Génesis 31
31
Jacobnën ꞌain kuku Labánnuax abáti sinan bana
1ꞌAínbi ka Jacobnën aín kuku Labánën bëchikë kamax a ñui kikë bana kuakëxa: Jacobnën ka kamabi ñuina nun papan ꞌarakakë biaxa, a bitankëx ka anun ñuñuira bërí ꞌikë kikë bana kuakëxa. 2Usai ꞌain bëchikëkama a ñui kimainun ka Labán axribia ami nishia Jacobnën ꞌunánkëxa, usa ꞌixun ka bëráma ꞌakinsa okin ꞌiisama ꞌikën. 3Usai ami ꞌikania iskin ka Nukën ꞌIbun Jacob kakëxa: Kamina kuantëkënti ꞌain min papan menubi, anua min aintsikama ꞌikë me anu, usai ꞌimi kuania kana ꞌën mi bërúanti ꞌain.
4Usakin Diosan kakëxun ka Jacobnën aín xanu Raquel ꞌimainun Lía anua unun kixun kamiakëxa, kamikin ka ësokian kaxuntanun kixun kakëxa, uinu karana ꞌën ñuinakama bërúain anu kamina uti ꞌain ësokin kamikëx kuabëtsini ka anubi uakëxa, 5ꞌaia ka ësokin kakëxa:
—ꞌËn kana bërí ꞌunan mitsun papan ka bëráma ꞌasa okin bërí ꞌë ꞌupiokin isima; usakin ꞌaiabi ka ꞌën ꞌIbu Diosan ënkinma ꞌë ꞌakinia kixun kana ꞌunan. 6Mitsúnbi kamina ꞌunanin ꞌën kana min papa ꞌupiokin ñu mëëxunkin añu kara ꞌaisama ꞌikë abi ꞌaxuan, 7ꞌimainun kamina mi rabë́xunbi ꞌunan an ka ꞌë ꞌitsokin paránxun ñu mëëmixunbi ꞌitsamashi kupíokian. Usakin ꞌaiabi ka Nukën ꞌIbu Diosan an sinánkësokian ꞌanun ꞌë ꞌamikëma ꞌikën; 8usa ꞌain ka ësai kiakëxa: ꞌËn kana mi ñuina pukukësa anun kupíoti ꞌain kikëbë ka kamabi a ñuinanën xanun tuákama ax pukukësa ꞌiakëxa; ꞌimainun ka ësai kiakëxa: ꞌËn kana mi ñuina shión shiónkama anun kupíoti ꞌain kikëbë ka kamabi aín xanukaman tuákë ax shión shión kuënëñu ꞌiakëxa. 9Usakin ka Diosan ꞌë ꞌinánuxun aín ñuinakama bikuanxa.
10Achúshi nëtën, kana ñuinakama aín xanu imikë ꞌain a ñuñai bëtsibë ubionamainun a imë́ namákin isan, cabra aín bënëan aín xanu shiónshión ꞌimainun pukukësa ꞌimainun tsaka tsaka akama ꞌaia. 11Usa ꞌain ka namákin iskëxun Nukën ꞌIbu Diosan ángelnën ꞌën anën ꞌë kuëanxa, kuënkëxun kana ësokin kan: Ënu kana ꞌain. 12Ësokin kakëxun ka ángelnën ꞌë kaxa: Kamina ꞌupiokin isti ꞌain, aín bënëkaman ka aín xanu kuënëñu ꞌimainun pukukësa ꞌimainun tsákatsaka aribi ꞌaia kamina isti ꞌain, ꞌën kana ꞌunánin min kuku Labánën kara uisa mi oxa kixun. 13ꞌËx kana min ꞌIbu Dios axa Betelnuax mimi mërá a ꞌain, anuxun kamina achúshi maxá ꞌënan ꞌinun upíokin nantankëxun xënisa ñu anun ꞌatankëxun ꞌëx isana min Dios ꞌiti ꞌai kixun ꞌë kakën. ¡Usa ꞌain kamina! Bërí kamina nirukiani ënuax kuanti ꞌain; amiribishi kamina anuaxmi bakë́an me anubi kuantëkënti ꞌain.
14Usakin namákin isun kakëxun ka Raquel ꞌimainun Lían kakëxa:
—Nun papan xubunua an kasunania nukaman biti achúshira ñubi ka ꞌaíma ꞌikën. 15Usa ꞌixun ka bëtsi xanu ꞌunánkëma ꞌakësokin nu ꞌakëxa. ¡ꞌImainun ka nu mi ꞌinánuxun a kupioimi tënun mi ꞌimiakëxa! 16Asérabi ka kamabi aín ñukama Nukën ꞌIbu Diosan nun papa bichianxa ax ka nunan ꞌimainun nun tuá kamanan ꞌiti ꞌikën. Usa ꞌain kamina kamabi Nukën ꞌIbu Diosan mi kakësabiokin ꞌati ꞌain.
