यर्मिया 42:1-22

शेयर गर्नुहोस्

यर्मिया 42:1-22 नेपाली नयाँ संशोधित संस्करण (NNRV)

तब फौजका सबै अधिकृतहरू, कारेहका छोरा योहानान र होशयाहका छोरा येजन्‍याह, सानाभन्‍दा सानादेखि लिएर ठूलाभन्‍दा ठूला सबै मानिसहरूसमेत गरी यर्मिया अगमवक्ताकहाँ भेट गर्न आए, र तिनीहरूले तिनलाई भने, “हाम्रो बिन्‍ती सुन्‍नुहोस्, र परमप्रभु तपाईंका परमेश्‍वरसित यी बाँचेकाहरूका निम्‍ति बिन्‍ती गरिदिनुहोस्‌। किनकि तपाईं आफ्‍नै आँखाले देख्‍नुहुन्‍छ कि हामी त्‍यति धेरै थियौं तर अब थोरै मात्र रहेका छौं। परमप्रभु तपाईंका परमेश्‍वरले हामीलाई कहाँ जाने हो, र हामीले के गर्नुपर्ने हो, सो देखाइदेऊन् भनेर प्रार्थना गर्नुहोस्‌।” यर्मिया अगमवक्ताले तिनीहरूलाई भने, “मैले तिमीहरूको कुरा सुनें। म परमप्रभु तिमीहरूका परमेश्‍वरलाई तिमीहरूले बिन्‍ती गरेअनुसार प्रार्थना गरिदिनेछु, र परमप्रभुले जे भन्‍नुहुन्‍छ, सो सबै तिमीहरूलाई बताइदिनेछु। म केही कुरा पनि तिमीहरूदेखि लुकाउनेछैनँ।” तब तिनीहरूले यर्मियालाई भने, “परमप्रभु तपाईंका परमेश्‍वरले तपाईंद्वारा पठाउनुभएका कुराअनुसार हामीले गरेनौं भने, परमप्रभु नै हामीहरूका विरुद्धमा साँचो र विश्‍वासयोग्‍य साक्षी होऊन्‌। चाहे त्‍यो अनुकूल होस्‌ वा नहोस्, परमप्रभु हाम्रा परमेश्‍वर, जसकहाँ हामी तपाईंलाई पठाइरहेका छौं, उहाँको वचन हामी पालन गर्नेछौं, ताकि परमप्रभु हाम्रा परमेश्‍वरको कुरा हामीले मानेकाले हाम्रो भलो होस्‌।” दश दिनपछि परमप्रभुको वचन यर्मियाकहाँ आयो। तब तिनले कारेहका छोरा योहानान र तिनका साथमा भएका फौजका सबै अधिकृतहरू र साना-ठूला सबै मानिसहरूलाई बोलाए। यर्मियाले तिनीहरूलाई भने, “परमप्रभु इस्राएलका परमेश्‍वर, जसको सामुन्‍ने तिमीहरूले मलाई आफ्‍नो बिन्‍ती चढ़ाउनलाई पठाएका थियौ, यसो भन्‍नुहुन्‍छ: ‘यदि तिमीहरू यही देशमा रह्यौ भने म तिमीहरूलाई बनाइराख्‍नेछु तर भत्‍काउनेछैनँ, म तिमीहरूलाई रोपिराख्‍नेछु तर उखेल्‍नेछैनँ, किनकि मैले तिमीहरूलाई गरेको सर्वनाशदेखि म दु:खित छु। बेबिलोनको राजा, जससँग अहिले तिमीहरू डराउँदछौ, अब त्‍यससँग नडराओ, किनकि तिमीहरूलाई त्‍यसको हातदेखि बचाउन र छुटाउनलाई म तिमीहरूसित हुन्‍छु, परमप्रभु भन्‍नुहुन्‍छ। म तिमीहरूमाथि कृपा गर्नेछु, र त्‍यसले तिमीहरूमाथि टिठ्याएर तिमीहरूलाई तिमीहरूकै देशमा फेरि बसाल्‍नेछ’। “तापनि तिमीहरूले परमप्रभु तिमीहरूका परमेश्‍वरका हुकुम पालन गरेनौ भने, र ‘हामी यस देशमा बस्‍नेछैनौं, तर हामी मिश्रदेशमा नै गएर बस्‍नेछौं, किनभने त्‍यहाँ हामी लड़ाइँ देख्‍नेछैनौं, तुरहीको सोर सुन्‍नेछैनौं, न त रोटी नपाई भोकै रहनेछौं,’ भन्‍यौ भनेदेखि त, हे यहूदाका बाँचेकाहरू