Matta 10
10
Yesu a̱ yei ba̱pfong swak bu ba̱hwa
(Markut 3:13-19; Luka 6:12-16)
1Yesu a̱ yei ba̱pfong nu ba swak bu ba̱hwa a̱ ba̱ ryi cet ba nyying a̱ka̱tuk tswa a̱ bo creng kozan taka̱i nhywu. 2To, a̱yiyrek ba̱pfong a nanini, ba̱na swak ba̱ a̱hwa: Siman, nu ba bo yin yei Bitut, bu a̱wumba nu nu Andrawut; bu Yakubu a̱hwai Zabadi ba̱ a̱wumba nu Yohana; 3bu Filibut; bu Bartalamawat; bu Toma bu Matta a̱ntyok ssang diga̱ndu; bu Yakubu a̱hwai Alfayat; bu Tadawat; 4bu Siman nu ban yei a̱ntyok cat tun ba̱nyet nu ka̱yat dityok Rom; bu Yahuda Iskariyoti a̱tuba nu a̱ yin dyap Yesu ni.
Yesu a̱ tom ba̱pfong swak bu ba̱hwa ba
(Markut 6:7-13; Luka 9:1-6)
5Yesu a̱ tun ba̱pfong bani a̱ tom a̱ ba̱ zzek a̱ hywa, “Yi ryok nat i ka̱byen nwap nzaan ko ka̱nkrang ka̱yaan Samariya ba. 6Yi yen nat di bvon-tsaap ji brik ni ba̱nyet Isreila. 7Yi nat si ba̱ yya wa'azi i hywa da̱ mba, ‘Dityok Tazwa ti ba shishrek.’ 8Yi si creng ba̱nyet nhywu, ba̱nyet ba yi si shya ba kwi ni yi ba̱ tyyi ba ta sso, i creng ba̱nyet ngbap, i nyying a̱ka̱tuk tswa. Yi yin san di krum ba, rot a̱mi yi ryok wrak n san krum ba. 9Yi ryok sook zinariya ko a̱zurfa ko a̱shong tswam i na̱bvwo ba̱tro nyin ba. 10Yi ryok sook ka̱badoma ko a̱kang a̱tro ko a̱kpatak ko shan ka̱cyet ba. Ku myim ba wrak a̱ntyok mpfong kyang a na̱ cat i.
11“Ka̱ram ka yi sin nwa i ka̱nkrang ko ka̱bacincong ka̱nkrang ni yi cat ka̱ryi ka ba ni ya gwai ni, i swat ka̱ yemi se ka̱ram ka yin wwon ka̱nkrang ka ni. 12Ki yi ni nwa ka̱ryi a̱yin, yi hywa, ‘Sa̱la̱ma nyin!’ 13Ki ba̱nyet ka̱ryi ba a̱ shim byet nyin na, yi ba̱ wwon i; ki ba shim ba, yi seyak bu byet ‘salama’ nyin na. 14Ki yi ma̱n nwai ka̱nkrang ko ka̱ryi ba ya nyying, yi gbaat dibvuk a̱tak nyin ti ba̱ krok i i seyak. 15Ka̱ryong n ya tyyei: Ka̱tuk nshirya ka Ka̱za a̱ ni hok dizot Saduma bu Gomorata a̱ ra̱u ba̱nyet ka̱nkrang iya.”
Ka̱bvung ka a̱ cong a̱ bai ni
(Markut 13:9-13; Luka 21:12-17)
16“Yi kula, n ya tssop yi cong di bvon-tsaap ka̱yat na̱bvwu a̱yit ni. Rot a̱mi se yi tung a̱za̱ncyi di ndyik ni, ma i yet ba̱nyet sang hywak di ba̱bva ni. 17Yi ta̱rwam bu ba̱nyet ba, rot ba ni ya kwak a̱ cong i i na̱bvwa nshirya, ba bo ya tyei tsot a a̱bat a̱duwa. 18Ba ni ya kwak a̱ cong i a̱ta̱ssi ba̱nyet shirya bu ba̱gwam rot yi n tssup. A̱ta̱ssi mba yi nin tyyei shaida nyin ji i bu tyyei kpikpit nwap a. 19Ka̱ram ka ban ya pyyem ni yi ryok hok ka̱wun kyang ka yi ni hywa ni ko ka̱sak ka yi nin hywa ni ba. Ki ka̱ram ka a̱ bu yya, ba ni ya ryi kyang a yi ni hywa ni. 20Ba̱ryat ba yi ni ryat i a̱ ni yet ba̱ nyiin ba. Tswa A̱tyyi nyin ji a̱mi ni ryat a nyin.
21“Ba̱nyet a̱ ni pyyem ba̱wumbeyang mba a̱ wwat ba hywaai; a̱mi ba̱tyyi ba nin yya bu na̱won mba. A̱mi meyang na̱won na ma̱ nin yya jyi bu ba̱tyyi mba a̱ tyyi ba ba̱ hywaai. 22Koyan a̱ ni rak ya ryi rot yi n tssup. Ma a̱yin nu a̱ sseng a̱ si tat a a̱ngbom u ni a̱ ni shya sucet. 23Ki ba yya da̱ nyin i ka̱nkrang kani, yi tyong nat i ka̱yaan. Ka̱ryong n ya tyyei: yi bun tyak nwai sa̱rei na̱byen Isreila ba, nzuk Ka̱won A̱neywu n ma̱n brek.