Jacob Padán-aram kakë me anuax kuan ñuikë bana
17-18Usa ꞌain ka aín xanubë banatankëxun Jacobnën kamabi aín ñukama mëníotankëx anuaxa uá Canaán menubi kuantëkëankëxa, anua aín papa Isaac tsóa me anubi. Kuankin ka aín bëchikëkama ꞌimainun aín xanu rabë́ akamabi, camello kakë ñuina chaiira anu ꞌaruakëxa, ꞌanan ka kamabi aín ñukama bianan aín ꞌarakakë ñuinakama ñu mëëxun bikë akama biakëxa, ax ka Padán-aram anuxun bikë aín ñuinakama buani kuankëxa. 19Usaia akamax ꞌimainun ka Labán ax aín ꞌarakakë ovejakama bërúanan anuxun aín rani chaxkë́ti kanikë kama tëai kuankëxa, axa anu kuantamainun ka aín ꞌini bëchikë Raquelnën aín papan aín aintsikamabëtan rabikë ñukama a mëkamakin biakëxa. 20Usa ꞌain ka Jacobnën aín kuku Labán arameo uni a kana kuani kixun kaimashi kuankëxa. 21Usai abáti kuankin ka kamabi aín ñukama buani kuankëxa. Kuani ka bënëtishi baka achúshi Éufrates kakë a sikakiani kuantankëx, Galaad kakë me bashiñu au kikiani kuankëxa.
Labánën aín piaka Jacob abatia nuia bana
22Anuan kuankë rabë́ ꞌimainun achúshi nëtë ꞌain ka aín, kuku Labánën aín piaka Jacob ka abati kuanxa kixun kuakëxa. 23Usa ꞌain ka abëa ꞌikë, aín aintsisa unikama raíri abë kuanti biakëxa, bibiani atubë kuani ka mapai achúshi ꞌimainun rabë́ nëtë kuankin, ka Galaab kakë menua ꞌikë bashikama anua nuküakëxa. 24ꞌAínbi ka a imë́ Nukën ꞌIbu Diosan Labán arameo uni a namámikin kakëxa: ꞌËn kakëxun kamina kuati ꞌain, min piaka Jacob kamina ꞌatima banan katima ꞌain.
25Ësokian kakëx kuanxun ka Labánën Jacob Galaad kakë menu ꞌikë bashikama anua nuküakëxa, aín xanu aín bëchikë a kamabë anu ꞌikë. Usokin a nukutankëx ka abë kuankë unikamabë axribi a ꞌurama ꞌiakëxa, 26usai anu ꞌinëti pëkaraxun ka Labánën munuma banakin ami nishkin Jacob kakëxa:
—¿Añu kaina ꞌabëtsian? ¿Uisokin sinanx kaina ꞌë paránbëtsini uban? ¡Min kamina ꞌën bëchikëkama ꞌakanankin bikëxa uni abákësa usaribi kuatsinkin bëan! 27¿Uisakatsi kaina mix ꞌë parántankëx uisakinbi ꞌë kaima unëkuatsini uan? ꞌËn kana ꞌëmi kakëxun upiokin mi xunuxun, minmi kakëxun kana unikama katankëxun tampurakama ꞌanan arpa ꞌai kantai kuëënkin ꞌatankëxun mi xukë ꞌitsían. 28ꞌËn bëchikë rabë́ upíokin katankëxun xukin bëtsuku kaxun xuti ꞌikëbi kamina ꞌën babakama këñunbi abákian. ¡Ax ka ꞌën iskëx sinánñuma uni ꞌikësaimi ꞌikë ꞌikën! 29ꞌËn kana kamabi mitsu ꞌatima okë ꞌitsían, min unikama këñunbi, usakin sinaniabi ka ënë imë́ min papan a rabia Diosan ka ꞌë kaxa: Kamina kuati ꞌain min kamina Jacob ꞌatima banan kakima upiokinshi kati ꞌain. 30ꞌËn kana ꞌunan mix kamina min papan xubunu kuantëkëinsairatan, usa ꞌaish kamina usai ꞌian, ¿uisa kupín kaina ꞌën rabikë ꞌën dioskama mëkamabëtsian?