हो, परमप्रभुको वचन सुन। सर्वशक्तिमान्‌ परमप्रभु, इस्राएलका परमेश्‍वर भन्‍नुहुन्‍छ: यदि तिमीहरूले मिश्रदेशमा गएर त्‍यहाँ बसोबास गर्नलाई पक्‍का नै गरेका छौ भने, जुन तरवारदेखि तिमीहरू डराउँदछौ, त्‍यसले नै तिमीहरूलाई मिश्रदेशमा खेदेर भेट्टाउनेछ, र जुन अनिकालदेखि तिमीहरू डराउँदछौ, त्‍यो मिश्रदेशमा तिमीहरूका पछिपछि आउनेछ, र तिमीहरू त्‍यहीँ नै मर्नेछौ। निश्‍चय नै मिश्रदेशमा गएर त्‍यहीँ रहनलाई मन पक्‍का गर्ने जति जम्‍मै तरवार, अनिकाल र रूढ़ीले मर्नेछन्‌। मैले तिमीहरूमाथि ल्‍याउने सर्वनाशबाट एउटै पनि बाँच्‍नेछैन वा उम्‍कनेछैन’। सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: ‘जसरी मेरो रीस र क्रोध यरूशलेमका मानिसहरूमाथि खनिएका थिए, त्‍यसरी नै तिमीहरू मिश्रदेशमा गयौ भने मेरो क्रोध तिमीहरूमाथि पनि खनिनेछ। तिमीहरू सराप र त्रास, अपराध र निन्‍दाका पात्र बनिनेछौ। तिमीहरूले यो ठाउँ फेरि कहिल्‍यै देख्‍न पाउनेछैनौ’। “हे यहूदाका बाँकी रहेका हो, परमप्रभुले तिमीहरूलाई भन्‍नुभएको छ, ‘मिश्रदेशमा नजाओ’। यो कुरा तिमीहरूले निश्‍चय जानिराख: आजको दिन म तिमीहरूलाई चेताउनी दिन्‍छु, कि तिमीहरूले एउटा घातक भूल गर्‍यौ। तिमीहरूले मलाई परमप्रभु तिमीहरूका परमेश्‍वरकहाँ यसो भनेर पठायौ, ‘परमप्रभु हाम्रा परमेश्‍वर जे भन्‍नुहुन्‍छ त्‍यो सबै हामीलाई बताइदिनुहोस्‌ र हामी त्‍यो गर्नेछौं’। आज मैले तिमीहरूलाई त्‍यो बताइदिएको छु। तर जे कुरा भन्‍नू भनी उहाँले मलाई तिमीहरूकहाँ पठाउनुभयो, ती सबै कुरामा परमप्रभु तिमीहरूका परमेश्‍वरको आज्ञापालन तिमीहरूले अझै गरेका छैनौ। यसैले अब यो कुरो निश्‍चय जानिराख, कि तिमीहरू बसोबास गर्न जानलाई इच्‍छा गरेको ठाउँमा नै तिमीहरू तरवार, अनिकाल र रूढ़ीले मर्नेछौ।”

यर्मिया 42:1-22 पवित्र बाइबल (NERV)

तिनीहरू गेरूथ किम्हाममा भएको बेला, योहानान र होशायाहको छोरो याजन्याह यर्मिया अगमवक्ताकहाँ गए। जम्मै सेनाका हाकिमहरू र सानोदेखि ठूलो दर्जा सम्मका मानिसहरू योहानान र याजन्याहसित गए। ती सबै जनाले अगमवक्ता यर्मियालाई भने, “हाम्रो नम्र बिन्ति ग्रहण गर्नुहोस् र हाम्रा निम्ति तथा बाँचेका यी मानिसहरूको लागि परमप्रभु तपाँईंका परमेश्वरसित प्रार्थना गरिदिनु होस्। एकपल्ट हामीहरू बहुसंख्यामा थियौं तर अहिले तपाईं देख्नु हुन्दैछ हामी केही मात्र बाँचेका छौं। यर्मिया, परमप्रभु तपाईंको परमेश्वरसित प्रार्थना गरिदिनु होस् ताकि हामी कहाँ जानु पर्ने अनि हामीले के गर्नु पर्ने हो।” तब अगमवक्ता यर्मियाले उत्तर दिए, “तिमीहरूले के गर्नु पर्ने भनेको हो मैले बुझें। तिमीहरूले भनें झैं म परमप्रभु तिमीहरूका परमेश्वरसित प्रार्थना गरिदिने