लेवीहरू 9:22-24
लेवीहरू 9:22-24 नेपाली नयाँ संशोधित संस्करण (NNRV)
तब हारूनले आफ्ना हात मानिसहरूतिर उठाएर तिनीहरूलाई आशीर्वाद दिए। यसरी पापबलि, होमबलि र मेलबलि चढ़ाएर उनी तल ओर्ले। तब मोशा र हारून भेट हुने पालभित्र प्रवेश गरे, अनि निस्केर मानिसहरूलाई आशीर्वाद दिए। अनि परमप्रभुको महिमा सबै मानिसहरूमा देखा पर्यो। परमप्रभुको सामुन्नेबाट आगो निस्केर वेदीमा रहेको होमबलि र बोसोलाई भस्म पार्यो। जब मानिसहरूले यो देखे, तब तिनीहरू खुशीले कराएर घोप्टो परेर लोटे।
लेवीहरू 9:22-24 पवित्र बाइबल, नेपाली समकालीन संस्करण (NCV)
तब हारूनले आफ्ना हात मानिसहरूतिर उठाएर तिनीहरूलाई आशिष् दिए। यसरी पाप शुद्धीकरण बलि, होमबलि र मेलबलि चढाएर तिनी तल ओर्ले। त्यसपछि मोशा र हारून समागम पालभित्र गए। जब तिनीहरू बाहिर निस्के, तब तिनीहरूले मानिसहरूलाई आशिष् दिए। तब याहवेहको महिमा सबै मानिसहरूकहाँ देखा पर्यो। याहवेहको उपस्थितिबाट आगो निस्केर आयो। अनि वेदीमाथि भएको होमबलि र बोसोको भागलाई भस्म पारिदियो। जब सबै मानिसहरूले त्यो देखे, तब तिनीहरू हर्षले चिच्याए, र घोप्टो परेर लोटे।
लेवीहरू 9:22-24 पवित्र बाइबल (NERV)
तब हारूनले मानिसहरू प्रति हात उठाएर तिनीहरूलाई आशीर्वाद दिए। यसरी पापबलि, होमबलि र मेलबलि चढाई सिध्याए पछि तिनी वेदीबाट तल ओर्लिए। त्यसपछि मोशा र तिनी भेट हुने पालमा गए। जब तिनीहरू बाहिर आए तिनीहरूले मानिसहरूलाई आशीर्वाद दिए। तब परमप्रभुको महिमा सबै मानिसहरूमा झल्कियो। परमप्रभुको सामुन्नेबाट आगो उत्पन्न भयो अनि वेदी माथिको होमबलि र बोसोलाई खरानी पार्यो। जब सबै मानिसहरूले यो देखे तिनीहरू कराए अनि आ-आफ्ना अनुहार भूइँतिर निहुराए।
लेवीहरू 9:22-24 सरल नेपाली पवित्र बाइबल (सरल नेपाली)
हारूनले सबै बलिहरू चढाइसकेपछि आफ्ना हात उचालेर मानिसहरूलाई आशिष् दिए। त्यसपछि तिनी ओर्ले। मोशा र हारून परमप्रभुको पवित्र पालभित्र पसे र बाहिर निस्केर तिनीहरूले मानिसहरूलाई आशीर्वाद दिए अनि परमप्रभुको महिमापूर्ण ज्योति सबै मानिसहरूले देखे। अचानक परमप्रभुले आगोको मुस्लो पठाउनुभयो र त्यसले होमबलि र वेदीमा भएका सबै बोसो भस्म पार्यो। त्यो देखेर मानिसहरूले सोर उचाले र भूइँसम्म शिर झुकाएर ढोगे।