मात्र हौं भनी उहाँलाई याद छ।