Лука 3
3
Пыртысь Иоан
(Мт. 3:1-12; Мк. 1:1-8; Ин. 1:19-28)
1Тайӧ вӧлі Тиверий нима кесарлӧн дас витӧд веськӧдлан воӧ. Сэки Иудея муӧн веськӧдліс Понтий Пилат. Ирӧд веськӧдліс Галилея муӧн, сылӧн Филип вокыс веськӧдліс Итурея-Траконит муясӧн, Лисаний веськӧдліс Авилен муӧн. 2Аннас да Каиаф вӧліны аркирейясӧн. Тайӧ кадӧ Енсянь кыв воис Иоанлы, Закар пилы, коді оліс овтӧминын. 3Йӧрдан юдорса муясӧд ветлӧдлігӧн Иоан юӧрталіс: «Бергӧдчӧй мыжъяссьыныд да пыртчӧй, медым Ен прӧститас мыжъяснытӧ». 4Исай пророк небӧгын тадзи гижӧма:
– Овтӧминын кылӧ горзысьлӧн шы:
«Лӧсьӧдӧй туй Господьлы,
веськӧдӧй-шыльӧдӧй ордымъяс Сылы!
5Быд ковтыс мед тырас,
быд керӧс да мыльк мед ляпкалас,
чукыльяс мед веськаласны,
гуранъяс мед шыляласны!
6Сэки ставӧн аддзасны Енлысь мездӧмсӧ».
7Иоан шуаліс сы дінӧ пыртчыны воӧмаяслы: «Вижля йылӧм! Коді туйдӧдіс тіянӧс пышйыны локтана скӧрлунысь? 8Олӧмнад петкӧдлӧй мыжъяссьыныд бергӧдчӧмнытӧ. Энӧ лысьтӧй мӧвпавны, мый тіян батьныд Ӧвраам. Висьтала тіянлы: тайӧ изъясысь Ен вермӧ вӧчны Ӧвраамлы ныв-писӧ. 9Черыс пу вужйыс дорын нин куйлӧ. Пуыс кӧ оз вай бур вотӧс, сійӧс кералӧны да шыбитӧны биӧ».
10Йӧзыс юасисны Иоанлысь: «Мый миянлы колӧ вӧчнысӧ?» 11Сійӧ вочавидзис: «Тэнад кӧ кык дӧрӧм, ӧтисӧ сет, кодлӧн абу. Тэнад кӧ эм сёян, тшӧтш тадзи вӧч». 12Пыртчыны воисны тшӧтш вот перйысьяс, найӧ юалісны: «Велӧдысь, мый миянлы колӧ вӧчнысӧ?» 13Сійӧ вочавидзис налы: «Энӧ босьтӧй тіянлы тшӧктӧмасьыс унджыксӧ». 14Шыпуртаяс тшӧтш юалісны сылысь: «А миянлы мый колӧ вӧчнысӧ?» Иоан шуис налы: «Мырдысьӧн да повзьӧдлӧмӧн энӧ босьтӧй йӧзлысь сьӧм, тырмӧдчӧй асланыд удждонӧн».
15Йӧзыс мӧвпалісны, абу-ӧ тайӧ Иоаныс Кристос, ӧд найӧ виччысисны Кристосӧс. 16Иоан шуис налы: «Ме пырта тіянӧс ваӧн, но локтӧ меысь вынаджык, ме ог шогмы разьны Сылысь кӧмкот кӧвсӧ. Сійӧ пыртас тіянӧс Вежа Лолӧн да биӧн. 17Сы киын тӧлӧдчан зырйыс. Сійӧ весалас гумласӧ: шобдісӧ йӧртӧдӧ чукӧртас, а кыдсӧ куслытӧм биын сотас».
