Matius 11
11
Yohanes maghag pelengehiropne ponekori, “Yesusag hail pururom,” aro nimi pogsiogha
(Lukas 7:18-35)
1Yesusti eldi yubu ka'ero neleptop nang aobare nang tanekoag, “Undo-undo ulamlulom,” aro komopto ambatsiogti, anekoa laplobi agha nhonag piog. Pioghag aneko as soro kalurop as ubu paiamek asag Allah yubu ambatto poa tongolamsiogti, tibin nembarelamsiog.
2Yesus aneko wamogpa, Yohanes maghag pelengehiropne ponekona, haing sae kaupto kop aeag tobongkibekpa wamog. Wamoghag anekoa nimiri Kristusti ulamogha sembe lelameka ka'ebaogti, Yohanesti eldi yubu ka'ero neleptop nang yopsiog. Yopsiogti Yesusag poglamsiogti, 3“A'un Yesusag pirumundi haibarurom nena, ‘Anna Allahri samenag, “Yalul,” aro salag pibogne poneko agha yaom to, amik nimi nhon yogne yalulne tibogto wamukap to?’ aro hail pururom,” aro pogsiogpa, hail pirek.
4Wene aro haibarekpa, Yesusti sinag samoro yubu lelamogti, “A'un samoro Yohanesag pirumundi, a'undi aori ka'elamdomne babe, haingdi ililamdomne babe ambatturom. Ambarel pururom nena, 5‘Nimi haing uropne kwelekto ililamang. Yan mali nimi yan ingiro palamang. Nimi kon tena pololamsil nimi kut talamang. Ao lepsirop nimi ao kuplamsil. Teptop nimi kamag talamang. Apna yubu walinge nimi saeagha orog nimiag ambatto palamla,’ aro ambarel pururom. 6Nimi etneri na Yesusti ulamnange sembe wa'ebanele kom tanena, nimi eneko wana awi uro wali wamlul,” aro ambatsiog.
7Sin samoro palamdek abeneko, Yesusti alniro nimi maikno longolamek nimi tanekoag Yohanes sembe ambarelamsiogti, “A'undi, ‘Sa'a ibukap,’ aro pai aldesag aneko pilum? ‘Phoanari pongoroba ko nhon pho alamoba, tara sip pang, tara sip yang ulamonge ibukap,’ aro pilum te? 8Undo kom aghana, a'un pilumne, ‘Sa'a ibukap,’ aro pilum? ‘Ag walinge agha enekto amog nimi ibukap,’ aro pilum te? Ag walinge enektop nimina, yubu sia lerop nimi ae nubungeag ua ulamang. 9Ane sembe a'un pilumne, ‘Sa'a ibukap,’ aro pilum? ‘Allah yubu silimu tiptopne ibukap,’ aro pilum te? Undop pagha tanena, otsik nari babe a'unag lelamnange, Allah yubu silimu tiptopne wamla. Ot Yohanes ponekona, el Allah yubu silimu tiptop nang ni anabiag agha el mo paliag uropne wamla. 10Yohanes sembe samenag nimi nhondi mome toro pibog nena,
‘Nari yubu poa ambatsirop nimi nhon an whingag pogneba,
an amik pinep ina an sembe yarelamlul,’
aro mome toro pairopne wamla.#Maleakhi 3:1
11Yubu sikne agha ambatnuahin. Mog so'o eneag mangap taek nimi ni anabiag agha Yohanes maghag pelengehiropne ponekori yubu ambatto tongolamlange nubu sirikti, el saogne nhon wamla kom. Aghana Imagneri saelba ulamsil nimina, ora nimiri sin nimi taneko sembe, ‘Nimi ene olog sirikne,’ sembahinep. Aghana Yohanes olog el umag wamlaba, Imagneri saelbamsil nimi taneko paliag nenelamsilba wamang. 12-13Yohanes maghag pelengelamsiogne poneko anam yan komag, Allah yubu silimu tiplamek nangdi yubuap, Musari aruksirop yubuap abeneko toman Allah yubu tipto ambarelamsieka kekman Yohanes yaog. Yohanesti alniro yubu ambarelamsiog ko'oag agha, wene babe sindi ambatsirop yubu enekoap sunul dalamlange toman Imagneri mog so'oag nimi saelbamsineba mikip uro peram talamlaba, wana yo urop nimiri, ‘Nuringe agha wamso,’ aro yo uro saelbamsiang. 14A'undi agha, ‘Sik sembahane,’ senelapmun tanena, ‘Elia yalul,’ aro salag pibog yubu eneko Yohanes yanepne sembe anamag lebog.#Maleakhi 4:5-6 15Aori ka'ebalomne nene nimi niri seneragto saelbamlulom.
16Nimi wene wamang ko'o eneag nimina, wela saog nimiag sunumna tol pina sumbahinun? Sinna nimiri kamna toro longorobag olog mabo puka urop mabo saog wamang. Wharo pulamangdi, yog nimiag yoplamsiangdi,
17‘Nu ma'i lom toman pho aro sunukna sunuklamap aghana,
a'un sepna seplom kom.
Nu engenange lelamap aghana,
engena engkalom kom,’
aro walamsiloa saog wamang.