छु। परमप्रभुले भन्नु भएको सबै कुराहरू म तिमीहरूलाई भन्नेछु। कुनै थोकहरू पनि म तिमीहरूदेखि लुकाउने छैन।” तब ती मानिसहरूले यर्मियालाई भने, “यदि हामीले परमप्रभु तपाईंका परमेश्वरले चाहनु भए जस्तै कामहरू गरेनौं भने हाम्रा निम्ति परमप्रभु साँच्चो र विश्वासी साक्षी रहनु हुन्छ। हामी जान्दछौं परमप्रभु तिमीहरूका परमेश्वरले के गर्नु पर्ने तिमीहरूलाई भन्न हामीलाई पठाउन्। परमप्रभुको आदेश चाहे हाम्रो हितमा होस् अथवा नहोस् हामी पालन गर्नेछौ ताकि जब हामी परमप्रभु हाम्रा परमेश्वरको सबै आदेश पालन गर्छौ सब कुरो हाम्रो हितमा हुनेछ। हामी तिमीलाई ती सन्देश लिनका लागि परमेश्वर कहाँ पठाई रहेछौं। तब असल कुराहरू हामी प्रति हुने छ। हो, हामी परमेश्वरको सारा कुराहरू पालन गर्ने नै छौं।” दश दिनको अन्त्यमा, यर्मियाकहाँ परमप्रभुबाट सन्देश आयो। तब यर्मियाले कारेहका छोरो योहानान र तिनका साथमा भएका सेनाका सबै हाकिमहरू अनि साना ठूला दर्जाका सबै मानिसहरूलाई डाके। तब यर्मियाले तिनीहरूलाई भने, “परमप्रभु इस्राएलका परमेश्वरको सन्देश यही हो। तिमीहरूले मलाई उहाँ कहाँ पठायौ। मैले परमप्रभुलाई तिमीहरूले जे चाहन्थ्यौ त्यही सोधें। परमप्रभु भन्नुहुन्छ ‘यदि तिमीहरू साँच्चै यस देशमा बस्छौं भने, म तिमीहरूलाई बलियो बनाउँछु। म तिमीहरूलाई नष्ट गर्ने छैन। म तिमीहरूलाई जोगाउनेछु अनि तिमीहरूलाई उखाल्ने छैन कारण तिमीहरूका निम्ति मैले गरेको नराम्रो काममा म दु:खित छु। तिमीहरू बाबेलका राजासित भयभित छौ। तर अब उसँग नडराऊ। म तिमीहरूसित छु अनि म तिमीहरूलाई उबाट बचाउँने छु। म तिमीहरूलाई दया दर्शाउनेछु। बाबेलका राजाले पनि तिमीहरू प्रति दयादृष्टि राख्नेछन् अनि उसले तिमीहरूलाई आफ्नो देशमा आउने अनुमति दिनेछन्।’ यदि तिमीहरू भन्छौ, ‘हामी यस देशमा बस्ने छौ,’ तब तिमीहरूले परमप्रभु तिमीहरूका परमेश्वरको आज्ञा पालन गरेनौ। तिमीहरूले भन्न सक्छौ, ‘हामी मिश्रमा जानेछौं जहाँ हामी युद्धको सम्मुखिन हुनु पर्दैन, मिश्रमा हामीले युद्धको तुरहीहरू सुन्नु पर्दैन, हामी भोक-भोकै बस्नुपर्दैन।’ यदि तिमीहरूले ती कुराहरू भन्छौ भने, तब परमप्रभुको सन्देश ध्यान दिएर सुन्, हे यहूदामा बाँचेर रहेका मानिसहरू! सेनाहरूका परमप्रभु, इस्राएलका परमेश्वर भन्नुहुन्छ, ‘यदि तिमीहरू मिश्रमा जाने निर्णय लिन्छौ अनि त्यहाँ बस्छौ भने यो तिनीहरूलाई हुनेछ। तिमीहरू तरवारसित डराउँछौ, तर तिमीहरूलाई त्यहाँ तरवारले परास्त गर्ने नै छ। तिमीहरू भोकको चिन्ता गर्छौ तर, यसले तिमीहरूलाई मिश्रमा पनि पछ्याउनेछ अनि तिमीहरू त्यहाँ मर्नेछौ। प्रत्येक मानिस जो मिश्र गएर बस्ने निर्णय लिन्छ, तरवार, अनिकाल र भयानक रोगबाट मर्नेछ। अनि कोही पनि मानिस मैले ल्याएको त्यो भयानक अनिष्टबाट बाँच्ने छैन।’ “सेनाहरूका परमप्रभु, इस्राएलका परमेश्वर भन्नुहुन्छ ‘यरूशलेम बासिन्दाहरूमाथि मैले मेरो क्रोध देखाएँ। त्यसरी नै जो मिश्र जाँदैछन् तिनीहरूमाथि क्रोध बर्षाउनेछु। तिमीहरू श्राप, अपराध र निन्दाको पात्र बनिनेछौ अनि तिनीहरूले यहूदा फेरि कहिल्यै देख्ने छैनौ।’ “यहूदामा बाँचेका मानिसहरू हो, परमप्रभुले तिमीहरूलाई भन्नु भएको छ ‘मिश्रमा नजाऊ।’ तिमीहरू निश्चय जान्दछौ कि म तिमीहरूलाई चेताउनी दिँदैछु। तिमीहरूले गल्ती गरिरहेका छौ जुन गल्ती तिमीहरूकै मृत्युको कारण बनिनेछ। तिमीहरूले मलाई परमप्रभु तिमीहरूका परमेश्वरकहाँ पठायौ र भन्यौ, ‘हाम्रो लागि परमप्रभु हाम्रा परमेश्वरसँग प्रार्थना गरिदेऊ अनि परमप्रभुले भन्नुभएको प्रत्येक कुरा हामीलाई भनिदिनु अनि हामी त्यो मान्नेछौ।’ यसकारण आज मैले तिमीहरूलाई परमप्रभुबाट सन्देश भनेको छु। तर तिमीहरूले मैले बताएको कुनै कुरामा पनि परमप्रभु तिमीहरूका परमेश्वरको आज्ञा पालन गरेका छैनौ। यसर्थ निश्चित हौ कि तिमीहरूले बुझ्छौ। तिमीहरू मिश्रमा गई बस्न चाहन्छौ। तर मिश्रमा तिमीहरूमाथि यी घटनाहरू हुनेछ। तिमीहरू तरवार, अनिकाल अथवा भयानक रूढीले मर्नेछौ।”

यर्मिया 42:1-22 सरल नेपाली पवित्र बाइबल (सरल नेपाली)

तब सबै फौजका कप्‍तानहरू, कारेहका छोरा योहानान र होशयाहका छोरा अजर्याहसमेत सबै दर्जाका मानिसहरूका साथमा मकहाँ आएर भने, “कृपा गरी हाम्रो बिन्‍तीअनुसार गर्नुहोस्। हाम्रा निम्‍ति परमप्रभु हाम्रा परमेश्‍वरसँग प्रार्थना गरिदिनुहोस्। हामी बाँचेकाहरूका निम्‍ति प्रार्थना गरिदिनुहोस्। एक समयमा हामी धेरै थियौं तर अब थोरै मात्र बाँकी रहेका छौं, त्‍यो तपाईंले देख्‍दै हुनुहुन्‍छ। हामी कुन बाटो जानुपर्छ र के गर्नुपर्छ, सो हामीलाई परमप्रभु हाम्रा परमेश्‍वरले देखाइदिऊन् भनी प्रार्थना गरिदिनुहोस्।” मैले उत्तर दिएँ, “हुन्‍छ, तपाईंहरूले भनेअनुसार म परमप्रभु हाम्रा परमेश्‍वरसित प्रार्थना गर्नेछु र उहाँले जे उत्तर दिनुहुन्‍छ, त्‍यो तपाईंहरूलाई बताउनेछु। म तपाईंहरूबाट केही लुकाउनेछैनँ।” तब तिनीहरूले मलाई भने, “परमप्रभु हाम्रा परमेश्‍वरले हाम्रा निम्‍ति जुन आज्ञाहरू तपाईंद्वारा दिनुहुनेछ, ती हामीले पालन गरेनौं भने उहाँ नै हाम्रा विरुद्धमा साँचो र विश्‍वासयोग्‍य साक्षी होऊन्। हामीहरूलाई खुसी लागोस् वा नलागोस्, हामी परमप्रभु आफ्‍ना परमेश्‍वरको आज्ञा मान्‍नेछौं। उहाँसित प्रार्थना गरिदिनुहोस् भनी हामी तपाईंलाई बिन्‍ती गर्दै छौं। उहाँको आज्ञापालन गर्नमा नै हाम्रो भलाइ छ।” दश दिनपछि परमप्रभु मसित बोल्‍नुभयो र मैले योहानान, उनीसित रहेका फौजका कप्‍तानहरू र अरू