Иоан 7
7
Исус йылысь вензьӧм
1Та бӧрти Исус ветлӧдліс Галилеяті. Иудея муӧд Сійӧ эз кӧсйы ветлӧдлыны, ӧд иудейяслӧн веськӧдлысьяс кӧсйисны вины Сійӧс.
2Матыстчис иудейяслӧн гажӧдчан кад, Чом вӧчан лунъяс. 3Исуслӧн вокъясыс шуисны Сылы: «Эн кольччы татчӧ, мун Иудея муӧ, медым велӧдчысьясыд тшӧтш аддзасны Тэнсьыд уджъястӧ. 4Мортыс кӧ кӧсйӧ, медым тӧдісны сы йылысь, сійӧ оз кут дзебны ассьыс уджъяссӧ. Тэ сы ыджда уджъяс вӧчан, сідзкӧ, петкӧдчы йӧзыслы». 5Исуслӧн вокъясыс эз эскыны Сылы. 6Исус шуис налы: «Менам кадӧй эз на во, а тіянлы быд кад лӧсялӧ. 7Тіянӧс йӧзыс оз мустӧмтны, а Менӧ мустӧмтӧны, ӧд Ме висьтала, мый налӧн уджъясыс лёкӧсь. 8Ті мунӧй гажӧдчанінас, а Ме ог на мун, ӧд Менам кадӧй эз на во». 9Тайӧс шуӧм бӧрын Исус кольччис Галилеяӧ. 10Но кор вокъясыс мунісны гажӧдчанінӧ, Исус тшӧтш муніс сэтчӧ гусьӧн.
11Иудейяслӧн веськӧдлысьяс корсисны Исусӧс гажӧдчанінысь, юасисны, кӧні Сійӧ. 12Йӧз пӧвстын унаӧн вензисны Сы йылысь. Ӧтияс сёрнитісны, Сійӧ пӧ бур, мӧдъяс шуисны, Сійӧ пӧ ылӧдлӧ йӧзсӧ. 13Но йӧзыс сёрнитісны Исус йылысь гусьӧн, ӧд найӧ полісны иудейяслӧн веськӧдлысьясысь.
14Гажӧдчан кад шӧрас Исус пырис крамӧ да кутіс велӧдны. 15Иудейяслӧн веськӧдлысьяс шензисны: «Кытысь Сійӧ велӧдчытӧгыс тӧдӧ Гижӧдъяссӧ?» 16Исус вочавидзис: «Менам велӧдӧмӧй абу Месянь, но Менӧ Мӧдӧдысьсянь. 17Коді кӧсйӧ вӧчны Ен кӧсйӧм серти, сійӧ тӧдмалас, Енсянь-ӧ тайӧ велӧдӧмыс, либӧ Ассянь Ме висьтала. 18Коді ассяньыс висьталӧ, сійӧ аслыс ошкӧмсӧ корсьӧ. Коді тӧждысьӧ, медым ошкӧмыс вичмис Сійӧс Мӧдӧдысьлы, Сійӧ збыльсӧ висьталӧ да оз ылӧдчы. 19Эз-ӧ Мӧисей сет тіянлы Индӧдсӧ? Но некод тіян пиысь оз ов Индӧд сертиыс. Сідзкӧ, мыйла кӧсъянныд Менӧ винысӧ?»
20Йӧзыс шуисны: «Пеж лов Тэ пытшкын! Коді кӧсйӧ Тэнӧ винысӧ?» 21Исус вочавидзис: «Ме вӧчи ӧтитор, и ті ставныд шензянныд. 22Мӧисей тшӧктіс тіянлы вундыштчыны. Дерт, тайӧ тшӧктӧмыс абу Мӧисейсянь, а батьяссяньныд. Ті весиг шойччан лунӧ вундыштанныд мортсӧ. 23Ті кӧ вундыштанныд мортсӧ шойччан лунӧ, медым эз ло торкӧма Мӧисейлысь Индӧдсӧ, сідзкӧ, мыйла Ме вылӧ скӧраланныд, Ме кӧ дзоньнас мортсӧ бурдӧді шойччан лунӧ? 24Энӧ мыждӧй чужӧм вылӧ видзӧдӧмӧн, а мыждӧй веськыда».
25Кодсюрӧ ерусалимсаяс пӧвстысь сёрнитісны: «Абу-ӧ тайӧ сійӧ Мортыс, кодӧс вины кӧсйӧны? 26Сійӧ сёрнитӧ восьсӧн, и некод весиг оз ӧлӧд Сійӧс. Гашкӧ, юралысьяс збыльысь Сійӧс Кристос туйӧ пуктӧны? 27Ми тӧдам, кытысь тайӧ Мортыс. А кор локтас Кристос, некод оз кут тӧдны, кытысь Сійӧ».
