Luka 7
7
Yesu Bar ɗǝ Koring Banjin Fuu maa Pok ma Roma
(Mat 8.5-13)
1Kǝ Yesu kǝd maksa nzup maa awuu mari ta kutu maa sumng kaa yira ma, shee por nak Kafarnahum. 2Ta ndar kyaa, banjin fuu maa pok maa Roma ng ɗǝ kori mee mang kǝng ruɗa ma, kori mee ki ng ta womnakghaa nung kwaa ya. 3Kǝ Banji fuu ma pok ki kǝ yir nung shiin Yeswaa, shee ton a dǝshaa ta kǝshii maa mushori maa Yahudu#7.3 Ayahudu: A yeni angaa shee tǝlǝm maa angaa Yahudu., ka, kaa ta kwarshii Yesu kǝ ta bar maa ɗǝ kori mee. 4Kaa nak ta Yeswaa, a kwarshii ma ɗǝng, a shee ka, “Sum ki kun kaa ɓwak ma, 5Tung ka ng ruɗa ndar war ɗakghai, pang lok war maa arang Shamang shii war.” 6Shee Yesu bii yen.
Yeni kaa taa gang pyet ɗǝ lok ki, banjin fuu maa pok ki ton amar mee ka kaa ɓan Yesu ka, “Mulok, kǝ pis ku rak, ng sham kaa taa lok mina rak. 7Duk dukghaa ng sham kǝng taa ta wokghai yaa rak. Shee nung maad, kori min ki barak. 8Makghai ma ng ngǝsng mu ɗakghai ya ni, ng ɗaa afuu maa pok ta nggǝs mina, ng mani ɓan mari ka, ‘Niyang,’ shee kǝ niyang. Mani ɓan mban ka, ‘Tari,’ shee kǝ tari, mani ɓan kori min ka, ‘Shi mari,’ shee kǝ shii.”
9Kǝ Yesu yir kaɓan, shiishii ma wuu. Shee shiiɓǝl ɓan ɓum maa sum kaa byaa ma ka, “Kǝduk-dukghaa Ng ɓee muɗakghai yaa kǝshiin Isaraila kǝng ɗǝ banji ˈyaan karkǝɗoo ta Vitora kan kee sum ri kǝng mu Isaraila ni rak.” 10Kaa marng banji fuu maa pok ki por tari lok myaa, a ta sok kori mee ki baraa.
Yesu Nanzu ɗǝ Fan Yiin Ɗokghaa
11Fedn nak, pang Yesu nak ndar yena kaa tokghaaki ka Naayin. Angaa byaa mee ɗǝ banji ɓum maa sum a ta naa kyaa ɗǝ mee. 12Kǝ gang pyet ɗǝ karkǝshiin kǝ lǝra ndar kyaa, a ɓee asum yen kaa cir tǝpunaa, mu kwaa ki meni en fan ta nakghai ya, nak ki yiiɗok ni. Aɓum maa sum kaa war ta ndar kyaa a ta byaa maa. 13Kǝ Mulok ki ɓee yii ki, shee ɓee shoor mee, pang ɓan yii ki ka, “Kala shiidnaki.”
14Pang naa ta gunji dugusn ciran tǝpun ki, shee angaan kaa cir tǝpun ki shambal maad. Yesu shee ka, “Fanshap, nanzu!” 15Shee fanshap ki nanzu, pang kap sheen nung, shee Yesu por na nak mee.
16Wop kap nzup yen, pang a mak Vitor, a shee ka, “Kǝ duk dukghaa, wo sok banjin mu fwan nung Vitorng kǝ taa war ta kǝshii waraa! Vitor tari tung kǝ ɓwak aswaa mee!” 17Awung kǝ Yesu shii nung ki basak yal ndarng Yahudiya nzup ɗaa ndarng kaa kom ma foo tǝɗwaa.
