यूहन्‍ना 16:16-33

शेयर गर्नुहोस्

यूहन्‍ना 16:16-33 पवित्र बाइबल (NERV)

“केही बेरपछि तिमीहरूले मलाई देख्नेछैनौ। अनि अर्को केही बेर पछि मलाई फेरि तिमीहरूले देख्नेछौ।” कोही चेलाहरूले आपसमा भने, “येशूले जब त्यसो भन्नु हुन्छ त्यसको मतलब के हो? ‘केही बेरपछि तिमीहरूले मलाई देख्नछैनौ अनि तब केही बेरपछि मलाई फेरि देख्नेछौ?’ त्यसो जब भन्नुहुन्छ, ‘म पिताकहाँ जादैछु।’ त्यसको अर्थ के हो?” चेलाहरूले सोधे, “‘केही बेरपछि’ भन्नुको तात्पर्य के हो? उहाँले के भनिरहनु भएको छ हामीले केही बुझेनौ।” येशूले जान्नु भयो कि चेलाहरूले त्यस विषयमा उहाँलाई सोध्न चाहन्छन्। तब येशूले आफ्ना चेलाहरूलाई भन्नुभयो, “तिमीहरू आपसमा सोधिरहेछौ मेरो भन्नुको तात्पर्य जब मैले भने, केही बेरपछि तिमीहरूले मलाई देख्ने छैनौ। तिमीहरूले यो जान्नलाई आपसमा बहस गरेकाछौ। त्यसपछि फेरि अर्को केही बेरपछि देख्नेछौ? म तिमीहरूलाई साँच्चो भन्छु। तिमीहरू रूनेछौ र दुःखी हुनेछौ तर संसार प्रसन्न हुनेछ। तिमीहरू दुःखी हुने छौ तर तिमीहरूका दुःख आनन्दमय हुनेछ। “जब एक नारीले बालकलाई जन्म दिने समय हुन्छ, उसलाई पीडा हुँदछ, किनभने उसले जन्माउने समय आएको हुँदछ। तर जब बालक जन्मिसक्दछ, उनले अघिका पीडाहरू भुल्छिन्, किनभने उनले बालक संसारमा जन्मिएको खुशीमा अघिका पीडाहरू त्यसै भुल्दछिन्। तिमीहरूसँग पनि ठीक त्यस्तै हुनेछ। अहिले तिमीहरू दुःखीछौ। तर म तिमीहरूलाई फेरि देख्नेछु र तिमीहरू खुशी हुनेछौ। अनि कसैले पनि तिमीहरूको खुशी खोसेर लानेछैन। त्यस दिन तिमीहरूले मलाई केही पनि सोध्ने छैनौ। म तिमीहरूलाई साँच्चो भन्दछु। मेरो नाममा जे मागे पनि मेरा पिताले