31Kakëxun ka Jacobnën aín kuku Labán kakëxa:
—ꞌËx kana mimi rakuëan. Usa ꞌain kana ꞌën sinánkë ꞌian min bëchikë kamami min kushínbi ꞌë bikuantisa. 32Usa ꞌain ka ꞌëbë ꞌikë uni achúshinën kara min dioskama bëaxa, ¡ax bamati ꞌikën! Nubë ꞌikë unikaman ka asérabi ꞌunánxa: Kamina ꞌë kati ꞌain, uisa min ñu karana ꞌën bëan, min ñu ꞌën bëkë kamina bibiankin buánti ꞌain.
ꞌAínbi ka aín kuku kakinbi ka aín xanu Raquelnën aín papan a rabikë ñukama mëkama bëtsinkë bëkë ꞌunánma ꞌikën. 33Usakin kakëx ka Labán anua Jacob ꞌikë xubusa okían ꞌakë anu atsíankëxa, atsíntankëx ka anua aín bëchikë Lía ꞌikë anuribi atsíanan, anua an ñu ꞌaxunkë xanu rabë́ ꞌikë anuribi atsíankëxa, atsínkinbi ka aín dioskama mërama ꞌikën. Usai anu pain atsíntankëx anua Lía ꞌikë anuax chikiti ka Raquel anu ꞌikë anuribi bari atsínbëkiankëxa, 34usaía anuribi aín papa atsínkëma ꞌaínshi ka an rabikë aín dioskama, a bitsishi anu tsotia camellonën kaxunu ꞌakë anu unëishi akamanan tsóbuakëxa. Usaia ꞌikëbëtan ka Labánën kamabi atun xubukamanua barikinbi mërama ꞌikën. 35Usa ꞌain ka Raquelnën kakëxa:
—Papan kamina nishtima ꞌain ꞌëx min bërunubi nirukëbëma, ax ka ꞌikën min kakëxun kuaisama tani ꞌikëma ꞌikën, bërí kana ꞌëx xanux ꞌikësabi ꞌikin pëi machakë ꞌain. Ësokian kakëx ka Labán an rabikë aín dioskama bari kuainbëkiankëxa.
36Usaía ꞌia isi xuamati nishkin ka Jacobnën aín kuku Labán a ësokin kakëxa:
—¿Añu ñu, karana ꞌën an? ¿Añu ꞌai ꞌuchakuatsini ukë kaina ꞌë tantikimaira nuian? 37Kamabi ꞌën ñukama kamina barian, ¿Añu ñu kaina min xubu kamanua ꞌën bëkë mëran? ¡Mëraxun kamina abëmi ꞌikë unikama ꞌimainun ꞌëbë ꞌikë unikaman isnun ënu nanti ꞌain, atux ka kiti ꞌikën uinu ꞌikë a rabëtan kara usakin ñu ꞌaxa! 38ꞌËx minu veinte baritia ñu mëëkin kana, achúshirabi min ovejakama ꞌimainun min cabrakama aín tuá napënkiax bamanun ꞌimikëma ꞌain; usakin ꞌimikima kana upíokin bërúankin min carnero achirabi rëxun piama ꞌain; 39usa ꞌixun kana ꞌën min ñuina ꞌarakakëkama axa pianankë ñuinakaman pinuxun rëtëkë uisaxunbi mi bëxunkëma ꞌain, usa ꞌixun kana ꞌën a kupín mi kupíokë ꞌitsían; nëtë ꞌimainun imë́bia ñuinanën min ñuina ꞌarakakë nëtënkë ꞌain min ꞌë kakëxun mi kupíokë ꞌitsían. 40Usa ꞌain kana nëtëan xanan ꞌakëx bamatisa tanan; imë́ribi matsin ꞌakëx tëmërai bamatisa tankën, ꞌimainun kana ꞌuxtisaira tankinbi tënëakën. 41ꞌËx kana veinte baritia min xubunu ꞌiakën, ësai kana ꞌëx ꞌiakën: min bëchikë xanu rabë́ bixun kana catorce baritia mi ñu mëëxuankën; ꞌimainun kana min ñuinakama bërúankin mapai achúshi ꞌimainun achúshi baritia ñu mëakën; ꞌaínbi kamina usakin ꞌë kupíokatsi kixun ꞌë kupíoma ꞌain. 42ꞌËn kana ꞌunan min kamina min xubunua añu ñubi ꞌinanxumabi ꞌë xukë ꞌitsían, usakinmi ꞌati ꞌikëbi ka ꞌën xuta Abraham aín Dios ꞌimainun, ꞌën papa Isaacnën a rabikë Dios axribi ꞌëbë ꞌixun mi ñu mëëxuni tëmërai masánuitutia iskin ꞌë ꞌakianxa, usa ꞌixun ka mi ënë imë́ namámikin ax ꞌëbëribi ꞌixun ꞌë kaxa.