18Уна ногӧн Иоан висьтавліс Бур Юӧрсӧ йӧзыслы. 19Иоан янӧдіс Ирӧд ӧксыӧс вокыслӧн Ирӧдиада гӧтырыс вылӧ гӧтрасьӧмысь да мукӧд лёкторйысь. 20Таысь Ирӧд пуксьӧдіс Иоанӧс дзескыдінӧ, тадзи содтіс аслас лёк вӧчӧмъяслысь лыдсӧ.
Исуслӧн пыртчӧм
(Мт. 3:13-17; Мк. 1:9-11)
21Пыртчис уна йӧз. Исус тшӧтш пыртчис. Пыртчӧм бӧрас Исуслӧн кевмысигӧн енэжыс воссис. 22Вежа Лов гулю кодьӧн лэччис Сы вылӧ. Енэжсянь кыліс гӧлӧс шы: «Тэ Менам муса Пиӧй, Ме нимкодяся Тэӧн».
Исуслӧн ордпу
(Мт. 1:1-17)
23Комын арӧссянь Исус пондіс кесъявны. Йӧзыс лыддисны Сійӧс Ӧсиплӧн пиӧн. Ӧсип вӧлі Илийлӧн пи, 24Илий – Маттатлӧн, Маттат – Левийлӧн, Левий – Мелкилӧн, Мелки – Яннайлӧн, Яннай – Ӧсиплӧн, 25Ӧсип – Маттафейлӧн, Маттафей – Амослӧн, Амос – Наумлӧн, Наум – Еслилӧн, Если – Наггайлӧн, 26Наггай – Маафлӧн, Мааф – Маттафейлӧн, Маттафей – Семейлӧн, Семей – Ӧсиплӧн, Ӧсип – Иудалӧн, 27Иуда – Йоаннанлӧн, Йоаннан – Рисайлӧн, Рисай – Зоровавельлӧн, Зоровавель – Шеалтиэллӧн, Шеалтиэл – Нирийлӧн, 28Нирий – Мелкилӧн, Мелки – Аддийлӧн, Аддий – Косамлӧн, Косам – Элмодамлӧн, Элмодам – Ирлӧн, 29Ир – Иосейлӧн, Иосей – Элизерлӧн, Элизер – Иоримлӧн, Иорим – Маттатлӧн, Маттат – Левийлӧн, 30Левий – Симеонлӧн, Симеон – Иудалӧн, Иуда – Ӧсиплӧн, Ӧсип – Ионанлӧн, Ионан – Элякимлӧн, 31Эляким – Мелеайлӧн, Мелеай – Маинанлӧн, Маинан – Маттафайлӧн, Маттафай – Нафанлӧн, Нафан – Давидлӧн, 32Давид – Ессейлӧн, Ессей – Овидлӧн, Овид – Воозлӧн, Вооз – Салмонлӧн, Салмон – Наашонлӧн, 33Наашон – Аминадавлӧн, Аминадав – Рамлӧн, Рам – Хецронлӧн, Хецрон – Пареслӧн, Парес – Иудалӧн, 34Иуда – Яковлӧн, Яков – Исааклӧн, Исаак – Ӧвраамлӧн, Ӧвраам – Терахлӧн, Терах – Нахорлӧн, 35Нахор – Серуглӧн, Серуг – Рагавлӧн, Рагав – Пелеглӧн, Пелег – Эверлӧн, Эвер – Шелахлӧн, 36Шелах – Кенанлӧн, Кенан – Арфаксадлӧн, Арфаксад – Симлӧн, Сим – Нойлӧн, Ной – Ламеклӧн, 37Ламек – Метушаллӧн, Метушал – Еноклӧн, Енок – Яредлӧн, Яред – Махалалеллӧн, Махалалел – Кенанлӧн, 38Кенан – Енослӧн, Енос – Сифлӧн, Сиф – Адамлӧн, Адам – Енлӧн.
अहिले सेलेक्ट गरिएको:
Лука 3: КБ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
(c) Institute for Bible Translation, Finland, amp Finnish Bible Society, 2023