तिमीहरूलाई दिनुहुनेछ। तिमीहरूले अझ सम्म मेरो नाममा केही पनि मागेकै छैनौ। माग अनि तिमीहरूले पाउनेछौ। अनि तिमीहरूको आनन्द पूर्ण हुनेछ। “यी कुराहरू मैले तिमीहरूलाई अर्थ लुकाएर भनिसकेकोछु। तर समय आउँदैछ म तिमीहरूसँग खुल्ला पारेर यी कुराहरू भन्नेछु। मेरा पिताको विषयमा म तिमीहरूलाई सरल भाषामा भन्नेछु। त्यस समय मेरो नाममा मेरा पितालाई बिन्ती गर्नेछौ। तर मैले भनिरहेकोछैन कि तिमीहरूको निम्ति म मेरा पितालाई भन्नेछु। किनभने पिता आफैंले तिमीहरूलाई प्रेम गर्नुहुन्छ। उहाँले तिमीहरूलाई प्रेम गर्नुहुन्छ किनभने तिमीहरूले मलाई प्रेम गरेकाछौ। त्यसकारणले तिमीहरूले विश्वास गर्छौ कि म परमेश्वरबाट आएको हुँ। म पिताबाट संसारमा आएँ। अब म यो संसार छोडेर पिता कहाँ फर्केर जाँदैछु।” तब येशूका चेलाहरूले भने, “तपाईंले अहिले हामीलाई खुलस्त भन्नुभयो। त्यस्तो बुझ्नै नसक्ने अप्ठेरो नबनाई तपाईंले भन्नु भएन। हामीले अब बुझ्न सक्छौ कि तपाईंले प्रत्येक कुरा जान्नु हुन्छ। तपाईंले सोध्नु अगाडि नै कुनै पनि मानिसको उत्तर दिनु सक्नुहुन्छ। यही कारणले हामीलाई विश्वास दिलाउँछ कि तपाईं परमेश्वरबाटै आउनु भएको हो।” येशूले भन्नुभयो, “यसर्थः अब तिमीहरूले विश्वास गर्यौ? ध्यानले सुन, तिमीहरू छरिएर बस्ने समय आइरहेछ। तिमीहरू प्रत्येक आफ्नै घरमा छरपष्ट हुनेछौ। त्यो समय अब आएको छ। तिमीहरूले मलाई छाडनेछौ। म एकलो रहनेछु। तर म वास्तवमा एक्लो रहनेछैन किनभने पिता मसँग रहनु हुनेछ। “मैले तिमीहरूलाई यी कुराहरू भनेको छु ताकि तिमीहरूलाई ममा शान्ति रहोस्। यस संसारमा तिमीहरूलाई संकट हुनेछ। तर साहसी बन। मैले संसारलाई पराजित गरेको छु।”