18Nari wene alamnange tam nene sembe. Yohanes yaog nena, kwaneng ten koma ulamogti, mag yonge tero koma wamogpa, nimi tanekori, ‘Phia yonge el kulomag wa'ioba ulamla,’ aro waro lelamong. 19Na Yesus mog so'oag nimi tahingena, kwaneng mag tero yalamsi aghana, nimi tanekori yubu lelamangdi, ‘Kembahut! Elna kwaneng kolag linne wamlari, mag yongeri wana toropne wamla. Elna Roma nimi sembe kamna poloro torop nangap, malia urop nimiap sikinkae wamla,’ aro waro lelamang. Waro lelamang aghana, wana hektop nimiri ul piropne kembandi, el tanep nena, ‘Wana heksiropne ponekori senenne sikne aghabog wamla,’ aro el tanep,” aro Yesusti ambatsiog.
Yahudi nimi as etpare wamek nimiri Yesusag seneraglamek komne sembe, “Seklebaukang,” aro ambatsiogha
(Lukas 10:13-15)
20Wene aro ambatsiogpa, sin samenag Yesusti ulamogha ibek nimi alniro wembahiog. Yesusti samenag as soro kalurop as nhon-nhonag wamogti, Allah mikibari uanepne maikno ulamog. As tanekoag wamek nimiri Yesusti ulamogha ibek aghana, sindam nimiri seneragto ulamekne lairo koma Allahri senenne saelbamek kom. Ane sembe Yesusti sin alniro wenelamsiog. 21Wenero ambarelamsiogti, “A'un as Khorazim nimiap, as Betsaida nimiap seklero wamlulom! Nari a'undi asag ulamnori, Allah mikibari uanepne ulamno aghana, a'undi Allahri senenne saelbamlom komdi, malia seneragto ulamlomne sae laplolamlom kom. Nari a'un whingag ulamnonge nimi sisa Yahudi kom nimi ua urop as Tirusap, as Sidonap nimi whingag uahane tanena, sin Yahudi sisa kom nimi aghana, samenag agha sindi malia uroba lipsiseng. Nari ulamnonge imneheng tanena, sindi wana ikin uro ag malinge wangaro hao pelagtahengdi, ‘Malia seneragto ulamobo aghana lipsiberi, Allahri senenne saelbaukap,’ aro uaheng. 22Aghana a'un el nenelamsin nena, amik Allahri, ‘Tam karebaneri opsinun,’ aro ikinne piple sum eneko, sin nimi sisa Yahudi kom nimi as Tirus nimiap, as Sidon nimiap sinag pairopne olog ikin. Aghana a'un Yahudi nimi as Khorazimap, as Betsaidaap wamlom nimiag ikin sirikne piplul. 23Apna a'un Yahudi nimi as Kapernaum wamlom nimiri seneraglamlom nena, ‘Nu as Kapernaum nimi alikinag nenelamsileri, imag nembahilul,’ senelamlom te? A'un paliag nenero imag nembahilul kom. Aghana a'unna, teptop nimi ua urobag pelengkahilul. Nari a'un whingag Allah mikibari uanepne ulamnonge as Sodom nimi whingag uahane tanena, sin malia uroba lipsisengba, Allahri opsiso komba, wene babe wamnep. 24Aghana a'un el nenelamsin nena, amik Allahri, ‘Tam karebaneri opsinun,’ aro ikinne piple sum eneko, sin Sodom nimiag pairopne olog ikin. Aghana a'un as Kapernaum wamlom nimiag ikin sirikne piplul,” aro ambatsiog.
“Nanag yamundi, tektek papto wamlulom,” aro ambatsiogha
(Lukas 10:21-22)
25-26Sum eneko Yesusti yubu lelamogti, “Nani, imap so'oap Saelba Ulamlamne, nari an omeklangken. Andi seneraglamlamne, ‘Sin ekon urop nimiag tognoroba lag nembatsinunne wali,’ senelamlumne sunsunum uro sin mome lerop komdi, ekon urop nimiag lag nembarelamsilam. Andi samenag tognobalumne wene sindi ililamongdi, el taong aghana, ora nimi wana hektop nimiap mome lero el taong nimiap tanekoag lag nembarelamsilam kom. Ot sin me ologne saog uro wamang nimiag lag nembarelamsilam. Ane sembe wana awi uro omeklangken!” aro omekto kibog.
27Wene seogti, Yesusti nen tipto yubu lelamogti, “Nani Allahri nia mangkina nari saeag nembaog. Nimi nhon babe el mori, Allah Elme el wamnep kom. Ot Nani Allah mo el wamla. Apna nimi nhondi babe Nani Allah el wamnep kom. Ot Allah Elme mo el wamnep. Na Elmeri nimiag, ‘Nani Allah sembe sinag lag nembatsinun,’ aro wepsine taneogna, nimi eneko babe el wamnep.
28A'un ikinne poro ulamlomba, nong pesa wamsil nimi ni nanag yalulom. Nanag yamunba, nari a'unag wana aingnibahineba, tektek papto wamlulom. 29Na wana maropne wamnari, win-win aro ulamna. Ane sembe, nari yubu amohiropne a'undi sa'oag pimneba, nanag agha el talapmundi, a'un wana aingnibahileba, tektek papto wamlulom. 30Nari yubu amohiropne a'undi sa'oag pimnunne, wana wali uro amolamsinun. A'undi na sembe ul palapmunne keyagman nembaneba, ul palamlulom,” seog.
अहिले सेलेक्ट गरिएको:
Matius 11: kklKOS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023 (Active), Wycliffe Bible Translators, Inc. All rights reserved.