Awan Tokghaan kaa War ta Yohana Mu Bonzaa
18Angaa byaan Yohana mu bonza a ta ɓan Yohana nzup maa awung kǝ Yesu shaaki. Shee Yohana tok asum mɓaa ta kǝshii yena, 19pang tok yen ta Mulokghaa ka, kaa naa yiɓǝn ma ka, “Wani mu kaa taa panaa, ko koo ˈyii yis muɗakghai yaa?”
20Kǝ a taa sok Yesu, pang a shee ka, “Yohana mu bonza ni tok war ta wokghai ya ka koo yiɓǝn ku ka, ‘Woni mung kaa taa panaa, ko koo ˈyii yis muɗakghai nyaa?’ ”
21Ta dǝtng sheemi mbana, Yesu bar ɗaa sum pyak mang kaa ɗaa ndus kwana ɗaa angaa awomnak ɗaa mang kaa ɗǝ vishii maa yiɓi, arub pyak sok ɓyaan yis. 22Pang Yesu ɓan yen ka, “Naan kǝ yin naa ɓan Yohana awung kǝ yin ɓee ɗaa awung kǝ yin yiri. Arub ɓee yis, angaa ndus shanggad sǝri, adǝbabci sok bara, angaan kaa yira kutu rak a yir kutu, angaan kuusa nanzu. Angaa shoor a ɓan yen nung zar. 23Angaa nggen kal ni angaa kaa ɗǝ tǝlǝm mɓaa ta shii mina rak.”
24Kǝ awan tokghaan Yohana mu bonza niyangaa, pang Yesu kab ɓaa ɓum maa sum ki nung shiin Yohana, shee ka, “Yeni pang yin nak ɓyaaki ta apokghaa paa? Alurum kobsar mang kǝ wuu vedɗa yen nyaa? 25Yeni pang yin war nak ɓyaaki paa? Sum kǝ ryakshii kǝrɓǝt zar nyaa? Angaan kaa ryaksa a kǝrɓǝt pyar kaa ɗaaki kǝshii wusungaa, a sokghaa yen balghamng ruu ya ni. 26Pang, yin war nak ɓyaan yeni paa? ˈYee, ng ɓaa yin, mung kǝ ɓyak mu fwan nung Vitor ni. 27Yohana ni mung kǝ a warang nung ta shii mee yaa ka,
“ ‘Ng fwaa fan tokghaa min kǝ lakshii nggen mwaa,
mung kǝ kasa gwarshii tung taa #7.27 Mal 3.1.mu,’ 28Ng ɓaa yin, kǝshiin tasa maa yii ya nzup, mung kǝ ɓyak Yohana ta rak. Nzup ɗǝ kaɓan mung kǝ byak njot ta kǝshiin tǝruun Vitora ɓyak Yohana.”
29(Ng kaa sum, ɗa angaan yelan pyar ndar, yir kaɓan, nzup yen a yal ˈyee ki ka nung Vitorng kaa maksaki ng kun kun ni tung ka, Yohana ɓwak bonji yena. 30Nzup ɗǝ kaɓan Afarisi, ɗǝ angaan maksan shiiring Musa a van awung kǝ Vitor ruɗa yen ɗǝ mee, pang a van ka kǝ Yohana bonji yen.)
31“Ɗǝ yeni pang ng zhakghaa angaan yisan ɓari ɗǝ mee paa? A kan kee yani paa? 32A kan kee awan ri ni ara maa ɓalakghaa, pang a toksa aɗakghai yen, a sheeki ka,
“ ‘Wo pip yin maa mazǝnda,
pang yin van shaan nɗur!
Wo foo wurin tǝku
pang yin van shiidnaki.’
33Yohana mu bonza tari, ng ryaa awura ryaa ɗǝ swaan nggam rak, nzup ɗǝ kaɓan yin shee ka, ng ɗaa ayiɓi! 34Nzup ɗǝ kaɓan Fan sum tari ng ryaaki, ng swaaki, pang yin shee ka, ‘Ɓyaan ma, teeli pum ma ɗakghai, ng mu swaan min nzaram ni, ng Mar maa angaan yelan pyar ndar ni ɗaa angaan shaan ram!’ 35Nzup ɗǝ kaɓan ta angaan kaa yal yokghaan Vitor, asum ɓyaa ka yokghaan Vitor meni mang zar ki.”