मानिसहरूलाई बोलाएर एकसाथ जम्‍मा गरें। मैले तिनीहरूलाई भनें, “तपाईंहरूले मलाई परमप्रभु इस्राएलका परमेश्‍वरकहाँ बिन्‍ती चढाइदिन भन्‍नुभएको थियो। अब उहाँले यसो भन्‍नुभएको छ, ‘तिमीहरू यसै देशमा बसोबास गर्न राजी छौ भने म तिमीहरूलाई बनाउनेछु तर भत्‍काउनेछैनँ। म तिमीहरूलाई रोपिराख्‍नेछु तर उखेल्‍नेछैनँ। तिमीहरूमाथि मैले ल्‍याएको विनाशले मलाई ठूलो कष्‍ट दिएको छ। बेबिलोनका राजाको डर मान्‍न छोड। म तिमीहरूका साथमा छु र तिमीहरूलाई त्‍यसका शक्तिबाट उद्धार गर्नेछु। म कृपालु छु, यसकारण म त्‍यसलाई तिमीहरूमाथि कृपा गर्न लाउनेछु। तिमीहरूलाई स्‍वदेश फर्की जान दिन लाउनेछु। म परमप्रभु बोलेको छु।’ “तर तपाईं यहूदामा बाँकी रहनुहुनेहरूले परमप्रभु आफ्‍ना परमेश्‍वरको आज्ञा नमानेर ‘यस देशमा बास गर्दैनौं,’ भन्‍नुहुँदैन। तपाईंहरूले यसो भन्‍नुहुँदैन, ‘अँहँ हामी मिश्रमा गएर बस्‍नेछौं, जहाँ हामीले फेरि लडाइँ देख्‍नुपर्नेछैन, लडाइँको सोर सुन्‍नुपर्नेछैन वा भोक खप्‍नुपर्नेछैन।’ त्‍यसो भन्‍नुभयो भने जवाफमा सर्वशक्तिमान् परमप्रभु इस्राएलका परमेश्‍वर यसो भन्‍नुहुन्‍छ, ‘तिमीहरूले मिश्रमा गई बास गर्ने पक्‍का गरेका छौ भने तिमीहरूले डर मानेका लडाइँले तिमीहरूलाई भेट्टाउनेछ र तिमीहरूले डर मानेका अनिकालले पछ्याउनेछ र तिमीहरू मिश्रमा मर्नेछौ। मिश्रदेश गई बस्‍ने निश्‍चय गर्ने मानिसहरू सबै लडाइँ, अनिकाल र रुढीले मर्नेछन्। कोही बाँच्‍नेछैन, जुन विनाश म तिमीहरूमाथि ल्‍याउनेछु, त्‍यसबाट एक जना पनि उम्‍कनेछैन।’ “परमप्रभु इस्राएलका परमेश्‍वर यसो भन्‍नुहुन्‍छ, ‘जसरी मेरो रिस र प्रचण्‍ड क्रोध यरूशलेमका मानिसहरूमाथि खनिएको थियो, त्‍यसरी नै तिमीहरू मिश्रदेशमा गई बस्‍यौ भने मेरो प्रचण्‍ड क्रोध तिमीहरूमाथि खनिनेछ। तिमीहरूको दशा हेर्दा डरलाग्‍दो हुनेछ, मानिसहरूले तिमीहरूलाई गिल्‍ला र घृणा गर्नेछन् र सराप दिंदा तिमीहरूको नाम लिएर सराप दिनेछन्। यो देश तिमीहरूले फेरि देख्‍नेछैनौ’।” त्‍यसपछि मैले भनें, “तपाईं यहूदामा बाँकी छोडिएकाहरूलाई परमप्रभुले ‘मिश्रमा नजानू’ भन्‍नुभएको छ। यसर्थ म तपाईंहरूलाई चेतावनी दिंदछु कि तपाईंहरूले घातक भुल गर्दै हुनुहुन्‍छ। तपाईंहरूले मलाई परमप्रभु हाम्रा परमेश्‍वरसित प्रार्थना गरिदिन भन्‍नुभयो र उहाँले दिनुभएको हरेक आज्ञा पालन गर्ने प्रतिज्ञा पनि गर्नुभयो। अनि अहिले उहाँको वचन मैले सुनाएँ। जुन आज्ञा सुनाउन परमप्रभु हाम्रा परमेश्‍वरले मलाई यहाँ पठाउनुभयो, ती आज्ञाहरू एउटै पनि पालन गर्नुहुन्‍न। अब त्‍यसो भए, यो कुरा याद राख्‍नुहोस्, जुन देशमा गएर बसोबास गर्न तपाईंहरू चाहनुहुन्‍छ, त्‍यहाँ तपाईंहरू लडाइँ, अनिकाल र रुढीले मर्नुहुनेछ।”