Jacob ꞌimainun Labán uisai karanuna ꞌiti ꞌai kiax mënionan ñuikë bana
43Usa ꞌain ka Labánën Jacob ësokin kakëxa:
—Xanu rabë́ ënëx ka ꞌën bëchikë xanu ꞌikën; ꞌimainun ka tuákama ënëx ꞌën xutakama ꞌikën; ꞌimainun ka ovejakama ënëxribi ꞌënan ꞌikën; ¡kamabi ñukama ënëx ka ꞌënan ꞌikën! Usa ꞌain kana, ¿uisa karana ꞌën bëchikë xanu rabë́ ꞌimainun, aín tuákama ꞌimainun ñuina kama oti ꞌain?
44Usa ꞌain, kamina uti ꞌain mi ꞌimainun ꞌëx kana uisai karanuna ꞌiti ꞌai kiax kananti ꞌain, ax ka nu rabëtaxnu usai kananuna ꞌiti ꞌai kiax kanankë ꞌiti ꞌikën. 45Usai kanantankëx sënë́nkin ka Jacobnën achúshi maxax bitankëxun, ꞌunántiokin nankëxa, 46nankin ka abë ꞌikë unikama kakëxa:
—¡Kamina maxáxkama timëkin bixun bukúnti ꞌain! Ësokian kakëxun ka kamaxunbi maxax timëtankëxun achúshishi ꞌitánun maburukin buküankëxa, bukuntankëxun ka a rapasu timë́xun pikankëxa maxáxkama maburukin bukúnkë anuxun. 47Anuxun ka Labánën aín bananbi anëkin Jegar Sahadutá kakin anëakëxa, anëmainun ka Jacobnënribi aín bananbi anëkin Galaad kakin anëakëxa. 48Usokin ꞌatankëx ka Labán kiakëxa:
—Bërí ka ësokin maxáxkama bukunrukë ënën nu rabëtan usai kananuna ꞌiti ꞌain kixun sinax mënionankë a ꞌikën. Usa ꞌain ka anuax kanantankëxun Galaad kakin a me anëakëxa, 49anëanan ka Mispá kakinribi anëakëxa, anuax ka Labán kiakëxa:
—Usa ꞌain ka Nukën ꞌIbun nu rabë́ bëtsibë istëkënananiamabi bërúanti ꞌikën. 50ꞌËn bëchikë xanukama ꞌatima onan, bëtsi xanu kamabikatsi kixun sinania an isti ka ꞌaíma ꞌikën, usa ꞌain ka Nukën ꞌIbu Diosanshi iskin ꞌunánti ꞌikën. Usa ꞌain kamina bëríbi ꞌë kati ꞌain ꞌën bëchikëkama kaina min nëtënuxun ꞌatima oi kuantima ꞌai kixun, ꞌimainun kamina ꞌën bëchikë ënkin bëtsi xanu biti karamina sinani kixun.
51Katankëxunbi ka Labánën karaishikin Jacob kakëxa:
—Ka kuat, ënu ka nun maburukin nankë maxáx ꞌikën ꞌimainun ka ꞌën nunan ꞌitiokinribi nankë maxáx kama aribi ꞌikën. 52Usa ꞌain kananuna nu rabëxun ësokinnu ñu ꞌakë ënë sinani ꞌëxribi ꞌima ꞌimainun mixribi ënë inubiani nitima ꞌain, ꞌatimanu bërútima kupí nitima ꞌain. 53Usokin kakëx ka min xuta Abraham ꞌimainun ꞌën xutókë Nahor aín Dios an nu uisakara nu rabë́ oti ꞌikën kiti ꞌikën.
Usokin kakëxun ka Jacobnën Nukën ꞌIbu Dios aín papa Isaacnën rabia an ismainun sinanatëkëntima oi kikin rabiakëxa. 54Usai pain kanantankëxun ka matá me anu maxax bukunrukin nankë anuxun, aín ꞌarakakë ñuina rëtankëxun Nukën ꞌIbu Dios rabikin asábi ka kakin xarokëxa xarokëxa, tëxëia bikë a ka Jacob ꞌimainun Labánën abëa ꞌikë unikama kuëntankëxun kamaxunbia pinun matá me anuxun ꞌinánkëxa.
55Usai atubë anu ꞌinëti ka pëkarakëma ꞌaínshi Labán niruakëxa, nirukin ka kuanuxun aín xutakama bëtsuku kanan aín bëchikë xanu rabë́ aribi bëtsuku kakin kamina bërúanx kuantankëx ꞌikuanti ꞌai kixun kakëxa, kabiani ka amiribishi anuaxa ukë aín me anubi kuantëankëxa.
अहिले सेलेक्ट गरिएको:
Génesis 31: cbrPB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1978, 1995, 2008, 2022 Wycliffe Bible Translators, Inc. All rights reserved.