Лука 19

Вот перйысь Заккей

1Ериконӧ воӧм бӧрын Исус муніс кар пырыс. 2Сэні оліс Заккей нима озыр морт, вот перйысьяслӧн юралысьыс. 3Сійӧ ёна кӧсйис аддзывны Исусӧс да тӧдмавны, коді Сійӧ сэтшӧмыс. Но ичӧт тушаыс вӧсна йӧз сайсянь Заккейлы нинӧм эз тыдав. 4Заккей котӧртіс водзӧ да кавшасис пу вылӧ, медым аддзыны Исусӧс. Буретш сійӧ туйӧдыс вӧлі локтӧ Исус. 5Пу весьтӧ воигӧн Исус видзӧдліс вывлань, аддзис Заккейӧс да шуис: «Заккей, лэччы ӧдйӧджык. Талун Меным колӧ лоны тэ ордын».

6Заккей тэрмасьӧмӧн лэччис. Сійӧ долыдпырысь сибӧдіс Исусӧс гортас. 7Тайӧс аддзылысьяс шуасисны, мыжа морт ордӧ пӧ муніс. 8Заккей сувтіс да шуис: «Господьӧй, овмӧслысь джынсӧ сета гӧльяслы, а кодлысь ылӧдлӧмӧн босьті, сылы нёль пӧвстӧн бӧр бергӧда». 9Исус шуис сылы: «Талун воис мездмӧм тайӧ керкаас, ӧд тайӧ мортыс тшӧтш Ӧвраам пи. 10Морт Пи локтіс корсьны да мездыны вошӧмаӧс».

Зарни сьӧм йылысь велӧданвисьт

(Мт. 25:14-30)

11Заккей керкаын кывзысьяслы Исус висьталіс нӧшта ӧти велӧданвисьт, ӧд Сійӧ вӧлі Ерусалимсянь матын, и унаӧн чайтісны, мый регыд нин воас Енлӧн Юралӧмыс.

12Исус висьталіс: «Ӧксы рӧдысь ӧти морт мӧдӧдчас ылі муӧ, медым сэні ӧксы ним босьтны да бӧр локны аслас муӧ ӧксыӧн. 13Сійӧ корас ас дорас дас кесйӧгӧс, быдӧнлы сетас зарни сьӧм да шуас: ”Менам локтӧдз тайӧ сьӧмсӧ уджӧ бергӧдӧй”. 14Ас войтырыслы тайӧ мортыс вӧлі мустӧм, та вӧсна бӧрсяньыс найӧ мӧдӧдасны юӧртысьясӧс висьтавны, огӧ пӧ кӧсйӧй, медым сійӧ вӧлі миян ӧксыӧн.

15Ӧксыӧн локтӧм бӧрын сійӧ тшӧктас корны кесйӧгъяссӧ, кодъяслы сетліс сьӧмсӧ. Кӧсъяс тӧдмавны, уна-ӧ найӧ содтӧд босьтісны. 16Ӧти локтас да шуас: ”Ыджыдӧй, тэнад зарни сьӧмыд вайис содтӧд дасӧс”. 17Ӧксы шуас: ”Бура вӧчин. Тэ бур кесйӧг. Ичӧтторйын тэ эскана вӧлін, дас карӧн веськӧдлыны кутан”. 18Локтас мӧд кесйӧг да шуас: ”Ыджыдӧй, тэнад зарни сьӧмыд вайис содтӧд витӧс”. 19Сылы ӧксы шуас: ”Вит карӧн веськӧдлыны кутан”.

20Локтас коймӧд кесйӧг да шуас: ”Ыджыдӧй, со, тэнад сьӧмыд, чышъянӧ гартыштӧмӧн видзи сійӧс. 21Ме полі тэысь, тэ ӧд чорыд морт: босьтан, мый эн пуктывлы, да вундан, мый эн кӧдзлы”. 22Ӧксы шуас сылы: ”Шогмытӧм кесйӧг! Аслад кывъясыд серти ме мыжда тэнӧ. Тэ тӧдін, мый ме чорыд морт, босьта, мый эг пуктывлы, да вунда, мый эг кӧдзлы. 23Мыйла сьӧмчукӧртанінӧ эн пукты менсьым сьӧмӧс? Сэки локтӧм бӧрам ме эськӧ содтӧдӧн босьті”.

