মার্ক 12
12
মাৎকম বাড়গী রাঃআ দৃষ্টান্ত। মথি 21:33-46; লুকা 20:9-19
1ইনা তায়্ম যীশু দ দৃস্টান্ত উডু কাতে ইঙ্কূ য়া হান্ডে থুতি জাগারেৎ আয়, মিয়াৎ হড় দ্রাঃআক্ষাবাইদ রাঃআ গটা কাতা বাড়গি এসেৎ কেৎআয়, দ্রাঃআক্ষা রস পিশা নাতিনাং খানা মিয়াৎ উর কেৎআয়, হেৎদ মিয়াৎ গাদা সাল্গী অড়াঃআ বাই কেৎআয়; হেৎদ চাষী কুরাঃআ তিহিরে সম্পা কাতে এটাআ দিসুমেতে সেএনায়।
2 ইনা তায়্ম চাষী কুরাঃআ হান্ডে হাতেৎ দ্রাঃআক্ষা বাইদ রাঃআ দ্রাঃআক্ষা জ আয়ায়্য় ভাগ নাম নাতিনাং দ্রাঃআক্ষা ইর সময় আয়ায়্য় মিয়াৎ মুনিসকে কুলকিআয়।
3 চাষীকুদ হানিকে বেষলেকা পাহারাঃআ কাতে এখেন তিহিতে কু কুল গিডি কিয়ায়্য়্,
4 অটহঅ গে মালিকদ চাষী কুরাঃআ হান্ডে অটঃ মিয়াৎ মুনিস কেয় কুল কিয়ায়্য়্য়। ইঙ্কূ দ ইনি রাঃআ বহ দাল পাড়া কেৎআ কু, হেৎদ মান হানি কিয়াকু।
5 ইনা তায়্ম অটহঅ অটঃ মিয়াৎ মুনিস কেয় কুল কিয়ায়, চাষী কুদ ইনিকে গচ কিয়াকু; হেৎদ অটহঅ হ্যাংকুয়ায়্য় ভীতির হাতে অকয় কেৎ দাল তল, অকয় কুকে দ গচ কেৎ কুয়াকু।
6 মালিক রাঃআ অটঅ মিহুড় গেয় তাহি লেনায়, ইনি দ আয়ায়্য় দুলাড়ি হন; ইঙ্কুয়া হান্ডে কুল নাতিনাং যাহায় বানুকুয়া, এন্খান গে মুচাৎ রে ইনি চাষী কুরাঃআ হান্ডে নিজ হন তেৎ কেগে কুল কিচ্যায়, গাম কেৎআয়, ইঙ্কূ ইঞা হনকে মানা বাতায়াকু।
7 মেন্খান চাষী কু দ আকু আকু কু থুতি জাগারেনা, হিঁই গে মা উত্তরাঃআ ধিকারী দেলা হিজু পে আবু হিঁই কে গ্চিয়াবু, ইন্খান্গে নিয়া কুরাঃআ আইদারি আবুয়াগে হযুয়া।
8 ইনা তায়্ম ইনিকে স্যাপ কাতে কু গচ কিয়ায়্য়, হেৎদ দ্রাঃআক্ষা বাইদ রাঃআ বাহার তে কু লেব্দা গিডি কিয়ায়।
9 ইনা দ্রাঃআক্ষা বাইদ রেনিচ মালিক কিনা আ চিকায়ায়্য় ? মালিক হিচ্ কাতে ইঙ্কূ চাষী কুকে বিনষ্ট কুয়ায়্য় , হেৎদ বাইদ এটা হড়কুকে এমা কুয়ায়্য়।
10 আপে দ চি নিয়া রিলামালা সাস্ত্রীয় বচন কাপে পড়াকানা,
'অকা ধিরি ধিরিগাথ্নিকু বাগী তুকা লাআ,
ইনাটা গে কচা রাঃআ মারাঃআং ধিরি মেন্তে হযুএনা।
11 নিয়াদ প্রভু হতেৎ হয়েনা,
নিয়া দ আবুয়া দৃষ্টি হাতেৎ অদ্ভৎ ? সংগীত (দুরাঃআং মালা) 118:23
12নিয়া উপমা গাম নাতিনাং ইঙ্কূ যীশু কে সাব রাঃআ কুরুমুটু কেৎআকু, মেন্খান হড় কুকে বরয়াত কুয়াকু, চিয়া চি ইঙ্কূ কু সারি নাম লাআ যীশুদ ইঙ্কূ য়া বাব্ত্তে ইনা দৃষ্টান্ত গাম লাত্যায়, ইনা তায়্ম যীশু কে বাগী কাতে কু নিরেনা।
'কৈয়্সরকে বুটি এম বাব্ত্তে চেচেদ ' মথি 22:15 -22; লুকা 20:20 -26