यूहन्‍ना 16:16-33 सरल नेपाली पवित्र बाइबल (सरल नेपाली)

“थोरै समयपछि तिमीहरूले मलाई देख्‍नेछैनौ अनि केही समयपछि फेरि तिमीहरूले मलाई देख्‍नेछौ।” “उहाँले ‘थोरै समयपछि मलाई देख्‍ने छैनौ, फेरि केही समयपछि मलाई देख्‍नेछौ, फेरि म पिताकहाँ जाँदै छु’ पनि भन्‍दै हुनुहुन्‍छ, “यो के भनेको?” भन्‍दै उहाँका चेलाहरूले आपसमा सोधे। यो थोरै समयपछि भनेको के हो? उहाँले केको बारेमा भन्‍दै हुनुहुन्‍छ, हामीहरूले त बुझेनौं,” भनेर तिनीहरू अलमल्‍ल परे। तिनीहरूले यो कुराको बारेमा सोध्‍न चाहन्‍छन् भन्‍ने जानेर येशूले तिनीहरूलाई भन्‍नुभयो, “मैले भने ‘थोरै समयपछि तिमीहरूले मलाई देख्‍नेछैनौ अनि केही समयपछि फेरि देख्‍नेछौ।’ के यही कुराबारे तिमीहरूले आपसमा सोधपुछ गरेका होइनौ? साँच्‍चै म तिमीहरूलाई भन्‍छु, तिमीहरू रुने र कराउनेछौ, तर दुनियाँचाहिँ खुसी हुनेछ। तिमीहरू दु:खी हुनेछौ, तर तिमीहरूको दु:ख र पीर आनन्‍दमा फेरिनेछ। नानी पाउन आँट्दा आमा कष्‍टले छटपटिन्‍छिन्, तर नानी पाउनेबित्तिकै ‘संसारमा एउटा बालकको जन्‍म भएको छ’ भन्‍ने हर्षले तिनी सबै दु:ख बिर्सेर खुसी हुन्‍छिन्। तिमीहरूलाई पनि त्‍यस्‍तै हुँदै छ। अहिले तिमीहरू शोक गर्छौ, तर म तिमीहरूलाई फेरि भेट्‍न आउँदा तिमीहरूको हृदय आनन्‍दले भरिनेछ र यस्‍तो खालको आनन्‍द तिमीहरूबाट कसैले पनि खोसेर लैजान सक्‍नेछैन। त्‍यति बेला तिमीहरूले मसँग केही पनि सोध्‍नेछैनौ। म साँच्‍चै भन्‍छु, मेरो नाउँमा जे मागे तापनि पिताले तिमीहरूलाई दिनुहुनेछ। अहिलेसम्‍म त तिमीहरूले मेरो नाउँमा केही पनि मागेका छैनौ। माग त तिमीहरूले पाउनेछौ अनि तिमीहरूको आनन्‍द पूरा हुनेछ। “अहिलेचाहिँ म तिमीहरूलाई दृष्‍टान्‍तको कथा दिएर कुरा गर्दै छु, तर पछि भने मैले तिमीहरूलाई पिताको बारेमा दृष्‍टान्‍त नदिई छर्लङ्ग हुने गरी भन्‍नेछु। त्‍यस बेला तिमीहरू आफैंले मेरो नाउँमा माग्‍नेछौ, मैले तिमीहरूको लागि पितासँग मागिदिनु पर्नेछैन। पिता आफैंले तिमीहरूलाई प्रेम गर्नुहुन्‍छ किनभने तिमीहरूले मलाई प्रेम गरेका छौ र म परमेश्‍वरबाट आएको हुँ भनेर विश्‍वास गरेका छौ। म पिताबाटै संसारमा आएको हुँ र अहिले संसारलाई छोडेर फेरि पिताकहाँ नै फर्किंदै छु।” तब चेलाहरूले येशूलाई भने, “अहिले पो तपाईं दृष्‍टान्‍त नदिई हामीलाई सोझै भन्‍दै हुनुहुन्‍छ। अब हामी जान्‍दछौ, तपाईं सबै कुरा जान्‍नुहुन्‍छ। तपाईंलाई अब कसैले प्रश्‍न गर्नुपर्दैन। त्‍यसैले तपाईं परमेश्‍वरबाट नै आउनुभएको हो भनेर हामी विश्‍वास गर्छौं।” येशूले जवाफ दिनुभयो, “अहिले त तिमीहरू विश्‍वास गर्छौ। तर समय आउँदै छ र नजिकै आइसक्‍यो, त्‍यति बेला तिमीहरू सबै तितरबितर हुनेछौ। तिमीहरू आ-आफ्‍ना घरमा जानेछौ र मलाई एक्‍लै छोड्‍नेछौ। तर हेर, म एक्‍लै हुनेछैनँ किनभने मसँग मेरा पिता हुनुहुन्‍छ। “तिमीहरू ममा रहेर शान्‍ति पाउन सक भनेर नै मैले तिमीहरूलाई यी सबै कुरा भनेको हुँ। संसारमा तिमीहरूलाई सङ्कष्‍ट हुनेछ, तर साहसिलो होओ किनभने मैले संसारलाई जितिसकेको छु।”