24Ӧксы шуас сыкӧд сулалысьяслы: ”Мырддьӧй сылысь сьӧмсӧ да сетӧй дас сьӧмаыслы”. 25Найӧ шуасны: ”Ыджыдӧй, сылӧн эм нин дас сьӧмыс”. 26Ӧксы шуас: ”Висьтала тіянлы: кодлӧн эм, сылы сетасны. Кодлӧн абу, сылысь бӧръясӧ босьтасны. 27Менӧ мустӧмтысьясӧс, менам юралӧмлы паныд сувтысьясӧс вайӧдӧй татчӧ да виӧй найӧс менам син водзын”».

Исус пырӧ Ерусалимӧ

(Мт. 21:1-11; Мк. 11:1-11; Ин. 12:12-19)

28Тайӧс висьталӧм бӧрын Исус мӧдӧдчис Ерусалимлань. 29Сійӧ воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн 30Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ. 31Юаласны кӧ, мыйла разянныд, вочавидзӧй, мый сійӧ колӧ Господьлы».

32Мӧдӧдӧмаяс мунісны да аддзисны, мый ставыс вӧлі Исуслӧн висьталӧм серти. 33Том осёлӧс разиганыс видзысьыс юаліс: «Мыйла разянныд?» 34Велӧдчысьяс вочавидзисны: «Сійӧ колӧ Господьлы».

35Том осёлӧс вайӧдісны Исус дінӧ, шлапкисны осёл вылӧ паськӧмнысӧ да отсалісны Исуслы пуксьыны. 36Кор Исус муніс осёл вылын, йӧзыс вольсавлісны паськӧмнысӧ туй вылас.

37Кор Исус матыстчис Олив керӧсысь лэччанінӧ, став Сылӧн велӧдчысьыс кыпыда да гораа пондісны ошкыны Енмӧс став аддзылӧм шензьӧданаторсьыс. 38Найӧ шуалісны:

– Бурсиӧма Господь нимӧн локтысь Ӧксыӧс!

Лӧнь олӧм енэжын,

ошкӧм Медвылыссалы!

39Йӧз чукӧрысь фарисейясысь кодсюрӧ шуисны Исуслы: «Велӧдысь, ӧлӧд велӧдчысьястӧ!» 40Исус воча шуис: «Висьтала тіянлы: найӧ кӧ ланьтасны, изъяс шыасясны».

41Ерусалимлань матыстчигӧн Исус видзӧдліс кар вылас да бӧрдӧмӧн 42шуаліс: «Тӧдін кӧ эськӧ тэ талун, мый вайӧ тэныд лӧнь олӧмсӧ! Ӧні тайӧ тупкыса тэнад синлы. 43Воас лун, кор тэнад вӧрӧгъяс лэптасны тэ гӧгӧр тымӧд, кытшаласны тэнӧ да быд боксянь дзескӧдасны. 44Тэнӧ жугӧдасны дзоньнас, олысьястӧ виаласны – из вылӧ из оз кольны, ӧд тэ эн кӧсйы тӧдны тэ дінӧ Енлысь волӧмсӧ».

Крамысь вузасьысьясӧс вӧтлалӧм

(Мт. 21:12-17; Мк. 11:15-19; Ин. 2:13-17)

45Исус пырис крамӧ да пондіс вӧтлавны сэтысь вузасьысь-ньӧбасьысьясӧс. 46Сійӧ шуис налы: «Гижӧма: ”Менам керкаӧй – кевмысян керка”. А ті сыысь лёк вӧчысьяслы дзебсянін вӧчинныд».

47Исус быд лун велӧдіс крамын. Аркирейяс, Индӧдӧ велӧдысьяс да веськӧдлысьяс кӧсйисны вины Сійӧс. 48Сӧмын эз тӧдны, кыдзи тайӧс вӧчны, ӧд став йӧзыс вешйывтӧг кывзісны Исусӧс.

अहिले सेलेक्ट गरिएको:

Лука 19: КБ

हाइलाइट

शेयर गर्नुहोस्

कपी गर्नुहोस्