13ইনা তায়্ম জিহুদী লাউড়িয়া কথক হড় ফরিসী হেৎদ হেরদিয়কে যীশু রাঃআ হান্ডে কুল কিইয়ায়, যাতে ইঙ্কূ যীশু কে থুতি রাঃআ জল রেকু ঝালি কাতে সাব দাড়িয়াকা আ।
14ইঙ্কূ হিচ্ কাতে যীশু কেকু কুলি কিয়ায়্য়, গুরু আলে সারিয়ালে আম দ সৎ হেৎদ যাহায় রাঃআ বর তে হঃঅ বানু মেয়া; চিয়া চি আবেন দ মান্মি রাঃআ ব্যবস্থা লেকা কাবেন করাঃআৎআ, মেন্খান সার্তি লেকা তেগে ঈস্বর রাঃআ হরাঃআ বাব্ত্তে চেদেৎ কুয়াবেন, আচ্ছা গামেম মহিন কৈসরকে বুটি এম লাক্তি চি ল্হয় ?
15আলে বুটি এমেয়ালে চি কালে এমেয়া ? যীশু ইঙ্কূ য়া ক্প্টিয়া মন আটকার নাম কাতে গামাৎ কুয়া, চিয়া আ ইঞ কেপে বিডাঞ তানা ? মিয়াৎ সিকি আনা আগু য়াঞপে, কাউডি নেলেয়াঞ।
16ইঙ্কূ কাউডি কু আগু কেৎআ; যীশু ইঙ্কূ কে কুলি কেৎ কুয়ায়্য় , নিয়া ছাপ হেৎদ নিয়া নুতুম অকয় রাঃআ ? ইঙ্কূ কু গাম রুয়াড় কেৎআ, কৈসর রাঃআ।
17যীশু ইঙ্কূ কে গামঅৎ কুয়ায়্য় , অকাকু কৈসর রাঃআ, ইনা কুদ কৈসর কেগে এমাই পে, হেৎদ অকাকু ঈশ্বর রাঃআ ইনাকুদ ঈশ্বর কে এমাইপে। ইন্তং ইঙ্কূ ইনি রাঃআ বাব্ত্তে খুঠিন্কু হাহাড়ায় না
বিরিৎ রুয়াড় হেৎদ হানাপুরি বাব্ত্তে চেচেদ। মথি 22:23 -33; লুকা 20:27-40
18ইনা তায়্ম স্দ্দুকি কু যীশু রাঃআ হান্ডে হিচেনা কু, হেৎদ যীশু কে কু কুলি কিইয়া, মান্মি কু গামেয়া গচ হাতে বিরিৎ রুয়াড় বায়ানা,
19ইঙ্কু যীশু রাঃআ হান্ডে হিচ্ কাতে কু কুলি কিয়ায়, গুরু মুশি দ আলেয়া নাতিনাং অল লায়ায়্য়,যাহায় রাঃআ হাগা ইরাঃআকে বাগী কাতে গচ ভেগার য়ায়্য়, হেৎদ আয়ায়্য় হন হপন বানুকুয়া, ইন্খান হানি রাঃআ হাগা হানি রাঃআ এরাঃআ কে তুতাম কাতে হাগা নাতিনাং পিড়ি সাব দ্যায় য়ায়্য়।
20খুব বেশ, ৭ হাগাকু তাহি লেনা; মারাঃআং হাগা মিয়াৎ কুড়ি হন কে দুতাম কিয়ায়্য়, হেৎদ হন হপন কাকু য়ুই কাতেগে গ্চেনায়।
21ইনাতায়্ম এটা হাগা হানিকে দুতাম কিয়ায়্য়, হানি হঅ হন হপন কাকু য়ুই কাতেগে গ্চেনায়, ইনা তায়্ম রেনিচ হঅ এনে এঙ্কাগে হুইয়ে না।
22এনে এংকা লেকাতেগে ৭ হাগা হন হপন কাকু য়ুই কাতেগে গ্চেনাকু যত হাগা। জৎচ রাঃআ তায়্ম তে হানি বাহু হঅ গ্চেনায়।
23বিরিৎ রুয়াড় মাহারে, জত হড় কু বিরিৎ রুয়াড় লেন্খান, হানি এরাঃআ অকয় রাঃআ বাহু হ্যুয়ায়্য় ? ইঙ্কূ কুমাত ৭ হড় গেকু দুতাম লিয়ায়্য়।
24যীশু ইঙ্কূ কে গাম রুয়াড়াৎ কুয়ায়্য় , ইন্যাদ চি আপেয়া লুব্বা কারন ল্হয়, আপেদ চি কিনা আ শাস্ত্র পে সারিয়া, চি কিনাআ ঈশ্বর রাঃআ পরাঃআক্রম পে সারিয়া?
