न्यायकर्ताहरू 8:22-35
न्यायकर्ताहरू 8:22-35 नेपाली नयाँ संशोधित संस्करण (NNRV)
इस्राएलीहरूले गिदोनलाई भने, “हामीलाई मिद्यानीहरूबाट बचाउनुभयो। अब तपाईं हाम्रा शासक हुनुहोस्, तपाईं, तपाईंका छोरा र तपाईंका नाति।” तर गिदोनले जवाफ दिए, “म वा मेरो छोराले होइन तर परमप्रभुले नै तिमीहरूमाथि शासन गर्नुहुनेछ।” अनि तिनले भने, “म तिमीहरूसँग एउटा अनुरोध गर्न चाहन्छु। तिमीहरू हरेकले आफ्नो लूटको मालबाट एउटा कुण्डल मलाई देओ।” ती शत्रु इश्माएलीहरूका बीचमा सुनका कुण्डल लगाउने चलन थियो। तिनीहरूले भने, “अवश्यै, हामी ती तपाईंलाई दिनेछौं।” तब एउटा लुगा ओछ्याइयो, र हरेकले त्यसमा आफ्नो लूटको मालबाट सुनको एउटा कुण्डल राखिदियो। तिनले मागेका सुनका कुण्डलको ओजन बीस किलो जति भयो। योचाहिँ चन्द्रहार र अरू गहना र मिद्यानी राजाहरूले लाउने बैजनी वस्त्रबाहेक थियो। उनीहरूका ऊँटका घाँटीमा लगाएका सिक्रीहरूको त गन्ती नै भएन। ती सुनबाट गिदोनले एउटा एपोद बनाए र आफ्नै सहर ओप्रामा त्यो राखे। सबै इस्राएलीहरूले त्यसको पूजा गरी आफैलाई वेश्यासमान बनाए, र त्यो गिदोन र तिनका घरानालाई फसाउने एउटा फन्दा भयो। यसरी मिद्यानीहरू इस्राएलीहरूको अधीनमा भए। उनीहरूले आफ्ना शिर फेरि ठाड़ो गर्न सकेनन्। गिदोनको जीवनपर्यन्त चालीस वर्षसम्म देशमा शान्ति भयो। त्यसपछि योआशका छोरा यरूब-बाल आफ्नै घरमा गएर बस्न लागे। तिनका सत्तरी जना छोराहरू थिए, किनभने तिनका धेरै पत्नीहरू थिए। तिनकी एउटी भित्रिनी थिइन्, जो शकेममा बस्थी। त्यसले पनि तिनको एक जना छोरो जन्माइन्, र तिनले त्यसको नाउँ अबीमेलेक राखे। अनि योआशका छोरा गिदोन पूरा बुढ़ेसकालमा मरे, र आफ्ना बुबाको चिहानमा अबीएजेरीहरूको ओप्रामा गाड़िए। तिनको मृत्यु हुनासाथ इस्राएलीहरूले फेरि देवताहरूसित व्यभिचार गर्न लागे, र बाल-बरीतलाई आफ्नो देवता तुल्याए। तिनीहरूले चारैतिरका तिनीहरूका शत्रुहरूका हातबाट छुटाउनुहुने परमप्रभु आफ्ना परमेश्वरलाई बिर्से। यरूब-बाल, अर्थात् गिदोनले इस्राएलको निम्ति गरेका सबै हितका काम भुलेर तिनीहरूले तिनको परिवारलाई देखाउनुपर्ने दया देखाएनन्।
न्यायकर्ताहरू 8:22-35 पवित्र बाइबल (NERV)