Yii Yen Mu Ram Yesu Porshii Ram Mee Furyang
36Mu Farisi yen kwar Yesu ka kǝ nak lok myaa, kǝ naa ta ri awura ryaa. Shee Yesu nak ta lokng mu Farisi kyaa pang ɗaa ka kǝ rii awura ryaaki. 37Yii yen ta ndar kyaa kǝng shaa ɗaa mee kǝshii ram ma ni. Mee kǝ yir ka Yesu taa yaa lokng mu Farisi pana ryaa maa awura ryaa, shee taa ɗǝ tǝɓokng tǝtarn alabasta ng kǝ shiil ma ɗǝ noong ngol mang pyar, 38pang taa shambal dǝbarin Yeswaa, saan kuɓol myaa, pang ng shiidnaki. Agisǝng mee kǝng jiraki ta kuɓolng Yeswaa pang ng turaki ɗǝ tǝkoɓin shii mee, pang ng kopsa akuɓol Yesu ki pang fur maa noong ngol ki ta.
39Mu Farisin kǝ kwar Yesu Lak ki ɓee awung kǝ yii ki shaaki, pang shee ta aɗoo mee yaa ka, “Sum ni meni wuu bang mu fwan nung Vitor ni, wuu yok ɓǝrkǝtng yiin Kǝng gunza ma! Wuu yokgha ka ng mu ram ni.”
40Yesu ɓan ma ka, “Siman, ng ɗǝ awung kǝng ɓaa ku.”
Shee pal ma ta ka, “Ɓan mi raa Mu Maksa.”
41Yesu shee ka, “Sum yen ta kǝng byaa asum mɓaa pyar, gaat ta kǝshii yena ng byaa ma dinari#7.41 Dinari gaat: Meni pyar ɗǝn mang yira gaat. nggagham kwen, gaɗi ki ng byaa ma dinari warkǝ kwen. 42Kǝ angaa kyaa sham pǝra ma pyar kǝng byaa yen nak, pang kala yen maa pyar kǝng byaa yen ki. Zheri, ta kǝshii maa sum mɓaa pana na ni pang ɓyakghaa ruɗan sum ki paa?”
43Siman palta ka, “Ta ɓyaa min na, mung kǝ a byaa maa pyar damai pan ni.”
Yesu palta ka, “A shee ta giri kyaa ni.”
44Pang shiiɓǝl ma ta yii kyaa, ɓan Siman ka, “A ɓee yii ryaa? Ng lǝr lok mwaa, a nam mi min Kǝng bonji akuɓol ta rak, nzup ɗǝ kaɓan yishiin kuɓol min ɗaa agisǝng mee, pang turing maa ɗǝ tǝkoɓin shii mee. 45Makghai kǝng lǝr lokmwa a kobshiing maa kuɓol rak, nzup ɗǝ kaɓan lǝra min lok mwaa, yii ri kala kobsang maa kuɓola rak. 46A furng maa noo shaa rak, nzup ɗǝ kaɓan mee fur ma noong ngol ta kuɓol minaa. 47Tung kaɓan ng ɓana ku, aram mee kaa zur a porshii furyang maa ya, tung ka zhak ruɗa ɗǝng. Nzup ɗǝ kaɓan mung kǝ a porshii aram mee furyang njot, zhakghaa ruɗa mee njot ni.”
48Pang Yesu ɓan yii ki ka, “A porshii aram mu furyangaa.”
49Angaan kaa ta ryaa awura ryaa ya ɗaa Yesu, pang a kap sheeraki ɗaa ɗakghai yen ka, “Na ni mari kǝng shama porsa aram furyang paa?”
50Pang Yesu ɓan yii ki ka, “Naa maa ɗoo mu ɓwak ku foo yaa, nak naan mu kǝshii wusungaa.”
अहिले सेलेक्ट गरिएको:
Luka 7: (Boi) Tiyaa
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2022 Luke Initiative for Scripture Translation