28Крамын велӧдігӧн Исус гораа шуис: «Ті тӧданныд Менӧ, и тӧданныд, кытысь Ме. Ме локті эг Ассянь. Менӧ мӧдӧдіс Сійӧ, коді эм Збыльыс. Ті Сійӧс онӧ тӧдӧй, 29а Ме тӧда, ӧд локті Сы дорысь. Сійӧ мӧдӧдіс Менӧ». 30Сэки кӧсйисны кутны Исусӧс, но некод эз лысьт инмӧдчыны Сы дінӧ, ӧд Сылӧн кадыс эз на во. 31Йӧз пӧвстысь унаӧн эскисны Исуслы. Найӧ сёрнитісны: «Кор локтас Кристос, Сійӧ ӧмӧй тайӧ Мортыс дорысь унджык шензьӧданаторсӧ вӧчас?»
32Кор фарисейяс кылісны Исус йылысь татшӧм сёрнисӧ, аркирейяскӧд ӧтвыв найӧ мӧдӧдісны крам видзысьясӧс кутны Исусӧс. 33Исус шуис налы: «Ме ог нин дыр ло тіянкӧд, регыд муна Менӧ Мӧдӧдысь дінӧ. 34Ті кутанныд корсьны Менӧ, но онӧ аддзӧй. Кӧні Ме лоа, сэтчӧ ті онӧ вермӧй локнысӧ».
35Иудейяслӧн веськӧдлысьяс ас костаныс сёрнитісны: «Кытчӧ Сійӧ кӧсйӧ мунны, мый огӧ вермӧй аддзыны Сійӧс? Оз-ӧ кӧсйы мунны миян йӧз дінӧ, кодъяс олӧны грек войтыр пӧвстын? Оз-ӧ кӧсйы грек войтырӧс велӧдны? 36Кыдзи гӧгӧрвоны Сылысь кывъяссӧ: ”Ті кутанныд корсьны Менӧ, но онӧ аддзӧй. Кӧні Ме лоа, сэтчӧ ті онӧ вермӧй локнысӧ”?»
37Бӧръя медыджыд гажӧдчан лунӧ Исус сувтіс да гораа шуис: «Кодлӧн горшыс косьмӧ, мед локтӧ Ме дінӧ да юӧ! 38Коді эскӧ Меным, сылӧн пытшкӧссьыс визувтасны ловъя валӧн юяс. Тадзи висьталӧ Гижӧдыс». 39Исус висьталіс тайӧс Лов йылысь, кодӧс сибӧдасны Сылы эскысьяс. Налы абу на вӧлі сетӧма Вежа Ловсӧ, ӧд Исуслӧн дзирдлуныс эз на воссьы.
40Тайӧ кывъяссӧ кылӧм бӧрын йӧз пӧвстысь унаӧн шуалісны: «Сійӧ збыльысь пророк». 41Ӧтияс шуисны: «Тайӧ Кристос». Мӧдъяс сёрнитісны: «Локтас ӧмӧй Кристос Галилеяысь? 42Оз ӧмӧй висьтав Гижӧдыс, мый Кристос петас Давид вужйысь, Виплием карысь, кытысь вӧлі Давид?» 43Тадзи йӧзыс кутісны вензьыны Сы йылысь. 44Кодсюрӧ кӧсйисны кутны Исусӧс, но некод эз лысьт инмӧдчыны Сы дінӧ.
45Исусӧс кутны мӧдӧдлӧмаяс бӧр локтісны аркирейяс да фарисейяс дінӧ. Найӧ юалісны: «Мыйла ті энӧ вайӧдӧй Сійӧс?» 46Мӧдӧдлӧмаяс вочавидзисны: «Тайӧ Мортыс моз некод на эз сёрнитлы». 47Фарисейяс шуисны налы: «Гашкӧ, тіянӧс тшӧтш ылӧдліс да? 48Эскӧ ӧмӧй Сылы кодкӧ юралысьяс да фарисейяс пӧвстысь? 49Но йӧзыс оз тӧдны Индӧдсӧ, найӧс ставнысӧ ёрӧма». 50Никодим нима фарисей, коді войнас воліс Исус дінӧ, шуис аркирейяслы да фарисейяслы: 51«Миян Индӧд серти позьӧ ӧмӧй мыждыны мортсӧ, оз кӧ медводз кывзыны сійӧс да тӧдмавны, мый сійӧ вӧчис?» 52Сылы вочавидзисны: «Гашкӧ, тэ тшӧтш Галилеяысь? Лыддьы Гижӧдсӧ да тэ аддзан, мый Галилеяысь пророкыд оз лок».
53Тайӧ сёрни бӧртиыс ставныс разӧдчисны гортаныс.
अहिले सेलेक्ट गरिएको:
Иоан 7: КБ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
(c) Institute for Bible Translation, Finland, amp Finnish Bible Society, 2023