25 গচ কু হাতে বিরিৎ রুয়াড় তায়্ম হড়কুমা কাকু দুতাম-গংঙআ, সরগ রিঙ্কূ সরগ নাগা লেকাকু তাহিনা।
26 গচ কুরাঃআ হাতেৎ বিরিৎ রুয়াড় বাব্ত্তে গামাৎ কুয়ায়্য় য়, নিয়া বাব্ত্তে মুশি রাঃআ অল লেকা ঝোপ রাঃআ বৃত্তান্তে কাপে পড়া কানা? ঈশ্বর হানিকে চিল্কা গামালিচায়, ইনি গামালিয়ায়্য় 'ইঞদ আব্রাঃআহাম রাঃআ ঈশ্বর, ইসহাক রাঃআ ঈশ্বর হেৎদ যাকোব রাঃআ ঈশ্বর।
27 ঈশ্বরদ গচহড় কু রাঃআ ঈশ্বর ল্হয়, মেন্খান জিউৎ হড় কুরাঃআ। আপে কঠিন হরবর রেপে নুরেনা।
যত হাতে সরেস হুকুম। লুকা 10 : 25-28; মথি 22: 34 - 40
28হেৎদ কটাল কুরাঃআ ভীতির হাতেৎ মিৎ হড় ঠাইঞ তে হিচ্ কাতে হানিকে থুতি তেংড়া তিংড়ী আয়ুমেৎ কেনায়, হেৎদ যীশু হানিকে যথা যথ তেলা এম রুয়াড়া তিয়ায়্য় সারি কাতে, ইনিকে কুলি কিইয়ায়্য়, যত হুকুম হাতেৎ অকাটা মারাঃআংজ্ঞা ?
29 যীশু গাম রুয়াড় কেৎআ য়, মারাঃআং ঙআ দ নিয়া, এ খেরয়াল, আয়ুমেপে; আবুয়া ঈশ্বর প্রভু মিয়াৎ প্রভু;
30হেৎদ আম আমাঃ আ যত মনঅন্তর তে, আমাঃ আ পেরেচ জিউ তে, আমাঃ আ যত মন হেতৎদ আমাঃ আ যত দাড়ি তে আমাঃ আ ঈশ্বর প্রভুকে কুসিয়ায়েম ।
31দ্সারাঃআ দ নিয়া তানা 'আমাঃ আ হাতু হড় কুকে নিজ লেকা কুসিয়াকুম" নিয়া বারিয়া হুকুম হাতেৎ মারাঃআং জাহান আ বায়ানা।
32কটালকুদ ইনিকে কুলি কিয়ায়্য়, বুগিনগুর, আবেন সার্তিগেবেন গাম তাৎআ চিয়া চি ইনিদ মিয়াৎ গেয়ায়্য়, ইনি ছাড়া এটা যাহায় বানুকুয়া
33হেৎদ আম আমাঃআ যত মনঅন্তর তে, যত বুদ্ধি হেৎদ দাড়িতে আমাঃআ ঈশ্বর প্রভুকে দুলাড়িম হেৎদ হাতু হড় কুকে নিজ লেকা কুসিয়াকুদ যত হোম বলিদান হাতেৎ হঅ সরেস গেয়া।
34ইন্তং হানি আক্কেলবান লেকা তেলা এম্তাৎআয় যীশু আয়ুম কাতেৎ গামা কিইয়ায়, ঈশ্বর রাঃআ পরগনা হাতেৎ আম দ সাঙ্গীরে বানুমেয়া। ইনাতায়ম ইনিকে জাহান কুক্লি রাঃআ যাহায় রাঃআ সাহস কা য়ুই লেনা।
খ্রীস্ট অকয় রাঃআ হন তাহি লেনায় ? মথি 22:41 -46; লুকা 20:41 -44
35হেৎদ ধরম থানরে উপমা এম বেতরাঃআং যীশু প্রসঙ্গ কাতে গাম কেৎআয়, কটাল কু চিল্কা কাতেৎ গামেয়া কু, খ্রিস্ট দাউদ রাঃআ হন তানায় মেন্তে?