24“A̱ntyok myyam a̱ ra̱u malam nu ba, di a̱kwwa na̱n da̱u a̱ntyok ka̱ryi nu ba. 25Rot a̱mi ku myim a̱ntyok myyam a̱ hok ansham na̱n ba rang bu malam nu nu, a̱kwwa meyang rang bu a̱ntyok ka̱ryi nu nu. Ki ba yei a̱ntyok ka̱ryi nu Ba'alzabul, a̱gwam a̱ka̱tuk tswa, ba̱re ba̱kwwa ba?”
A̱yin nu a̱ maai ba hok ka̱wun nu ni
(Luka 12:2-7)
26“Rot a̱mi yi ryok hok ka̱wun mba ba. Kyang a ba kup ni ba ni kpo kruk, kyang a ba yya ka̱nrang ni ba ni wruk ba̱ nkpa a̱za̱kpai. 27Kyang a n ya tyyei ka̱nrang ni yi ni wruk ba̱ nkpa a̱ta̱sa, kyang a n ma̱ ya shwwang i ni yi kpo tyyei tazwa. 28Yi ryok hok ka̱wun ba̱nyet ba a̱ ni hywat rwam a ni ma di ba maai hywat sucet a ba. Seko yi wi hok ka̱wun Ka̱za ka a̱ maai a̱ hywat rwam a nta̱mak bu sso ji ka̱yat ndong ni. 29Yi na kwei ba̱ta̱nta̱ba̱ra ba̱hwa di ka̱bacincong krum, ma ko a̱yring mba a̱ kwei ka̱byen di cyi A̱tyyi nyin na ba. 30Ba̱re nyin, sa̱rei a̱cat diccu nyin na ba ka̱n na̱ twang. 31Rot a̱mi yi ryok hok ka̱wun ba, rot yi ran ba̱ta̱nta̱ba̱ra iya ba̱zinzan!”
Ba̱nyet ton bvwo Kristi, a̱yin nu Ka̱za ka tssa ni
(Luka 12:8-9)
32“A̱yin nu a̱ wruk a̱za̱kpai a̱ tyyei yet a̱nzuuk ni, nzuk meyang n ma̱ ni yya a̱mi ba̱ nu a̱ta̱ssi A̱tyyi nzuk ka Tazwa. 33A̱yin nu a̱ ma̱n wruk a̱ ton n bvwo ni, nzuk meyang n ma̱ ni yya a̱mi ba̱ nu a̱ta̱ssi A̱tyyi nzuk ka Tazwa.”
Tsswa nda n shyi ba
(Luka 12:51-53; 14:26-27)
34“Yi ryok hwa di n ba wrak ka̱sa ka tsswa nda ba, kaai, seko ka̱krong. 35N ba brak na̱won ba sook dira̱ndwan bu ba̱tyyi, na̱won na̱neyang bu ba̱naa mba, a̱mi meyang ba̱kumbvon bu ba̱yikop ba̱nyring mba. 36A̱ka̱tuk a̱ra̱ndwan a̱yin a̱ ni nyyai bu ka̱ryi nu ka.
37“A̱yin nu a̱ cat a̱tyyi nu ko a̱naa nu a̱ n da̱u ni a̱ maai n tssup ba. A̱yin nu a̱ ma̱n cat ka̱won ka̱neyang nu ko ka̱seyang nu a̱ n da̱u ni a̱ maai n tssup ba. 38A̱yin nu a̱ cot ka̱teyang nu a̱ tssup a̱nyyan nzuk ani ba a̱ maai n tssup ba. 39A̱yin nu a̱ cat san sso nu ni a̱ ni za̱ jing, ma a̱yin nu a̱ ma̱n jing sso nu a̱zi hywak nzuk ni a̱ ni za̱ shya.”
Zang
(Markut 9:41)
40“A̱yin nu a̱ ya san ni, nzuk na̱ san; a̱yin nu a̱ n san ni a̱ san a̱tuba nu a̱ n tom ni. 41A̱yin nu a̱ san a̱ntyok tyyei ba̱ryat Ka̱za rot a̱ bvwo a̱ yet a̱ntyok tyyei ba̱ryat Ka̱za ni a̱ ni san zang ba̱cicrak ba̱ nu. A̱yin nu a̱ san a̱tsatsak a̱yin rot a̱ bvwo a̱ yet a̱tsatsak a̱yin ni a̱ ni san zang ba̱cicrak ba̱ nu. 42Ka̱ryong n ya tyyei: a̱yin nu a̱ nang ka̱baan ka̱yat na̱won pfong nzuk ka ba̱shekwot sswa rot a̱ bvwo a̱ yet ka̱won pfong nzuk ni, a̱ ma̱ ni san zang nu.”
अहिले सेलेक्ट गरिएको:
Matta 10: kaj
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011, Wycliffe Bible Translators, Inc. All rights reserved.
