Matius 25
25
Kapalendano doompulu kalambe
25:1-13
1“Nahumato wakutuu anaꞌa, Kafopahintaꞌano Lahataꞌala tapedamo doompulu kalambe, deala bhe kantaleando maka dokala dosumpui loꞌia buꞌou. 2Lidimano dokabhohe-bhohe, lidimano dopande. 3Kalambeꞌi kabhohe-bhoheno naꞌa dewowoꞌo kantalea tamaka miina daewowoꞌo bhe minando so katubhano. 4Kalambeꞌi mandeno dewowoꞌo kantalea pakade dewowoꞌo dua bhe minando ne kaenteiꞌa sigaoꞌano. 5Gahaꞌa loꞌia buꞌou miina napikihatoa, tadempau sampe dofisiodo-odoꞌamo.
6Nofewuntaꞌi alo notifetingkemo suaha nekei-kei ambano, ‘Aituꞌaemo! Loꞌia buꞌou nohatomo! Sumpuiꞌeomu!’ 7Kalambe ompuluno naꞌa lasao dowanu maka dofekataaꞌi kantaleando. 8Kalambeꞌi kabhohe-bhoheno naꞌa dopugaumo ne kalambe mandeno ambado, ‘Waꞌa kainsamiomu bhe insaodi minamiu itu naseendai, ingka kantalea mani maꞌomo naopeo.’ 9Tamaka kalambe mandeno tadotobhoosi, ‘Paise, bhahaa pae nakumapo so wuto mani bhe so hintimiu. Labhiꞌano kala meꞌoliomu we mahaasono.’
10Nandoo tangasano dokala deꞌoli mina, loꞌia buꞌou nohatomo. Toka mantaa-ntaano lasao dopesua weo lambu kahame-hameꞌa, dopoowa-owa bhe loꞌia buꞌou naꞌa. Pada aitu fointo doꞌontoemo. 11Gahaꞌa domaimo dua kalambeꞌi kabhohe-bhoheno saꞌituini, dofeabha ambado, ‘Waompu, lengka kainsami fointo!’ 12Tamaka loꞌia buꞌou naꞌa tanopugau ambano, ‘Amohatokoomu, kotu-kotuꞌu miina amandeꞌaangkoomua.’ 13Dadiꞌanomo kodhagaomu, kapaꞌamo miina mandeꞌaaneomua oleono bhe tempono.”
Kapalendano dototolu bhatua
25:14-30
Luk 19:12-27
14“Kafopahintaꞌano Lahataꞌala tapedamo seemie kafeompuꞌa so kumalano we koliwuno. Nakumala kaowu nosaliꞌimo bhatuaꞌino maka noposahunaꞌaanda daꞌumondofao kanandoono. 15Seemieno nowaꞌane lima kakadu dhoi bulawa, #25:15 Sakotuꞌuno: talenta. seemieno nowaꞌane haa kakadu bhe seemieno nowaꞌane sekakadu, noposahataa bhe nepoo-poolindo seemie-seemie. Pada anaꞌa nokalamo. 16Bhatua metahimano dhoi lima kakadu naꞌa lasao nokala nopodagaane sampe nokolabaꞌao dua lima kakadu dhoi bulawa. 17Bhatua metahimano haa kakadu nehabu dua peda naꞌa sampe nokolaba dua haa kakadu. 18Tamaka bhatua metahimano sekakadu kaowu lasao nokala neseli wite maka nokantano dhoino kafeompuꞌano maitu.
19Nompona pada anaꞌa, kafeompuꞌando nosulimo nopolentu bhe bhatuaꞌino. 20Nomaimo bhatua metahimano lima kakadu naꞌa nowowoꞌo dua bhe labano lima kakaduno. Nopugaumo ne kafeompuꞌano ambano ‘Waompu, lima kakadu waꞌa kanau. Aini akolabaanemo dua lima kakadu.’ 21Ambano kafeompuꞌa naꞌa, ‘Nokesa sepaliꞌa itua, hintu bhatua metaano bhe tumuhuno lalo. Notuhu lalomu ne taka mohobu, maka amosahunaꞌaangkomo taka bhalano. Pesuamo weo hame-hameku, pehapiꞌo dua bhe hintu kaꞌiaku ini.’ 22Nomaimo dua bhatua metahimano haa kakadu, ambano, ‘Waompu, haa kakadu waꞌa kanau. Aini akolabaanemo dua haa kakadu.’ 23Ambano kafeompuꞌa naꞌa, ‘Nokesa sepaliꞌa itua, hintu bhatua metaano bhe tumuhuno lalo. Notuhu lalomu ne taka mohobu, maka amosahunaꞌaangkomo taka bhalano. Pesuamo weo hame-hameku, pehapiꞌo dua bhe hintu kaꞌiaku ini.’