यूहन्‍ना 16:16-33 नेपाली नयाँ संशोधित संस्करण (NNRV)

“अलि बेरपछि तिमीहरूले मलाई फेरि देख्‍नेछैनौ, अनि अलि बेरपछि मलाई फेरि देख्‍नेछौ।” तब उहाँका कुनै-कुनै चेलाहरूले एक-अर्कालाई भने, “उहाँले हामीहरूलाई यो भन्‍नुभएको के हो? ‘अलि बेरपछि तिमीहरू मलाई देख्‍नेछैनौ, अनि फेरि अलि बेरपछि तिमीहरू मलाई देख्‍नेछौ,’ र ‘किनकि म पिताकहाँ गइरहेछु’।” तिनीहरूले भने, “उहाँले ‘अलि बेर’ भन्‍नुभएको के हो? हामी जान्‍दैनौ, उहाँ के भन्‍दैहुनुहुन्‍छ।” तिनीहरूले उहाँलाई सोध्‍ने इच्‍छा गर्दैछन्‌ भन्‍ने येशूलाई थाहा भयो, र उहाँले भन्‍नुभयो, “‘अलि बेरपछि तिमीहरू मलाई देख्‍नेछैनौ, अनि अलि बेरपछि मलाई देख्‍नेछौ’ भन्‍ने कुराको अर्थ के हो भन्‍ने विषयमा के तिमीहरू आपसमा बहस गरिरहेछौ? साँच्‍चै, म तिमीहरूलाई भन्‍दछु, तिमीहरू रुनेछौ र विलाप गर्नेछौ, तर संसार रमाउनेछ। तिमीहरू शोकित हुनेछौ, तर तिमीहरूको शोक आनन्‍दमा परिणत हुनेछ। बालक जन्‍माउने बेलामा स्‍त्रीलाई पीडा हुन्‍छ किनभने तिनको बेला आएको हुन्‍छ, तर जब तिनले बालक जन्‍माउँछिन्, तब तिनलाई त्‍यस वेदनाको सम्‍झना हुँदैन किनकि संसारमा एउटा बालकको जन्‍म भयो भन्‍ने कुरामा तिनी हर्षित हुन्‍छिन्‌। यसरी नै अहिले तिमीहरूलाई शोक हुन्‍छ, तर म फेरि तिमीहरूलाई देख्‍नेछु, र तिमीहरूका हृदय आनन्‍दित हुनेछन्‌। अनि कसैले तिमीहरूको आनन्‍द तिमीहरूबाट खोस्‍नेछैन। त्‍यो दिन तिमीहरूले मलाई केही सोध्‍नेछैनौ। साँच्‍चै म तिमीहरूलाई भन्‍दछु, तिमीहरूले मेरो नाउँमा पितासँग जे माग्‍छौ, उहाँले त्‍यो तिमीहरूलाई दिनुहुनेछ। अहिलेसम्‍म तिमीहरूले मेरो नाउँमा केही मागेका छैनौ। माग, अनि तिमीहरूले पाउनेछौ। यसरी तिमीहरूको आनन्‍द पूर्ण होओस्‌। “यी कुरा मैले तिमीहरूलाई दृष्‍टान्‍तमा भनेको छु। तर समय आइरहेछ, जब म तिमीहरूसँग फेरि दृष्‍टान्‍तमा बोल्‍नेछैनँ, तर पिताको विषयमा तिमीहरूलाई स्‍पष्‍ट बताउनेछु। त्‍यो दिन तिमीहरूले मेरो नाउँमा माग्‍नेछौ। म तिमीहरूका निम्‍ति पितासँग बिन्‍ती गरिदिनेछु भनी तिमीहरूलाई भन्‍दिनँ, किनभने पिता आफैले तिमीहरूलाई माया गर्नुहुन्‍छ, किनकि तिमीहरूले मलाई माया गरेका छौ, र म परमेश्‍वरको तर्फबाट आएँ भनी विश्‍वास गरेका छौ। म पिताबाट आएँ, अनि संसारमा आएको छु, र फेरि म संसारलाई छोड़ेर पिताकहाँ जाँदैछु।” उहाँका चेलाहरूले भने, “अब तपाईं स्‍पष्‍ट बोल्‍दैहुनुहुन्‍छ, दृष्‍टान्‍तमा होइन। अब हामीहरूले बुझ्‍यौं, तपाईं सबै कुरा जान्‍नुहुन्‍छ, अनि तपाईंलाई कसैले सोध्‍ने आवश्‍यकता छैन। यसैले हामी विश्‍वास गर्छौं, कि तपाईं परमेश्‍वरबाट आउनुभएको हो।” येशूले तिनीहरूलाई जवाफ दिनुभयो, “के तिमीहरू अब विश्‍वास गर्दछौ? हेर, समय आइरहेछ, वास्‍तवमा आइसकेको छ, जब तिमीहरू छरपष्‍ट भई आफ्‍नै ठाउँमा जानेछौ र मलाई एकलै छोड्‌नेछौ। तापनि म एकलो छैनँ, किनभने पिता मसँग हुनुहुन्‍छ। मैले तिमीहरूलाई यी कुरा यस हेतुले भनेको छु, कि ममा तिमीहरूलाई शान्‍ति होस्‌। संसारमा तिमीहरूलाई सङ्कष्‍ट हुनेछ, तर साहस गर, मैले संसारलाई जितेको छु।”

यूहन्‍ना 16:16-33 नेपाली समकालीन संस्करण (NCV)