36 চিয়া চি দাউদ আচ নিজে গেত রিলামালা আত্মা রাঃআ ভরতে নিয়া জাগার লাঃআয়,
'প্রভুপরমেশ্বর ইঞআ প্রভুকে গামাকিয়ায়্য়,
আমদ ইঞআ ম্যাডি তিহি দররে দুপ্মে,
যাবৎ আমাঃ আ বাইরি আমাঃ আ কাটা
বুটাতে কাঞ আগু কুয়া। ইনাব্দি আম ইঞাঃআ মাডি তিহি কাতারে দুপ তাহিনাম।
37 দাউদ নিজে গে হানিকে প্রভুপরমেশ্বর গামাইয়ায়, তবে খান ইনি চিল্কাতে হানি রাঃআ হন হ্যুয়ানায় ? হেৎদ সাধারন হড় কু খুসিতে আয়ায়্য় জাগারকু আয়ুমেতৎ কেনা।
কটাল কু হাতে হুসিয়ার। মথি 23:1-36; লুকা 20:45 -47,
38 হেৎদ যীশু আয়ায়্য় উপমা রাঃআ লেকাতে ইঙ্কূ কে গামাৎ কুয়ায়্য় য়, কটাল কু রাঃআ হান্ডে হাতে হুসিয়ার, ইঙ্কূ হরেক জিলিং জিলিং কিচি তুসিং কাতে দাড়ান কু সেন আ,
39 হেৎদ হাট বাজার কুরে হড় কুকে মঙ্গল বাদ, জাহের থানরে মারাঃআং ডুবাআ হেৎদ ভোজরে বহ বহ জায়গা কুসিয়াকু।
40 নিকু হড়কু রাঃআন্ডি কু রাঃআ অড়া যত কু দ্খ্লেয়া, অটহঅ হড় দেখানি গাদা ঘাড়ি কু বিন্তিয়া, নিকুদ ধরবার মাহা রে গাদা কুড়াই কু নামেয়া।
রাঃআঁন্ডী বুডি রাঃআ দান। লুকা 21:1-4,
41হেৎদ যীশু দান ভান্ডার সামাং রে দুপ কাতে, চিল্কা হড়কু ভান্ডাররে কাউডি কু সম্বাৎ কেনা, ইনাকুই নেলেৎ কেনায়। ইন্তং গাদা কিসাড় কিসাড় হড় কু গাদা গাদা কাউডি কু এমেৎ কেনা।
42ইনা তায়্ম মিয়াৎ রেঙ্গেচ রাঃআন্ডি বুডি হিচ্ কাতে বারিয়া খুব হুডিঙ কাউদী ইনারে সম্বাকেৎআয়, অকারাঃআ মূল্য মিৎ সিকি আনা।
43ইন্তং যীশু আয়ায়্য় চেলা কু কে কাতারে রাঃআ হুন্ডি কাতে গামাৎ কুয়ায়্য় , ইঞ আপেকে সার্তি গেঞ গামা পে তানা, দান ভান্ডারে অকয় কু কাউদী কু সম্বাতাৎআ, ইঙ্কূ য়া জ্ত্চ রাঃআ হাতেৎ হিঁই রেঙ্গেচ রাঃআন্ডি বুডি জ্ত্চ হাতেৎ গাদা ডের এম্ তাআয়্য;
44 চিয়া চি এটা যত হড় আকুয়াআ বাড়তি সম্পদ হাতেৎ ইতিচ ইতিচ সম্পদ কু দহ তাৎআকু, মেন্খান হিঁই আয়ায়া অনটন তাহি কাতে রহ, বঞ্চা তাহি নাতিনাং অকাগে আয়ায়্য় তাহিলেনা, জ্ত্যাগে এম চাবা কেৎআয়্য়
अहिले सेलेक्ट गरिएको:
মার্ক 12: KTn
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
CC BY SA