24Kaowu nomaimo bhatua metahimano sekakadu bhe nopugau ne kafeompuꞌano, ‘Waompu, apandeꞌaane hintu mie moꞌosano lalo. Otobhe ne kaampo pata kaeꞌewiꞌamu, okape ne kaampo pata kamontisaꞌamu. 25Dadiꞌanomo aoteꞌi sampe dhoimu sekakaduno ini akantanoe. Aini sulimo alaꞌao wutomu.’ 26Nopugaumo kafeompuꞌa naꞌa, ‘Hintu ini bhatua modai bhe mantawano! Ingka pandeꞌaanemo atobhe ne kaampo pata kaeꞌewiꞌaku, akape ne kaampo pata kamontisaꞌaku. 27Feꞌemo dhoiku itu moadae ne mie so mefowaweno dhoi, neanomo sasuliku, atumahimae bhe oeno. 28Dadiꞌanomo alaeꞌomu dhoi sekakaduno maitu maka waꞌaneomu kodhoino ompulu kakaduno saꞌituini. 29Kapaꞌamo kokanandoono datumubhahiane ampa napontalabhi-labhi, tamaka tapa kokanandoono, o ae maka dua kanandoono damadae damalaꞌie. 30Bhatua tapa kofahalaa itu, ohoeꞌomu we simbali, weo doloma mposo. Ne naꞌa taꞌo kangkoꞌae bhe kuꞌino wangka.’ ”
Kabhotusi ne Oleono Kiama
25:31-46
31“Ane namai kaowu Anano Manusia weo kakalabhiano napoowa-owa bhe kosasawindo malaꞌekatino, maka naengkoha-ngkoha te kaengkohaꞌano kumalabhiano. 32Kosasawindo bansano liwu datihompu te wiseno maka napofelesaanda, pedamo dhagano dhumba nopogaatiꞌao dhumba bhe membe. 33O dhumba ⸤ kaꞌibahatino mie dhumalangino kapoindalono Lahataꞌala⸥ namowada ne suanano; o membe ⸤ kaꞌibahatino mie sigaoꞌano⸥ namowada ne kemano.
34Omputo anaꞌa napugau ne mie we suanano ambano, ‘Maimoomu, hintimiu nebarakatino Amaku, tahimamoomu Kafopahintaꞌa toka nefontaa-ntaano so hintimiu mpini pakatifokonandoono dhunia. 35Kapaꞌamo wakutuuno aoꞌaho pakande kanauꞌomu, wakutuuno nokekele wuꞌuku fefohoꞌuti kanauꞌomu, aembali mie humampe we liwumiu fobutu kanauꞌomu ne lambumiu. 36Wakutuuno miina akopakea fepakeani kanauꞌomu, aosaki feꞌondo kanauꞌomu, atitohongku mai umbati kanauꞌomu.’
37Mie banara naꞌa datumobhoosi ambado, ‘Waompu, saneafa bhahaa tawohako moꞌaho maka tapakandeko tawa nokekele wuꞌumu maka tafefohoꞌutiko? 38Saneafa bhahaa tawohako membali mie humampe ne liwu mani, maka tafobutuko we lambu mani, tawa miina kopakea maka tafepakeaniko? 39Saneafa bhahaa mosaki tawa titohongku maka tamai taumbatiko?’ 40Omputo anaꞌa natumobhoosi ambano, ‘Amohatokoomu, kotu-kotuꞌu sabhaha nehabumiu ne bhahitieku foliuno kandidiki ini, ingka nopototomo habueꞌomu ne Idi.’
41Pada anaꞌa napugaumo dua ne mie we kemano, ‘Gampiomu maiꞌao ne wiseku ini, hintimiu mie nekangkanaino balaa! Pesuaꞌomu weo efino narakaa tapa mopoopeono ampa suhue dhamani, toka nefontaa-ntaa so Kafeompuꞌando seetani bhe malaꞌekati sabhangkaꞌino. 42Kapaꞌamo aoꞌaho miina makande kanauꞌomu, nokekele wuꞌuku miina mefohoꞌuti kanauꞌomu. 43Wakutuuno aembali mie humampe we liwumiu miina mobutu kanauꞌomu ne lambumiu, wakutuuno miina akopakeaꞌa miina mepakeani kanauꞌomu, aosaki bhe atitohongku miina mai umbati kanauꞌomu.’
44Andoa naꞌa datumobhoosi, ambado, ‘Waompu, saneafa bhahaa tawohako moꞌaho tawa nokekele wuꞌumu, membali mie humampe tawa miina kopakeaꞌa tawa mosaki bhahaꞌi titohongku maka miina taꞌumondofaangkoa?’ 45Ambano dua omputo naꞌa, ‘Amohatokoomu, kotu-kotuꞌu taenomo mokiidoomu metulumiomu seemie foliuno kandidiki ini, nopototomo mokiidoomu tumulumiomu Idi.’ 46Andoa ini damesua weo kakadee-dee suhue dhamani, tamaka mie banara daeꞌawa dadi suhue dhamani.”
अहिले सेलेक्ट गरिएको:
Matius 25: mnbSD
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2022, Wycliffe Bible Translators, Inc. All rights reserved.