“केही बेरपछि तिमीहरूले फेरि मलाई देख्नेछैनौ; अनि फेरि केही बेरपछि तिमीहरूले मलाई देख्नेछौ।” उहाँका केही चेलाहरूले एक-आपसमा भने, “उहाँले ‘केही बेरपछि तिमीहरूले फेरि मलाई देख्नेछैनौ, अनि फेरि केही बेरपछि तिमीहरूले मलाई देख्नेछौ’ र ‘किनकि म पिताकहाँ जाँदैछु’ भनी भन्‍नुभएको अर्थ के हो?” तिनीहरूले “उहाँले ‘केही बेर’ भन्‍नुभएको अर्थ के हो? उहाँले के भन्दैहुनुहुन्छ, सो हामी बुझ्न सक्दैनौं,” भनी सोधपुछ गरिरहे। तिनीहरूले यस विषयमा उहाँलाई सोध्ने इच्छा गर्दैछन् भनी येशूले थाहा पाउनुभयो र उहाँले तिनीहरूलाई भन्‍नुभयो, “के तिमीहरूले मैले ‘केही बेरपछि तिमीहरूले फेरि मलाई देख्नेछैनौ, अनि फेरि केही बेरपछि तिमीहरूले मलाई देख्नेछौ’ भनी भन्‍नुको अर्थ के होला भन्दै एकापसमा सोधपुछ गरिरहेका छौ? म तिमीहरूलाई साँच्‍चै भन्दछु, तिमीहरू रुनेछौ र विलाप गर्नेछौ, तर संसारचाहिँ रमाउनेछ। तिमीहरूले शोक गर्नेछौ, तर तिमीहरूको शोक आनन्दमा परिणत हुनेछ। बालक जन्माउने बेलामा स्त्रीलाई पीडा हुन्छ; किनकि तिनको समय आएको हुन्छ, तर बालक जन्मिएपछि संसारमा एउटा बालकको जन्म भएको छ भन्‍ने कुराको हर्षको कारण तिनले त्यस वेदनालाई बिर्सन्छिन्। तिमीहरूलाई पनि त्यस्तै नै हुन्छ: अहिले तिमीहरूको शोकको समय हो, तर मैले फेरि तिमीहरूलाई देख्नेछु, र तिमीहरू रमाउनेछौ, अनि कसैले पनि तिमीहरूको आनन्द खोस्‍नेछैन। अनि त्यस दिन तिमीहरूले मलाई फेरि केही पनि माग्नेछैनौ। म तिमीहरूलाई साँच्‍चै भन्दछु, तिमीहरूले मेरो नाउँमा जे माग्छौ, त्यो मेरा पिताले तिमीहरूलाई दिनुहुनेछ। अहिलेसम्म तिमीहरूले मेरो नाउँमा केही पनि मागेका छैनौ; माग अनि तिमीहरूले पाउनेछौ र तिमीहरूको आनन्दपूर्ण हुनेछ। “म दृष्‍टान्तहरूमा बोलिरहेको छु, तर एउटा समय आउँदैछ, जब मैले फेरि यस प्रकारको दृष्‍टान्तको प्रयोग गर्नेछैनँ, तर मेरा पिताको विषयमा मैले तिमीहरूलाई स्पष्‍ट गरी भन्‍नेछु। त्यो दिन तिमीहरूले मेरो नाउँमा माग्नेछौ। मैले पितासँग तिमीहरूका निम्ति विन्ती गर्नेछु भनी भनेको होइनँ। पिता आफैले तिमीहरूलाई प्रेम गर्नुहुन्छ; किनकि तिमीहरूले मलाई प्रेम गरेका छौ र म परमेश्‍वरबाट आएको हुँ भनी विश्‍वास गरेका छौ। म पिताबाट आएँ, र संसारमा प्रवेश गरें; अब म संसारलाई छोडेर पिताकहाँ नै फर्कंदैछु।” त्यसपछि येशूका चेलाहरूले भने, “अब तपाईं स्पष्‍टसँग र दृष्‍टान्‍तविना नै बोल्दैहुनुहुन्छ। अब हामीले बुझ्न सक्यौं, कि तपाईं सबै कुरा जान्‍नुहुन्छ; अनि तपाईंलाई कसैले केही सोध्नुपर्ने आवश्यकता पनि तपाईंको निम्ति छैन। यसै कुराले तपाईं परमेश्‍वरबाट आउनुभएको हो भनी हामीलाई विश्‍वास दिलाउँछ।” येशूले जवाफ दिनुभयो, “बल्‍ल तिमीहरूले विश्‍वास गर्दछौ? तर समय आइरहेको छ, वास्तवमा त्यो समय आइसकेको छ, जब तिमीहरू छरपस्‍ट हुनेछौ, र हरेक आ-आफ्नै ठाउँमा जानेछौ। तिमीहरूले मलाई एकलै छोड्नेछौ। तापनि म एकलो छैनँ, किनकि मेरा पिता मसँग हुनुहुन्छ। “ममा तिमीहरूलाई शान्ति मिलोस् भनेर मैले यी कुराहरू तिमीहरूलाई भनेको छु। यस संसारमा तिमीहरूलाई सङ्कष्‍ट हुनेछ; तर ढाडस गर! मैले संसारलाई जितेको छु।”