इस्राएलका मानिसहरूले गिदोनलाई भने, “तिमीले हामीलाई मिद्यानका मानिसहरूबाट बँचायौ। यसर्थ अब हामीमाथि शासन गर। हामी तिमीले, तिम्रा छोराले अनि तिम्रा नातीले हामी माथि शासन गरेको चाहन्छौ।” तर गिदोनले इस्राएलका मानिसहरूलाई भने, “परमप्रभु तिमीहरूका शासक हुनुहुनेछ। म तिमीहरूमाथि शासन गर्ने छैन। अनि मेरा छोराले तिमीहरूमाथि शासन गर्ने छैनन्।” इस्राएलका मानिसहरूले पराजित गरेका केही मानिसहरू इश्माएलीहरू थिए। अनि इश्माएली मानिसहरू सुनका कुण्डल लाउँथे। यसर्थ गिदोनले इश्माएलका मानिसहरूलाई भने, “तिमीहरूले मेरो निम्ति यो एउटा काम गरेको चाहन्छु। तिमीहरू प्रत्येकले मलाई तिमीहरूले युद्धहुँदा लगेका सुनका कुण्डल एक एकवटा दिएको म चाहन्छु।” यसर्थ इस्राएलका मानिसहरूले गिदोनलाई भने, “तिमी जे चाहन्छौ हामीहरू तिमीलाई दिन खुशी छौ” यसर्थ तिनीहरूले एउटा लुगा भूइँमा ओछ्याए। प्रत्येक मानिसले लुगामा एक-एकवटा कुण्डल हाले। जब ती सुनको कुण्डलहरू एकत्रित गरिए तिनीहरूको लगभग ओजन 1,700 शेकेल भयो। यसमा इस्राएलका मानिसहरूले गिदोनलाई प्रदान गरेका अन्यभेटहरू संलग्न थिएनन्। तिनीहरूले गिदोनलाई चन्द्रमा आकृतिका अनि आँसुका थोपा आकृतिका मणि-माणिक्य पनि प्रदान गरे। अनि तिनीहरूले बैजनी बस्त्रहरू तिनलाई दिए। ती चीजबीजहरू थिए जो मिद्यानका राजाहरूले पहिरेका थिए। तिनीहरूले तिनलाई मिद्यानी ऊँठहरूको सिक्री पनि दिए। गिदोनले त्यो सुन एउटा एपोद निर्माण गर्नमा प्रयोग गरे। तिनले त्यो एपोदलाई ओप्रा नाउँको शहर-तिनको निवास शहरमा राखे। इस्राएलका समस्त मानिसहरूले त्यो एपोदलाई पूजा गरे। यस प्रकारले इस्राएलका मानिसहरू परमेश्वर प्रति विश्वसनीय रहेनन्-तिनीहरूले एपोद पूजे। एपोद एक पासो बन्यो जसले गिदोन अनि तिनका घरानालाई पापगर्न लगायो। मिद्यानका मानिसहरूलाई इस्राएलको शासनमा रहन वाध्य तुल्याइयो। मिद्यानका मानिसहरूले अझ कष्ट दिएनन्। अनि त्यस भूमिमा चालीस बर्ष सम्म शान्ति भयो जब सम्म गिदोन जीवित रहे। त्यसपछि यरूब्बाल, योआशाका छोरा आफ्नै घरमा गएर बस्न लागे। गिदोनका आफ्नै सत्तरी जना छोराहरू थिए। तिनका यदि धेरै छोराहरू भए किनभने तिनका धेरै पत्नीहरू थिए। गिदोनकी एउटी रखौटी थिइन् जो शकेम शहरमा वस्थिन्। रखौटीबाट तिनका एउटा पुत्र जन्मिए। तिनले त्यसको नाउँ अबीमेलेक राखे। यसरी योआशका छोरा गिदोनको पूरा बूढेसकालमा मृत्यु भयो। गिदोनलाई तिनका बाबुको चिहान छेउमा गाडिदिए। त्यो चिहान ओप्रा शहरमा थियो। जहाँ अबीएजरका परिवार बस्दथे। गिदोनको मृत्यु हुनासाथ इस्राएलका मानिसहरू फेरि परमेश्वर प्रति विश्वसनीय रहेनन्, तिनीहरूले बाल देवको अनुशरण गरे। तिनीहरूले बाल-बरीतलाई आफ्ना देवता बनाए। इस्राएलका मानिसहरूले तिनीहरूका चारैतिर बस्ने तिनीहरूका सबै शत्रुहरूबाट परमप्रभुले बँचाउनु भयो। तापनि परमप्रभु आफ्ना परमेश्वरलाई सम्झेनन्। इस्राएलका मानिसहरू यरूब्बालका घराना प्रति आज्ञाकारी थिएनन् यद्यपि तिनीहरूका निम्ति धेरै राम्रो कुरा तिनले गरेका थिए।
न्यायकर्ताहरू 8:22-35 सरल नेपाली पवित्र बाइबल (सरल नेपाली)
त्यसपछि इस्राएलीहरूले गिदोनलाई भने, “तिमी हाम्रा शासक बन। तिमीपछि तिम्रा सन्तान हाम्रा शासक बनून्। तिमीले हामीलाई मिद्यानीहरूदेखि बचाएका छौ।” गिदोनले उत्तर दिए, “म तिमीहरूका राजा बन्नेछैनँ। मेरो छोरो पनि तिम्रा राजा बन्नेछैन। परमप्रभु तिम्रा शासक हुनुहुनेछ।” तर त्यसपछि उनले फेरि भने, “म तिमीहरूबाट एउटा कुरा माग्दछु। तिमीहरूले लिएका कानका सुनका कुण्डल प्रत्येकले मलाई देओ।” (मिद्यानीहरू अरू मरुभूमिबासीजस्तै कानमा सुनका कुण्डल लाउँथे।) मानिसहरूले भने, “हामी खुसीसाथ ती तिमीहरूलाई दिनेछौं।” तिनीहरूले एउटा कपडा ओछ्याए। हरेकले आफूले लिएका कुण्डलहरू त्यहाँ राखिदिए। यसरी गिदोनले पाएका सुनका कुण्डलहरूको ओजन बीस किलोजति भयो। तर त्यसमा मिद्यानी राजाहरूले लाएका गहना, हार र बैजनी-वस्त्रहरू अनि ऊँटका गलाका हार वा सिक्रीहरू परेका थिएनन्। गिदोनले त्यो सुनबाट एउटा मूर्ति बनाए र आफ्नो सहर ओप्रामा राखे। सबै इस्राएलीहरूले परमेश्वरलाई त्यागेर त्यहाँ गई मूर्तिलाई पूजा गर्थे। त्यो गिदोन र उनका परिवारको लागि एउटा पासो बन्यो। यसरी मिद्यानीहरू इस्राएलीहरूसँग हारे र इस्राएलीहरूलाई तिनीहरूको केही डर रहेन। गिदोनका मृत्यु-कालसम्म चालीस वर्षभरि देशमा शान्ति थियो। गिदोन आफ्नो घर गई त्यहीँ बस्न लागे। उनका सत्तरी जना छोरा भए, कारण स्वास्नीहरू धेरै थिए। शकेममा उनकी एउटी रखौटी पनि थिई, त्यसले उनको निम्ति एउटा छोरो जन्माई अनि उनले त्यसको नाम अबीमेलेक राखे। योआशको छोरा गिदोन पूरा उमेर पुगेर बुढेसकालमा मरे र उनको बुबा योआशको चिहानमा गाडिए। सो चिहान अबीएजेर कुलको सहर ओप्रामा थियो। गिदोनको मृत्युपछि इस्राएलीहरू परमेश्वरप्रति फेरि अविश्वासी बने र बालको पूजा गर्न लागे। तिनीहरूले बाल-बरीतलाई आफ्नो देवता बनाए र आफ्ना चारैपट्टिका शत्रुहरूदेखि रक्षा गर्नुहुने आफ्ना परमप्रभु परमेश्वरलाई सेवा गर्न छोडे। गिदोनले इस्राएलका निम्ति गरेका सम्पूर्ण उपकारका कार्य भुलेर तिनीहरू उसका परिवारप्रति धन्यवादी रहेनन्।